Ƴɛ̀r-dɩrbɛ 6 - A SƐB-SÕW

A Madian tẽw dem dɔwrɛ nɩ a Ɩsɩrayɛl nɩbɛ

¹ A Ɩsɩrayɛl nɩbɛ tɩ lɛb'a maal ɩrɛ a bɛ pɛlɛ a Sore pʋɔ ɩ, a Sore de bɛ ƴãw a Madian tẽw dem nuru pʋɔ, yome ayopõi.

² A Madian tẽw dem tɩ dɔwr'ɩ a Ɩsɩrayɛl faa faa. A bɛl ƴãw a, a Ɩsɩrayɛl nɩbɛ tɩ zɔ na cen tɩ kpɩɛr a tan cará, a tan bɔwrɩ pʋɔ, nɩ tan a dob na kpɛmɛ a zu.

³ Kʋrakʋralɛ, a Ɩsɩrayɛl nɩbɛ na mɩ́ tɩ bʋ̀r a bɛ póru a, a Madian tẽw dem nɩ a Amalesitɩ mɩnɛ nɩ a Saa-pɛrɩ́ nɩ-yʋɔrɩ bɛ mɩnɛ kãw mɩ́ tɩ wa na wa ŋmãa nɩ bɛ a zɛbr.

⁴ Bɛ mɩ́ tɩ maal'ɩ a bɛ laɩ pɩɛlɩ a Ɩsɩrayɛl nɩbɛ, sãw a bɛ bʋ̃-kʋ́ɔrɩ bɛr, tɩ sãá nɩ a Gaza nʋɔr. Bɛ bɛ mɩ́ tɩ bɛr bʋ̃-dɩra kãw za kʋ̀ a Ɩsɩrayɛl nɩbɛ ɩ, bɛ bɛr bɛ píir, nĩi nɩ bòn ɛ.

⁵ Bʋ̃ʋ n'ʋ vɛ̃, bɛ mɩ́ tɩ tɛr'ɩ a bɛ dʋn nɩ a bɛ pɛnɛ-sɛwr cɔlɛ nɩ, mɩ́ tɩ ta yãwmɛ mɛ̃ sãsoge a. Bɛlɛ nɩ a bɛ nyɔ̃wmɩ tɩ yãwmɛ na, nɩr kʋ̃ tʋ̃ɔ́ sɔ́r bãw a nʋɔr ɛ. Bɛ mɩ́ tɩ kpɛ na so a tẽw za, sãwnɛ ʋ bɛrɛ.

⁶ À ŋá n'a a Madian tẽw dem tɩ ƴãw a Ɩsɩrayɛl nɩbɛ kpɩɛrʋ kpɛ̃ɛ pʋɔ, ɛ̀ bɛ kõ bʋɔlɩ a Sore k'ʋʋ wa faa bɛ.

⁷ A lɛn daar a Ɩsɩrayɛl nɩbɛ na tɩ kone bʋɔlɛ a Sore, k'ʋʋ wa faa bɛ a Madian tẽw dem nuru pʋɔ a,

⁸ a Sore tɩ tõ n naaŋmɩn-ƴɛ̀r-manɛ kãw a bɛ zie ʋ tɩ yel bɛ: «À ŋá n'a a Sore, a Ɩsɩrayɛl Naaŋmɩn yere: Mãa n'ʋ tɛr nyɩ yi n a Eziptɩ tẽw, nyɩ na tɩ ɩ gbãgbaar a.

⁹ Ɩ̃ faa nyɩ nɩ a Eziptɩ tẽw dem nuru pʋɔ, nɩ a bɛlɩ dem za na tɩ dɔwrɛ nyɩ a nuru pʋɔ. Ɩ̃ diw bɛ nɩ a nyɩ niŋé, ɛ́ de a bɛ tẽw kʋ̀ nyɩ.

¹⁰ Ɩ̃ yel nyɩ na: “Mãa n'ɩ a Sore, a nyɩ Naaŋmɩn. Nyɩ ta puore a Amoritɩ mɩnɛ tẽw nyɩ na kpɩɛr a ŋmɩmɛ ɩ!” Ɛcɛ nyɩ bɛ bɛr wõ a ɩ̃ ƴɛ̀rʋ ɛ!»

A Sore bʋɔl'ɩ a Zedeɔ̃ k'ʋʋ tɩ faa a Ɩsɩrayɛl

¹¹ A Sore malkɩ tɩ wa na wa zɩ̃ a Yowasɩ terebɛ̃tɩ tɩɛ pile, a Ofɩra tẽw. A Yowasɩ tɩ ɩ n Aviezɛɛr dɔwlʋ nɩr. A ʋ bidɛb Zedeɔ̃ tɩ vàrɛ nɩ a ble a tɩ-wɔmɛ nɛbrʋ zie, k'aa Madian tẽw dem ta nyɛ̃ ʋ ɛ.

¹² A Sore malkɩ tɩ ɩ na ʋ nyɛ̃ ʋ, ʋʋ yel ʋ: «Soja-gãdaa a, a Sore be n a fʋ zie!»

¹³ A Zedeɔ̃ sɔw ʋ: «Ɩ̃ nɩ-kpɛ̃ɛ ɛ, gaafara! A Sore wa be a tɩ zie a, bʋ̃ʋ n'ʋ so à á ŋá za ta tɩ? A nɔ-ɓãa-yele al za a tɩ sãà mɩnɛ na tɩ manɛ kʋ̀rɛ tɩ a, nyɩnɛ n'a a cen? A al bɛ na mɩ́ tɩ manɩ tɩ kʋ a nʋɔr yel: “Sɩrɛ bɛ n'a a Sore tɛr tɩ yi n a Eziptɩ ɛ?” Ɛ́ ƴɛrɛŋa a, a Sore jɛ tɩ na bɛr kʋ̀ a Madian tẽw dem.»

¹⁴ A Sore tɩ lɩɛb'ɩ a Zedeɔ̃ zie yel ʋ: «Cen nɩ a fãw fʋ na tɛr a, tɩ faa nɩ a Ɩsɩrayɛl a Madian tẽw dem nuru pʋɔ. Sɩza, mãa n'ʋ tone fʋ.»

¹⁵ A Zedeɔ̃ tɩ sɔw ʋ na: «Ɩ̃ Sore e, gaafara! Ŋmɩŋmɩn za n'a ɩ̃ na faa a Ɩsɩrayɛl? A Manase dɔwlʋ pʋɔ a, a ɩ̃ dɔwlʋ n'ʋ bɛ tɛr fãw ɛ, ɛ́ mãa n'ɩ a ɩ̃ sãà yir pʋɔ bɩr-baara.»

¹⁶ A lɛ n'a a Sore tɩ yel ʋ: «Ɩ̃ na be n a fʋ zie, ɛ́ fʋ na zɛb'a tʋ̃ɔ́ a Madian tẽw dem za mɛ̃ nɩ-been a.»

¹⁷ A Zedeɔ̃ lɛb yel ʋ: «Mãa wa sɩrɩ pɛlɩ a fʋ pʋɔ a, fʋ̃ʋ ɩ ɩb kãw ɩ̃ bãw kɛ́ fʋ̃ʋ n'ʋ sɩrɩ ƴɛ̀rɛ nɩ mɛ̃.

¹⁸ Ɩ̃ zɛlɛ fʋ na, taa cere zie ɩ, ɛ́ gù ɩ̃ tɩ lɛb wa, ɩ̃ cen tɩ de a de-kʋ̀b bom ɩ̃ na bɔbr k'ɩ̃ɩ kʋ̀ b a, lɛb wa n.» A Sore tɩ yel ʋ na: «Ɩ̃ na àr'a gù fʋ tɩ lɛb wa.»

¹⁹ A Zedeɔ̃ tɩ cen na tɩ nyɔw bʋle kʋ maalɩ, ɛ́ de kilo lɩzɛr'ɩ pie zɔ̃ maal'ɩ dipɛ̃ na bɛ ƴãw dãbɩl a. Ʋ tɩ ƴãw nɩ a nɛn pèlé pʋɔ, ɛ́ ƴãw a bɩ̃ɩ lale pʋɔ, de a za wa n a terebɛ̃tɩ tɩɛ pile wa kʋ̀ a Naaŋmɩn malkɩ.

²⁰ A malkɩ tɩ yel ʋ na: «Cen nɩ a nɛn nɩ a dipɛ̃ tɩ dɔwlɩ pìir ŋa zu, ɛ́ cir a bɩ̃ɩ ƴãw.» A Zedeɔ̃ tɩ ɩ a lɛ.

²¹ A Sore malkɩ tɩ tur'ɩ a dabɔl ʋ na tɩ ƴãw a nũú a, tɔ n a nɛn nɩ a dipɛ̃ na bɛ ƴãw dãbɩl a. Vũu tɩ ƴaw na yi a pìir pʋɔ dɩ a nɛn nɩ a dipɛ̃. Al pùorí, a malkɩ bɔr.

²² Lɛ n'a a Zedeɔ̃ tɩ bãw k'aa Sore malkɩ n'ʋ, ɛ́ ŋmɛ cɛl yel: «We, Sore Naaŋmɩn i, ɩ̃ nyɛ̃ nɩ a fʋ malkɩ nɩ mimir!»

²³ Ɛcɛ a Sore tɩ yel ʋ na: «A ƴã-ɓaarʋ, ʋ be a fʋ zie, ta zɔrɛ dɛ̃bɩ̃ɛ ɩ, fʋ bɛ kpiir ɛ.»

²⁴ A Zedeɔ̃ tɩ mɛ n bàwr-maal-kuur a be, por a yúor kɛ́: “Sore n'ɩ a ƴã-ɓaarʋ.” Nɩ dɩ̃a, a bàwr-maal-kuur ŋa cãà nɩ be a Ofɩra, a Aviezɛɛr dɔwlʋ pʋɔ.

A Zedeɔ̃ ŋmɛ n a Báàl bàwr-maal-kuur ŋmɛr

²⁵ A ʋlɩ tɩ̃ɩsɔw nɛ, a Sore tɩ yel'ɩ a Zedeɔ̃: «Nyɔw a fʋ sãà nadɛr, a ayi sob ʋl na tɛr a yome ayopõi a. Al pùorí, ŋmɛ a Báàl a fʋ sãà na puore a bàwr-maal-kuur ŋmɛr, ɛ́ cɛ̀ a dà-barɩ na àr kɔw ʋ a ŋma.

²⁶ Al pùorí, fʋ na mɛ n bàwr-maal-kuur, mɛ̃ a lɛ a na sɛw a, a Sore fʋ Naaŋmɩn ƴãw a tãw nyʋɔrɩ́, ɛ́ de a nadɛr maal'ɩ nyɩw-a-za-bàwr. A dà-bara fʋ na cɛ̀ ŋmãa a, ʋlɛ n'ʋ na ɩ a dàa a vũu ƴãw.»

²⁷ A Zedeɔ̃ tɩ kaa na ír dɛbr pie a ʋ tõ-tõ-biir pʋɔ, ɩ n a lɛ a Sore na tɩ yel kʋ̀ ʋ a. Ɛcɛ tɩ̃ɩsɔw n'a ʋ tɩ ɩ a lɛ, ʋ na tɩ zɔrɛ a ʋ sãà yir dem, nɩ a tẽw dem a ƴãw.

²⁸ A bio daarɩ́ biɓaar-pipi, a tẽw nɩbɛ tɩ nyɛ̃ na k'aa Báàl bàwr-maal-kuur gã nɩ tẽw, ɛ́ a dà-bara na àr kɔw ʋ a cɛ̀ ŋmãa, ɛ́ nyɛ̃ bɛ maalɩ nyɩw-a-za-bàwr nɩ a nadɛɛ ayi sob, a bàwr-maal-kuur na mɛ ƴɛrɛlɛ a zu.

²⁹ Bɛ tɩ sowre nɩ taa: «Ãa n'ʋ ɩ à à ŋá?» Bɛ tɩ sowr sowr'a, ɛ́ bɔ lɛɛɛ tɩ nyɛ̃ k'aa Yowasɩ bidɛb Zedeɔ̃ n'ʋ ɩ a lɛ.

³⁰ Lɛ n'a a tẽw nɩbɛ tɩ yel a Yowasɩ: «Tɛr a fʋ bidɛb yi wa n tɩ wa kʋ, bʋ̃ʋ n'ʋ vɛ̃, ʋ ŋmɛ n a Báàl bàwr-maal-kuur ŋmɛr, ɛ́ cɛ̀ a dà-bara na àr kɔw ʋ a ŋmãa.»

³¹ A Yowasɩ tɩ sɔw nɩ a bɛlɩ dem za na tɩ àr kɔw ʋ a: «Nyɩmɛ nɛbɛ na ƴɛ̀r faa a Báàl bɩɩ? Nyɩmɛ nɛbɛ na faa ʋ bɩɩ? Sob nɛ za nãà wa ƴɛ̀rɛ faarɛ a Báàl a, a fɛr'a k'ʋʋ kpi ɛ́ a zie bãw vɩɛ. A Báàl wa ɩ ŋmɩn a, ʋ̃ʋ ƴɛ̀r faa ʋ tʋɔra ʋ mɩŋa, a Zedeɔ̃ na ŋmɛ a ʋ bàwr-maal-kuur ŋmɛr a ƴãw!»

³² A ʋlɩ bibir'a bɛ bʋɔlɩ a Zedeɔ̃ kɛ́ Yerubaal, a pɛr lɛ kɛ́: “A Báàl, ʋ ƴɛ̀r faa ʋ mɩŋa”, a ʋ bàwr-maal-kuur na n'ʋ bɛ ŋmɛ ŋmɛr a.

A Zedeɔ̃ zɛlɛ nɩ bãwfʋ kãw a Naaŋmɩn zie

³³ A Madian tẽw dem nɩ a Amalesitɩ mɩnɛ nɩ a Saa-pɛrɩ́ nɩ-yʋɔrɩ tɩ ɓã n taa gãw a Zurdɛ̃, tɩ maalɩ a bɛ laɩ a Izireyɛl fʋɔla pʋɔ.

³⁴ A Sore Vʋʋrʋ tɩ paal'ɩ a Zedeɔ̃, ʋ pɛblɩ a wɩ́ɛ bʋɔl'ɩ a Aviezɛɛr dɔwlʋ nɩbɛ bɛ tu ʋ.

³⁵ Ʋ tɩ tõ n nɩbɛ a Manase tẽw, kɛ́ bɛ tɩ bʋɔlɩ a Manase dɔwlʋ nɩbɛ bɛ mɩ̀ wa tu ʋ. Ʋ tɩ cãà na lɛb tõ nɩbɛ a Asɛɛr, a Zabulɔ̃ nɩ a Nɛfɩtali dɔwlʋ pʋɔ, a nɩbɛ wa lãw nɩ ʋ.

³⁶ A Zedeɔ̃ tɩ yel'ɩ a Naaŋmɩn: «Fʋ yel'a kɛ́ fʋ na de m a faa nɩ a Ɩsɩrayɛl.

³⁷ Alɛ wa sɩrɩ ɩ sɩza a, ɩ̃ na yɛ́r'ɩ pɛrʋ-gan-kɔblʋ a ble vab gbãgbala pʋɔ. A tɩ̃ɩsɔw a, ɓɩɛlʋ wa lo a pɛrʋ-gan-kɔblʋ tɛwr zu, ɛ́ a tẽsɔw na viiri koli ʋ a ko gã a, ɩ̃ na sɩrɩ na bãw kɛ́ mãa n'ʋ fʋ na de faa nɩ a Ɩsɩrayɛl mɛ̃ a lɛ fʋ na yel a.»

³⁸ Ɛ́ a tɩ ɩ a lɛ. A bio daarɩ́ biɓaara a, a Zedeɔ̃ tɩ cen na tɩ ŋmɔwrɩ a pɛrʋ-gan-kɔblʋ, a ɓɩɛlʋ kʋ̃ɔ yi paalɩ kʋ̃ɔ-nyúur ŋmale.

³⁹ Lɛ n'a a Zedeɔ̃ tɩ yel a Naaŋmɩn: «Taa nyɛrɛ nɩ mɛ̃ suur, mãa wa lɛb zɛlɛ bom kãw a ɩ. Sàw ɩ̃ pãa baa lɛb ɩ a pɛrʋ-gan-kɔblʋ kaa: ƴɛrɛŋa ʋl a, a pɛrʋ-gan-kɔblʋ, ʋ ko gã, ɛ́ a ɓɩɛlʋ lo a tẽsɔw zu viiri koli.»

⁴⁰ A ʋlɩ tɩ̃ɩsɔw nɛ a, a Naaŋmɩn tɩ ɩ n a lɛ a Zedeɔ̃ na yel a: a pɛrʋ-gan-kɔblʋ yõ tɩ ko na gã, ɛ́ a ɓɩɛlʋ lo a tẽsɔw za na viiri koli a zu.