Ƴɛ̀r-dɩrbɛ 20 - A SƐB-SÕW

A dɔwlʋ ŋmãa al na cɛ a ŋmãa nɩ nɩ a Bɛ̃zamɛ dɔwlʋ zɛbr

¹ A Ɩsɩrayɛl nɩbɛ za tɩ yi na ɓã taa mɛ̃ nɩ-been a, a Sore niŋé, a Misɩpa. A ziir za n'a bɛ tɩ yi wa: a na tĩ a Dan a saa-pɛrɩ́-gʋba-lowr, tɩ tɔ a Bɛɛr-Seva a saa-pɛrɩ́-dʋrʋ-lowr, nɩ a Galaadɩ tẽw za, a saa-pɛrɩ́ a.

² A nɩ-bɛrɛ nɩ a Ɩsɩrayɛl dɔwlʋ za nɩbɛ tɩ be n be a Naaŋmɩn nɩbɛ ɓã taa ŋa zie: a soja-gbɛ́ɛ dem na bãw a zɛbr-sɔ-kpɛ̃ɛ zɛbrʋ a tɩ ɩ n tùr-kɔbr anaar (400 000).

³ A Bɛ̃zamɛ dɔwlʋ nɩbɛ tɩ wõ na k'aa Ɩsɩrayɛl nɩbɛ cen nɩ a Misɩpa. A Ɩsɩrayɛl nɩbɛ tɩ yel'a: «Nyɩ manɩ a lɛ a ɩ-faa ŋa na bɛ maal'ɩ wob a na ɩ a kʋ̀ tɩ.»

⁴ A levitɩ mɩnɛ ʋl bɛ na tɩ kʋ a pɔw a, tɩ sɔw na: «Mãa nɩ a ɩ̃ pɔw-bile tɩ ta n a Bɛ̃zamɛ tẽw Givea kɛ́ tɩ gã ìr.

⁵ A Givea tẽw dem tɩ ìr'a wa a ɩ̃ ƴãw, ɛ́ a tɩ̃ɩsɔw, bɛ wa ŋmãa viiri koli a yir ʋl pʋɔ ɩ̃ na tɩ be a. Bɛ tɩ bɔbr'ɩ a ɩ̃ kʋb, ɛ́ fɛr a ɩ̃ pɔw gã nɩ, ʋ tɩ kpi.

⁶ Lɛ n'a ɩ̃ tɩ ɓáw a ɩ̃ pɔw-kũu, ŋma pʋrpʋr tɩr kʋ̀ a Ɩsɩrayɛl dɔwlʋ za, bʋ̃ʋ n'ʋ vɛ̃, a Givea tẽw dem ɩ n vĩ-ɩb nɩ ɩ-faa na bɛ maal'ɩ wob a, a Ɩsɩrayɛl tẽw pʋɔ.

⁷ Ɩsɩrayɛl nɩbɛ ɛ, nyɩ za na be ka dɩ̃a a, nyɩ sowri taa nyɛ̃, ɛ́ ɩ ɩb kãw.»

⁸ A nɩbɛ za tɩ lãw nɩ taa mɛ̃ nɩ-been a yel: «Tɩ kãw za bɛ lɛbr kule ɩ, a ɩ n a ʋ pɛn-sɛw pʋɔ bɩɩ a ʋ yir pʋɔ a.

⁹ Ɛ́ à ŋá n'a tɩ na ɩ a Givea: tɩ na ŋmɛ n gbãw

¹⁰ mɩ́ ír nɩ-been nɩbɛ pie pʋɔ, a Ɩsɩrayɛl dɔwlʋ za pʋɔ. Bɛ na cen na tɩ bɔ a bʋ̃-dɩrɩ wa kʋ̀ a sojarɩ na na zɛb'ɩ a Givea tẽw a. Bɛlɛ wa lɛb wa a, tɩ na dɔwr'ɩ a Givea tẽw a ɩ-faa na bɛ maal'ɩ wob a bɛ tẽw dem na ɩ a Ɩsɩrayɛl tẽw pʋɔ a.»

¹¹ À ŋá n'a a Ɩsɩrayɛl nɩbɛ za tɩ ɓã taa mɛ̃ nɩ-been a, kɛ́ bɛ cen tɩ zɛb'ɩ a Givea.

¹² A Ɩsɩrayɛl dɔwlʋ tɩ tõ n nɩbɛ a Bɛ̃zamɛ dɔwlʋ za pʋɔ kɛ́ bɛ tɩ yel à ŋá: «Bʋ̃ʋ ɩ-faa n'ɩ á ŋá na maalɩ a nyɩ zie a?

¹³ Ƴɛrɛŋa a, nyɩ ƴãw tɩ a Givea nɩ-faar bɛ ŋa, a nɩ-bɛ-tɛr-bir mɩnɛ bɛ ŋa, nyɩ ƴãw bɛ a tɩ nũú. Tɩ na kʋ bɛ na, tʋ̃ɔ́ ír a faa bɛr a Ɩsɩrayɛl nɩ-bʋʋrɛ sɔgɔ.» Ɛcɛ a Bɛ̃zamɛ dɔwlʋ nɩbɛ bɛ tɩ bɔbr kɛ́ bɛ bɛr wõ a bɛ yɛbr Ɩsɩrayɛl nɩbɛ ƴɛ̀rʋ ɛ.

¹⁴ Bɛ tɩ yi n a bɛ ten za pʋɔ wa ɓã taa a Givea, kɛ́ bɛ zɛb'ɩ a Ɩsɩrayɛl nɩbɛ.

¹⁵ A ʋlɩ bibir nɛ a, bɛ tɩ sɔr'ɩ nɩbɛ tùr-lɩzɛr'ɩ ayʋɔb (26 000) na tɩ yi a Bɛ̃zamɛ dɔwlʋ ten za pʋɔ wa a, ɛ́ a Givea soja-gãdaar kɔbr ayopõi (700) bɛ tɩ pʋɔ ɩ.

¹⁶ A zɛbr-nɩbɛ bɛ ŋa pʋɔ a, soja-gãdaar kɔbr ayopõi (700) tɩ ɩ n gɔbr. A bɛ kãw za mɩ́ tɩ tʋ̃ɔ́ na vãw a ʋ kpala-kuur páw zukɔbr been, ɛ́ bɛ nyɩr ʋ ɛ.

¹⁷ Bɛ mɩ̀ tɩ sɔr'ɩ a Ɩsɩrayɛl dɔwlʋ nɩbɛ, bɛ ɩ sojarɩ tùr-kɔbr anaar (400 000) na mili nɩ a zɛbr a.

¹⁸ A Ɩsɩrayɛl nɩbɛ tɩ cen nɩ a Betɛl tɩ sowri a Naaŋmɩn à ŋá: «Dɔwlʋ buor sob'ʋ na de niwn cen tɩ zɛb'ɩ a Bɛ̃zamɛ dɔwlʋ nɩbɛ?» A Sore sɔw: «Zuda dɔwlʋ n'ʋ na de niwn cen.»

¹⁹ A bio daarɩ́ biɓaara, a Ɩsɩrayɛl nɩbɛ tɩ ìr'a cen tɩ maalɩ a bɛ laɩ pɩɛlɩ a Givea.

²⁰ Al pùorí, bɛ tɩ tawr'a pɩɛlɛ, kɛ́ bɛ zɛb'ɩ a Bɛ̃zamɛ dɔwlʋ nɩbɛ, ɛ́ pɩɛrɩ tori a Givea.

²¹ A Bɛ̃zamɛ dɔwlʋ nɩbɛ tɩ yi n a Givea a ʋlɩ bibir nɛ, kʋ a Ɩsɩrayɛl nɩbɛ tùr-lɩzɛr'ɩ ayi (22 000).

^22-23 A Ɩsɩrayɛl nɩbɛ tɩ cen nɩ a Sore niŋé tɩ kõ tɩ sɔb'ɩ zie. Bɛ tɩ sowr'ɩ a Sore kɛ́ bɛ bãw, bɛ na tʋ̃ɔ́ na lɛb zɛb'ɩ a bɛ yɛbr, a Bɛ̃zamɛ dɔwlʋ nɩbɛ ɛ? A Sore tɩ sɔw na yel kɛ́ bɛ na tʋ̃ɔ́ na. Lɛ n'a a Ɩsɩrayɛl nɩbɛ lɛb tɩ dɩ kanyir, ɛ́ lɛb pɩɛrɩ a zɛbr pɩɛrʋ a be bɛ na tɩ pɩɛrɩ a bibi-dãw-niwn sob a.

^24-25 Bɛ tɩ lɛb'a zɛb'ɩ a Bɛ̃zamɛ dɔwlʋ nɩbɛ. A bibie ayi sob ŋa zɛbr pʋɔ a, a Bɛ̃zamɛ dɔwlʋ nɩbɛ tɩ yi n a Givea kʋ a Ɩsɩrayɛl nɩbɛ sojarɩ tùr-pie nɩ ani (18 000) na mili nɩ a zɛbr a.

²⁶ Lɛ n'a a Ɩsɩrayɛl nɩbɛ za tɩ cen a Betɛl. Bɛ tɩ zɩ̃ n a Sore niŋé kõ, ɛ́ tɛr mʋta-tuo a ʋlɩ bibir nɛ tɩ ta n a zaanʋɔra. Bɛ tɩ maal'ɩ nyɩw-a-za-bàwr nɩ ƴã-ɓaarʋ bàwr kʋ̀ a Sore.

^27-28 A lɛn daar, a Naaŋmɩn wõ-taa daga tɩ be n a Betɛl. Eleazaar bidɛb, Pɩnasɩ, na ɩ Aarɔ̃ yãw a, ʋlɛ n'ʋ tɩ kaarɛ a ʋ zie. A Ɩsɩrayɛl nɩbɛ tɩ sowri a Sore kɛ́ bɛ bãw, bɛ na tʋ̃ɔ́ na cen tɩ zɛb'ɩ a bɛ yɛbr, a Bɛ̃zamɛ dɔwlʋ nɩbɛ, bɩɩ bɛ ta cen. A Sore tɩ sɔw bɛ na: «Nyɩ cen, bio, ɩ̃ na ƴãw bɛ nɩ a nyɩ nũú.»

²⁹ A Ɩsɩrayɛl nɩbɛ tɩ sɔwl'ɩ sojarɩ viiri koli a Givea.

³⁰ A bibie ata sob, a Ɩsɩrayɛl nɩbɛ tɩ cen na tɩ zɛb'ɩ a Bɛ̃zamɛ dɔwlʋ nɩbɛ, ɛ́ lɛb tɩ pɩɛrɩ a zɛbr pɩɛrʋ, tori a Givea mɛ̃ a lɛ bɛ na tɩ dãw pɩɛrɩ a bibie al na tɔl a.

³¹ A Bɛ̃zamɛ dɔwlʋ nɩbɛ tɩ yi n a zɛbr ƴãw, ɛ́ bɛr bɛ bɛlɩ bɛ zãá nɩ a Givea. Bɛ tɩ lɛb'a tĩ kʋrɛ a Ɩsɩrayɛl nɩbɛ sojarɩ, mɛ̃ a bibie al na tɔl a, kʋ ta sojarɩ lɩzɛr'ɩ pie a kar pʋɔ, a Betɛl sɔ́r zu nɩ a Givea sɔ́r zu.

³² Bɛ tɩ tɩɛr kɛ́ bɛ tʋ̃ɔ́ nɩ a Ɩsɩrayɛl nɩbɛ, mɛ̃ a bibie al na tɔl a. Ɛcɛ a Ɩsɩrayɛl nɩbɛ tɩ yel'a kɛ́ bɛ zɔ zãá nɩ a Givea tẽw, bɛlɩ a Bɛ̃zamɛ dɔwlʋ nɩbɛ ƴãw a sɛ́ɛ zu a kar pʋɔ.

³³ Lɛ n'a a Ɩsɩrayɛl nɩbɛ tɩ yi a ziir al za bɛ na tɩ be a, cen tɩ ɓã taa a Baal-Tamaar, ɛ́ a sojarɩ na tɩ sɔwlɩ pɩɛlɩ a tẽw a, ƴawr yire a Geva tĩtal lowr.

³⁴ À ŋá n'a a Ɩsɩrayɛl soja-gãdaar tùr-pie (10 000) tɩ ta tori a Givea. A zɛbr tɩ tʋl'ɩ kpãkpãkpã, ɛ́ a Bɛ̃zamɛ dɔwlʋ nɩbɛ cãà bɛ tɩ bãwnɩ a dɔwrʋ na na lo a bɛ zu a ɩ.

³⁵ A Sore tɩ ɩ na a Bɛ̃zamɛ dɔwlʋ nɩbɛ lɩɛbɩ zɔ a Ɩsɩrayɛl nɩbɛ niŋé, a Ɩsɩrayɛl nɩbɛ tɩ kʋ n a Bɛ̃zamɛ dɔwlʋ sojarɩ tùr-lɩzɛr'ɩ anũu dɔwlɩ kʋba (25 100) a ʋlɩ bibir.

³⁶ Lɛ n'a a Bɛ̃zamɛ dɔwlʋ nɩbɛ tɩ bãwnɩ a bɛ na zɛb tʋ̃ɔ́ bɛ a. A Ɩsɩrayɛl nɩbɛ tɩ bɛr'ɩ vuo kʋ̀ a Bɛ̃zamɛ dɔwlʋ nɩbɛ, bʋ̃ʋ n'ʋ vɛ̃, bɛ tɩ ɩrɛ na ƴãwn a sojarɩ na tɩ sɔwlɩ viiri koli a Givea a ƴãw.

³⁷ A bɛl na tɩ sɔwlɩ a tɩ ta n fɔ̃wlɛ a tẽw pʋɔ, kpɛ de ʋ, ɛ́ kʋ a tẽw dem.

³⁸ Bɛlɛ nɩ a Ɩsɩrayɛl nɩbɛ ŋmãa na cɛ a tɩ wõ n taa ƴãw bãwfʋ: kɛ́ bɛ na ɩ n zʋ̀ʋ́r a ŋmɛlɛ dúor a tẽw zu-sɔw.

³⁹ A Ɩsɩrayɛl nɩbɛ sojarɩ na tɩ tɩ̃wnɛ pùor a zɛbr daar a, a Bɛ̃zamɛ dɔwlʋ nɩbɛ tɩ kʋ n a bɛ nɩbɛ ta lɩzɛr'ɩ pie, ɛ́ tɩɛr kɛ́ bɛ zɛb'a tʋ̃ɔ́ mɛ̃ a bibie al na tɔl a.

⁴⁰ Ɛcɛ a lɛn daar'a a bãwfʋ na ɩ a zʋ̀ʋ́r na ŋmɛlɛ dúor a tɩ tĩ sãá a Givea zu-sɔw. A Bɛ̃zamɛ dɔwlʋ nɩbɛ tɩ ŋmɛlɩ na kaa, nyɛ̃ a bɛ tẽw na nyɔw a vũu a zʋ̀ʋ́r ŋmɛlɛ dúor a.

⁴¹ A Ɩsɩrayɛl nɩbɛ tɩ lɩɛb'a lo a Bɛ̃zamɛ dɔwlʋ nɩbɛ zu, pʋl-vʋ̃ɔ nyɔw a Bɛ̃zamɛ dɔwlʋ nɩbɛ, bɛ na tɩ nyɛ̃ a dɔwrʋ na lo a bɛ zu a ƴãw.

⁴² Bɛ tɩ lɩɛbɩ a Ɩsɩrayɛl nɩbɛ niŋé, zɔrɛ cere a wɛja-kpalɛ pʋɔ, ɛcɛ bɛ bɛ tɩ tʋ̃ɔ́ cɩ̃ɛ ɩ, a sojarɩ na tɩ yi a Givea a tɩ kʋ bɛ na.

⁴³ A Ɩsɩrayɛl nɩbɛ tɩ ŋmãa na jil a Bɛ̃zamɛ nɩbɛ a ziir za. Bɛ tɩ diw bɛ na tɩ sãá nɩ zie kãw na be a Geva saa-pɛrɩ́ a, ɛ́ kʋrɛ bɛ a sɔ́r zu bɛ sàw bɛ na pɩ̃ɛnɩ ɛ.

⁴⁴ À ŋá n'a a Bɛ̃zamɛ soja-gãdaar tùr-pie nɩ ayi (12 000) tɩ kpi.

⁴⁵ A Bɛ̃zamɛ dɔwlʋ nɩbɛ ŋmãa na cɛ a tɩ zɔ na tu a wɛja-kpalɛ lowr, a Irimon pìir lowr. A Ɩsɩrayɛl nɩbɛ tɩ kʋ n nɩbɛ túr-anũu (5 000) a sɔ́r zu, ɛ́ diw a ŋmãa tɩ sãá nɩ a Gidom, lɛb kʋ nɩbɛ túr-ayi (2 000).

⁴⁶ A Bɛ̃zamɛ dɔwlʋ nɩbɛ za bɛ na kʋ a ʋlɩ bibir a tɩ ɩ n sojarɩ tùr-lɩzɛr'ɩ anũu (25 000), soja-gãdaar bɛ za.

⁴⁷ Ɛcɛ a bɛl na tɩ zɔ tu a wɛja-kpalɛ lowr a, nɩbɛ kɔbr ayʋɔb (600) tɩ tʋ̃ɔ́ na cɩ̃ɛ, zɔ tɩ ta a Irimon pìir lowr, kpɛ a be cuwr anaar.

⁴⁸ A Ɩsɩrayɛl nɩbɛ tɩ lɩɛb'a lo a Bɛ̃zamɛ dɔwlʋ nɩbɛ na cɛ a zu. Bɛ mɩ́ tɩ yi n tẽw ŋa tɩ sãá tẽw ŋa pʋɔ, kʋ a nɩbɛ za lãwnɩ a dʋn, ɛ́ nyɩw a ten al za bɛ na tuore a bɛr.