Ƴɛ̀r-dɩrbɛ 18 - A SƐB-SÕW

Dan dɔwlʋ nɩbɛ wob'ɩ a Mɩka ŋmɩmɛ dasuli, ɛ́ tɛr a ʋ bàwr-maalɛ cen nɩ

¹ A lɛn daar, nãà bɛ tɩ ka be a Ɩsɩrayɛl tẽw ɛ. A Dan dɔwlʋ nɩbɛ tɩ bɔbr'ɩ zie kɛ́ bɛ zɩ̃, bʋ̃ʋ n'ʋ vɛ̃, wa tɩ tɔ a lɛn daar a, bɛ cãà bɛ tɩ tɛr zie mɛ̃ a Ɩsɩrayɛl dɔwlʋ ŋmaarɛ za a ɩ.

² Lɛ n'a a Dan dɔwlʋ nɩbɛ tɩ be a Sorea nɩ a Ɛsɩtaɔl ɛ́ kaa ír dɛbr anũu a bɛ pʋɔ, zɛbr-nɩbɛ, tõ bɛ kɛ́ bɛ cen tɩ jɩ́r bãw a tẽw. Bɛ tɩ yel'a kʋ̀ bɛ: «Nyɩ cen tɩ jɩ́r bãw a tẽw.» A nɩbɛ anũu bɛl tɩ ta n a Efarayim tãw vuo pʋɔ, a Mɩka yir, gã vɩɛ a zie.

³ Bɛ na tɩ be a be a, bɛ tɩ wõ n a levitɩ mɩnɛ pɔlbile na ƴɛ̀rɛ a bãw a ʋ kɔkɔr. Bɛ tɩ cen nɩ a ʋ zie tɩ sowr'ʋ: «Ãa n'ʋ ƴãw fʋ wa a ka? Bʋ̃ʋ n'ʋ fʋ ɩrɛ a ka? Ɛ́ bʋ̃ʋ n'ʋ nyɔw fʋ tɛr a ka?»

⁴ Ʋ sɔw: «A Mɩka ɩ na ɩ̃ tɛr àrʋ zie: ʋ de m'a yarɛ mɛ̃, ɩ̃ɩ ɩ a ʋ bàwr-maalɛ.»

⁵ Bɛ lɛb yel ʋ: «Alɛ wa ɩ lɛ a, fʋ̃ʋ sowri a Naaŋmɩn kʋ̀ tɩ, tɩ tʋ̃ɔ́ bãw, a sɔ́r tɩ na lo a na vɩɛl'a bɩɩ ʋ kʋ̃ vɩɛl.»

⁶ A bàwr-maalɛ yel bɛ: «Nyɩ ta zɔrɛ dɛ̃bɩ̃ɛ ɩ, a Sore bɩɛlɛ nyɩ nɩ a nyɩ sɔ́r nyɩ na lo a zu.»

⁷ A nɩbɛ anũu bɛl tɩ lɛb'a lo a sɔ́r tɩ ta Laisɩ. Bɛ tɩ nyɛ̃ nɩ a be dem bɛ kpɩɛr a bɛ tẽw zoomlɛ, ƴã-ɓaarʋ pʋɔ, ɛ́ bɛ bãw damnʋ ɛ, mɛ̃ a Sɩdɔ̃ tẽw dem a. Nɩr bɛ tɩ ka a be mɩ́ ƴɛ̀r nɩr maw ɛ, nɩr bɛ tɩ ka be dɩrɛ naalʋ kãw za ɩ. A Laisɩ nɩbɛ tɩ kpɩɛr'a zãá nɩ a Sɩdɔ̃ tẽw dem, ɛ́ so bɛ tʋɔra bɛ bɔbr bom kãw za nɩr zie ɩ.

⁸ A nɩbɛ anũu bɛl tɩ lɛb'a wa a Dan dɔwlʋ nɩbɛ zie a Sorea nɩ a Ɛsɩtaɔl, bɛ wa sowri bɛ: «Bʋ̃ʋ n'ʋ nyɩ nyɛ̃?»

⁹ Bɛ sɔw: «Nyɩ ìr! Nyɩ ɩ tɩ cen tɩ ŋmãa nɩ a Laisɩ tẽw dem a zɛbr. Tɩ nyɛ̃ nɩ a tẽw, ʋ vɩɛl'a bɛ tɛr vuo ɩ. Nyɩ ta zɩ̃ a ka zawlalɛ ɩ, nyɩ ìr fɔ̃w tɩ cen tɩ zɛb de a tẽw.

¹⁰ Nyɩmɛ wa ta a, nyɩ na nyɛ̃ nɩ nɩbɛ na bɛr yã ɛ́ kpɩɛr tẽw na yɛlmɛ a pʋɔ a. Naaŋmɩn na ƴãw nɩ a tẽw ŋa a nyɩ nuru pʋɔ, ɛ́ tẽw zu bʋ̃-vla za bɛ cɛ bɛ be a tẽw nɛ pʋɔ ɩ.»

¹¹ Lɛ n'a a Dan dɔwlʋ nɩbɛ kɔbr ayʋɔb (600) na tɛr zɛbr bome a zɛbr ƴãw a, tɩ yi a Sorea nɩ a Ɛsɩtaɔl cen.

¹² Bɛ tɩ cen na tɩ maalɩ a bɛ laɩ Kɩrɩyatɩ-Yeyarim a Zuda tẽw. Lɛ so bɛ bʋɔlɛ a zie ŋa kɛ́ Mahane-Dan, wa tɩ tɔ n dɩ̃a. Ʋ be n a Kɩrɩyatɩ-Yeyarim mʋ̃tɔ̃w-kpɛb-lowr.

¹³ Bɛ tɩ yi n a be, ɛ́ tɔl a Efarayim tãw vuo pʋɔ tɩ ta a Mɩka yir.

¹⁴ A nɩbɛ anũu bɛl na tɩ cen tɩ jɩ́r bãw a Laisɩ tẽw a, tɩ yel'ɩ a bɛ taabɛ: «Nyɩ bãw kɛ́ tɩɩb nɩ ŋmɩmɛ dasuli nɩ tɩɩb na nyɩl kure pàw a be n a yie á ŋá kãw pʋɔ ɔ? Nyɩ pãa bãw bom nɛ nyɩ na na ɩ a.»

¹⁵ Al pùorí, a nɩbɛ anũu bɛl tɩ cen na tɩ kpɛ a Mɩka yir, sowri a levitɩ pɔlbile nɛ na kpɩɛr a be a, a ʋ ƴã-ɓaarʋ yele.

¹⁶ Bɛ tɩ be n a levitɩ nɛ zie, ɛ́ a Dan dɔwlʋ nɩbɛ kɔbr ayʋɔb (600) bɛl na tɛr a zɛbr bome a, pɩɛrɛ a yir dɩ̃dɔrɩ́.

¹⁷ A nɩbɛ anũu bɛl na tɩ cen tɩ jɩ́r bãw a tẽw a, tɩ do n a bɔwpɩɛ pʋɔ tɩ kpɛ wob a tɩbɛ nɩ a ŋmɩmɛ dasuli nɩ a tɩɩb na nyɩl a kure pàw a, ɛ́ a bàwr-maalɛ nɩ a nɩbɛ kɔbr ayʋɔb (600) bɛl na tɛr a zɛbr bome a be a dɩ̃dɔrɩ́.

¹⁸ A bàwr-maalɛ na tɩ nyɛ̃ bɛ kpɛ a Mɩka yir wob a tɩbɛ nɩ a ŋmɩmɛ dasuli a, ʋ tɩ sowri bɛ na: «Bʋ̃ʋ n'ʋ nyɩ ɩrɛ a ka?»

¹⁹ Bɛ tɩ sɔw ʋ na: «Pàw a fʋ nʋɔr, taa ƴɛ̀rɛ ƴɛ̀rʋ za ɩ, ɛ́ páw tɩ. Ɩ a tɩ sãà nɩ a tɩ bàwr-maalɛ. A fʋ zie a, abobe sob'a sa: fʋ na na ɩ nɩ-been yõ yir bàwr-maalɛ a, bɩɩ fʋ na na ɩ Ɩsɩrayɛl dɔwlʋ been bàwr-maalɛ a?»

²⁰ Nʋ̃ɔ̀ tɩ kpɛ n a bàwr-maalɛ a bɛ ƴɛ̀rʋ ŋa ƴãw, ʋ de a tɩbɛ nɩ a ŋmɩmɛ dasuli páw nɩ a sojarɩ.

²¹ A Dan dɔwlʋ nɩbɛ tɩ lɛb'a lo a bɛ sɔ́r, ƴãw a bibiir nɩ a dʋn nɩ a tuor de bɛ niwn.

²² Bɛ tɩ cen na zãá nɩ a Mɩka yir baarɩ, ɛ́ a Mɩka nɩ a ʋ kpɛ-pɩɛl dem ɓã taa ta tu bɛ.

²³ Bɛ na tɩ ŋmɩɛr cɛlsɩ cɔwr a Dan dɔwlʋ nɩbɛ a, bɛ tɩ lɩɛb'a sowri a Mɩka: «Bʋ̃ʋ n'ʋ fʋ bɔbr? Bʋ̃ʋ cɛlsɩ n'ɩ à à ŋá?»

²⁴ A Mɩka tɩ sɔw bɛ na: «Nyɩ faa nɩ a ɩ̃ ŋmɩmɛ ɩ̃ na maalɩ a, tɛr'ɩ a ɩ̃ bàwr-maalɛ cere nɩ. Bʋ̃ʋ n'a cɛ m? Ɛ́ nyɩ ŋmɛr kpʋr sowre mɛ̃ kɛ́ bʋ̃ʋ n'ʋ tɛr mɛ̃ ɛ?»

²⁵ A Dan dɔwlʋ nɩbɛ tɩ lɛb'a yel ʋ: «Ta pàwr tɩ gɔmɛ ɩ, alɛ bɛ ɩ lɛ, a tɩ nɩbɛ bɛ mɩnɛ nãà nyɛ̃ nɩ suur, lɩɛbɩ lo a nyɩ zu. Fʋ nãà ɩrɛ na bɛ wa kʋ fʋ̃ʋ nɩ a fʋ yir dem.»

²⁶ Al pùorí a Dan dɔwlʋ nɩbɛ cãà lo a bɛ sɔ́r cere. A Mɩka na tɩ nyɛ̃ bɛ kpɛmɛ zuo ʋ a, ʋ tɩ lɛb'ɩ pùor kul a ʋ yir.

A Dan dɔwlʋ nɩbɛ zɩ̃ n a Laisɩ

²⁷ A Dan dɔwlʋ nɩbɛ tɩ wob'ɩ a Mɩka bome, tɛr'ɩ a bàwr-maalɛ na tɩ tone ʋ a cen nɩ. Bɛ tɩ cen na tɩ lo a Laisɩ tẽw zu, kʋ a ʋ nɩbɛ na tɩ bɛr yã kpɩɛr zoomlɛ a, ɛ́ nyɩw a tẽw bɛr.

²⁸ A Laisɩ tɩ be n a Bɛtɩ-Erehovʋ fʋɔla pʋɔ, zãá nɩ a Sɩdɔ̃, ɛ́ a ʋ nɩbɛ tɩ so bɛ tʋɔra, bɛ bɔbr bom nɩr zie ɩ, alɛ so nɩr za bɛ tɩ tʋ̃ɔ́ wa sõw bɛ ɩ. A Dan dɔwlʋ nɩbɛ tɩ lɛb'a mɛ a tẽw, zɩ̃ a ʋ pʋɔ.

²⁹ Bɛ tɩ por'ɩ a tẽw yúor kɛ́ Dan, mɛ̃ a bɛ sãàkʋm-kʋra, Dan a, a Zakɔb bidɛb, ɛcɛ a tẽw yúor tɩ dãw na dɩ kɛ́ Laisɩ.

³⁰ A Dan dɔwlʋ nɩbɛ tɩ bin nɩ a Mɩka tɩɩb, ɛ́ Gɛrsom bidɛb Yehonatan, na ɩ a Moyiir yãw a, nɩ a ʋ bidɛbr, lɩɛbɩ a bàwr-maalbɛ a Dan dɔwlʋ nɩbɛ ƴãw, tɩ ta a lɛn daar bɛ na diw a nɩbɛ cen nɩ a.

³¹ Bɛ tɩ tɛr'ɩ a Mɩka tɩɩb, lɛn daar za a Naaŋmɩn yir na tɩ be a Silo a.