Zeremi 13 - A SƐB-SÕW

Zeremi nɩ a lɛ̃ pɛn kpàwr yele

¹ À ŋá n'a a Sore yel mɛ̃: «Cen tɩ dà lɛ̃ pɛn kpàwr ɛ́ sɛ ʋ a fʋ sɩɛmɩ́, ɛcɛ taa pɛ̀wr ʋ ɛ.»

² Lɛ n'a ɩ̃ tɩ dà kpàwr mɛ̃ a lɛ a Sore na yel kʋ̀ m a, ɛ́ tɩ sɛ ʋ a ɩ̃ sɩɛmɩ́.

³ A Sore tɩ lɛb'a ƴɛ̀r a ɩ̃ zie à ŋá a gb'a ayi sob ƴãw:

⁴ «Tɛr a kpàwr fʋ na dà sɛ a sɩɛmɩ́ a, cen nɩ a Faara bãá. A be a, tɩ sɔwlɩ ʋ pìir bɔw pʋɔ.»

⁵ Ɩ̃ tɩ cen na tɩ sɔwlɩ ʋ a Faara bãá mɛ̃ a lɛ a Sore na tɩ ƴãw a nʋɔr kʋ̀ m a.

⁶ A tɩ cɛlɩ na, ɛ́ a Sore wa yel mɛ̃: «Lɛb cen a Faara bãá tɩ de a kpàwr ɩ̃ na tɩ ƴãw nʋɔr kʋ̀ b kɛ́ fʋ tɩ sɔwlɩ a be a.»

⁷ Lɛ n'a ɩ̃ tɩ lɛb cen a Faara bãá k'ɩ̃ɩ tɩ bɔ de a kpàwr a be ɩ̃ na tɩ sɔwlɩ ʋ a. Ɩ̃ tɩ nyɛ̃ ʋ na ʋ pʋ̃ɔ́ ʋ za, bɛ cãà tɛr ɩb za ɩ.

⁸ A lɛ n'a a Sore tɩ ƴɛ̀r a ɩ̃ zie à ŋá:

⁹ «À ŋá n'a a Sore yere: À ŋá n'a ɩ̃ na sãw a Zuda nyʋ̀ʋ́r bɛr, a Zerizalɛm nyʋ̀ʋ́r na bɛ dɩ vuo a bɛr.

¹⁰ A nɩ-bʋʋr-faa ŋa na mɩ́ zawrɩ na bɛr wõ a ɩ̃ ƴɛ̀rʋ, ɛ́ kpãa tobr tuur a ʋ pʋ-tɩɛrʋ, zɔrɛ tuur'ɩ a ŋmɩn-yoru, maalɛ a, ɛ́ mɩ́ gbĩ dume gũu tɩ tɔ tẽw a niŋé a, ʋ ŋmɛ̃ taa nɩ a kpàwr ŋa na bɛ cãà tɛr ɩb za a!

¹¹ A Sore yere na: Mɛ̃ a lɛ nɩr na mɩ́ sɛ kpàwr a ʋ sɩɛmɩ́ a, lɛ n'a mãa nɩ a Ɩsɩrayɛl nɩ a Zuda nɩbɛ tɩ 'lẽ taa. Ɩ̃ tɩ bɔbr'a kɛ́ bɛ ɩ a ɩ̃ nɩbɛ, bɛ ɩ a ɩ̃ yúor ʋ yi, bɛ ɩ ɩ̃ nyɛrɛ ƴãwfʋ, bɛ ɩ a ɩ̃ dɛpaal-bom. Ɛcɛ bɛ bɛ bɛr wõ m ɛ.»

A divɛ̃ nɩ a Naaŋmɩn suur

¹² «Fʋ na yel bɛ na: “À ŋá n'a a Sore, a Ɩsɩrayɛl Naaŋmɩn, yere: Yuor za a, bɛ mɩ́ paalɩ ʋ nɩ divɛ̃.” Bɛlɛ wa sɔw: “Lɛ n'a, tɩ bãwnɩ a na kɛ́ yuor za a, bɛ mɩ́ paalɩ ʋ nɩ divɛ̃” a,

¹³ fʋ̃ʋ yel bɛ a lɛn daar: “À ŋá n'a a Sore yere: A nɩbɛ za na kpɩɛr a tẽw ŋa pʋɔ a, a na-mɩnɛ za na zɩnɛ a Daviir naalʋ-dà-kɔw zu, a bàwr-maalbɛ, a naaŋmɩn-ƴɛ̀r-manbɛ nɩ a nɩbɛ za na kpɩɛr a Zerizalɛm a, ɩ̃ na ɩ na bɛ kuoli kuolu mɩŋa.

¹⁴ Ɩ̃ na mɩ́ nyɔw nɩ ŋa va n ŋa, va bɛ kar kar, a sãà mɩnɛ lãwnɩ a bibiir, a Sore n'ʋ yel. Ɩ̃ bɛ cɩ́ɛr nɩr bɛrɛ ɩ. Nɩbaal-zɔba kãw za kʋ̃ piw mɛ̃ sɔ́r ɩ̃ bɛ sãw bɛ bɛr ɛ.»

Nyɩ bɛrɛ wone, a bɛr-wob daar na cãà n'a a

¹⁵ Nyɩ bɛrɛ wone, nyɩ ƴãw tobr, nyɩ ta cãà ɩrɛ pɔ̀lʋ ɛ. A Sore ƴɛ̀rɛ nɩ a nyɩ zie.

¹⁶ Nyɩ ɩ a Sore nyɩ Naaŋmɩn nyɛ̃ a yúor-vɩɛlʋ-danʋ, ɛ́ a zie wa bãw sɔb, ɛ́ nyɩ wa bãw ŋmɩɛr a gbɛ́ɛ a tan a tɩ̃ɩsɔw lige na pili páw a zu. Nyɩ tɩ gùre nɩ a cãà, ʋʋ wa lɩɛbɛ ʋ ʋ ɩrɛ lige, ʋ ɩ zũzuwr sɛbla.

¹⁷ Nyɩmɛ bɛ wa bɛr wõ a, ɩ̃ na sɔwl'a kõ a nyɩ pɔ̀l-ɩb ƴãw. Ɩ̃ na kõ na cir mʋta-kʋ̃ɔ yaga, bɛ na diwr a Sore dʋn cere nɩ tẽ-yũo a ƴãw.

A Sore ƴɛ̀rʋ a nãà yir dem ƴãw

¹⁸ Yel kʋ̀ a nãà nɩ a nãà mã: «Nyɩ zɩ̃ tẽw, bʋ̃ʋ n'ʋ vɛ̃, a nyɩ nãà-kpawɔ-vla yi n a nyɩ zũú lo.

¹⁹ A Negɛɛvʋ tẽ-bɛrɛ za pàw na, nɩr za bɛ cãà yuore a pamɛ ɩ. Bɛ diw nɩ a Zuda nɩbɛ za cen nɩ tẽ-yũo, bɛ za kpɛ̃lɛ̃kpɛ̃lɛ̃ nɛbɛ bɛ diw cen nɩ.»

A Zerizalɛm yúor sãw na

²⁰ «Zerizalɛm i, dʋɔ a zu jɩ́r nyɛ̃: a fʋ dɔ dem yi n a saa-pɛrɩ́-gʋba-lowr waar. A dʋn ɩ̃ na tɩ kʋ̀ b kɛ́ fʋ kaarɛ a wa? A píir na tɩ so fʋ nyʋʋr a wa?

²¹ Fʋ na yel'a kɛ́ bo a lɛn daar a bɛlɩ dem fʋ na mili nɩ, bɛ ɩ a fʋ bárɩ, nãà wa ìr a fʋ ƴãw bɔbr kɛ́ bɛ tʋ̃ɔ́ fʋ a? Sɩza n'a, fʋ na wone nɩ tuo mɛ̃ pɔw, a ʋ dɔwfʋ daar a.

²² Lɛ n'a fʋ na sowri: “Bʋ̃ʋ n'ʋ so à á ŋá za tarɛ mɛ̃?” A fʋ sãwna na tɩbrɛ a zũú n'a bɛ vaarɩ a fʋ kparʋ do n, ɛ́ fɛrɛ fʋ.

²³ Nɩ-sɛbla na tʋ̃ɔ́ na ɩ a ʋ ƴã-gan ŋmɛ̃a ʋ lɩɛbɩ ɩ? Bɩɩ nyũo na tʋ̃ɔ́ na ír a ʋ kɔblʋ na 'leni 'leni a bɛr ɩ? Ɛ́ a nyɩɩm na mili nɩ a faa a, nyɩ na tʋ̃ɔ́ na maalɩ a vla a?

²⁴ Ɩ̃ na ɩ na nyɩ yaarɩ cen a ziir za mɛ̃ mɔ̃-kon a wɛja-kpalɛ pʋɔ sɛsɛb na de cen nɩ a.

²⁵ A Sore yere na: Zerizalɛm i, nyɛ̃ a bom nɛ na gùre fʋ a, a bom ɩ̃ na gùre nɩ fʋ a. Bʋ̃ʋ n'ʋ vɛ̃, fʋ yiiri mɛ̃ na bɛr ɛ́ ƴãw a fʋ tɩɛrʋ ŋmɩn-bɛlɛbɛlɛ ƴãw.

²⁶ Ɩ̃ mɩ̀ na vaar'ɩ a fʋ kparʋ do tɩ tɔ n a fʋ niwn, ɛ́ bɛ na nyɛ̃ nɩ a fʋ faalʋ.

²⁷ Aa! a fʋ pɩ̃ɔ ɩ-ɩrɩ, a dɛb vʋla kon, a fʋ pɔw-yɛm vĩ tome! Ɩ̃ nyɛ̃ nɩ a za vla a tãli zu nɩ a póru pʋɔ, a fʋ tɩb-faar faar! Bʋnʋ baw-bio n'a Zerizalɛm i, fʋ bɛ bɔbr kɛ́ fʋ so a fʋ dɛwr bɛr ɛ! Debor'a a na cãà cɛlɩ tɩ ta?»