Zã 10 - A SƐB-SÕW

A pi-cɩ̃ɩnɛ nɩ a ʋ píir zʋkpar

¹ «Yel-mɩŋa sɩza sɩza n'a ɩ̃ yere kʋ̀rɛ nyɩ, ʋlɩ sob na bɛ tuur a zaw dɩ̃dɔr ƴãw kpɩɛr a píir zaw pʋɔ, ɛ́ mɩ́ tu zi-yoru do kpɛ a, ʋ ɩ n nyãnyuge, nyãnyu-nɩ-kʋrɛ.

² Ɛcɛ ʋlɩ sob na mɩ́ tu a dɩ̃dɔr ƴãw kpɛ a, ʋlɛ n'ɩ a pi-cɩ̃ɩnɛ.

³ A dɩ̃dɔ-gùre mɩ́ yuo ʋ nɩ a dɩ̃dɔr, ɛ́ a píir bɛrɛ wone a ʋ kɔkɔr. Ʋ mɩ́ bʋɔl'ɩ a ʋ píir yée been been, ɛ́ kpa a yi n.

⁴ Ɛ́ ʋlɛ wa kpa a za yi n baar'a, ʋ mɩ́ de a nɩ niwn, ɛ́ a tuur ʋ, a na bãw a ʋ kɔkɔr a ƴãw.

⁵ A bɛ be za na tu nɩ-sãan ɛ, a na nɩ̃ɛ na mɩ́ zɔ, a na bɛ bãw a nɩ-sãanbɛ kɔkɔr a ƴãw.»

⁶ A zʋkpar ŋa n'ʋ a Yeezu tɩ lɔb kʋ̀ bɛ, ɛcɛ bɛ bɛ tɩ bãw bʋ̃ʋ n'ʋ ʋ bɔbr k'ʋʋ yel kʋ̀ bɛ a ɩ.

A Yeezu n'ɩ a pi-cɩ̃ɩn-vla

⁷ A Yeezu tɩ lɛb'a yel bɛ: «Yel-mɩŋa sɩza sɩza n'a ɩ̃ yere kʋ̀rɛ nyɩ: mãa n'ɩ a píir zaw dɩ̃dɔr.

⁸ A bɛlɩ dem za na de niwn wa a ɩ̃ ƴãw a, bɛ ɩ n nyãnyuwr, nyãnyu-nɩ-kʋrbɛ, ɛcɛ a píir bɛ bɛr wõ a bɛ ƴɛ̀rʋ ɛ.

⁹ Mãa n'ɩ a dɩ̃dɔr. Nɩr wa tuur a ɩ̃ zie kpɩɛr a, ʋ na nyɛ̃ nɩ faafʋ. Ʋ na mɩ́ kpɛ na ɛ́ yi, ʋʋ na nyɛ̃ nɩ bʋ̃-dɩrɩ.

¹⁰ Nyãnyuge bɛ waar, a bɛ ɩ zub nɩ kʋb nɩ sãw-bɛrʋ tɛwr ƴãw ɛ. Mãa wa na kɛ́ a nɩsaalbɛ wa tʋ̃ɔ́ páw a nyɔ-vʋʋrʋ, ɛ́ páw ʋ gʋr bɛr.

¹¹ Mãa n'ɩ a pi-cɩ̃ɩn-vla. A pi-cɩ̃ɩn-vla mɩ́ de nɩ a ʋ nyɔ-vʋʋrʋ tɩr a ʋ píir ƴãw.

¹² A libi-bɔbrɛ na bɛ ɩ a pi-cɩ̃ɩnɛ tɔr za a, ɛ́ mɩ̀ bɛ so a píir a, ʋlɛ mɩ́ wa nyɛ̃ a wɛ-baa ʋ waar a, ʋ mɩ́ zɔ na ɛ́ bɛr a píir, a wɛ-baa nyɔw a, ɛ́ diw a yaarɩ bɛr.

¹³ Libi-bɔbrɛ n'ʋ, ʋʋ tobr bɛ ka a píir ƴãw ɛ.

¹⁴ Mãa n'ɩ a pi-cɩ̃ɩn-vla. Ɩ̃ bãw nɩ a ɩ̃ píir ɛ́ a ɩ̃ píir bãw mɛ̃,

¹⁵ mɛ̃ a lɛ a ɩ̃ Sãà na bãw mɛ̃ ɩ̃ɩ bãw a ɩ̃ Sãà a. Ɩ̃ɩ dier'ɩ a ɩ̃ nyɔ-vʋʋrʋ tɩrɛ a ɩ̃ píir ƴãw.

¹⁶ Ɩ̃ cãà na tɛr píir a mɩnɛ na bɛ ɩ a zaw ŋa píir a, a fɛr'a k'ɩ̃ɩ mɩ̀ cɩ̃ɩnɛ a. A na bɛrɛ na wone a ɩ̃ ƴɛ̀rʋ, lɛ n'a zaw been yõ nɩ pi-cɩ̃ɩn-been yõ na be be.»

¹⁷ «A ɩ̃ Sãà nɔnɛ mɛ̃ na, ɩ̃ na dier a ɩ̃ nyɔ-vʋʋrʋ tɩrɛ k'ɩ̃ɩ tʋ̃ɔ́ lɛb páw ʋ a pùorí a ƴãw.

¹⁸ Nɩr za bɛ n'ʋ íre a ɩ̃ nyɔ-vʋʋrʋ ɛ, mãa mɩŋa n'ʋ dier a ɩ̃ nyɔ-vʋʋrʋ tɩrɛ. Ɩ̃ tɛr'ɩ fãw na tʋ̃ɔ́ de a ɩ̃ nyɔ-vʋʋrʋ tɩr, ɛ́ tɛr fãw na tʋ̃ɔ́ lɛb páw ʋ: a nʋɔr'ɩ à ŋà a ɩ̃ Sãà na ƴãw kʋ̀ m a.»

¹⁹ A ƴɛ̀r-bie á ŋá tɩ lɛb'a maal ƴãw bʋ́r-taa a Zifʋ mɩnɛ cara pʋɔ.

²⁰ A bɛ pʋɔ a, yaga tɩ yere na: «Ʋ ìre nɩ kɔ̃tɔmɛ! Ʋ yarɛ na! Bʋ̃ʋ n'ʋ so nyɩ bɛrɛ wone a ʋ ƴɛ̀rʋ?»

²¹ Ɛcɛ bɛ mɩnɛ tɩ yere na: «Kɔ̃tɔ̃-ìre ƴɛ̀rʋ bɛ n'ɩ à á ŋá ɩ. Kɔ̃tɔ̃-faa na tʋ̃ɔ́ na yuo zɔn mimie e?»

A Zifʋ mɩnɛ bɛ sàw de a Yeezu ɛ

²² A lɛn daar, bɛ tɩ maalɛ nɩ a Ŋmɩn-yir-kpɛ̃ɛ maalʋ cuw a Zerizalɛm. Ũo-yi-paala tɩ n'a.

²³ A Yeezu tɩ be n a Ŋmɩn-yir-kpɛ̃ɛ pʋɔ cɔlɛ viire a Salomɔ̃ bɛ-caar pʋɔ.

²⁴ A Zifʋ mɩnɛ tɩ ŋmãa na viiri koli ʋ ɛ́ sowr'ʋ: «Fʋ bɔbr'a kɛ́ tɩ bʋ́nɛ à ŋá a fʋ ƴãw ɛ́ gù debor? Fʋ̃ʋ wa n'ɩ a Kɩrɩta a, fʋ̃ʋ yel kʋ̀ tɩ daadaa!»

²⁵ A Yeezu tɩ sɔw bɛ na: «Ɩ̃ yel'a kʋ̀ nyɩ, ɛ́ nyɩ bɛ sàw de ɩ. A tome ɩ̃ na tone a ɩ̃ Sãà yúor ƴãw a, alɛ n'a dɩrɛ a ɩ̃ dãsɩɛ.

²⁶ Ɛcɛ nyɩ bɛ sàw de m ɛ, nyɩ na bɛ pʋɔ a ɩ̃ píir pʋɔ a ƴãw.

²⁷ A ɩ̃ píir bɛrɛ na wone a ɩ̃ ƴɛ̀rʋ, ɩ̃ bãw a na ɛ́ a tuur mɛ̃.

²⁸ Ɩ̃ kʋ̀rɛ nɩ a ɩ̃ píir a nyɔ-vʋʋrʋ na be kʋralɛ a: a kʋ̃ kpi towtow ɛ, ɛ́ nɩr kʋ̃ tʋ̃ɔ́ faa a a ɩ̃ nũú ɛ.

²⁹ A ɩ̃ Sãà na kʋ̀ m a píir a ɩ n kpɛ̃ɛ zuo bom za, ɛ́ nɩr za kʋ̃ tʋ̃ɔ́ faa bom a ɩ̃ Sãà nũú ɛ:

³⁰ mãa nɩ a ɩ̃ Sãà za ɩ n been.»

³¹ A Zifʋ mɩnɛ tɩ lɛb'a maal wob kʋsɛbɛ kɛ́ bɛ lɔb'ɩ ʋ.

³² Ɛcɛ a Yeezu tɩ lɛb'a yel bɛ: «Ɩ̃ wul nyɩ nɩ tõ-vɩɛlɩ yaga na yi a ɩ̃ Sãà zie a. A tõ-vɩɛlɩ á ŋá buor sob ƴãw n'a nyɩ bɔbr kɛ́ nyɩ lɔb'ɩ mɛ̃ a kʋsɛbɛ?»

³³ A Zifʋ mɩnɛ tɩ sɔw ʋ na: «Tõ-vla ƴãw bɛ n'a tɩ bɔbr kɛ́ tɩ lɔb'ɩ fʋ a kʋsɛbɛ ɩ. Fʋ na tʋ a Naaŋmɩn a n'a so: fʋ̃ʋ na ɩ nɩsaal a, fʋ de nɩ fʋ tʋɔra bʋɔlɛ Naaŋmɩn.»

³⁴ A Yeezu tɩ sɔw bɛ na: «A nyɩ Naaŋmɩn wulu sɛbɛ pʋɔ bɛ bɛ tʋ̃ɔ́ sɛb: “Ɩ̃ yel'a: nyɩ ɩ n naaŋmɩmɛ” ɩ?

³⁵ A na ɩ à ŋá a, a bɛlɩ dem na bɛrɛ wone a Naaŋmɩn ƴɛ̀rʋ a, a Naaŋmɩn wulu mɩ́ tʋ̃ɔ́ na bʋɔlɛ bɛ ŋmɩmɛ. Ɛcɛ nɩr kʋ̃ tʋ̃ɔ́ lɩɛbɩ a Sɛb-sõw ƴɛ̀rʋ bɛr ɛ.

³⁶ Ɛ́ a sob nɛ a Sãà na maalɩ ʋ ɩ sõw, ʋʋ tõ ʋ a tẽ-daa zu a, nyɩ yel ʋ na: “Fʋ tʋʋr'ɩ Naaŋmɩn”, ɩ̃ na háa nʋɔr yel k'ɩ̃ɩ ɩ n Naaŋmɩn Bie a ƴãw.

³⁷ Mãa bɛ wa tone a ɩ̃ Sãà tome a, nyɩɩm ta sàw de m ɛ!

³⁸ Ɛcɛ mãa wa tone a a, nyɩmɛ saa bɛ sàw de m a, nyɩɩm sàw de a tome á ŋá, kɛ́ nyɩ tʋ̃ɔ́ bãw ɛ́ sàw kɛ́ a ɩ̃ Sãà sɩrɩ na lãw nɩ mɛ̃, mɛ̃ a lɛ ɩ̃ na lãw nɩ a ɩ̃ Sãà a.»

³⁹ A lɛ n'a bɛ lɛb tɩ maal bɔbr a ʋ nyɔwfʋ, ɛcɛ bɛ bɛ tɩ páw ʋ nyɔw ɛ.

⁴⁰ A Yeezu tɩ lɛb'a cen a Zurdɛ̃ man gãwn, tɩ be a be a Zã na tɩ tĩ tɩrɛ a suob a.

⁴¹ Nɩ-yaga tɩ cen nɩ a ʋ zie, ɛ́ tɩ yere: «Sɩza n'a, a Zã bɛ maalɩ yel kãw za na ɩ bãwfʋ sãá a ɩ, ɛcɛ a yele al za ʋ na tɩ yel a nɩr ŋa ƴãw a ɩ n sɩza.»

⁴² Nɩ-yaga tɩ sàw na de ʋ a be.