Ƴɛ̀r-dɩrbɛ 5 - A SƐB-SÕW

A zɛb-tʋ̃ɔ́fʋ yielu a Debora nɩ a Barakɩ na yieli a

¹ A ʋlɩ bibir nɛ a, a Debora nɩ a Avinowam bidɛb, Barakɩ, tɩ yiel'ɩ a yielu ŋa:

² «A Ɩsɩrayɛl tẽw pʋɔ a, ŋa za cɔbr'a gù a zɛbr, a Naaŋmɩn nɩ-bʋʋrɛ de nɩ bɛ tʋɔra tɩr a zɛbr ƴãw: nyɩ puore a Sore yãanɩ!

³ Nyɩɩm na-mɩnɛ, nyɩɩm nɩbɛ niw-dierbɛ, nyɩ ƴãw tobr vla! Mãa a, ɩ̃ na yiele nɩ a Sore ƴãw, ɩ̃ na zɛwr'ɩ a Sore, a Ɩsɩrayɛl Naaŋmɩn.

⁴ Sore e, fʋ na tɩ yi a Edɔm tẽw wa a, fʋ na tɩ yi a Seyiir tan pʋɔ siw a, a tẽsɔw tɩ dam'a, a zũzuwe tɩ bɛr'ɩ a kʋ̃ɔnɩ a cir, sa-zʋba tɩ mĩ na,

⁵ a tan tɩ yʋʋr'ɩ a fʋ niŋé, a fʋ̃ʋ Sinayi tãw Sore, a Ɩsɩrayɛl Naaŋmɩn niŋé.

⁶ A Anatɩ bidɛb Samgaar daar, a Yayɛl daar, a nɩbɛ na mɩ́ zɔm nyɔ̃wmɩ tɔ̃w tu taa cere a tɩ zawr'ɩ a tẽw bɛr, a bɛlɩ dem na yʋ̀ɔr a, tɩ tuur'ɩ sɛ-pɩlɩ.

⁷ Nɩ-bɛrɛ bɛ tɩ cãà be ɩ, nɩ-bɛrɛ bɛ tɩ cãà be a Ɩsɩrayɛl tẽw pʋɔ ɩ, ɛ́ gù a mãa Debora tɩ ìr, ɩ̃ tɩ ìr, mɛ̃ mã a, a Ɩsɩrayɛl ƴãw.

⁸ Bɛ tɩ kaarɛ na íre ŋmɩn-paalɛ, ɛ́ daadaalɛ a zɛbr mɩ́ tɩ n'a. Ɛcɛ a Ɩsɩrayɛl tẽw pʋɔ a, zɛbr-kur-pãgala been bɩɩ kafin been, bɛ tɩ be be nɩbɛ tùr-lɩz'a ayi (40 000) ƴãw ɛ.

⁹ A Ɩsɩrayɛl zɛbr-nɩbɛ nɩ-bɛrɛ nɛbɛ ɩ̃ lãw nɩ, nɩ a Naaŋmɩn nɩ-bʋʋrɛ bɛl na sàw de bɛ tʋɔra tɩr a zɛbr ƴãw a. Nyɩ puore a Sore yãanɩ!

¹⁰ Nyɩɩm na zɔm bòn-nyamɛ na pɛlɩ a, nyɩɩm na zɩnɛ tẽsɔw pɛn-zʋmzʋm zu a, nyɩɩm na lo a sɛ́ɛ cere a, nyɩ hiere a ʋ yele!

¹¹ A kʋ̃ɔnɩ ziir a, dʋ̃-cɩ̃ɩnbɛ manɛ nɩ a Sore yel-vɩɛlɩ, a ʋ yel-vɩɛlɩ a Ɩsɩrayɛl nɩ-bɛrɛ ƴãw, a lɛn daar a Naaŋmɩn nɩ-bʋʋrɛ na yi a tẽw dɩ̃dɛɛ ƴãw a.

¹² Zaw ìr, Debora a, zaw ìr! Zaw ìr, cɛ yielu! Avinowam bidɛb Barakɩ i, ìr, tɛr a fʋ zɛbr-nɩ-nyɔwrɩ lɛb wa n!

¹³ A bɛl na cãà vʋʋrɛ a cen na tɩ páw a nɩ-bɛrɛ, a Sore nɩ-bʋʋrɛ ɓã n taa a ɩ̃ zie mɛ̃ gãdaar a.

¹⁴ A bɛlɩ dem na zɛb tʋ̃ɔ́ a Amalesitɩ mɩnɛ a, Efarayim'a bɛ yi wa. Bɛ̃zamɛ tu bɛ na kpɛ pʋɔ a bɛ zɛbr-nɩbɛ pʋɔ. Nɩ-bɛrɛ yi n a Makɩɩr dɔwlʋ pʋɔ, ɛ́ zɛbr-nɩbɛ nɩ-bɛrɛ yi a Zabulɔ̃ dɔwlʋ pʋɔ.

¹⁵ A Ɩsakaar nɩ-bɛrɛ wa na wa páw a Debora, a Ɩsakaar nɩbɛ na tu a Barakɩ a, wa n fɔ̃wlɛ wa páw ʋ a tɩ̃tal pʋɔ. Ɛcɛ a Urubɛn dɔwlʋ pʋɔ a, bɛ ŋmɛ n a nɔkpɛn a ka baarʋ.

¹⁶ Bʋ̃ʋ n'ʋ so nyɩ àr a dʋn zawr ƴãw, bɛrɛ wone a dʋ̃-cɩ̃ɩnbɛ na bʋɔlɛ a bɛ dʋn a? Sɩza n'a, a Urubɛn dɔwlʋ pʋɔ a, bɛ ŋmɛ n a nɔkpɛn a ka baarʋ.

¹⁷ A Zurdɛ̃ saa-pɛrɩ́, a Galaadɩ pʋɔ a, a dɔwlʋ bɛ dam dam ɛ. A Dan dɔwlʋ nɩbɛ àr'a kɔw a bɛ gbee, a Asɛɛr dɔwlʋ nɩbɛ mɩ̀ àr'a pɩɛlɩ a bɛ gbee siwfʋ zie, a kʋ̃ɔ-kpɛ̃ɛ nʋɔr.

¹⁸ A Zabulɔ̃ nɩbɛ bɛl a, mɛ̃ a Nɛfɩtali nɩbɛ a, bɛl sàw na cɛ blã na kpi a zɛbr zie.

¹⁹ A na-mɩnɛ na ɩ dɔ̃ dem a, a Kanãa tẽw na-mɩnɛ ìr'a ŋmãa nɩ a Taanakɩ zɛbr, a Megido bàrʋ nʋɔr, ɛcɛ bɛ bɛ páw zɛbr bom za ɩ, bɛ bɛ páw libir ɛ!

²⁰ A ŋmar-bie na be a salom zu a tɩ pʋɔ nɩ a zɛbr pʋɔ, a tɩ tuur'ɩ a sɛ́ɛ zɛbr'ɩ a Sɩsera.

²¹ A fʋɔla na zɔrɛ a dɩta-pɛ-yome za a, a Kison bà-fʋɔla, ʋ gbaal'ɩ a dɔ̃ dem cen nɩ. Nyɩ ɩ tɩ nyar tɩ za cere nɩ a zɛbr!

²² Wie tɩ gar'a wa tɔl panɛ a tẽsɔw nɩ a nafɩlɛ.

²³ A Sore malkɩ yere na: nyɩ ŋmɛ ƴãw a Merozi tẽw, nyɩ ŋmɛ ƴãw ʋ, nyɩ ŋmɛ ƴãw a nɩbɛ na kpɩɛr a ʋ pʋɔ a, bɛ na bɛ wa sõw a Sore a ƴãw, bɛ bɛ lãwnɩ a ʋ gãdaar zɛb ɛ.

²⁴ A Sore, ʋ maalɩ fʋ gãw a pɔwbɛ za, Kenitɩ nɩr Ebɛɛr pɔw Yayɛl i, ʋ̃ʋ, a Sore, ʋ maalɩ fʋ gãw a pɔwbɛ za na kpɩɛr a pɛn-sɛw pʋɔ a.

²⁵ A Sɩsera zɛlɩ nɩ kʋ̃ɔ, a Yayɛl kʋ̀ ʋ bʋ̀rʋ, bʋ̀r-kʋ̃ɔ na ɩ kãá a koli-nyúura vla vla pʋɔ.

²⁶ Al pùorí, ʋ tur ɓáw a kpawbir nɩ a gʋba, ɛ́ a dʋrʋ tɛr a tõ-tõ-bie 'hama. Ʋ ŋmɛ n a Sɩsera, ʋ ŋmɛ ʋ nɩ a zu ŋmɛr cʋmcʋm, ʋ ŋmɛ ʋ nɩ a tacɩɩl puo.

²⁷ Ʋ siwr'a lore a ʋ niŋé, ʋ lore na, ʋ gã nɩ a ʋ gbɛ́ɛ ƴãw a tẽw, ʋ siwr'a, ʋ lore na, ʋ kpi na.

²⁸ A Sɩsera mã vuole nɩ a tokoro vʋɔrɩ́, a tokoro kur-dali voru pʋɔ n'a ʋ jɩ́rɛ kone yere nɩ: “Bʋ̃ʋ n'ʋ so a ʋ zɛbr-torko kɔwrɛ à ŋá? Bʋ̃ʋ n'ʋ so ʋ kɔwrɛ a waa ƴãw?”

²⁹ A ʋ cɛnbɛ na bãw yã a sɔwr'ʋ na, ʋ mɩ̀ lɛb yere a bɛ sɔwfʋ ƴɛ̀r-bie à ŋá:

³⁰ “Bʋnʋ bɛ ka be ɩ, a sojarɩ wobr'ɩ a bome bɛ na zɛb de a ɓanɛ taa, bɛ pone a na: soja ŋa za pɔwsɩrale been bɩɩ ayi, Sɩsera so pɛn-zɩɩr-mʋɔlɛ na maw maw a, ʋ̃ʋ, pɛn na maw gb'a ayi a n'ʋ bɛ vile a zɛb-tʋ̃ɔ́nɛ nyũumɩ́.”

³¹ Sore e, a fʋ dɔ̃ dem za, bɛ kpi, mɛ̃ a lɛ a Sɩsera na kpi a! Ɛcɛ a fʋ nɩ-nɔnɩ ɩ mɛ̃ a mʋ̃tɔ̃w na mɩ́ wa pur nyɩwrɛ ʋ za a!» Ɛ́ a tẽw tɩ tɛr'ɩ ƴã-ɓaarʋ yome lɩz'a ayi.