Zã 12 - A SƐB-SÕW

Marya cir'ɩ kãa-nyũu ƴãw a Yeezu gbɛ́ɛ ƴãw

¹ A Tɔl-gãw cuw na tɩ cɛ bibie ayʋɔb a, a Yeezu tɩ ta n a Betani. Be n'a a Lazaar, ʋ na tɩ ɩ ʋ lɛb ìr a kũuni pʋɔ a, tɩ kpɩɛr.

² Bɛ tɩ ɩ n bʋ̃-dɩrɩ a ʋ ƴãw: Marta tɩ dier'ɩ a bʋ̃-dɩrɩ tɩrɛ, ɛ́ a Lazaar tɩ pʋɔ a nɩbɛ pʋɔ zɩ̃ a dɩb ƴãw.

³ A Marya tɩ de nɩ litɩr ŋmãa kãa-nyũu kãw bɛ na maal'ɩ náàr mɩŋa a, ɛ́ a daarʋ bɛ gbʋ́r a, cir ƴãw a Yeezu gbɛ́ɛ ƴãw ɛ́ fɩɛlɩ a nɩ a ʋ zukɔbɛ. A nyũu tɩ ìr'a paalɩ a yir za.

⁴ A lɛ n'a a po-tuurbɛ ƴen sob, a Zuda Ɩsɩkarɩɔtɩ, a ʋl na na mɩl a Yeezu nyɔw tɩr a, tɩ yel:

⁵ «Bʋ̃ʋ pãa ɩ bɛ bɛ kʋɔrɩ a kãa-nyũu á ŋá, bibie kɔbr ata (300) sã-ya libie kʋ̀ a nan dem a!»

⁶ Nan dem sõwfʋ tɩɛrʋ bɛ n'a ʋ tɩ tɛr ƴɛ̀r'ɩ à à ŋá ɩ. Nyãnyuge tɩ n'ʋ. Ʋlɛ n'ʋ mɩ́ tɩ tɛr a bɛ wɛr-wʋɔ zure íre a libie bɛ na mɩ́ ƴãwnɛ a.

⁷ A lɛ n'a a Yeezu tɩ yel: «Bɛr ʋ! Ʋ tu n à à ŋá a ɩ̃ ũufʋ ƴãw.

⁸ Nan dem be n a nyɩ zie kʋralɛ, ɛcɛ a mãa a, ɩ̃ kʋ̃ be a nyɩ zie kʋralɛ ɩ.»

A bàwr-maal-nɩ-bɛrɛ bɔbr'ɩ a Lazaar kʋb

⁹ A Zifʋ mɩnɛ yaga yaga tɩ wõ na kɛ́ a Yeezu be n a Betani. Bɛ tɩ zɔrɛ na waar kɛ́ bɛ wa nyɛ̃ ʋ, ɛ́ mɩ̀ nyɛ̃ a Lazaar ʋ na tɩ ɩ ʋ lɛb ìr a kũuni pʋɔ a.

¹⁰ A lɛ n'a a bàwr-maal-nɩ-bɛrɛ tɩ yel kɛ́ bɛ mɩ̀ na kʋ n a Lazaar,

¹¹ ʋlɛ na n'ʋ so a Zifʋ mɩnɛ yaga sàw de a Yeezu ɛ́ zawrɩ bɛ bɛr a.

A Yeezu kpɛ n a Zerizalɛm tẽw pʋɔ mɛ̃ nãà a

¹² A dãw-bio daarɩ́, a zu-sɛbla na bɛ dɩ vuo a na tɩ wa a cuw ƴãw a, tɩ wõ na kɛ́ a Yeezu tarɛ nɩ a Zerizalɛm.

¹³ Bɛ tɩ kár'ɩ kpãkparmɛ wuli yi tuore nɩ ʋ, cáarɛ nɩ yere nɩ: «Ozaana! A Naaŋmɩn, ʋ maalɩ a sob nɛ na waar a Sore yúor ƴãw a! A Naaŋmɩn, ʋ maalɩ a Ɩsɩrayɛl nãà!»

¹⁴ A Yeezu tɩ nyɛ̃ nɩ bõw bile do zɩ̃ a ʋ zu, a tu a Sɛb-sõw ƴɛ̀r-bie á ŋá:

¹⁵ «Sɩyɔ̃ tẽw i, ta zɔrɛ dɛ̃bɩ̃ɛ ɩ. A fʋ nãà n'ɩ ŋan waar, zɔm bõw-nyãw bile!»

¹⁶ A Yeezu po-tuurbɛ bɛ tɩ bãw a yel ŋa pɛr a daadaalɛ ɩ. Ɛcɛ a Yeezu na wa lɛb yi a kũu pʋɔ baarɩ nyɛ̃ yúor-vɩɛlʋ-danʋ a, bɛ lɛb'a tɩɛrɩ bãw kɛ́ a Sɛb-sõw tɩ yel'ɩ à á ŋá a ʋ ƴãw, nɩ kɛ́ a yel ŋa n'ʋ a nɩbɛ tɩ tu a ʋ ƴãw.

¹⁷ A zu-sɛbla na tɩ be be a ʋlɩ bibir a Yeezu na bʋɔlɩ a Lazaar ʋ yi a yaa pʋɔ a, ʋʋ ɩ ʋ lɛb vʋʋrɛ a, bɛ tɩ dɩrɛ nɩ a ʋ dãsɩɛ.

¹⁸ Bɛ na tɩ wõ k'ʋʋ maal'ɩ a yel ŋa na ɩ bãwfʋ sãá a, alɛ n'a so bɛ tɩ zɔ tuor'ʋ.

¹⁹ A lɛ n'a a Faarizɩ̃ɛ mɩnɛ tɩ yere kʋ̀rɛ taa: «Nyɩ nyɛ̃ a na: nyɩ kʋ̃ tʋ̃ɔ́ ɩ bom za ɩ: a tẽ-daa nɩbɛ za n'ɩ bɛ ŋa tuur ʋ!»

Gɩrɛkɩ bɛ mɩnɛ kãw bɔbr'ɩ a Yeezu nyɛ́b

²⁰ Gɩrɛkɩ bʋʋrɛ bɛ mɩnɛ kãw mɩ̀ tɩ pʋɔ na wa a Zerizalɛm a cuw daar, kɛ́ bɛ wa puori a Naaŋmɩn nɩ bɛ tʋɔra-siwru.

²¹ Bɛ tɩ taw na ta a Filib zie na yi Bɛtɩsayida a, Galile tẽw a, yel ʋ: «Sore e, tɩ bɔbr'a kɛ́ tɩ nãá nyɛ̃ a Yeezu.»

²² A Filib tɩ cen na tɩ yel kʋ̀ Ãdere, a Ãdere nɩ a Filib za cen tɩ yel kʋ̀ a Yeezu.

²³ A Yeezu tɩ sɔw bɛ nɩ à ŋá: «A daar ʋl a Nɩsaal Bie na na nyɛ̃ a yúor-vɩɛlʋ-danʋ a pãa ta na.

²⁴ Yel-mɩŋa sɩza sɩza n'a ɩ̃ yere kʋ̀rɛ nyɩ: a ka-bir wa lo a tẽw bɛ wɛ a, ʋ mɩ́ gã nɩ ʋ yõ. Ɛcɛ ʋlɛ wa wɛ a, ʋ mɩ́ wɔ̃ n wɔmɛ yaga.

²⁵ Ʋlɩ sob na nɔnɛ a ʋ nyɔ-vʋʋrʋ a, ʋ bɔrɛ ʋ na bɛrɛ, ɛ́ ʋlɩ sob na hɩ̃ɛn a ʋ nyɔ-vʋʋrʋ a tẽ-daa ŋa zu a, ʋ na maal'a tɛr ʋ a nyɔ-vʋʋrʋ na be kʋralɛ a ƴãw.

²⁶ Nɩr wa bɔbr k'ʋʋ tone a ɩ̃ tome a, ʋ tuur mɛ̃, ɛ́ zie nɛ za ɩ̃ na be a, be n'a a ɩ̃ tõ-tone mɩ̀ na be. Nɩr wa tone a ɩ̃ tome a, a ɩ̃ Sãà na ƴãwnɛ ʋ na.»

A Yeezu ƴɛ̀rɛ nɩ a ʋ kũu ƴɛ̀rʋ

²⁷ «Ɛcɛ a ƴɛrɛŋa a, a ɩ̃ tɩɛrʋ dam'a. Ɩ̃ yel kɛ́ bo? Kɛ́ a ɩ̃ Sãà faa mɛ̃ a daar ŋa yel-kpɩɛrɩ pʋɔ bɩɩ? Ɛcɛ a yel-kpɩɛrɩ daar ŋa tɔr za ƴãw n'a ɩ̃ wa.

²⁸ Ɩ̃ Sãà a, ɩ a fʋ yúor nyɛ̃ vɩɛlʋ-danʋ.» Kɔkɔr kãw tɩ ƴɛ̀r'a yi a salom zu yel: «Ɩ̃ ɩ na ʋ nyɛ̃ a yúor-vɩɛlʋ-danʋ, ɛ́ na lɛb ɩ ʋ nyɛ̃ ʋ.»

²⁹ A zu-sɛbla na tɩ àr a be ɛ́ wõ a a tɩ yel'a kɛ́ saa n'ʋ tanɩ. Bɛ mɩnɛ tɩ yel'a kɛ́ malkɩ n'ʋ ƴɛ̀r a ʋ zie.

³⁰ A Yeezu tɩ lɛb'a yel: «Mãa ƴãw bɛ n'a a kɔkɔr ŋa ƴɛ̀r nyɩ wõ ɩ, nyɩɩm ƴãw n'a.

³¹ A ƴɛrɛŋa n'a bɛ na maal'ɩ a tẽ-daa ŋa a ƴɛ̀rʋ. Ƴɛrɛŋa n'a bɛ na diw a tẽ-daa ŋa nãà bɛr.

³² Ɛ́ a mãa a, bɛlɛ wa bà m a tẽsɔw k'ɩ̃ zɛw do a, ɩ̃ na taw nɩ a nɩsaalbɛ za wa n a ɩ̃ zie.»

³³ Ʋ tɩ ƴɛ̀r'ɩ à à ŋá wul a kũu nɛ bʋʋrɛ ʋ nãà kpi a.

³⁴ A zu-sɛbla tɩ sɔw ʋ na: «A tɩ Naaŋmɩn wulu sɛbɛ pʋɔ, tɩ wõ na kɛ́ a Kɩrɩta na be n kʋralɛ. Ŋmɩŋmɩn n'a fʋ na tʋ̃ɔ́ yel kɛ́ a fɛr'a bɛ bà a Nɩsaal Bie ʋ zɛw do? Ãa n'ɩ a Nɩsaal Bie ŋa?»

³⁵ A Yeezu tɩ sɔw bɛ na: «A cãà na cãà nɩ a nyɩ sɔgɔ blãlɛ ƴãw. Nyɩ na tɛr a cãà a, nyɩ cere, kɛ̀ lige taa pile pàwr nyɩ ɛ. Sob nɛ na cere lige pʋɔ a bɛ bãw be ʋ na cere a ɩ.

³⁶ Nyɩ na tɛr a cãà a, nyɩ sàw de a cãà, tʋ̃ɔ́ lɩɛbɩ cãà bibiir.» A Yeezu na tɩ ƴɛ̀r à à ŋá baar'a, ʋ tɔl'a cen tɩ sɔwlɩ zãá nɩ bɛ.

A Zifʋ mɩnɛ bɛ sàw de a Yeezu ɛ

³⁷ A Yeezu na saa tɩ maalɩ a yele-na-ɩ-bãwfʋ-sãá sɛw à ŋá za a bɛ niŋé a, bɛ bɛ tɩ sàw de ʋ ɛ.

³⁸ Lɛ n'a a naaŋmɩn-ƴɛ̀r-manɛ Ɩzayi ƴɛ̀r-bie á ŋá tɩ tu: «Sore e, ãa n'ʋ sàw de a tɩ ƴɛ̀rʋ? Ãa n'ʋ a Sore wul a ʋ kpɛnʋ?»

³⁹ A Ɩzayi been nɛ n'ʋ tɩ yel a ʋlɩ bom nɛ na n'ʋ so bɛ kʋ̃ tʋ̃ɔ́ sàw de a.

⁴⁰ «Naaŋmɩn ɩ na bɛ zɔ̃w, ʋʋ ɩ a bɛ socie kpawlɩ, kɛ́ bɛ ta tʋ̃ɔ́ nyɛ̃ nɩ a bɛ mimie ɩ, kɛ́ bɛ ta tʋ̃ɔ́ bãw a pɛr ɛ, kɛ́ bɛ ta tʋ̃ɔ́ lɩɛbɩ a bɛ ɩb ɛ, ʋ ta tʋ̃ɔ́ sanɩ bɛ ɩ.»

⁴¹ A Ɩzayi na tɩ de niwn nyɛ̃ a Yeezu yúor-vɩɛlʋ-danʋ, ɛ́ ƴɛ̀r a ʋ ƴɛ̀rʋ a n'a so ʋ ƴɛ̀r à à ŋá.

⁴² Ɛcɛ a Zifʋ mɩnɛ nɩ-bɛrɛ pʋɔ a, nɩ-yaga tɩ sàw na de a Yeezu. Ɛcɛ bɛ tɩ zɔrɛ nɩ a Faarizɩ̃ɛ mɩnɛ, lɛ so bɛ bɛ mɩ́ tɩ sàw ƴɛ̀r a yi ɛ, kɛ́ bɛ taa wa diw bɛ bɛr a puoru-dĩó ɛ.

⁴³ Bɛ tɩ nɔnɛ nɩ a yúor a nɩsaalbɛ zie zuo a yúor ʋl na yi a Naaŋmɩn zie a.

A Yeezu ƴɛ̀rʋ n'ʋ na maal'ɩ a nɩsaalbɛ a ƴɛ̀rʋ

⁴⁴ A Yeezu tɩ zɛw nɩ kɔkɔr yel: «Sob nɛ na sàw de m a, mãa bɛ n'ʋ ʋ sàw de ɩ, a sob nɛ na tõ m a n'ʋ ʋ sàw de.

⁴⁵ Sob nɛ na nyɛ̃ m a, mɩ̀ nyɛ̃ nɩ a sob nɛ na tõ m a.

⁴⁶ A mãa na ɩ a cãà a, ɩ̃ wa n a tẽ-daa zu kɛ́ sob nɛ za na sàw de m a, ta be lige pʋɔ ɩ.

⁴⁷ Nɩr wa wõ a ɩ̃ ƴɛ̀rʋ ɛ́ bɛ dier a, mãa bɛ n'ʋ maalɛ nɩ a ʋ sob a ƴɛ̀rʋ ɛ: ɩ̃ bɛ wa k'ɩ̃ɩ wa maal'ɩ a tẽ-daa ƴɛ̀rʋ ɛ, ɩ̃ wa na k'ɩ̃ɩ wa faa a tẽ-daa.

⁴⁸ Sob nɛ na zawrɩ mɛ̃ bɛr ɛ́ bɛ dier a ɩ̃ ƴɛ̀rʋ a, tɛr'ɩ a ʋ ƴɛ̀r-maalɛ: a ƴɛ̀rʋ ɩ̃ na ƴɛ̀r a na yel'ɩ a ʋ sãwna a bibi-pɛ-baara wa vɩɛ a.

⁴⁹ Ɩ̃ bɛ nyɛ̃ ɩ̃ tʋɔra ƴɛ̀r ɛ, ɛcɛ a ɩ̃ Sãà na tõ m a n'ʋ wul mɛ̃ a lɛ ɩ̃ na na ƴɛ̀r a, nɩ bom nɛ a na sɛw k'ɩ̃ɩ wul a.

⁵⁰ Ɩ̃ɩ bãw na kɛ́ a ʋ wulu tɩrɛ nɩ nyɔ-vʋʋrʋ na be kʋralɛ a: bom nɛ za ɩ̃ na yere a, ɩ̃ yere na mɛ̃ a lɛ a ɩ̃ Sãà na yel kʋ̀ m a.»