Zeremi 15 - A SƐB-SÕW

*

¹ A Sore yel mɛ̃ na: «A Moyiir nɩ a Samɩɛl saa tɩ zɛlɛ mɛ̃ a, ɩ̃ kʋ̃ʋ tɛr nɩbaal-zɔba a nɩbɛ bɛ ŋa ƴãw ɛ. Diw bɛ bɛ zãá nɩ mɛ̃, bɛ cen!

² Ɛ́ bɛlɛ wa sowre fʋ: “Nyɩnɛ n'a a fɛr kɛ́ tɩ cen?” Fʋ na sɔw bɛ na: “À ŋá n'a a Sore yere: Ŋa za na mɩ́ tu n a ʋ sɔ́r. Bɛ mɩnɛ a, a na ɩ n a jɛ̀lmɛ̃ kũu, bɛ mɩnɛ a ɩ a zɛbr kũu, bɛ mɩnɛ a ɩ a kɔ̃ kũu, ɛ́ bɛ mɩnɛ a ɩ a bɛ tẽw bɛ na na ìr bɛ cen nɩ tẽ-yũo a!”

³ A Sore yere na: Ɩ̃ na ìr'ɩ a bɛ ƴãw nɩ tub anaar: a zɛbr-sɔ-kpɛ̃ɛ na kʋrɛ bɛ na, a baar tawr bɛ tɔlɛ nɩ nidaa, a sidume nɩ a gbõgbo-cili na gɔr gɔr bɛ na ɛ́ ɩ bɛ bɔr.

⁴ À ŋá n'a a tẽ-daa naalʋ-ten za na mɩ́ tɛr dɛ̃bɩ̃-kpɛ̃ɛ alɛ wa nyɛ̃ bɛ a. A faa a Ezekɩasɩ bidɛb, Manase, na ɩ Zuda tẽw nãà a na tɩ maalɩ a Zerizalɛm a, alɛ n'a wa n à á ŋá.»

A Sore zɔ n a nɩbaalʋ lɛɛ tɩ bàl

⁵ A Sore yere na: «Ãa n'ʋ pãa na zɔ a fʋ nɩbaalʋ a, Zerizalɛm i? Ãa n'ʋ na kõ ƴãw fʋ? Ãa n'ʋ na fɛr ʋ tʋɔra wa sowri a fʋ ƴã-ɓaarʋ yele?

⁶ A Sore yere na: Fʋ̃ʋ n'ʋ zawrɩ mɛ̃ bɛr, lɩɛbɩ zikur cɔw mɛ̃. A lɛ n'a ɩ̃ ìr a fʋ ƴãw k'ɩ̃ɩ sãw fʋ bɛr, bʋ̃ʋ n'ʋ vɛ̃, ɩ̃ zɔ n a nɩbaalʋ lɛɛ tɩ bàl.

⁷ A tẽw tẽ-kpɛ̃ɛ za pʋɔ a, ɩ̃ zɛw nɩ a ɩ̃ bʋ̃-yɛla k'ɩ̃ɩ yɛ́lɩ nɩ a nɩbɛ bɛr a ziir za. Ɩ̃ ɩ na bɛ bɛ cãà tɛr bibiir ɛ, baarɩ bɛ za, ɛcɛ bɛ bɛ lɩɛbɩ a bɛ ɩb ɛ.

⁸ Ɩ̃ ɩ n a ʋ pɔw-kɔbɛ yãwmɛ zuo a kʋ̃ɔ-kpɛ̃ɛ nʋɔr biire. Ɩ̃ ɩ na kpɩɛrʋ páw a soja-pɔl mã mʋ̃tɔ̃-tuo. Ɩ̃ ùr'a ɩ dɛ̃bɩ̃-kpɛ̃ɛ lo a ʋ zu.

⁹ A pɔw ʋl na dɔw bibiir ayopõi a, bɛ cãà ɩ bom za ɩ. Ʋ vʋʋrɛ na guur. Ʋl zie a, a mʋ̃tɔ̃w kpɛ n a mʋ̃tɔ̃-tuo daarɩ́. Vĩ nyɔw ʋ na, ʋ bɛ cãà nyɛrɛ ƴãwfʋ ɛ. A bɛlɩ dem na cãà vʋʋrɛ a, ɩ̃ na ɩ na bɛ kpi zɛbr zie, a bɛ dɔ̃ dem niŋé.» À à ŋá n'a a Sore yel.

A Zeremi zɛbr'a, a Sore sɔw ʋ A Zeremi

¹⁰ Ɩ̃ mã a, nyɛ̃ kpɩɛrʋ fʋ na ƴãw mɛ̃, fʋ na dɔw mɛ̃ a! A tẽw za pʋɔ a, a nɩbɛ bɛ de a ɩ̃ yele ɩ: bɛ mɩ́ ŋmɩɛr'ɩ a ɩ̃ ƴɛ̀rʋ lɔbr. Ɩ̃ bɛ pɛ̃w nɩr ɩ̃ libir ɛ, ɛ́ mɩ́ bɛ pɛ̃w libir nɩr zie ɩ. Ɛ́ a nɩbɛ za ŋmɩɛr ƴãwn mɛ̃.

¹¹ Ɛcɛ a Sore tɩ yel'a: «Ɩ̃ pɔ na, ɩ̃ na faa fʋ nɩ a fʋ nʋ̃ɔ̀ ƴãw. Ɩ̃ pɔ na, ɩ̃ na ɩ na a dɔ̃ sob lɔb nuru zɛlɩ nɩ fʋ a kpɩɛrʋ nɩ a pʋl-vʋ̃ɔ daar.

¹² Bɛ na tʋ̃ɔ́ na kar a kure, a saa-pɛrɩ́-gʋba-lowr kure nɩ a kur-zɩɛ bɛr bɩɩ?»

A Sore

¹³ Zuda a, a fʋ tɛra, a fʋ na-bome, ɩ̃ na de a na tɩr bɛ zá. Alɛ n'ɩ a fʋ sãwna fʋ na maalɩ a fʋ tẽw za pʋɔ a sã-ya.

¹⁴ Ɩ̃ na ɩ na fʋ ɩ a fʋ dɔ̃ dem gbãgbaa tẽw fʋ na bɛ bãw a pʋɔ. A ɩ̃ suur vũu ìr'ɩ kel, na dɩrɛ fʋ.

A Zeremi

¹⁵ Ɛcɛ fʋ̃ʋ a, Sore e, fʋ bãw nɩ bom za na càarɩ mɛ̃ a, tɛr a ɩ̃ tɩɛrʋ, ɩ ɩb kãw a ɩ̃ ƴãw. Yáa a san a bɛlɩ dem na dɔwrɛ mɛ̃ a zie. Ta bɛr mɛ̃ k'ɩ̃ wone tuo fʋ na nyɔwr fʋ tʋɔra a bɛ ƴãw a zũú ɛ. Bãwnɩ a, a fʋ zũú n'a ɩ̃ sàw a zʋmɛ.

¹⁶ A fʋ ƴɛ̀rʋ na mɩ́ tɩ ta m a, ɩ̃ mɩ́ tɩ vɔl a na. A mɩ́ tɩ ƴãw mɛ̃ nɩ nʋ̃ɔ̀, a mɩ́ tɩ ɩ na a ɩ̃ socir cɩlɛ. Bʋ̃ʋ n'ʋ vɛ̃, fʋ̃ʋ so m, Sore e, kpɛnʋ-za-sob i.

¹⁷ Ɩ̃ bɛ zɩ̃ a nɩ-ɩ-laarbɛ sɔgɔ k'ɩ̃ɩ dɩ̃ɛnɩ ɛ. Ɛcɛ fʋ fɛr mɛ̃ na ƴãw ɩ̃ be ɩ̃ yõ zie, fʋ na tɩ ɩ ɩ̃ ɩ suur tɛwr a ƴãw.

¹⁸ Bʋ̃ʋ n'ʋ so a wob wone mɛ̃ bɛ tɛr baarʋ daar? Bʋ̃ʋ n'ʋ so a ɩ̃ natɩr bɛ tɛr sanʋ, ɛ́ bɛ bɔbr a ɓãafʋ? Fʋ sɩrɩ na lɩɛbɩ bàa na bɛ̀lɛ a, a ɩ̃ zie, mɩ́ tɛr kʋ̃ɔ ta sɔgɔ bɛ tɛr ɛ.

¹⁹ Nyɛ̃ a lɛ a Sore na ƴɛ̀rɛ a ɩ̃ zie a: «Fʋ̃ʋ wa lɛb wa a ɩ̃ zie a, ɩ̃ na lɛb'a de fʋ a ɩ̃ tome ƴãw. Fʋ̃ʋ wa gù kɛ́ fʋ mɩ́ ƴɛ̀r ƴɛ̀r-sɩza ɛ́ bɛr a ƴɛ̀r-fowle a, fʋ na lɛb'a ɩ a sob nɛ na ƴɛ̀rɛ a ɩ̃ yúor ƴãw a. A Zuda nɩbɛ nɛbɛ sɛw kɛ́ bɛ lɛb wa a fʋ zie, fʋ̃ʋ bɛ n'ʋ sɛw kɛ́ fʋ lɛb wa a bɛ zie ɩ.

²⁰ A nɩbɛ bɛ ŋa niŋé a, ɩ̃ na ɩ na fʋ ɩ mɛ̃ kur-zɩɛ dacin bɛ na kʋ̃ tʋ̃ɔ́ dáa lɔb a. Bɛ na zɛb'ɩ fʋ na, ɛcɛ bɛ kʋ̃ tʋ̃ɔ́ fʋ ɩ bom za ɩ, bʋ̃ʋ n'ʋ vɛ̃, ɩ̃ be n a fʋ zie k'ɩ̃ɩ faa fʋ ɛ́ ɩ fʋ so fʋ tʋɔra. A Sore n'ʋ yel.

²¹ Ɩ̃ na ìr fʋ nɩ a nɩ-faar nuru pʋɔ, ɩ̃ na ìr fʋ nɩ a po-to-fãw dem nuru pʋɔ.»