Zakari 7 - A SƐB-SÕW

A Naaŋmɩn ƴãw sɩrɩ n'a a Ɩsɩrayɛl nɩbɛ tɛr a mʋta-tuo o?

¹ A Daarisɩ naalʋ-dɩb yome anaar sob, a cuwr piwaɩ na ɩ a Kisile cuw a, a bibie anaar sob, a Sore tɩ ƴɛ̀r'ɩ ƴɛ̀rʋ kʋ̀ m.

² A Betɛl tẽw dem tɩ tõ n Saresɛɛr nɩ Eregɛm Melɛkɩ nɩ nɩbɛ kɛ́ bɛ tɩ ɓaalɩ a Sore.

³ Kɛ́ bɛ tɩ sowri sowru ŋa a bàwr-maalbɛ na tone a Sore, a Kpɛnʋ-za-sob yir-kpɛ̃ɛ pʋɔ a, ɛ́ mɩ̀ sowri a naaŋmɩn-ƴɛ̀r-manbɛ: «A fɛr'a kɛ́ tɩ mɩ́ cãà kone, ɛ́ tɛr mʋta-tuo a yũon cuwr anũu sob, mɛ̃ a lɛ tɩ na ɩrɛ a koro kãw za a bɩɩ?»

⁴ Lɛ n'a a Sore, a Kpɛnʋ-za-sob, tɩ kʋ̀ m a nʋɔr,

⁵ k'ɩ̃ɩ ɩ a bàwr-maalbɛ nɩ a tẽw dem za bãw a ʋ sɔwfʋ ŋa: «Yome lɩz'a ata nɩ pie n'ɩ à ŋá, nyɩ na mɩ́ tɛr a mʋta-tuo kone nɩ, a cuwr anũu nɩ a cuwr ayopõi sob daar a, ɛcɛ, nyɩ bɛ mɩ́ tɛr a mʋta-tuo á ŋá k'aa pɛlɩ a ɩ̃ pʋɔ ɩ!

⁶ A lɛn daar nyɩ na mɩ́ dɩrɛ ɛ́ nyúur a, nyɩɩm mɩŋa nʋ̃ɔ̀ wob ƴãw n'a nyɩ mɩ́ dɩrɛ ɛ́ nyúur!»

⁷ A dãwdãw za a, a Naaŋmɩn tɩ ƴãw na a ƴɛ̀r-manbɛ ƴɛ̀r a ƴɛ̀rʋ á ŋá taabɛ. A lɛn daar a, a Zerizalɛm tẽw dem nɩ a tẽ-bɛrɛ na jil koli ʋ a nɩbɛ tɩ tɛr'ɩ ƴã-ɓaarʋ, ɛ́ nɩbɛ kpɩɛr a Negɛɛvʋ nɩ a Ba-Peyi vuo pʋɔ.

^8-9 A Sore, a Kpɛnʋ-za-sob, tɩ yel mɛ̃ na, k'ɩ̃ɩ lɛb yel a ʋlɩ bom nɛ ʋ na tɩ dãw yel a: «Nyɩ mɩ́ dɩ a ƴɛ̀rʋ a tu yel-mɩŋa, nyɩ mɩ́ tɛr nɔ̃wfʋ nɩ su-ɓaarʋ ɩ-ɩrɩ a nyɩ taabɛ zie.

¹⁰ Nyɩ ta dɔwrɛ a pɔw-kɔbɛ nɩ a bi-kpebe ɩ, a nʋʋrɩ nɩ a nan dem ɛ. Nyɩ ta mɩ́ tɩ́ɛrɛ kɛ́ nyɩ maalɩ taa faa ɩ.»

¹¹ Ɛcɛ a nɩbɛ zawr'ɩ a bɛr-wob: bɛ gùr'ɩ pùor cɔw, ɛ́ fùr a bɛ tobe, kɛ́ bɛ ta wõ bom ɛ.

¹² Bɛ ɩ na a bɛ socie a kpawlɩ mɛ̃ kʋsɛ-nyɩla kãw bɛ na bʋɔlɛ dɩamã a. A Sore, a Kpɛnʋ-za-sob wulu nɩ a ʋ ƴɛ̀rʋ, a ʋ Vʋʋrʋ na tɩ ƴãw a koro za ƴɛ̀r-manbɛ yel kʋ̀ bɛ a, bɛ bɛ tɩ sàw de ɩ. Lɛ n'a a Sore, a Kpɛnʋ-za-sob, tɩ nyɛ̃ suur bɛ dɩ vuo ɩ,

¹³ ɛ́ yel: «Bɛ na zawrɩ na bɛr wõ m a lɛn daar ɩ̃ na tɩ yel kɛ́ bɛ sàw a nʋɔr a, ɩ̃ mɩ̀ tɩ zawr'a na sɔw bɛ, a lɛn daar bɛ na tɩ yel k'ɩ̃ɩ faa bɛ a.

¹⁴ Ɩ̃ diw bɛ na yaarɩ, a nɩ-bʋʋrɛ za bɛ na bɛ tɩ bãw a sɔgɔ. A bɛ pùorí a, bɛ bɛr'ɩ tẽw na sãw ʋ za a. Nɩr za bɛ tɩ cere a be ɩ, ɛ́ nɩr za bɛ tɩ yire a be waar ɛ. A bɛ tẽw na tɩ ɩ tẽ-nʋ̃ɔ̀ a, bɛ ɩ na ʋ lɩɛbɩ wɛja-kpalɛ.»