Zakari 1 - A SƐB-SÕW

A BƲ̃-NYƐRƖ A ZAKARI NA NYƐ̃ A 1—8 A Sore yere nɩ a Ɩsɩrayɛl nɩbɛ kɛ́ bɛ lɩɛbɩ a bɛ ɩb

¹ A Daarisɩ naalʋ-dɩb yome ayi sob, a cuwr ani sob, a Sore tɩ ƴɛ̀r'ɩ a naaŋmɩn-ƴɛ̀r-manɛ Zakari na ɩ Berekɩa bidɛb nɩ Ido yãw a zie.

^2-3 A Sore tɩ ƴãw na k'ʋʋ yel a Ɩsɩrayɛl nɩbɛ: «A mãa Sore, ɩ̃ nyɛ̃ nɩ nɩ a nyɩ sãàkʋm-kore suur tɩ pi kɔkɛɛ. Ɛcɛ nyɩ lɛb wa a ɩ̃ zie, a mãa Sore Kpɛnʋ-za-sob, ɩ̃ɩ na lɛb'a wa a nyɩ zie, mãa n'ʋ yere.

⁴ Nyɩ ta cɔwrɛ a nyɩ sãàkʋm-kore ɩ. A koro za naaŋmɩn-ƴɛ̀r-manbɛ tɩ kpaalɩ bɛ nɩ a ɩ̃ yúor ƴãw, kɛ́ bɛ bɛr a bɛ cen-faar nɩ a bɛ ɩ-faar, ɛcɛ bɛ bɛ tɩ bɛr wõ ɩ, bɛ bɛ tɩ sàw a ɩ̃ nʋɔr ɛ.

⁵ A nyɩ sãàkʋm-kore wa? Ɛ́ a naaŋmɩn-ƴɛ̀r-manbɛ, bɛ cãà na a?

⁶ Ɛcɛ a ɩ̃ ƴɛ̀rʋ nɩ a ɩ̃ nɛ́ɛ ɩ̃ na tɩ ƴɛ̀r kʋ̀ a ɩ̃ tõ-tõ-biir, a ɩ̃ ƴɛ̀r-manbɛ a, a nyɩ sãàkʋm-kore wa tɩ nyɛ̃ na a ɩ sɩza, bɛ lɩɛbɩ a bɛ ɩb, ɛ́ bãwnɩ a k'ɩ̃ɩ ɩ bɛ na, mɛ̃ a lɛ ɩ̃ na tɩ yel k'ɩ̃ɩ na ɩ bɛ na a, nɩ a lɛ a bɛ cenu nɩ a bɛ ɩ-ɩrɩ mɩ̀ na sɛw taa nɩ a.»

A bʋ̃-nyɛra dãw-niwn sob: a wie

⁷ A Daarisɩ naalʋ-dɩb yome ayi sob, a cuwr pie nɩ been sob na ɩ Sevatɩ cuw a, a bibie lɩzɛr'ɩ anaar sob, a Sore tɩ ƴɛ̀r'ɩ a ʋ ƴɛ̀rʋ kʋ̀ a naaŋmɩn-ƴɛ̀r-manɛ Zakari, na ɩ Berekɩa bidɛb nɩ Ido yãw a. A Zakari manʋ ʋ na manɩ a n'ɩ ŋa:

⁸ Bʋ̃-nyɛra kãw n'ʋ ɩ̃ nyɛ̃ a tɩ̃ɩsɔw: Nɩr na zɔm wur-zɩɛ a. Ʋ tɩ àr'ɩ mɩrtɩ tɩɩr pʋɔ, a bà-fʋɔla pɛrɩ́ za. Wie a mɩnɛ tɩ be n a ʋ pùorí ɩ zɩɩr, ulsɩ nɩ pɛlɛ.

⁹ Ɩ̃ tɩ sowr'ʋ na: «Ɩ̃ sore e, bʋ̃ʋ n'ʋ a wie á ŋá wule?» A malkɩ na tɩ ƴɛ̀rɛ a ɩ̃ zie a, tɩ sɔw na: «Ɩ̃ na ír'ɩ a pɛr kʋ b.»

¹⁰ Ɛ́ tɩ be a mɩrtɩ va-pɔrɛ pʋɔ ɛ́ yel: «A Sore n'ʋ tõ a kɛ́ a tɩ zɔ cɔlɩ a tẽw.»

¹¹ Lɛ n'a a wi-zɔmnbɛ tɩ man a lɛ na ɩ a, kʋ̀ a Sore malkɩ na be a mɩrtɩ tɩɩr pʋɔ a. Bɛ tɩ yel ʋ na: «Tɩ zɔ na cɔlɩ a tẽw za, ɛ́ bɛ nyɛ̃ damnʋ kãw za ɩ, bom za gã nɩ zoom.»

¹² Lɛ n'a a Sore malkɩ tɩ lɛb yel: «Sore Kpɛnʋ-za-sob i, yome lɩz'a ata nɩ pie n'ɩ à ŋá fʋ na nyɛ̃ nɩ a Zerizalɛm nɩ a Zuda ten al na cɛ a, suur a. Debor'a fʋ na zawrɩ na zɔ a nɩbaalʋ tɩ ta n?»

¹³ Lɛ n'a a Sore tɩ ƴɛ̀r sõwfʋ ƴɛ̀rʋ, nɩ mɔwlʋ ƴɛ̀rʋ kʋ̀ a malkɩ na tɩ ƴɛ̀rɛ a ɩ̃ zie a.

A Sore na lɛb'a kaa ír a Zerizalɛm

¹⁴ A malkɩ na tɩ ƴɛ̀rɛ a ɩ̃ zie a, tɩ yel mɛ̃ na: Hieri yel: À ŋá n'a a Sore, a Kpɛnʋ-za-sob, yere: «Ɩ̃ nɔnɛ nɩ a Zerizalɛm nɩ a Sɩyɔ̃ tãw vũuvũu.

¹⁵ Ɛcɛ su-yãyaar kãw tɛr mɛ̃ nɩ a nɩ-bʋʋr-yoru bɛl bom za na bɛ damnɛ a ƴãw. Bʋ̃ʋ n'ʋ vɛ̃, ɩ̃ tɩ nyɛ̃ nɩ nɩ a Ɩsɩrayɛl suur blãlɛ, ɛ́ bɛl wa ɩ a ʋ kpɩɛrʋ a dɔwlɩ.

¹⁶ Alɛ n'a so ɩ̃ yere, a mãa, a Sore Kpɛnʋ-za-sob: Ɩ̃ lɛb'a waar a Zerizalɛm nɩ nɩbaal-zɔba. A ɩ̃ yir na lɛb'a mɛ a ʋ pʋɔ, ɛ́ bɛ na lɛb'a mɛ a Zerizalɛm tẽ-kpɛ̃ɛ.»

¹⁷ Al pùorí a malkɩ tɩ yel'a k'ɩ̃ɩ lɛb hieri yel à ŋá: «Bʋ̃-vɩɛlɩ na lɛb'a paalɩ a ɩ̃ tẽ-bɛrɛ, a Sore Kpɛnʋ-za-sob n'ʋ yere, ɩ̃ na lɛb'a kaa ír a Zerizalɛm, ɩ̃ na lɛb'a mɔwlɩ a Sɩyɔ̃.»