Ƴɛ̀r-dɩrbɛ 7 - A SƐB-SÕW

A Zedeɔ̃ zɛb'a tʋ̃ɔ́ a Madian tẽw dem

¹ Biɓaar-pipi, a Zedeɔ̃ mɩ̀ na dɩ Yerubaal a tɩ ìr'a lo a sɔ́r, ʋlɛ nɩ a ʋ sojarɩ, cen tɩ maalɩ a bɛ laɩ pɩɛlɩ a Harɔdɩ bul-nʋɔr, ɛ́ a Madian tẽw dem laɩ be a nidaa a saa-pɛrɩ́-gʋba-lowr, a Moore tãw ƴãw, a tɩ̃tal pʋɔ.

² A Sore tɩ yel'ɩ a Zedeɔ̃: «A fʋ sojarɩ yãwmɛ na zuo, nɩ ɩ̃ na na ɩ bɛ zɛb tʋ̃ɔ́ a Madian tẽw dem a. A Ɩsɩrayɛl nɩbɛ nãà pɔrɛ na, k'aa bɛl mɩŋa fãw n'a bɛ zɛb tʋ̃ɔ́ nɩ, ɛ́ de yúor na ɩ a mãa dem a.

³ A na ɩ à ŋá a, yel à ŋá kʋ̀ a fʋ nɩbɛ: “Nɩr za dɛ̃bɩ̃ɛ na ɩrɛ ʋ màwr a, ʋ lɛb tu a Galaadɩ tãw sɔ́r kul.”» Nɩbɛ tùr-lɩzɛr'ɩ ayi (22 000) a bɛ pʋɔ tɩ lɛb'a kul, ɛ́ cɛ nɩbɛ tùr-pie (10 000).

⁴ Ɛcɛ a Sore tɩ yel'ɩ a Zedeɔ̃: «A fʋ nɩbɛ bɛ ŋa cãà na yãwmɛ zuo. Ƴãw bɛ siw a kʋ̃ɔ nʋɔr, ɩ̃ɩ na tɩ ɩ bɛ na kaa kʋ̀ b. Ɩ̃ na tɩ yel'a kʋ̀ b sob nɛ na na páw fʋ cen, nɩ sob nɛ na kʋ̃ páw fʋ cen na.»

⁵ Lɛ n'a a Zedeɔ̃ tɩ ƴãw a ʋ sojarɩ siw a kʋ̃ɔ nʋɔr. Al pùorí, a Sore tɩ yel ʋ na: «Ƴãw nɩr za na nyúur a kʋ̃ɔ nɩ a zɛl, mɛ̃ a lɛ a baa na mɩ́ nyũ a kʋ̃ɔ a, ʋ tʋɔra zie, ɛ́ mɩ́ ƴãw nɩr za na gbine dume nyuur a kʋ̃ɔ a, ʋ tʋɔra zie.»

⁶ Nɩbɛ kɔbr ata (300) n'a tɩ kal a kʋ̃ɔ nyũ nɩ a bɛ nũu, ɛ́ a ŋmaarɛ bɛl za gbĩ a dume nyũ.

⁷ A Sore tɩ yel'ɩ a Zedeɔ̃ à ŋá: «A nɩbɛ kɔbr ata (300) bɛ ŋa na kal a kʋ̃ɔ nyũ a nɛbɛ ɩ̃ na faa nɩ nyɩ, bɛlɛ nɛbɛ na ɩ ɩ̃ ƴãw a Madian tẽw dem a fʋ nuru pʋɔ. A ŋmaarɛ bɛl na cɛ a, bɛ lɛb kul bɛ za a bɛ yie pʋɔ.»

⁸ A Zedeɔ̃ tɩ tɛr'ɩ a nɩbɛ kɔbr ata (300) bɛl, ɛ́ bɛr a Ɩsɩrayɛl nɩbɛ ŋmãa bɛl na cɛ a, bɛ lɛb kul, ɛcɛ bɛ tɩ de nɩ a bɛl na lɛb kule a bʋ̃-dɩrɩ nɩ a bɛ wɩɩr. A Madian tẽw dem laɩ tɩ be n a Zedeɔ̃ laɩ pile, a tɩ̃tal pʋɔ.

A Zedeɔ̃ bãwnɩ a na ʋ na na zɛb tʋ̃ɔ́ a

⁹ A ʋlɩ tɩ̃ɩsɔw nɛ a, a Sore tɩ yel'ɩ a Zedeɔ̃ à ŋá: «Ìr, siw tɩ zɛb'ɩ a Madian tẽw dem laɩ, ɩ̃ de ʋ na ƴãw a fʋ nuru pʋɔ.

¹⁰ Ɛcɛ fʋ̃ʋ wa zɔrɛ a siwfʋ dɛ̃bɩ̃ɛ a, fʋ̃ʋ de niwn tɛr a fʋ tõ-tõ-bie Puura siw nɩ.

¹¹ Fʋ na tɩ wõ n a lɛ bɛ na yere a be a, al pùorí fʋ na tɛr'ɩ kanyir dɔwlɩ a zɛbr ƴãw.» Lɛ n'a a Zedeɔ̃ tɩ tɛr a ʋ tõ-tõ-bie bɛ siw tɩ pɩɛlɩ a laɩ yɩ̃ɛlɛ, a be a soja-dãw-niwn dem na be a.

¹² A Madian tẽw dem, a Amalesitɩ mɩnɛ nɩ a Saa-pɛrɩ́ nɩ-yʋɔrɩ tɩ yɛ́r'a pàw a tɩ̃tal, yãwmɛ mɛ̃ sãsowe a. A bɛ nyɔ̃wmɩ tɩ yãwmɛ na mɛ̃ kʋ̃ɔ-kpɛ̃ɛ nʋɔr biire a, bɛ tɛr sɔ́rʋ ɛ.

¹³ A lɛ a Zedeɔ̃ na tɩ tarɛ a, nɩr kãw tɩ manɛ nɩ zánʋ ʋ na zánɩ a kʋ̀rɛ a ʋ tɔ. Ʋ tɩ yere na: «Fʋ nyɛ̃ na a, ɩ̃ zanɩ na nyɛ̃ ɔɔzʋ dipɛ̃-ɓil, ʋ bile gʋɔr a tɩ laɩ pʋɔ, tɩ ŋmɛ pɛn-sɛw kãw, ŋmɛ ʋ lɔb ʋ lo pili pili gã.»

¹⁴ A ʋ tɔ sob tɩ sɔw ʋ na: «A dɛ bɛ tɛr bʋnʋ ɛ, bom za bɛ n'ʋ ɛ, a Ɩsɩrayɛl nɩr Yowasɩ bidɛb Zedeɔ̃ zɛbr-sɔ-kpɛ̃ɛ n'ʋ. Naaŋmɩn de nɩ a Madian tẽw dem nɩ a bɛ laɩ za ƴãw a ʋ nuru pʋɔ.»

¹⁵ A Zedeɔ̃ na wa wõ a zánʋ ŋa nɩ a ʋ pɛr a, ʋ tɩ gbĩ n dume gũu tɩ tɔ tẽw, puori a Naaŋmɩn yãanɩ, al pùorí, ʋ lɛb cen a Ɩsɩrayɛl nɩbɛ laɩ pʋɔ tɩ ŋmɛ cɛl yel: «Nyɩ ìr, a Sore ƴãw nɩ a Madian tẽw dem laɩ a nyɩ nuru pʋɔ!»

A Zedeɔ̃ nɩ a ʋ nɩbɛ zɛb'a tʋ̃ɔ́ a Madian tẽw dem

¹⁶ A Zedeɔ̃ tɩ nyɔw nɩ a nɩbɛ kɔbr ata (300) bɛl põ ziir ata. Ʋ tɩ kʋ̀ n ŋa za wɩ́ɛ nɩ duwli-zawlɛ nɩ mɔ̃-'lena vũu, bɛ na na ƴãw a duwle pʋɔ a.

¹⁷ Al pùorí, ʋ tɩ yel bɛ na: «Nyɩ jɩ́rɛ a ɩ̃ lowr, ɛ́ ɩrɛ a lɛ tɔr za ɩ̃ na na ta pɩɛlɩ a bɛ laɩ ɩrɛ a.

¹⁸ Mãa wa pɛblɩ a wɩ́ɛ, mãa nɩ a nɩbɛ bɛl na bɩɛlɛ mɛ̃ a, nyɩɩm mɩ̀ pɛblɩ a wɩ́ɛ viiri kol'ɩ a bɛ laɩ, ɛ́ ŋmɛ cɛl yel: “A Sore ƴãw, nɩ Zedeɔ̃ ƴãw!”»

¹⁹ A zie tɩ cɛ nɩ blã na bɩ põ-zɛ̃-taa, ɛ́ a Zedeɔ̃ nɩ a ʋ nɩbɛ kɔbr ata (300) pɩɛlɩ a laɩ. Bɛ tɩ lɩɛrɛ nɩ a laɩ-gùrbɛ wa báarɛ, ɛ́ bɛ ta. Bɛ tɩ pɛbl'ɩ a wɩ́ɛ, ɛ́ lɔb a duwli bɛ na ƴãw a nurú a ŋmɛr.

²⁰ Lɛ n'a a kɔbr kɔbr ziir ayi nɩbɛ na tɩ cɛ a mɩ̀ pɛblɩ a wɩ́ɛ, ɛ́ lɔb a duwli ŋmɛr. Bɛ tɩ tɛr'ɩ a mɔ̃-'lena vũu nɩ gʋba, ɛ́ tɛr a wɩɩr nɩ dʋrʋ, pɛblɛ ɛ́ cɩɩrɛ yere: «Tɩ zɛb a Sore ƴãw nɩ a Zedeɔ̃ ƴãw!»

²¹ Bɛ tɩ ŋmãa na viiri koli a laɩ, ɛ́ ŋa za àr a ʋ àrʋ zie. Ɛcɛ a laɩ pʋɔ a, a tɩ ɩ n dãw-taa, bɛ ŋmɩɛr cɛlsɩ zɔrɛ nɩ.

²² A nɩbɛ kɔbr ata (300) na tɩ pɛblɛ a wɩ́ɛ a lɛn daar a, a Sore tɩ ɩ na a Madian tẽw dem lɛb ŋmɛlɩ cɔ̀rɛ taa kʋrɛ a laɩ za pʋɔ. A bɛl na wa cɛ a tɩ zɔ na tɩ ta Bɛtɩ-Sɩta, Serera lowr, ɛ́ tɩ ta Avɛl-Mehola tẽw na pɩɛlɩ Tabatɩ a.

²³ Bɛ tɩ bʋɔl'ɩ a Ɩsɩrayɛl nɩbɛ a Nɛfɩtali, a Asɛɛr nɩ a Manase dɔwlʋ pʋɔ bɛ wa diw a Madian tẽw dem.

²⁴ A Zedeɔ̃ tɩ tõ n nɩbɛ, a Efarayim tan vuo pʋɔ, bɛ tɩ hieri yel: «Nyɩ siw so a Zurdɛ̃ gãwfʋ ziir za tɩ ta n a Bɛtɩ-Bara, piw a Madian tẽw dem a tɔlʋ zie.» Lɛ n'a bɛ tɩ bʋɔlɩ a Efarayim nɩbɛ za bɛ siw so a Zurdɛ̃ gãwfʋ ziir za tɩ ta n a Bɛtɩ-Bara.

²⁵ Bɛ tɩ nyɔw nɩ a Madian tẽw dem na-mɩnɛ ayi Orɛvʋ nɩ Zɛvʋ. Bɛ tɩ kʋ n a Orɛvʋ, a Orɛvʋ pìir ƴãw, ɛ́ kʋ a Zɛvʋ, a Zɛvʋ tɩ-wɔmɛ nɛbrʋ zie. Al pùorí, bɛ cãà ta tu a Madian tẽw dem. Bɛ tɩ lɛb'a gãw wa n a Orɛvʋ nɩ a Zɛvʋ zuru a Zurdɛ̃ gãwn ŋa wa kʋ̀ a Zedeɔ̃.