Zakari 10 - A SƐB-SÕW

Nyɩ zɛlɛ a Sore zie, nyɩ ta zɛlɛ a tɩbɛ zie ɩ

¹ Nyɩ mɩ́ zɛlɩ a Sore, ʋ kʋ̀ nyɩ a sɩ̃ɛ-kpɛ-paala saa: a Sore n'ʋ tɩrɛ a sa-pɛlɛ. Ʋ na ɩ na a saa wa yaga, ŋa za púo bʋ̃-kʋ́ɔrɩ mɩ́ maalɩ.

² A tɩbɛ nyɩ na mɩ́ sowri a, a mɩ́ ŋma n ziri kʋ̀ nyɩ. A bàwr-bʋwrbɛ mɩ́ wul'ɩ yele na bɛ ɩ sɩza a. A zánʋ bɛ na mɩ́ manɛ a, bɛ tɛr pɛr ɛ, a mɔwlʋ bɛ na mɩ́ tɩrɛ a, mɩ́ ɩ n bɛ̀lʋ. Alɛ n'a so a wone a nɩbɛ, bɛ yaarɛ gʋɔr, mɛ̃ dʋn na bɛ tɛr cɩ̃ɩnɛ a.

A Sore na lɛb'a tɛr a ʋ nɩ-bʋʋrɛ wa n

³ «Ɩ̃ nyɛ̃ nɩ nɩ a dʋ̃-cɩ̃ɩ-sãanbɛ suur, bɛl na yel kɛ́ bɛlɛ nɛbɛ kaarɛ a ɩ̃ nɩ-bʋʋrɛ zie a, ɩ̃ na ìr'ɩ a bɛ ƴãw. Sɩza n'a, a mãa, a Sore Kpɛnʋ-za-sob, ɩ̃ na kaa nɩ a ɩ̃ dʋn zie, a Zuda nɩbɛ. Ɩ̃ na tɛr bɛ na cen nɩ a zɛbr zie, mɛ̃ a ɩ̃ wur-yúor a.

⁴ A bɛ pʋɔ n'a nɩ-bɛr-bʋʋrɛ za na yire, kpɛmɛ mɛ̃ yir pɛr kʋsɩɛr a, kpɛmɛ jɩjɩ mɛ̃ pɛn-sɛw kpawbir a, kpɛmɛ mɛ̃ zɛbr tam a.

⁵ Bɛ na ɩ na mɛ̃ gãdaar a, nɛbr a bɛl na zɛbr'ɩ bɛ a nɩ gbɛ́ɛ, mɛ̃ sɔ́r zu tanɛ a. Bɛ na zɛbr'ɩ à à ŋá, a mãa, Sore na lãw nɩ bɛ a ƴãw. A dɔ̃ dem na zɔm wie a, na nyɛ̃ nɩ vĩ.

⁶ Ɩ̃ na ɩ na a Zuda nɩbɛ tɛr fãw, ɩ̃ na faa nɩ a Ɩsɩrayɛl nɩbɛ. Ɩ̃ na lɛb'a tɛr bɛ wa n a bɛ tẽw, ɛ́ wul bɛ a ɩ̃ nɔ̃wfʋ, mɛ̃ ɩ̃ bɛ dãw jɛ bɛ bɛr towtow a. Ɩ̃ ɩ n a Sore bɛ Naaŋmɩn, ɩ̃ɩ na sàw na de a bɛ puoru.

⁷ A Efarayim nɩbɛ na kpɛmɛ na mɛ̃ gãdaar a, nʋ̃ɔ̀ na ɩrɛ bɛ na mɛ̃ nɩbɛ na nyũ divɛ̃ a. A bɛ bibiir na nyɛ̃ bɛ na nʋ̃ɔ̀ ɩrɛ bɛ, bɛ na cɩlɛ nɩ bɛ za a Sore ƴãw.

⁸ Ɩ̃ na bʋɔl'ɩ a ɩ̃ nɩ-bʋʋrɛ lɛb ɓã bɛ taa, bʋ̃ʋ n'ʋ vɛ̃, ɩ̃ faa bɛ na. Bɛ na yãwmɛ na mɛ̃ a dãwdãw a.

⁹ Ɩ̃ ɩ na bɛ yaarɩ be a nɩ-bʋʋr-yoru pʋɔ, mɛ̃ bʋ̃-bʋʋrɛ bɛ na yaarɩ a, ɛcɛ bɛ na tɛr'ɩ a ɩ̃ tɩɛrʋ, a tẽ-zãánɩ pʋɔ. Bɛ na kpɩɛr'ɩ a be nɩ a bɛ bibiir, al pùorí bɛ na lɛb'a wa.

¹⁰ Ɩ̃ na tɛr bɛ nɩ a Eziptɩ tẽw lɛb wa n, ɩ̃ na tɛr bɛ nɩ a Asiiri tẽw lɛb wa ɓã bɛ taa, ɩ̃ mɩ̀ na tɛr bɛ na cen nɩ Galaadɩ tẽw nɩ Libã tẽw, ɛcɛ a be mɩ̀ a, a vuo kʋ̃ saalɩ bɛ ɩ.

¹¹ Bɛ na lo na gãw a Kpɩɛrʋ kʋ̃ɔ-kpɛ̃ɛ, a mãa, a Sore, ɩ̃ na ŋmɛ n a kʋ̃ɔ-mie siwri, a Nɩl bà-dĩo tɔr za na ko na. A Asiiri na ɩrɛ pɔ̀lʋ a na lo na, ɛ́ a Eziptɩ naalʋ-dɩb za na baar'a.

¹² Ɩ̃ na ɩ n a ɩ̃ nɩ-bʋʋrɛ bɛ tɛr fãw, bɛ na mɩ́ ɩrɛ na a pɛlɩ a ɩ̃ pʋɔ kʋralɛ. A mãa, a Sore, mãa n'ʋ yel.»