Zakari 5 - A SƐB-SÕW

A bʋ̃-nyɛrɩ ayʋɔb sob: a ŋmɛ-ƴãw sɛbɛ

¹ Ɩ̃ tɩ lɛb'a zɛw zu nyɛ̃ bʋ̃-nyɛra kãw: sɛbɛ na pili pili, ɛ́ ƴaw cere a.

² A malkɩ tɩ sowri mɛ̃ na: «Bʋ̃ʋ n'ʋ fʋ nyɛ̃?» Ɩ̃ sɔw: «Ɩ̃ nyɛ̃ nɩ sɛbɛ na pili pili a, ʋ ƴaw cere. A ʋ wogo ɩ n mɛtɩr pie, ɛ́ a yɛ̀lʋ ɩ anũu.»

³ Lɛ n'a ʋ tɩ yel mɛ̃: «A ŋmɛ-ƴãw na na páw a tẽw za a n'ʋ: bɛ sɛb'ɩ a sɛbɛ na pili a, lõbowr kãw, kɛ́ bɛ na diw nɩ a nyãnyuwr za bɛr a tẽw pʋɔ, ɛ́ sɛb a lõbowr ƴen sob, kɛ́ bɛ mɩ̀ na diw nɩ a bɛlɩ dem za na mɩ́ pɔ ɛ́ bɛ ír a bɛ pɔɛ a, bɛr a tẽw pʋɔ.

⁴ A Sore, a Kpɛnʋ-za-sob, yere na kɛ́ ʋl mɩŋa n'ʋ ƴãw a ŋmɛ-ƴãw ŋa waar: ʋ na tɩ kpɛ n nɩr za na zure nɩ nɩr za na mɩ́ pɔ, ɛ́ bɛ ír a ʋ pɔɛ a yir pʋɔ, be a be, sãwnɛ bom za bɛrɛ, mɩ́ tɩ lãwnɩ a wɛwr nɩ a kʋsɛbɛ.»

A bʋ̃-nyɛrɩ ayopõi sob: a Faalʋ

⁵ A malkɩ na tɩ ƴɛ̀rɛ a ɩ̃ zie a, tɩ taw na ta yel mɛ̃: «Dʋɔ a zu bɛl nyɛ̃ a bom na waar a.»

⁶ Ɩ̃ tɩ sowr'ʋ na: «Bʋ̃ʋ n'ʋ?» Ʋ sɔw: «Zãkpa na ƴãw a tẽw za yel-bebe a n'ʋ.»

⁷ A lɛn daar'a, a zãkpa nɔ-pàwra na ɩ kur-mɔrmɔr a tɩ gel'a, ɩ̃ɩ nyɛ̃ pɔw ʋ zɩ̃ a zãkpa pʋɔ.

⁸ A malkɩ tɩ yel mɛ̃ na: «A Faalʋ n'ɩ a pɔw ŋa.» Al pùorí, ʋ lɛb nɛ̃ ʋ ƴãw a zãkpa pʋɔ, ɛ́ lɛb de a pàwra pàw.

⁹ Ɩ̃ tɩ zɛw nɩ a zu nyɛ̃ pɔwbɛ ayi bɛ sãá. Bɛ tɩ tɛr'ɩ pɩgɛ na ɩ mɛ̃ tɩlãtoo pɩgɛ a, bɛ tɩ ƴaw na cere, ɛ́ sɛsɛb fure darɛ bɛ. Bɛ tɩ ɓáw nɩ a zãkpa ìr do n a saa-zu cere nɩ.

¹⁰ Ɩ̃ tɩ sowr'ɩ a malkɩ: «Nyɩnɛ n'a bɛ cere nɩ a zãkpa?»

¹¹ Ʋ sɔw: «Mezopotami vuo pʋɔ n'a. Bɛ na tɩ ŋmãa nɩ ŋmɩn-yir kʋ̀ ʋ a be, ɛ́ mɛ kpul dɔwlɩ ʋ.»