Zakari 6 - A SƐB-SÕW

A bʋ̃-nyɛrɩ ani sob: a zɛbr-torkori anaar

¹ Ɩ̃ tɩ lɛb'a zɛw a zu nyɛ̃ bʋ̃-nyɛra kãw: zɛbr-torkori anaar, a yi kur-zɩɛ tan ayi cara pʋɔ,

² wur-zɩɩr tɩ caw na ƴãw a zɛbr-torko-dãw-niwn sob ƴãw, ɛ́ wur-sɛbl caw ƴãw a ayi sob ƴãw,

³ wur-pɛlɛ caw ƴãw a ata sob ƴãw, ɛ́ wie na ɓalɩ zɩɛ wʋlʋlʋ a, caw ƴãw a anaar sob ƴãw.

⁴ Ɩ̃ tɩ sowr'ɩ a malkɩ na tɩ ƴɛ̀rɛ a ɩ̃ zie a: «Ɩ̃ sore e, a wie na caw ƴãw a zɛbr-torkori ƴãw a, bʋ̃ʋ n'ʋ a wule?»

⁵ Ʋ tɩ sɔw mɛ̃ na: «A sɛsɛbr anaar'a. A tɩ be n a tẽw za Sore niŋé, ɛcɛ ƴɛrɛŋa a, a cere na.»

⁶ A zɛbr-torko a wur-sɛbl na tawr a, tɩ cen nɩ a saa-pɛrɩ́-gʋba-lowr tẽw lowr, a wur-pɛlɛ tɩ cen nɩ a mʋ̃tɔ̃w-kpɛb-lowr tẽw lowr, ɛ́ a wie na ɓalɩ zɩɛ wʋlʋlʋ a, cen a saa-pɛrí-dʋrʋ-lowr tẽw lowr.

⁷ A wur-zɩɩr-wʋlʋlʋ tɩ taw na ta àrɛ guur, a tẽw zɔ cɔlʋ ƴãw. A Sore tɩ yel a na: «Nyɩ cen tɩ zɔ cɔlɩ a tẽw.» A lɛ n'a a tɩ ɩ.

⁸ Lɛ n'a a Sore tɩ bʋɔlɩ mɛ̃ yel: «Jɩ́r nyɛ̃, a al na cere a saa-pɛrɩ́-gʋba-lowr tẽw lowr a, na ɩ na a ɩ̃ Vʋʋrʋ siw a vuo ʋl pʋɔ.»

A Zozue naalʋ-dɩb na ɩ bãwfʋ a

⁹ A Sore tɩ yel'ɩ à ŋá kʋ̀ m:

¹⁰ «Sàw de a nɩbɛ bɛ na diw cen nɩ a Babɩlɔn a bʋ̃-kʋ̀rɩ, a Hɛldaɩ nɩ Toviya, nɩ Yedaya na wa n a. A dɩ̃a tɔr za a, fʋ na cen nɩ a Sefanɩa bidɛb Yosiya yir, a be a nɩbɛ bɛ ŋa na yi a Babɩlɔn tẽw wa be a.

¹¹ Fʋ na tɩ de nɩ salm-pla nɩ salm-zɩɛ, maal'ɩ nãà-kpawʋɔ vɔblɩ a bàwr-maal-kara Zozue na ɩ Yosadakɩ bidɛb a, zũú,

¹² ɛ́ yel ʋ: “À ŋá n'a a Sore, a Kpɛnʋ-za-sob, yere: Nɩr be n a ka, a yúor dɩ kɛ́ “Bʋ̃-bul”, a nyɔ-vʋʋrʋ na búle nɩ a ʋ gbɛ́ɛ bɔwrɩ pʋɔ, ɛ́ ʋlɛ n'ʋ na lɛb mɛ a ɩ̃ yir-kpɛ̃ɛ,

¹³ ʋlɛ sɩrɩ n'ʋ na lɛb mɛ ʋ. Ʋ na su n a nãà bʋ̃-suuri, ɛ́ zɩ̃ a naalʋ-dà-kɔw zu, dɩrɛ naalʋ a nɩbɛ zu. Bàwr-maalɛ na zɩ̃ na kɔwlɩ ʋ: ɛ́ bɛ za ayi na wone nɩ taa vla vla.

¹⁴ “A nãà-kpawʋɔ ʋl na be n a Ŋmɩn-yir-kpɛ̃ɛ pʋɔ, k'aa nɩbɛ tɛr a Hɛldaɩ, a Toviya nɩ a Yedaya tɩɛrʋ, nɩ a vla a Sefanɩa bidɛb na maalɩ a.”»

¹⁵ Nɩbɛ na yi n zi-zãána wa sõw a Sore yir-kpɛ̃ɛ lɛb-mɛb. Lɛ n'a nyɩ na bãw k'aa Sore Kpɛnʋ-za-sob sɩrɩ n'ʋ tõ m a nyɩ zie. A yele á ŋá za na ta na, nyɩmɛ wa sàwr a Sore nyɩ Naaŋmɩn nʋɔr a.