Ƴɛ̀r-dɩrbɛ 19 - A SƐB-SÕW

Bɛ̃zamɛ dɔwlʋ nɩbɛ ɩ n ɩ-faa kãw na bɛ maal'ɩ wob a

¹ A lɛn daar nãà na bɛ tɩ ka be a Ɩsɩrayɛl tẽw sɛr a, levitɩ mɩnɛ kãw na tɩ kpɩɛr a Efarayim tãw vuo pʋɔ, gõgon kãw pʋɔ a, tɩ de nɩ pɔw-bile ʋ yi Zuda tẽw Bɛtɩlɛm.

² A ʋ pɔw-bile ŋa tɩ nyɛ̃ nɩ ʋ nɩ suur, yi kul a ʋ sãà yir a Zuda tẽw Bɛtɩlɛm, tɩ maalɩ cuwr anaar.

³ A sɩr tɩ ìr'a cen k'ʋʋ tɩ ƴɛ̀r'ɩ ʋ, ʋ lɛb wa. Ʋ tɩ tɛr'ɩ a ʋ tõ-tõ-bie nɩ bòn ayi cen nɩ. A ʋ pɔw-bile tɩ tɛr ʋ na kpɛ n a ʋ sãà yir. A pɔw sãà na tɩ nyɛ̃ ʋ a, nʋ̃ɔ̀ tɩ kpɛ ʋ na, ʋ zɔ tuori ʋ.

⁴ A dɩɛm-sãà tɩ tɛr'ɩ a ʋ dɩɛm a ʋ zie bibie ata: a levitɩ nɩ a ʋ tõ-tõ-bie mɩ́ tɩ dɩ na ɛ́ nyũ, ɛ́ gã a be.

⁵ A bibie anaar sob, bɛ tɩ dãw nɩ nɩ ìru. A levitɩ na tɩ cɔbrɩ baarɩ na kul a, a ʋ dɩɛm-sãà tɩ yel ʋ na: «Zɩ̃ dɩ bʋ̃-kãw tɛr fãw, ɛ́ nyɩ bãw cere.»

⁶ Lɛ n'a bɛ za ayi tɩ zɩ̃, lãw dɩ ɛ́ nyũ. A levitɩ dɩɛm-sãà tɩ yel'ɩ a levitɩ: «Sàw lɛb gã a ka a dɩ̃a tɩ̃ɩsɔw wõ nʋ̃ɔ̀ blã.»

⁷ A levitɩ tɩ cãà na bɔbr k'ʋʋ kul, ɛcɛ a ʋ dɩɛm-sãà tɩ ƴɛ̀r'ɩ lɛɛɛ, ʋ wa tɩ sàw lɩɛbɩ a kulu bɛr, ɛ́ lɛb gã a be a ʋlɩ tɩ̃ɩsɔw nɛ.

⁸ A bibie anũu sob, ʋ tɩ dãw nɩ nɩ ìru k'ʋʋ kul, ɛcɛ a dɩɛm-sãà tɩ yel ʋ na: «Ɩ̃ zɛlɛ fʋ na, zɩ̃ dɩ tɛr fãw, ɛ́ a mʋ̃tɔ̃w gɔ̃w baarɩ, nyɩ lo a sɔ́r.» Lɛ n'a bɛ tɩ zɩ̃ lãw dɩ.

⁹ A levitɩ na tɩ bɔbr a kulu, ʋlɛ nɩ a ʋ pɔw nɩ a ʋ tõ-tõ-bie a, a ʋ dɩɛm-sãà tɩ yel ʋ na: «Nyɛ̃, a mʋ̃tɔ̃w kpɩɛr'a, a zie sɔb'a baarɩ, nyɩ gã a ka wõ nʋ̃ɔ̀, ɛ́ bio nyɩ dãw nɩ ìru kul a fʋ yir.»

¹⁰ Ɛcɛ a levitɩ bɛ tɩ sàw na lɛb gã ɩ, ɛ́ tɩ ìr lo a sɔ́r, ʋlɛ nɩ a ʋ pɔw nɩ a ʋ bòn ayi na ƴãw a kɔwr a. Bɛ tɩ ta n a Zebi tẽw ƴãw, a pɛr lɛ k'aa Zerizalɛm.

¹¹ Bɛ na tɩ ta pɩɛlɩ a Zebi tẽw a, a mʋ̃tɔ̃w tɩ faa nɩ ʋ za, lɛ n'a a tõ-tõ-bie tɩ yel a ʋ zu-sob: «Tɩ cen a Zebi tẽw dem zie tɩ gã a be ír.»

¹² A ʋ zu-sob tɩ sɔw na: «Tɩ bɛ tɛwr àrɛ a nɩ-bʋʋr-yoru tẽw ŋa pʋɔ ɩ, Ɩsɩrayɛl nɩr kãw za bɛ ka be ɩ. Tɩ na cen na tɩ ta a Givea.

¹³ Tɩ ƴãw fãw ta a Givea bɩɩ a Arama gã a ziir á ŋá kãw.»

¹⁴ Lɛ n'a bɛ tɩ cãà lo a sɔ́r. A mʋ̃tɔ̃w tɩ kpɩɛr'ɩ ʋ za a lɛn daar bɛ na tɩ ta a Givea, a Bɛ̃zamɛ tẽw a.

¹⁵ Bɛ tɩ bɩɛ na cen kɛ́ bɛ tɩ gã a Givea. Bɛ tɩ kpɛ n a tẽw pʋɔ, cen tɩ zɩ̃ a nɩbɛ tuor-taa zie, ɛcɛ nɩr za bɛ tɩ sàw bʋɔlɩ bɛ a ʋ yir a gaa ƴãw ɛ.

¹⁶ A ʋlɩ zaanʋɔra nɛ, dɛb-nyãw kãw mɩ̀ tɩ yi n a póru tome zie waar. Efarayim tãw vuo pʋɔ n'a ʋ tɩ yi, ɛ́ kpɩɛr a Givea. Zɩ̃ k'aa Givea tẽw dem tɩ ɩ n Bɛ̃zamɛ dɔwlʋ nɩbɛ.

¹⁷ Ʋ tɩ nyɛ̃ nɩ a sɔr-cene na tɩ zɩ̃ a tẽw nɩbɛ tuor-taa zie a, ɛ́ sowr'ʋ à ŋá: «Nyɩnɛ n'a fʋ yi waar, ɛ́ cere nyɩnɛ?»

¹⁸ A levitɩ sɔw ʋ: «Zuda tẽw Bɛtɩlɛm'a tɩ yi waar, ɛ́ cere Efarayim tãw vuo pʋɔ, gõgon kãw pʋɔ. Be n'a ɩ̃ kpɩɛr, ɛ́ cen Bɛtɩlɛm, ɛ́ lɛb kule. Ɛcɛ nɩr za bɛ de m sãánʋ a ʋ yir ɛ.

¹⁹ Ɛcɛ tɩ tɛr'ɩ kɛkɛɛ nɩ mɔ̃-kon a tɩ bòn ƴãw, ɩ̃ mɩ̀ tɛr'ɩ dipɛ̃ nɩ divɛ̃, mãa nɩ a ɩ̃ pɔw nɩ a ɩ̃ tõ-tõ-bie ƴãw. Bom bɛ cɛ tɩ ɛ.»

²⁰ Lɛ n'a a dɛb-nyãw tɩ sɔw ʋ: «Ƴã-ɓaarʋ, a be a fʋ zie! Bom nɛ nãà wa cɛ b a, ɩ̃ na bɔ na kʋ̀ b, ɛcɛ ta gã a tuor-taa zie ka ɩ.»

²¹ Ʋ tɩ tɛr bɛ na kpɛ n a ʋ yir, tɩ kʋ̀ mɔ̃-kon a bòn. A sɔr-cenbɛ tɩ pɛ́w nɩ gbɛ́ɛ, al pùorí bɛ dɩ ɛ́ nyũ.

²² Bɛ na tɩ dɩrɛ wone nɩ nʋ̃ɔ̀ a, a be dem bɛ mɩnɛ, nɩ-bɛ-tɛr bir mɩnɛ, tɩ wa na wa ŋmãa viiri koli a yir, ɛ́ ŋmɛ a pan kpɛ̃w kpɛ̃w za, ɛ́ yel a dɛb-nyãw na tɩ so a yir a: «A nɩr ʋl fʋ na de a fʋ yir a, ɩ ʋ yi tɩ gã nɩ ʋ.»

²³ A yir sob tɩ yi na tɩ yel bɛ: «Ɩ̃ bá mɩnɛ ɛ, ɩ̃ zɛlɛ nyɩ na, nyɩ ta ɩ a ɩ-faa ŋa ɩ. A nɩr ŋa ɩ n ɩ̃ sãan, nyɩ ta tõ a tõ-faa ŋa na bɛ maal'ɩ wob a ɩ.

²⁴ Ɩ̃ tɛr'ɩ pɔwyaa ʋ bɛ bãw dɛb sɛr ɛ, ɛ́ a nɩr ŋa mɩ̀ tɛr pɔw-bile, ɩ̃ na tɛr bɛ na yi wa kʋ̀ nyɩ, nyɩ ɩ bɛ lɛ za nyɩ na bɔbr a, ɛcɛ nyɩ ta ɩ a ɩ-faa ŋa na bɛ maal'ɩ wob a a dɛb ŋa zie ɩ.»

²⁵ Ɛcɛ a nɩbɛ bɛl bɛ tɩ bɔbr kɛ́ bɛ bɛr wõ a ʋ ƴɛ̀rʋ ɛ. Lɛ n'a a levitɩ tɩ tɛr a ʋ pɔw-bile yi n tɩ kʋ̀ bɛ. Bɛ tɩ fɛr ʋ na gã nɩ ʋ, ɛ́ zazaw ʋ a tɩ̃ɩsɔw za, a zie na wa vɩɛrɛ a n'a bɛ bɛr ʋ.

²⁶ A zie na wa wɛlɛ a, a pɔw tɩ wa na wa lo gã a nɩr ʋl yir a ʋ sɩr na tɩ be a, ɛ́ gù a zie tɩ vɩɛ.

²⁷ A ʋ sɩr tɩ dãw nɩ nɩ ìru, yuo a pan k'ʋʋ lɛb lo a ʋ sɔ́r. Lɛ n'a ʋ tɩ nyɛ̃ a ʋ pɔw-bile ʋ gã a dɩ̃dɔr nʋɔr, a nuru dɔwlɩ a dɩ̃dɔ-mimir zu.

²⁸ Ʋ tɩ yel ʋ na: «Ìr tɩ kul.» Ɛcɛ a pɔw bɛ tɩ sɔw ʋ ɛ. Lɛ n'a ʋ tɩ ɓáw a pɔw, dɔwlɩ a bõw zu tɔl kul'ɩ.

²⁹ Ʋ na tɩ ta a ʋ yir a, ʋ tɩ de nɩ sʋɔ ŋma n a ʋ pɔw-kũu ziir pie nɩ ayi, tɩr kɛ́ bɛ mɩ́ tɩ ír been kʋ̀ a Ɩsɩrayɛl dɔwlʋ za.

³⁰ Ʋ tɩ tõ n a ʋ nɩbɛ, kɛ́ bɛ tɩ yel a Ɩsɩrayɛl nɩbɛ za: «A lɛn daar za a Ɩsɩrayɛl nɩbɛ na yi a Eziptɩ tẽw a, yel ŋa tɔ dãw na ɩ ɩ? Nyɩ jɛl a yel ŋa kaa, nyɩ sowri taa, ɛ́ ɩ ɩb kãw.» A bɛlɩ dem za na tɩ nyɛ̃ a yel ŋa a, tɩ yere na: «A lɛn daar za a Ɩsɩrayɛl nɩbɛ na yi a Eziptɩ tẽw a, nɩr bɛ dãw nyɛ̃ a yel ŋa tɔ ɩ, ɛ́ nɩr mɩ̀ bɛ dãw ɩ a yel ŋa tɔ ɩ!»