Zakɩ 2 - A SƐB-SÕW

Owr-taa ta ka be ɩ

¹ Ɩ̃ yɛbr i, nyɩɩm na sàw de a tɩ Sore Yeezu Kɩrɩta na tɛr danʋ a, nyɩ ta owre taa ɩ.

² Mɛ̃ à ŋá a, nɩr wa kpɛ a nyɩ puoru lãw pʋɔ, ƴãw salm-zɩɛ nũ-tʋʋr ɛ́ su kparɩ na vɩɛl nyɩwrɛ a, ɛ́ nã́w sob mɩ̀ kpɛ su kpar-dɛgɛ a,

³ nyɩmɛ wa jɩ́r a sob ŋa na su a kparɩ na vɩɛl nyɩwrɛ a kaa ɛ́ yel ʋ: «Fʋ̃ʋ, zɩ̃ zie ŋa na vɩɛl a», ɛ́ yel a nã́w sob: «Fʋ̃ʋ a, àr saaƴẽwn ka» bɩɩ «Zɩ̃ tẽsɔw a ɩ̃ gbɛ́ɛ ƴãw» a,

⁴ owru bɛ n'a nyɩ owri ɛ? Nyɩ bɛ lɩɛbɩ ƴɛ̀r-maalbɛ a tɩɛrʋ na bɛ vɩɛl a ɩ?

⁵ Nyɩ bɛrɛ wone, ɩ̃ yɛb-nɔnɩ i: a Naaŋmɩn bɛ tʋ̃ɔ́ kaa ír a bɛlɩ dem na ɩ nan dem a tẽ-daa zie a, ƴãw bɛ kpɛ a ʋ sàw-deb naalʋ, ɛ́ ɩ a ʋ Naalʋ gbã-dɩrbɛ ɩ? A Naalʋ ŋa ʋ na ƴãw nʋɔr k'ʋʋ na kʋ̀ n a bɛlɩ dem na nɔnɛ ʋ a ɩ?

⁶ Ɛcɛ a nyɩɩm a, nyɩ bɛ tɛr a nã́w sob ƴãwfʋ ɛ. A tɛra dem bɛ nɛbɛ mɩ́ dɔwrɛ nyɩ ɛ́ nyɔwr nyɩ cere nɩ a ƴɛ̀rʋ-dɩb ziir ɛ?

⁷ Bɛlɛ bɛ nɛbɛ mɩ́ sãwnɛ a yo-vla ʋl a Naaŋmɩn na kʋ̀ nyɩ a ɩ?

⁸ Nyɩmɛ wa sɩrɩ sàwr a Nãà ŋa nʋɔr mɛ̃ a lɛ a Sɛb-sõw na yel a: «Fʋ na nɔnɛ nɩ a fʋ tɔ sob mɛ̃ a fʋ mɩŋa a», nyɩ ɩrɛ nɩ vla.

⁹ Ɛcɛ nyɩmɛ wa owre a, nyɩ maalɛ nɩ yel-bier, ɛ́ a nʋɔr wule nɩ a nyɩ sãwna: kɛ́ nyɩ ɩ n nɔ-zawrbɛ.

¹⁰ Bʋ̃ʋ n'ʋ vɛ̃, nɩr wa sàwr a Naaŋmɩn nɛ́ɛ za ɛ́ tɩ cɛ Naaŋmɩn nɔ-been yõ a, sãwna sob'ʋ a nɛ́ɛ za ƴãw.

¹¹ A sob nɛ na yel: «Fʋ kʋ̃ maalɩ pɔw-gaa-yel-bier» a, ʋlɛ n'ʋ mɩ̀ cãà lɛb yel: «Fʋ kʋ̃ kʋ nɩr ɛ.» A na ɩ lɛ a, fʋ̃ʋ bɛ mɩ́ wa maalɩ a pɔw-gaa-yel-bier ɛ́ mɩ́ kʋ a nɩr a, fʋ mɩ́ gãw nɩ a nʋɔr bɛr.

¹² Nyɩ mɩ́ ƴɛ̀rɛ ɛ́ ɩrɛ mɛ̃ nɩbɛ a nʋɔr na waar'ɩ só-fʋ-tʋɔra a na na dɩ n ƴɛ̀rʋ a.

¹³ A Naaŋmɩn wa maalɛ nɩ nɩr na bɛ zɔrɛ ʋ taabɛ nɩbaalʋ a ƴɛ̀rʋ a, ʋ mɩ̀ kʋ̃ tɛr nɩbaal-zɔba a ʋ zie ɩ, ɛcɛ nɩbaal-zɔrɛ bɛ zɔrɛ a ƴɛ̀rʋ-maalʋ ɛ.

A naaŋmɩn-sàw-deb nɩ a ɩ-ɩrɩ

¹⁴ Ɩ̃ yɛbr i, nɩr wa yel k'ʋʋ tɛr'ɩ a naaŋmɩn-sàw-deb, ɛ́ bɛ mɩ́ wul a sãá a ʋ ɩ-ɩrɩ pʋɔ a, bʋ̃ʋ yel-ɩra n'a a tɛr? A sàw-deb ŋa na tʋ̃ɔ́ na faa ʋ bɩɩ?

¹⁵ A ɩ mɛ̃ a tɩ yɛb kãw bɩɩ a tɩ yeepuule kãw bɛ tɛr bʋ̃-suuri nɩ bʋ̃-dɩrɩ na mɩ́ dɩ a bibie za ɩ,

¹⁶ ɛ́ a nyɩ kãw yel bɛ: «Nyɩ na kul'ɩ vla, nyɩ tɩ su kparɩ a ƴã-gamɛ tʋl ɛ́ nyɩ dɩ tɩw», ɛ́ nyɩ bɛ kʋ̀ bɛ a bɛ ƴã-gamɛ yel-bɔbrɩ ɛ, a tɛr'ɩ pɛr bɩɩ?

¹⁷ À ŋá n'a a mɩ̀ ŋmɛ̃ a naaŋmɩn-sàw-deb zie: ʋlɛ bɛ wa sãá ɩ-ɩrɩ pʋɔ a, ɛ́ ʋl yõ ƴãw a, bʋ̃-kũu n'ʋ.

¹⁸ Ɛcɛ kapaw nɩr na yel'a: «Fʋ̃ʋ a, fʋ tɛr'ɩ a naaŋmɩn-sàw-deb, ɛ́ mãa tɛr a ɩ-ɩrɩ.» Lɛn daar'a ɩ̃ na sɔw ʋ: «Wul mɛ̃ a lɛ a fʋ naaŋmɩn-sàw-deb na na tʋ̃ɔ́ be be ɛ́ bɛ tɛr ɩ-ɩrɩ a. Mãa a, a ɩ-ɩrɩ pʋɔ n'a ɩ̃ na wul fʋ a ɩ̃ naaŋmɩn-sàw-deb.»

¹⁹ Fʋ sàw na de kɛ́ Naaŋmɩn ɩ n been ɩ? A vɩɛl'a wɛ. A kɔ̃tɔmɛ mɩ̀ sàw na de, ɛ́ màwr dɛ̃bɩ̃-mawfʋ.

²⁰ Fʋ̃ʋ nɩ-bɛ-tɛr-bir ŋa, fʋ bɔbr'a kɛ́ fʋ bãw a lɛ a naaŋmɩn-sàw-deb na ɩ zawlalɛ ʋlɛ bɛ wa tɛr a ɩ-ɩrɩ a?

²¹ A tɩ sãàkʋm Abraham a, a ʋ ɩ-ɩrɩ ƴãw bɛ n'a a Naaŋmɩn tɩ nyɛ̃ ʋ k'ʋ ɩ nɩ-mɩŋa ɩ? A ʋ bidɛb Ɩzaakɩ ʋ na tɩ de tɩr a bàwr-maal-kuur zu a ƴãw bɛ n'a ɩ?

²² Fʋ nyɛ̃ a na, a ʋ naaŋmɩn-sàw-deb nɩ a ʋ ɩ-ɩrɩ tɩ lãw nɩ taa: a ʋ naaŋmɩn-sàw-deb tɩ vɩɛl'ɩ ʋ za, a ɩ-ɩrɩ na tɩ pʋɔ a ƴãw.

²³ À ŋá n'a a lɛ a Sɛb-sõw na yel a tu: «A Abraham tɩ sàw na de a Naaŋmɩn, a Naaŋmɩn nyɛ̃ ʋ k'ʋ ɩ nɩ-mɩŋa a al ƴãw», ɛ́ bʋɔl'ʋ ʋ bá.

²⁴ A na ɩ à ŋá a, nyɩ nyɛ̃ a na, a nɩr ɩ-ɩrɩ ƴãw n'a a Naaŋmɩn mɩ́ sàw kʋ̀ ʋ k'ʋʋ ɩ n nɩ-mɩŋa, a ʋ sàw-deb yõ ƴãw bɛ n'a ɩ.

²⁵ Lɛ n'a a mɩ̀ tɩ ŋmɛ̃ a pɔw-yɛm Arahab zie. A ʋ ɩ-ɩrɩ ƴãw n'a Naaŋmɩn tɩ sàw kʋ̀ ʋ k'ʋʋ ɩ n nɩ-mɩŋa, ʋ na tɩ de a Ɩsɩrayɛl nɩbɛ na tɩ cen kɛ́ bɛ tɩ piwri bãw a zie a sãanʋ a, ɛ́ wul bɛ sɔr-yũo bɛ lɛb tu kul a.

²⁶ Mɛ̃ a lɛ a ƴã-gan na ɩ bʋ̃-kũu, vʋʋrʋ bɛ wa ka be a, lɛ mɩ̀ n'a a naaŋmɩn-sàw-deb ɩ bʋ̃-kũu, ɩ-ɩrɩ bɛ wa ka be a.