Zakari 11 - A SƐB-SÕW

A tẽ-kpɛn lo na

¹ Libã a, yuo a fʋ pamɛ kɛ̀ vũu dɩ a fʋ sɛɛdɩr tɩɩr.

² Sɩpɩrɛ tɩɩr ɩ, nyɩ kone, bʋ̃ʋ n'ʋ vɛ̃, a sɛɛdɩr tɩɩr lo na, bɛ cɛ n a tɩ-vɩɛlɩ vɩɛlɩ á ŋá lɔb. Basan tẽw sɛn tɩɩr ɩ, nyɩ kone, bɛ sáw nɩ a nyɩ tuw-zũgulu bɛr.

³ Bɛ wone nɩ a nɩ-bʋʋrɛ cɩ̃ɩnbɛ kon, bʋ̃ʋ n'ʋ vɛ̃, a bɛ kpɛnʋ baar'a. Bɛ wone nɩ a gben na ùore a, bʋ̃ʋ n'ʋ vɛ̃ a tuwr na lanɩ a Zurdɛ̃ a sáw nɩ a za.

A dʋ̃-cɩ̃ɩnbɛ ayi zʋkpar

⁴ Bibir kãw, a Sore ɩ̃ Naaŋmɩn tɩ yel'ɩ à ŋá kʋ̀ m: «Ɩ a píir á ŋá bɛ na na kʋ a cɩ̃ɩnɛ.

⁵ A bɛlɩ dem na mɩ́ dà a, mɩ́ ŋmãa a nɩ a kɔkɛɛ ɛ́ bɛ tɩɛrɛ kɛ́ bɛ maal'ɩ faa ɩ, ɛ́ a bɛlɩ dem na mɩ́ kʋɔrɩ a a yere: “Tɩ puori a Sore yãanɩ, tɩ kpɛ n naalʋ!” A cɩ̃ɩnbɛ tɛɛ za bɛ mɩ́ zɔrɛ a nɩbaalʋ ɛ.

⁶ A mãa, a Sore, ɩ̃ yere na, ɩ̃ mɩ̀ kʋ̃ zɔrɛ a tẽ-daa nɩbɛ nɩbaalʋ ɛ. Ɩ̃ na mɩ́ ƴãw nɩ nɩsaal za a ʋ kpɛ-pɩɛl nɩ a ʋ nãà nũú. A na-mɩnɛ na sãw nɩ a tẽw bɛr ʋ za, ɩ̃ɩ bɛ faarɛ nɩr za a bɛ nuru pʋɔ ɩ.»

⁷ Lɛ n'a ɩ̃ tɩ ɩ a píir, a yɛ-yɛ-nyãnyuwr na tɩ waar na kʋ a, cɩ̃ɩnɛ. Ɩ̃ tɩ de nɩ pi-cɩ̃ɩn-da-kʋrɩ ayi. Ɩ̃ tɩ por'ɩ a dãw-niwn-sob “Báalʋ”, ɛ́ por a ayi sob “Lãw-taa”, ɛ́ kaarɛ a píir zie.

⁸ Cuw-been pʋɔ a, ɩ̃ diw nɩ cɩ̃ɩnbɛ ata bɛr. Al pùorí, ɩ̃ tɩ bàl'ɩ a ɩ̃ píir ƴãw, ɛ́ a ɩ̃ píir mɩ̀ bàl a ɩ̃ ƴãw.

⁹ Lɛ n'a ɩ̃ tɩ yel a: «Ɩ̃ kʋ̃ cãà kaarɛ a nyɩ zie ɩ. A al na na kpi a, a kpi! A al na na bɔr a, a bɔr! A al na na cãà vʋʋrɛ a, a 'wɔbr taa!»

¹⁰ Ɩ̃ tɩ de nɩ a báalʋ dakʋra ka bɛr, k'ɩ̃ɩ sãw a báalʋ wõ-taa bɛr, a Sore na tɩ ɩ k'ʋ be a nɩ-bʋʋrɛ cara pʋɔ a.

¹¹ Lɛ n'a a wõ-taa tɩ sãw a ʋlɩ daar nɛ za. A yɛ-yɛ-nyãnyuwr na tɩ jɩ́rɛ a lɛ ɩ̃ na ɩrɛ a, tɩ nyɛ̃ na bãw k'aa Sore n'ʋ ƴɛ̀rɛ a ɩ̃ ɩ-ɩrɩ pʋɔ.

¹² Ɩ̃ tɩ yel bɛ na: «Nyɩmɛ wa nyɛ̃ a sɛw a, nyɩɩm kʋ̀ m a ɩ̃ sã-ya. Alɛ wa bɛ n'a a, a bɛ ɩ yel ɛ!» Lɛ n'a bɛ tɩ sɔ́r salm-zɩɛ libie lɩzɛr'ɩ pie kʋ̀ m, a ɩ a ɩ̃ sã-ya.

¹³ A Sore tɩ yel mɛ̃ na: «Bɛ nyɛ̃ nɩ a ɩ̃ daarʋ bɛ zuo à à ŋá ɩ! De a libi-bɛrʋ ŋa tɩ kʋ̀ a kur-nyɩlɛ!» Lɛ n'a ɩ̃ tɩ de a salm-zɩɛ libie lɩzɛr'ɩ pie tɩ kʋ̀ a kur-nyɩlɛ, a Sore Ŋmɩn-yir-kpɛ̃ɛ pʋɔ.

¹⁴ Al pùorí, ɩ̃ tɩ kár'ɩ a dakʋrɩ ayi sob bɛr, a lãw-taa dakʋra, k'ɩ̃ɩ sãw a Zuda nɩ a Ɩsɩrayɛl yɛblʋ bɛr.

¹⁵ A Sore tɩ lɛb'a yel mɛ̃: «Ƴɛrɛŋa a, ɩrɛ mɛ̃ dʋ̃-cɩ̃ɩn-dãbol sob a.

¹⁶ Bʋ̃ʋ n'ʋ vɛ̃, ɩ̃ na tõ n dʋ̃-cɩ̃ɩn-sãan a tẽw pʋɔ: ʋ kʋ̃ ŋmɛlɛ kaar a píir al bɛ na na kʋ a ɩ, ʋ kʋ̃ bɔ a al na bɔr a ɩ, ʋ kʋ̃ mɩ́ sanɩ a al na tɛr natɩɛ a ɩ, ʋ kʋ̃ guole a al na cãà kpɛmɛ a ɩ. Ʋ na nɩ̃ɛ na kʋrɛ a al na 'wɔr a 'wɔbr, ɛ́ fowre a a nafɩlɛ.»

¹⁷ Baw-bio sob'ɩ a pi-cɩ̃ɩn-dãbol sob na zawrɛ a ʋ píir bɛrɛ a! A ʋ kpãkpãw nɩ a ʋ dʋrʋ mimir, a sãw a zɛbr zie! A ʋ kpãkpãw ʋ kpi ʋ za, a ʋ dʋrʋ mimir, ʋ ta cãà nyɛrɛ towtow ɛ!