Zã 6 - A SƐB-SÕW

A Yeezu guol'ɩ nɩbɛ tur anũu

¹ A yele á ŋá pùorí, a Yeezu tɩ gãw nɩ a Galile kʋ̃ɔ-kpɛ̃ɛ gãwn ŋa lowr, bɛ mɩ̀ na bʋɔlɛ kɛ́ Tɩberiyadɩ kʋ̃ɔ-kpɛ̃ɛ a.

² Nɩ-yaga yaga tɩ tuur ʋ na, bɛ na tɩ nyɛ̃ a yele-na-ɩ-bãwfʋ-sãá ʋ na maalɛ sanɛ nɩ a bàalbɛ a ƴãw.

³ A Yeezu tɩ do n tãw zu tɩ zɩ̃, ʋlɛ nɩ a ʋ po-tuurbɛ.

⁴ A Tɔl-gãw cuw na ɩ a Zifʋ mɩnɛ cuw a tɩ pɩɛl'a.

⁵ A Yeezu tɩ dʋɔ nɩ zu, ɛ́ nyɛ̃ kɛ́ nɩ-yaga yaga tɩ waar'ɩ a ʋ zie. Ʋ tɩ yel'ɩ Filib: «Nyɩnɛ n'a tɩ na da dipɛ̃ a sɛw a nɩbɛ bɛ ŋa za dɩb?»

⁶ A Yeezu tɩ yel'ɩ a lɛ k'ʋʋ ɩ a Filib kaa: ʋl mɩŋa tɩ bãw nɩ a lɛ ʋ na na ɩ a.

⁷ A Filib tɩ sɔw ʋ na yel: «Bibie kɔbr ayi (200) sã-ya libie dipɛ̃ kʋ̃ tʋ̃ɔ́ sɛw, kɛ̀ ŋa za mɩ́ páw dipɛ̃ ŋmale blã ɩ.»

⁸ A Yeezu po-tuurbɛ ƴen sob kãw, Ãdere, Sɩmʋ̃ Pɩɛr yɛb, tɩ yel ʋ na:

⁹ «Dɛble kãw be n ka, tɛr ɔɔzʋ dipɛ̃ anũu nɩ zʋ́mɛ́ ayi, ɛcɛ bʋ̃ʋ n'ɩ à á ŋá, a nɩbɛ na sɛw à ŋá za a ƴãw?»

¹⁰ A Yeezu tɩ yel'a: «Nyɩ ƴãw bɛ zɩ̃.» Mʋ̃ɔ tɩ be n a ʋlɩ zie nɛ yaga. Bɛ tɩ zɩ̃ na vɩrɩ na ta túr-anũu (5 000).

¹¹ A Yeezu tɩ de nɩ a dipɛ̃, ʋʋ na wa puori a Naaŋmɩn yãanɩ baarɩ a, ʋ põ bɛ na. Ʋ mɩ̀ tɩ kʋ̀ bɛ nɩ a zʋ́mɛ́ sɛw lɛ za bɛ na bɔbr a.

¹² A nɩbɛ na tɩ dɩ tɩw a, a Yeezu yel'ɩ a ʋ po-tuurbɛ: «Nyɩ wob a bʋ̃-ŋmaarɛ na cɛ a, kɛ̀ bom za taa wa wɛrɛ ɩ.»

¹³ Bɛ tɩ wob'ɩ a bʋ̃-ŋmaarɛ ɓã taa a paalɩ peli pie nɩ ayi. A ɔɔzʋ dipɛ̃ anũu al, nɩ a zʋ́mɛ́ ayi al bɛ na tɩ dɩ ɛ́ a guu a n'a.

¹⁴ A nɩbɛ na tɩ nyɛ̃ a yel ŋa na ɩ bãwfʋ sãá a Yeezu na maalɩ a, bɛ tɩ yere na: «A naaŋmɩn-ƴɛ̀r-manɛ tɔr za n'ɩ à ŋà, a ʋl na waar a tẽ-daa zu a.»

¹⁵ Ɛcɛ a Yeezu na tɩ bãwnɩ a, bɛ na na wa nyɔw ʋ ƴãw ʋ ɩ a bɛ nãà a, ʋ lɛb'a do a tãw zu tɩ be be ʋ yõ.

A Yeezu na cere a kʋ̃ɔ-kpɛ̃ɛ zu a

¹⁶ A zaanʋɔra na wa ta a, a Yeezu po-tuurbɛ tɩ siw nɩ a kʋ̃ɔ-kpɛ̃ɛ nʋɔr,

¹⁷ tɩ kpɛ a gbor tu Kafarnawɔm sɔ́r gãwnɛ a kʋ̃ɔ-kpɛ̃ɛ. A zie tɩ sɔb'a baarɩ, ɛ́ a Yeezu cãà bɛ wa páw bɛ ɩ.

¹⁸ Sɛsɛb tɩ fure na nɩ fãw, a kʋ̃ɔ-kpɛ̃ɛ dãdawlɛ.

¹⁹ Bɛ tɩ duwri na cen ta mɛ̃ kilo anũu a, ɛ́ wa nyɛ̃ a Yeezu ʋ cere a kʋ̃ɔ-kpɛ̃ɛ zu tarɛ pɩɛlɛ a gbor. A lɛ n'a dɛ̃bɩ̃ɛ tɩ nyɔw bɛ.

²⁰ Ɛcɛ a Yeezu tɩ yel bɛ na: «Nyɩ ta zɔrɛ dɛ̃bɩ̃ɛ ɩ, mãa n'ʋ!»

²¹ Bɛ na tɩ bɔbr kɛ́ bɛ de ʋ a gbor pʋɔ a, a gbor tɩ tɔ n a tẽw daadaalɛ, a ʋlɩ zie nɛ bɛ na tɩ cere a.

A zu-sɛbla bɔbr'ɩ a Yeezu

²² A bio daarɩ́, a zu-sɛbla na tɩ cãà be a kʋ̃ɔ-kpɛ̃ɛ gãwn a, tɩ nyɛ̃ na kɛ́ gbor been n'ʋ tɩ be a be, ɛ́ k'aa Yeezu bɛ tɩ bɩɛlɩ a ʋ po-tuurbɛ a bɛ gbor pʋɔ ɩ. Bɛl tɛwr nɛbɛ tɩ tɔl cen.

²³ Ɛcɛ gbee a mɩnɛ tɩ yi n a Tɩberiyadɩ wa ta pɩɛlɩ a be a Sore na tɩ puori a Naaŋmɩn yãanɩ a dipɛ̃ ƴãw baarɩ, ɛ́ bɛ 'wɔb a.

²⁴ A zu-sɛbla na tɩ nyɛ̃ k'aa Yeezu nɩ a ʋ po-tuurbɛ bɛ be a be a, bɛ kpɛ n a gbee bɔbr ʋ cere nɩ a Kafarnawɔm.

A Yeezu n'ɩ a bʋ̃-dɩra na tɩrɛ a nyɔ-vʋʋrʋ a

²⁵ Bɛ na tɩ nyɛ̃ a Yeezu a kʋ̃ɔ-kpɛ̃ɛ gãwn a, bɛ sowr'ʋ na: «Wul-wul-kara a, debor'a fʋ ta a ka?»

²⁶ A Yeezu tɩ sɔw bɛ na: «Yel-mɩŋa sɩza sɩza n'a ɩ̃ yere kʋ̀rɛ nyɩ, yel-na-ɩ-bãwfʋ-sãá nyɩ nyɛ̃ a ƴãw bɛ n'a nyɩ bɔbr mɛ̃ ɩ, dipɛ̃ nyɩ na páw 'wɔb sɛw a ƴãw n'a.

²⁷ Nyɩ ta tone bɔbr'ɩ dɩb na na tʋ̃ɔ́ wɛ a ɩ, nyɩ ƴãw fãw tone bɔbr'ɩ dɩb na be be a nyɔ-vʋʋrʋ na be kʋralɛ a ƴãw a, a dɩb ŋa n'ʋ a Nɩsaal Bie na kʋ̀ nyɩ, ʋl a Sãà, na ɩ Naaŋmɩn a, na ƴãw a ʋ bãwfʋ a.»

²⁸ A lɛ n'a bɛ tɩ lɛb sowr'ʋ: «Bʋ̃ʋ n'ʋ tɩ na ɩrɛ a ɩ a Naaŋmɩn tome tɩ tone?»

²⁹ A Yeezu yel bɛ: «A Naaŋmɩn tome n'ɩ kɛ́ nyɩ sàw de a sob nɛ ʋ na tõ a.»

³⁰ Ɛ̀ bɛ lɛb sowr'ʋ: «Yel-na-ɩ-bãwfʋ-sãá-a buor sob'ʋ fʋ na maalɩ kɛ̀ tɩ tʋ̃ɔ́ nyɛ̃, ɛ́ sàw de a fʋ yele? Tõ-buor'ʋ fʋ na tõ?

³¹ Tɩ sãàkʋm-kore dɩ n mãan a wɛja-kpalɛ pʋɔ, a tu mɛ̃ a lɛ a Sɛb-sõw ƴɛ̀r-bie na yel a: “Ʋ kʋ̀ bɛ nɩ dipɛ̃ na yi salom zu siw a.”»

³² A Yeezu tɩ yel bɛ na: «Yel-mɩŋa sɩza sɩza n'a ɩ̃ yere kʋ̀rɛ nyɩ: Moyiir bɛ n'ʋ kʋ̀ nyɩ a salom zu dipɛ̃ ɩ, ɩ̃ Sãà n'ʋ kʋ̀rɛ nyɩ a dipɛ̃-sɩza na yi a salom zu a.

³³ Bʋ̃ʋ n'ʋ vɛ̃, a dipɛ̃ a Naaŋmɩn na tɩrɛ a, ʋlɛ n'ɩ a ʋl na yi a salom zu siwr ɛ́ kʋ̀rɛ a nyɔ-vʋʋrʋ a tẽ-daa a.»

³⁴ A lɛ n'a a nɩbɛ tɩ yel ʋ: «Sore e, kʋ̀rɛ tɩ a dipɛ̃ ŋa tɔ kʋralɛ!»

³⁵ A Yeezu yel bɛ: «Mãa n'ɩ a nyɔ-vʋʋrʋ dipɛ̃. Ʋlɩ sob na waar a ɩ̃ zie a, kɔ̃ kʋ̃ kpɛ ʋ towtow ɛ, ɛ́ ʋlɩ sob na sàw de m a, kʋ̃ɔ-nyúur kʋ̃ kpɛ ʋ towtow ɛ.

³⁶ Ɛcɛ ɩ̃ yel'a kʋ̀ nyɩ: nyɩ nyɛ̃ na, ɛ́ nyɩ bɛ sàw de ɩ.

³⁷ Bɛlɩ dem za a ɩ̃ Sãà na kʋ̀ m a, bɛ za na wa n a ɩ̃ zie, ɛ́ sob nɛ za na waar a ɩ̃ zie a, ɩ̃ kʋ̃ diw ʋ bɛr ɛ.

³⁸ Bʋ̃ʋ n'ʋ so, ɩ̃ bɛ yi a tẽ-vla pʋɔ siw wa k'ɩ̃ɩ wa maalɛ a ɩ̃ mɩŋa pʋ-tɩɛrʋ ɛ, ɩ̃ wa na k'ɩ̃ɩ wa ɩrɛ a ʋlɩ sob na tõ m a yã-nɔn ɩb za.

³⁹ Ɛcɛ a ʋlɩ sob na tõ m a bɔbr'a kɛ́ a bɛlɩ dem za ʋ na kʋ̀ m a, a bɛ been za taa wa bɔrɛ ɩ, k'ɩ̃ɩ ɩ bɛ lɛb yi a kũu pʋɔ a bibi-pɛ-baara wa vɩɛ a.

⁴⁰ A ɩ̃ Sãà pʋ-tɩɛrʋ sɩrɩ n'ɩ ŋa: kɛ́ sob ŋa za na nyɛrɛ a Bie ɛ́ sàwr dier ʋ a, ʋ tɛr a nyɔ-vʋʋrʋ na be kʋralɛ a, ɛ́ a mãa a, ɩ̃ na ɩ na ʋ lɛb yi a kũu pʋɔ a bibi-pɛ-baara wa vɩɛ a.»

⁴¹ A Yeezu na tɩ yel: «Mãa n'ɩ a dipɛ̃ na yi a salom zu siw a», alɛ n'a a Zifʋ mɩnɛ tɩ zɛbr'ɩ ʋ.

⁴² Bɛ tɩ yere na: «A Yeezu bɛ tʋ̃ɔ́ n'ɩ à ŋà ɩ, a Zuzɛb bidɛb ɛ? Tɩ bãw nɩ a ʋ sãà nɩ a ʋ mã vla. Ɛ́ ŋmɩŋmɩn n'a ʋ na tʋ̃ɔ́ ƴɛ̀rɛ à ŋá: “Ɩ̃ yi n salom zu siw wa?”»

⁴³ A Yeezu tɩ sɔw na yel bɛ: «Nyɩ ta zɛbr a nyɩ cara pʋɔ be ɩ.

⁴⁴ Nɩr za kʋ̃ tʋ̃ɔ́ wa a ɩ̃ zie, ɛ́ a bɛ ɩ a ɩ̃ Sãà na tõ m a n'ʋ taw ʋ wa n ɛ, ɛ́ a mãa a, ɩ̃ na ɩ na ʋ lɛb yi a kũu pʋɔ a bibi-pɛ-baara wa vɩɛ a.

⁴⁵ Bɛ sɛb'ɩ a naaŋmɩn-ƴɛ̀r-manbɛ sɛbɛ pʋɔ kɛ́: “A Naaŋmɩn mɩŋa n'ʋ na ɩ a bɛ za wule.” Nɩr za na bɛrɛ wone a Sãà ƴɛ̀rʋ ɛ́ dier a ʋ wulu a, ʋ waar'ɩ a ɩ̃ zie.

⁴⁶ Nɩr za bɛ nyɛ̃ a Naaŋmɩn Sãà ɩ, alɛ bɛ ɩ a sob ŋa na yi a Naaŋmɩn zie wa a ɩ: a sob ŋa yõ n'ʋ nyɛ̃ a Sãà.

⁴⁷ Yel-mɩŋa sɩza sɩza n'a ɩ̃ yere kʋ̀rɛ nyɩ: ʋlɩ sob na sàw de a, ʋ tɛr'ɩ a nyɔ-vʋʋrʋ na be kʋralɛ a.

⁴⁸ A mãa a, mãa n'ɩ a nyɔ-vʋʋrʋ dipɛ̃.

⁴⁹ A nyɩ sãàkʋm-kore dɩ n mãan a wɛja-kpalɛ pʋɔ, ɛ́ kpi.

⁵⁰ Ɛcɛ a dipɛ̃ na yi a salom zu siwr a, ŋmɛ̃a ŋmɛ̃ lɛ, kɛ́ sob nɛ na 'wɔbr ʋ a kʋ̃ kpi ɛ.

⁵¹ Mãa n'ɩ a dipɛ̃ na vʋʋrɛ a, na yi a salom zu siw wa a. Nɩr wa 'wɔbr a dipɛ̃ ŋa a, ʋ na vʋʋrɛ nɩ kʋralɛ, ɛ́ a dipɛ̃ ɩ̃ na na tɩr a, ʋlɛ n'ɩ a ɩ̃ ƴã-gã-nɛn a tẽ-daa nyɔ-vʋʋrʋ páwfʋ ƴãw.»

⁵² A lɛ n'a a Zifʋ mɩnɛ tɩ ŋmɩɛr nɔkpɛn yaga yaga a bɛ cara pʋɔ yere nɩ: «Ŋmɩŋmɩn n'a a nɩr ŋa na tʋ̃ɔ́ kʋ̀ tɩ a ʋ ƴã-gã-nɛn tɩ 'wɔb?»

⁵³ A Yeezu tɩ yel bɛ na: «Yel-mɩŋa sɩza sɩza n'a ɩ̃ yere kʋ̀rɛ nyɩ: nyɩmɛ bɛ wa 'wɔbr a Nɩsaal Bie ƴã-gã-nɛn, ɛ́ nyúur a ʋ zɩ̃ɩ a, a nyɔ-vʋʋrʋ kʋ̃ be a nyɩ zie ɩ.

⁵⁴ Ʋlɩ sob na 'wɔbr a ɩ̃ ƴã-gã-nɛn ɛ́ nyúur a ɩ̃ zɩ̃ɩ a, ʋ tɛr'ɩ a nyɔ-vʋʋrʋ na be kʋralɛ a, ɛ́ a mãa a, ɩ̃ na ɩ na ʋ lɛb yi a kũu pʋɔ a bibi-pɛ-baara wa vɩɛ a.

⁵⁵ A ɩ̃ ƴã-gã-nɛn sɩrɩ na ɩ bʋ̃-dɩ-sɩza, ɛ́ a ɩ̃ zɩ̃ɩ ɩ bʋ̃-nyúura sɩza.

⁵⁶ Ʋlɩ sob na 'wɔbr a ɩ̃ ƴã-gã-nɛn ɛ́ nyúur a ɩ̃ zɩ̃ɩ a, ʋ lãw nɩ mɛ̃ na, ɩ̃ɩ mɩ̀ lãw nɩ ʋ.

⁵⁷ Mɛ̃ a lɛ a Sãà na vʋʋrɛ a na tõ m ɛ́ so k'ɩ̃ vʋʋrɛ a, lɛ mɩ̀ n'a, sob nɛ nãà wa 'wɔbr mɛ̃ a, mãa n'ʋ mɩ̀ na so k'ʋ vʋʋrɛ.

⁵⁸ A dipɛ̃ na yi a salom zu siwr a n'ɩ à ŋà. Ʋ bɛ ŋmɛ̃ mɛ̃ a ʋl a nyɩ sãàkʋm-kore na tɩ 'wɔb a ɩ, a bɛl a, bɛ kpi na. Ʋlɩ sob na 'wɔbr a dipɛ̃ ŋa a, ʋ na vʋʋrɛ nɩ kʋralɛ.»

⁵⁹ A kanʋ á ŋá n'a a Yeezu tɩ kanɩ nɩ a nɩbɛ a Zifʋ mɩnɛ puoru-dĩó a Kafarnawɔm tẽw.

A Yeezu ƴɛ̀rʋ tɩrɛ nɩ nyɔ-vʋʋrʋ na be kʋralɛ a

⁶⁰ Nɩbɛ yaga, a ʋ po-tuurbɛ pʋɔ, na tɩ wõ a ʋ ƴɛ̀rʋ a, tɩ yere na: «A ƴɛ̀rʋ ŋa kpɛ̃w tɔ, ãa n'ʋ na tʋ̃ɔ́ bɛrɛ wone ʋ?»

⁶¹ A Yeezu na tɩ bãwnɩ a, ɛ́ nɩr za bɛ yel kʋ̀ ʋ, a ʋ po-tuurbɛ na zɛbr a, ʋ yel bɛ na: «A yel ŋa sãw nɩ a nyɩ suur ɩ?

⁶² Ɛ́ nyɩmɛ pãa wa nyɛ̃ a Nɩsaal Bie ʋ dúor a be ʋ na tɩ dãw be a?

⁶³ A Naaŋmɩn Vʋʋrʋ n'ʋ tɩrɛ a nyɔ-vʋʋrʋ, nɩsaal yõ kʋ̃ tʋ̃ɔ́ ɩ ɩb kãw za ɩ. A ƴɛ̀r-bie ɩ̃ na ƴɛ̀r kʋ̀ nyɩ a, a ɩ n Vʋʋrʋ nɩ nyɔ-vʋʋrʋ.

⁶⁴ Ɛcɛ nɩbɛ be n a nyɩ pʋɔ bɛ sàwr dier ɛ.» A pɛr-tib daar za sɩrɩ n'a a Yeezu tɩ bãw a bɛlɩ dem na bɛ sàwr dier a, nɩ a ʋlɩ sob nɛ na na mɩl ʋ nyɔw tɩr a.

⁶⁵ Ʋ tɩ yel'a ƴãw pʋɔ: «Alɛ n'a so, ɩ̃ tɩ yel kʋ̀ nyɩ kɛ́ nɩr za kʋ̃ tʋ̃ɔ́ wa a ɩ̃ zie, a Naaŋmɩn Sãà bɛ wa kʋ̀ ʋ a lɛ a ɩ.»

⁶⁶ A ʋlɩ daar nɛ n'a nɩbɛ yaga, a ʋ po-tuurbɛ pʋɔ, tɩ zawr'ʋ bɛr bɛ cãà tuur ʋ ɛ.

⁶⁷ Lɛ n'a a Yeezu tɩ sowri a Pie-nɩ-ayi: «Ɛ́ a nyɩɩm, nyɩ mɩ̀ bɛ bɔbr kɛ́ nyɩ bɛr mɛ̃ ɛ́ cen ɛ?»

⁶⁸ Sɩmʋ̃ Pɩɛr tɩ sɔw ʋ na yel: «Sore e, ãa zie n'a tɩ na cen? Fʋ tɛr'ɩ a nyɔ-vʋʋrʋ na be kʋralɛ a ƴɛ̀r-bie.

⁶⁹ Tɩɩm tɛwr ƴãw a, tɩ sàw na, ɛ́ tɩ bãw na kɛ́ fʋ̃ʋ n'ɩ a Naaŋmɩn Nɩ-sõw.»

⁷⁰ A Yeezu tɩ sɔw bɛ na: «Mãa bɛ n'ʋ kaa ír a nyɩɩm Pie-nɩ-ayi ɛ? Ɛcɛ a nyɩ ƴen sob ɩ n gɛgɛra.»

⁷¹ Sɩmʋ̃ Ɩsɩkarɩɔtɩ bidɛb Zuda n'ʋ a Yeezu tɩ ƴɛ̀rɛ jɩɛrɛ nɩ. Bʋ̃ʋ n'ʋ vɛ̃, ʋ na saa tɩ pʋɔ a Pie-nɩ-ayi pʋɔ a, ʋlɛ n'ʋ na mɩl a Yeezu.