Zakari 4 - A SƐB-SÕW

A bʋ̃-nyɛrɩ anũu sob: a fɩ̃tɩlɩ dɔwlʋ zie nɩ a olivʋ tɩɩr ayi

¹ A malkɩ na tɩ ƴɛ̀rɛ a ɩ̃ zie a, tɩ wa na wa sɩ̃w a ɩ̃ tɩɛrʋ, mɛ̃ nɩr bɛ na sɩ̃w gʋ̃ɔ pʋɔ a.

² Ʋ tɩ sowri mɛ̃ na: «Bʋ̃ʋ n'ʋ fʋ nyɛ̃?» Ɩ̃ sɔw: «Fɩ̃tɩlɩ dɔwlʋ zie na ɩ salm-zɩɛ tɛwr'a n'ʋ ɩ̃ nyɛ̃, ʋ tɛr kãá ƴãwfʋ zie a saa-zu. Ʋ tɛr'ɩ fɩ̃tɩlɩ ayopõi nɩ kãá yib ziir ayopõi a fɩ̃tɩlɛ za ƴãw.

³ Olivʋ tɩɩr ayi tɩ be n a kãá ƴãwfʋ zie lõbowrí, kãw a dʋrʋ lowr ɛ́ kãw a gʋba lowr.»

⁴ Ɩ̃ tɩ sowr'ɩ a malkɩ na ƴɛ̀rɛ a ɩ̃ zie a: «Ɩ̃ sore e, bʋ̃ʋ n'ʋ à á ŋá za wule?»

⁵ Ʋ tɩ sowri mɛ̃ na: «Fʋ bɛ bãw ɛ?» Ɩ̃ tɩ sɔw ʋ kɛ́ ʋ̃ʋ'hʋ̃.

^6a Lɛ n'a ʋ tɩ man mɛ̃ à ŋá:

^10b «A fɩ̃tɩlɩ ayopõi ɩ n a Sore mimie na piwre a tẽw zu yele za a.»

¹¹ Ɩ̃ tɩ lɛb'a sowr'ʋ: «A olivʋ tɩɩr ayi na be a fɩ̃tɩlɩ dɔwlʋ zie dʋrʋ lowr nɩ a gʋba lowr a, bʋ̃ʋ n'ʋ a wule?»

¹² Sowru ŋa n'ʋ ɩ̃ tɩ lɛb sowri ƴãw pʋɔ: «A olivʋ tɩɩr wuli ayi na àr kɔw a salm-zɩɛ kur-vɛɛ ayi, ɛ́ a kãá yire a pʋɔ, ɩ mɛ̃ salm-zɩɛ a, bʋ̃ʋ n'ʋ a wule?»

¹³ Ʋ tɩ sowri mɛ̃ na: «Fʋ bɛ bãw ɛ?» Ɩ̃ tɩ sɔw ʋ kɛ́ ʋ̃ʋ'hʋ̃.

¹⁴ Lɛ n'a ʋ tɩ man mɛ̃ à ŋá: «A nɩbɛ ayi bɛl bɛ na cir a kãá ƴãw a zũú, kɛ́ bɛ ɩ a tẽ-daa za Sore tõ-tõ-biir a nɛbɛ.»

Nɛ́ɛ a Sore na ƴãw a Zorobabɛl ƴãw a

^6b A malkɩ tɩ yel'a k'ɩ̃ɩ ƴɛ̀r ƴɛ̀rʋ ŋa kʋ̀ a Zorobabɛl: «Gãdaalʋ nɩ fʋ mɩŋa fãw bɛ n'a fʋ na tõ n a fʋ ton ɛ, a ɩ̃ vʋʋrʋ n'ʋ na so fʋ tõ.»

⁷ Ʋ tɩ yel'a ƴãw pʋɔ: «A tã-kpɛ̃ɛ ŋa ɩ n bɩwra bɩɩ? Zorobabɛl na ɩ na ʋ lɩɛbɩ zi-tɩ̃tal. Ʋ na tuw ʋ na ír a kʋsɩɛr, a na fɛr k'ʋʋ ƴãw a Ŋmɩn-yir-kpɛ̃ɛ zu-sɔw a. Bɛ na cɩɩrɛ na: “Nyɛ̃ ʋ na vɩɛl a! Nyɛ̃ ʋ na vɩɛl a”!»

⁸ A Sore tɩ cãà na lɛb ƴɛ̀r ƴɛ̀rʋ ŋa kʋ̀ m:

⁹ «A Zorobabɛl nuru n'a sʋ̃ɔ́ a Ŋmɩn-yir-kpɛ̃ɛ pɛr, ɛ́ na mɛ ʋ tɩ baarɩ.» A yele á ŋá za wa ta baar'a, nyɩ na bãw na k'aa Sore, a Kpɛnʋ-za-sob, sɩrɩ n'ʋ tõ m a nyɩ zie.

^10a A bɛ sɛw kɛ́ nyɩ ɩ a tome tib daar tõ-pʋrɩ kãw la ɩ, a nɩ̃ɛ vɛ̃ kɛ́ ɩrɛ nʋ̃ɔ̀, a Zorobabɛl bɛ na nyɛ̃, ʋ ƴãw a tõ-tõ-bom a nũú a.