Zakɩ 3 - A SƐB-SÕW

A zɛl yele

¹ Ɩ̃ yɛbr i, nyɩ ta bɔbr kɛ́ nyɩ ɩ wul-wulbɛ yaga ɩ. Nyɩ bãw na k'aa tɩɩm na wule a nɩbɛ a, bɛ na maal'ɩ tɩ nɩ a ƴɛ̀rʋ a kpɛmɛ zuo a nɩbɛ dem.

² Tɩ za tule nɩ yaga za. Nɩr bɛ wa tule towtow a ʋ ƴɛ̀rʋ pʋɔ a, ʋ ɩ n nɩ-vla baarɩ, ʋ na tʋ̃ɔ́ na nyɔw ʋ mɩŋa.

³ Tɩ mɩ́ ƴãw nɩ nɔ-bamɛ a wie ƴãw k'aa sàwr a tɩ nʋɔr, kɛ̀ tɩ tʋ̃ɔ́ so a ƴã-gamɛ za lɩɛbɛ cere nɩ be tɩ na bɔbr a.

⁴ Bɩɩ nyɩ mɩ̀ nyɛ̃ a gbee a: alɛ saa bɛrmɛ sɛw ŋmɩn, ɛ́ a sɛsɛb fure nɩ fãw darɛ a a, ɛcɛ, bʋ̃-dãana zaa pʋrɩ n'ʋ bɛ mɩ́ dãanɛ nɩ a, ɛ́ a cere a be a gbor-duwre na bɔbr a.

⁵ Lɛ mɩ̀ n'a, a zɛl ɩ n a ƴã-gan ɓɛrmɛ na ɩ pʋrɩlɛ ɛ́ na tʋ̃ɔ́ pɔrɛ ʋ na maalɛ yel-bɛrɛ a ƴãw. Nyɩ tɩɛrɩ nyɛ̃ a lɛ vũu cãpile na mɩ́ nyɩw wɛ-kpɛ̃ɛ a!

⁶ A zɛl mɩ̀ ɩ n vũu. Faalʋ tẽw n'ʋ be a tɩ ƴã-gan pʋɔ sãwnɛ a tɩ beba za. Ʋ mɩ́ ɩ na a tɩ beba za nyɔw vũu na ɩ a tẽ-faa vũu mɩŋa a.

⁷ Dʋ̃-bʋʋrɛ kãw za bɛ be be a nɩsaal kʋ̃ tʋ̃ɔ́ pɔwlɩ ɛ: a wɛ-dʋn nɩ a lili, a bʋ̃-vuri nɩ a zʋ́mɛ́.

⁸ Ɛcɛ nɩsaal za kʋ̃ tʋ̃ɔ́ pɔwlɩ a zɛl ɛ: ʋ kpɛ n faa ɛ́ lɩɛbɛ kʋralɛ, ʋ ɩ n lɔw tɛwr na kʋrɛ a.

⁹ Ʋlɛ n'ʋ tɩ mɩ́ danɛ nɩ a Sore tɩ Sãà, ɛ́ ʋlɛ n'ʋ tɩ mɩ́ ŋmɩɛr'ɩ ƴãwn a nɩsaalbɛ na ɩ a Naaŋmɩn ŋmɛ̃-ta-taabɛ a.

¹⁰ A nɔ-been nɛ pʋɔ n'a a maalʋ bɩɩ a ŋmɛ-ƴãw ƴɛ̀r-bie yire. Ɩ̃ yɛbr i, a bɛ tɛr sɔ́r k'aa mɩ́ ɩ a lɛ ɩ.

¹¹ A kʋ̃ɔ-nʋ̃ɔ̀ nɩ a kʋ̃ɔ-tuo na tʋ̃ɔ́ na bule yire bul-nɔ-been ƴãw ɩ?

¹² Ɩ̃ yɛbr i, kãkãw na tʋ̃ɔ́ na wɔ̃ olivʋ ɛ́ divɛ̃ tɩɛ wɔ̃ kãkamɛ bɩɩ? Bul-nʋɔr na ɩ nyaarʋ a kʋ̃ tʋ̃ɔ́ bule kʋ̃ɔ na nʋmɛ a ɩ.

A yã-bãwfʋ na yi a Naaŋmɩn zie a

¹³ Ãa n'ʋ bãw yã ɛ́ tɛr yã a nyɩ pʋɔ? Ʋ wul a sãá cenu na vɩɛl a pʋɔ, nɩ ɩ-ɩrɩ na ɩ yã-bãwnɛ nɩ su-siwra sob ɩ-ɩrɩ a pʋɔ.

¹⁴ Ɛcɛ nyu-faa nɩ zuo-taa tɩɛrʋ wa n'a be a nyɩ socie pʋɔ a, nyɩɩm ta zɛwr nyɩ tʋɔra ɛ́ ŋmarɛ ziri piwr'ɩ a yel-mɩŋa ɩ.

¹⁵ A yã-bãwfʋ ŋa tɔ bɛ yi Naaŋmɩn zie ɩ, tẽw zu n'a ʋ yi, nɩsaalʋ zie, kɔ̃tɔmɛ zie mɔ̃ mɩ̀.

¹⁶ A be a nyuur nɩ a zuo-taa tɩɛrʋ na be a, a damnʋ nɩ a ɩ-faar bʋʋrɛ za mɩ̀ be n be.

¹⁷ Ɛcɛ a yã-bãwfʋ na yi a Naaŋmɩn zie a, ʋ mɩ́ de nɩ niwn ɩ vɩɛlʋ tɛwr, al pùorí ʋ ɩ ƴã-ɓaarʋ, su-nʋ̃ɔ̀, nʋɔr-sàwfʋ. Ʋ mɩ́ ɩ n nɩbaal-zɔba nɩ ɩ-vɩɛlɩ tɛwr. Ʋ bɛ mɩ́ owre ɩ, ɛ́ bɛ sɔwlɛ a ʋ pʋ-tɩɛrʋ ɛ.

¹⁸ Bɛlɩ dem na mɩ́ ɩrɛ a ƴã-ɓaarʋ ɩb a, a ƴã-ɓaarʋ pʋɔ n'a bɛ mɩ́ bʋ̀r, ɛ́ a wɔmɛ bɛ na mɩ́ wa de a, alɛ n'ɩ a mɩnʋ.