Ƴɛ̀r-dɩrbɛ 8 - A SƐB-SÕW

A Efarayim nɩbɛ nyɛ̃ nɩ nɩ a Zedeɔ̃ suur

¹ A Efarayim nɩbɛ tɩ yel'ɩ a Zedeɔ̃: «A pɛr'ɩ bʋnʋ fʋ na ɩ tɩ à ŋá a, fʋ na cen tɩ zɛb'ɩ a Madian tẽw dem ɛ́ bɛ bʋɔlɩ tɩ a?» Ɛ́ tɩ zɛbr'ɩ ʋ faa faa.

² Ɛcɛ a Zedeɔ̃ tɩ sɔw bɛ na: «Bʋ̃ʋ gãda-tome n'a ɩ̃ tõ man a nyɩ dem? Efarayim nɩbɛ ɛ, a blã al nyɩ na tʋ̃ɔ́ ɩ a, a bɛ zuo a mãa mɩŋa dɔwlʋ, a Aviezɛɛr dɔwlʋ gãda-tome za ɩ?

³ A nyɩ nuru pʋɔ n'a a Naaŋmɩn ƴãw a Madian tẽw dem na-mɩnɛ, a Orɛvʋ nɩ Zɛvʋ. Bʋ̃ʋ n'ʋ ɩ̃ ɩ a ta à à ŋá?» Bɛ na dɛ wa wõ a Zedeɔ̃ ƴɛ̀r-bie á ŋá a, a bɛ suur tɩ ɓã nɩ a ʋ ƴãw.

A zɛbr a Zedeɔ̃ na zɛb a Zurdɛ̃ saa-pɛrɩ́ a

⁴ A Zedeɔ̃ nɩ a nɩbɛ kɔbr ata (300) tɩ ta n a Zurdɛ̃ kpɛ gãw. Bɛ na saa tɩ bàl bàl a, bɛ tɩ cãà na diwr a bɛ dɔ̃ dem.

⁵ Bɛ tɩ ta n a Sukotɩ tẽw, a Zedeɔ̃ yel a tẽw dem: «Ɩ̃ zɛlɛ nyɩ na, nyɩ kʋ̀ dipɛ̃-vilovilo a nɩbɛ na tuur mɛ̃ a, bʋ̃ʋ n'ʋ vɛ̃, bɛ bàl'a, ɩ̃ɩ diwr a Madian tẽw dem na-mɩnɛ Zeva nɩ Salimuna.»

⁶ Ɛcɛ a Sukotɩ nɩ-bɛrɛ tɩ sɔw na: «Fʋ ƴãw nɩ a Zeva nɩ a Salimuna nũú baarɩ, ɛ̀ tɩ na kʋ̀rɛ bʋ̃-dɩrɩ a fʋ sojarɩ ɩ?»

⁷ A Zedeɔ̃ tɩ sɔw bɛ na: «Lɛ̀ɛ! A Sore wa ƴãw mɛ̃ a Zeva nɩ a Salimuna nũú a, wɛja-kpalɛ pʋɔ gʋʋr nɩ mɔ̃-gʋʋr'a ɩ̃ na fɔb'ɩ nyɩ.»

⁸ A Zedeɔ̃ tɩ yi n a be ɛ́ do Penuwɛl, lɛb tɩ ƴɛ̀r a lɛ tɔr za a Penuwɛl nɩbɛ zie, bɛ mɩ̀ sɔw mɛ̃ a lɛ tɔr za a Sukotɩ nɩbɛ na tɩ sɔw a.

⁹ A Zedeɔ̃ mɩ̀ yel a Penuwɛl nɩbɛ: «Mãa wa lɛb wa n ƴã-ɓaarʋ a, ɩ̃ na ŋmɛ n a nyɩ tẽw yir-cõcowla ŋmɛr.»

¹⁰ A Zeva nɩ a Salimuna tɩ be n Karkɔɔr nɩ a bɛ sojarɩ na tɩ cɛ nɩbɛ tùr-pie nɩ anũu (15 000) tɛwr a. A Saa-pɛrɩ́ nɩ-yʋɔrɩ zɛbr-nɩbɛ na tɩ cɛ a n'ɩ a lɛ, bʋ̃ʋ n'ʋ vɛ̃, sojarɩ tùr-lɩz'a ayʋɔb (120 000) tɩ kpi n a zɛbr zie.

¹¹ A Zedeɔ̃ tɩ tu n a nɩ-yʋɔrɩ sɔ́r na be a Nova nɩ a Yogboha saa-pɛrɩ́ a, do tɩ zɛb tʋ̃ɔ́ a ʋ dɔ̃ dem na tɩ tɩɛrɛ kɛ́ bom bɛ damnɛ bɛ a.

¹² A Madian tẽw dem na-mɩnɛ Zeva nɩ a Salimuna tɩ nyɔw nɩ zɔba, ɛcɛ a Zedeɔ̃ tɩ diw na nyɔw bɛ, ɛ́ ɩ dɛ̃bɩ̃ɛ nyɔw a bɛ zɛbr-nɩbɛ za.

¹³ A Yowasɩ bidɛb Zedeɔ̃ na tɩ yi a zɛbr zie tu a Hɛrɛsɩ sɔ́r lɛb waar a,

¹⁴ ʋ tɩ nyɔw nɩ Sukotɩ tẽw pɔlbile kãw sowr'ʋ, ʋ sɛb a tẽw nɩ-bɛrɛ nɩ a nɩ-kore yée kʋ̀ ʋ, bɛ za tɩ ɩ n nɩbɛ lɩz'a ata nɩ pie nɩ ayopõi.

¹⁵ A lɛ n'a a Zedeɔ̃ tɩ cen a Sukotɩ nɩbɛ zie tɩ yel bɛ à ŋá: «Nyɩ nyɛ̃ a Zeva nɩ a Salimuna: bɛl ƴãw n'a nyɩ tɩ ɩ m la yel à ŋá: “Fʋ so nɩ a Zeva nɩ a Salimuna baarɩ, ɛ̀ tɩ na kʋ̀rɛ bʋ̃-dɩrɩ a fʋ sojarɩ na bàl a?”»

¹⁶ Ʋ tɩ de nɩ wɛja-kpalɛ pʋɔ gʋʋr nɩ mɔ̃-gʋʋr wul'ɩ a Sukotɩ tẽw nɩ-kore yã.

¹⁷ Ʋ mɩ̀ tɩ ŋmɛ n a Penuwɛl tẽw yir-cõcowla ŋmɛr, ɛ́ kʋ a tẽw nɩbɛ.

¹⁸ Al pùorí, a Zedeɔ̃ tɩ sowr'ɩ a Zeva nɩ a Salimuna: «A nɩbɛ bɛl nyɩ na kʋ a Tabɔɔr a, bɛ tɩ ŋmɛ n ŋmɩŋmɩn?» Bɛ sɔw: «Bɛ tɩ ŋmɛ̃ na mɛ̃ a fʋ̃ʋ a, bɛ kãw za mɩ́ tɩ ɩ na mɛ̃ nãà bie a.»

¹⁹ Lɛ n'a a Zedeɔ̃ tɩ yel bɛ: «Ɩ̃ yɛbr tɩ nɛbɛ, a ɩ̃ mã bibiir! Ɩ̃ pɔ n nɩ a Sore na vʋʋrɛ a, nyɩmɛ bɛ tɩ kʋ bɛ a, ɩ̃ bɛ tɩ kʋrɛ nyɩ ɛ!»

²⁰ Al pùorí, ʋ yel a ʋ bidɛb-kpɛ̃ɛ Yetɛɛr: «Ìr kʋ bɛ!» Ɛcɛ a pɔl bɛ tɩ sàw vʋ̃ɔ a ʋ zɛbr-sɔ-kpɛ̃ɛ ɩ, bʋ̃ʋ n'ʋ vɛ̃, ʋ tɩ cãà na ɩ pɔlbile, ɛ́ tɩ zɔrɛ dɛ̃bɩ̃ɛ.

²¹ Lɛ n'a a Zeva nɩ a Salimuna tɩ yel a Zedeɔ̃: «Ìr kʋ tɩ fʋ mɩŋa, dɛb'ʋ na tʋ̃ɔ́ tõ à à ŋá!» Lɛ n'a a Zedeɔ̃ tɩ ìr kʋ a Zeva nɩ a Salimuna, ɛ́ de a pɩ̃ɛmɛ na tɩ ƴãw a bɛ nyɔ̃wmɩ nyurú a.

A Zedeɔ̃ nyɔ-vʋʋrʋ baarʋ

²² A yele á ŋá pùorí a, a Ɩsɩrayɛl nɩbɛ tɩ yel'ɩ a Zedeɔ̃: «Dɩrɛ naalʋ a tɩ zu a fʋ̃ʋ tɔr za, a pùorí, a ɩ a fʋ bidɛb, a pùorí, a ɩ a fʋ yãw, bʋ̃ʋ n'ʋ vɛ̃, fʋ faa tɩ nɩ a Madian tẽw dem nuru pʋɔ.»

²³ A Zedeɔ̃ tɩ sɔw bɛ na: «Mãa bɛ n'ʋ na dɩrɛ naalʋ a nyɩ zu ɛ, ɛ́ a mɩ̀ kʋ̃ ɩ a ɩ̃ bidɛb'ʋ ɛ. A Sore n'ʋ na dɩrɛ naalʋ a nyɩ zu.»

²⁴ Ɛ́ tɩ yel ƴãw pʋɔ: «Ɩ̃ bɔbr'a k'ɩ̃ɩ zɛlɩ bom kãw a nyɩ zie: a nyɩ kãw za, ʋ mɩ́ kʋ̀ m nũ-tʋʋr a ʋ zɛbr bome ʋ na de a pʋɔ.» A Madian tẽw dem tɩ sɩrɩ na tɛr salm-zɩɛ nũ-tʋɛ, bɛ na tɩ ɩ Ɩsɩmayɛl bʋʋrɛ a ƴãw.

²⁵ Bɛ tɩ sɔw ʋ na: «Tɩ na kʋ̀ b a.» Bɛ tɩ de nɩ kpar-kpɛ̃ɛ yɛ́r, ɛ́ ŋa za mɩ́ lɔb nũ-tʋʋr been ʋ na de a zɛbr bome pʋɔ a ƴãw.

²⁶ A nũ-tʋɛ a Zedeɔ̃ na tɩ zɛlɩ a, a tɩbrʋ za tɩ faar'a na ta kilo lɩzɛr, ɛ́ bɛ bɛ sɔ́r a pɩ̃ɛmɛ ƴãw ɛ, nɩ a tokpamɛ nɩ a Madian tẽw dem na-mɩnɛ kpar-zɩɩr zɩɩr vɩɛlɩ vɩɛlɩ nɩ a kɔkɔr bamɛ a bɛ nyɔ̃wmɩ na tɩ ƴãw a kɔkɛ̃ɛ́ a ɩ.

²⁷ A Zedeɔ̃ tɩ de nɩ a salm-zɩɛ al maal'ɩ ŋmɩn kãw dasule, bin a ʋ tẽw Ofɩra. A Ɩsɩrayɛl nɩbɛ za tɩ tĩ na puore a dasule ŋa. À ŋá n'a ʋ tɩ lɩɛbɩ bɛra a Zedeɔ̃ nɩ a ʋ yir dem ƴãw.

²⁸ À ŋá n'a a Madian tẽw dem tɩ lo ɛ́ a Ɩsɩrayɛl nɩbɛ so bɛ, ɛ́ bɛ bɛ lɛb ìr a bɛ loba ŋa zu towtow ɛ. A tẽw tɩ tɛr'ɩ ƴã-ɓaarʋ yome lɩz'a ayi, a Zedeɔ̃ cãafʋ daar za.

²⁹ A Yowasɩ bidɛb, Yerubaal, a pɛr lɛ k'aa Zedeɔ̃, tɩ lɛb'a kul tɩ kpɩɛr a ʋ yir.

³⁰ Ʋ tɩ dɔw nɩ bidɛbr lɩz'a ata nɩ pie, ʋ na tɩ tɛr pɔw-yaga yaga a ƴãw.

³¹ A ʋ pɔw-bile kãw na tɩ kpɩɛr a Sɩsɛm a, mɩ̀ tɩ dɔw nɩ bidɛb kʋ̀ ʋ, ʋ por kɛ́ Abimelɛkɩ.

³² A Yowasɩ bidɛb Zedeɔ̃ tɩ wõ n nʋ̃ɔ̀ a ʋ koru pʋɔ ɛ́ bãw kpi, bɛ ũù ʋ a ʋ sãà Yowasɩ yaa pʋɔ, a Aviezɛɛr tẽw Ofɩra.

³³ Ɛcɛ a Zedeɔ̃ kũu pùorí a, a Ɩsɩrayɛl nɩbɛ tɩ lɛb'a tĩ puore a Báàl mɩnɛ. Bɛ tɩ de nɩ Báàl-Beritɩ ʋ ɩ a bɛ ŋmɩn,

³⁴ ɛ́ bɛ yiiri a Sore bɛ Naaŋmɩn bɛr, ʋl na tɩ faa bɛ a bɛ dɔ̃ dem na tɩ viiri koli bɛ a nuru pʋɔ a.

³⁵ A vla al za a Zedeɔ̃ mɩ̀ na dɩ Yerubaal a na saa tɩ maalɩ a Ɩsɩrayɛl nɩbɛ ƴãw a, bɛ bɛ tɩ tɛr a tɩɛrʋ kãw za a ʋ yir dem zie ɩ.