Ƴɛ̀r-dɩrbɛ 15 - A SƐB-SÕW

A Samsɔ̃ nyɩw nɩ a Filisɩtɛ̃ mɩnɛ póru yáa a san

¹ Bibie à ŋá lɛ pùorí, a ble cɛb daar, a Samsɔ̃ tɩ tɛr'ɩ bʋle cen nɩ k'ʋʋ tɩ nyɛ̃ nɩ a ʋ pɔw. Ʋ tɩ yel'ɩ a ʋ dɩɛm-sãà: «Ɩ̃ bɔbr'a k'ɩ̃ɩ kpɛ a ɩ̃ pɔw zie, a di-gana pʋɔ.» Ɛcɛ a dɩɛm-sãà bɛ tɩ sàw ɛ,

² ɛ́ yel a Samsɔ̃: «Ɩ̃ tɩ tɩɛr kɛ́ fʋ bɛ cãà nɔnɛ ʋ ɛ, ɛ́ de ʋ kʋ̀ a fʋ yel-mɩŋa sob. Ɛcɛ a ʋ yɛ-bile bɛ sa ʋ ɛ? De ʋ lɩɛr'ɩ ʋ!»

³ A Samsɔ̃ tɩ sɔw bɛ na: «Ƴɛrɛŋa ʋl a, nɩr bɛ be na yere mɛ̃ a faa ɩ̃ na na ɩ a Filisɩtɛ̃ mɩnɛ a ƴãw ɛ.»

⁴ A Samsɔ̃ tɩ cen na tɩ nyɔw tʋrbaar kɔbr ata (300). Ʋ tɩ bɔ n mɔ̃-'leni, ɛ́ nyɔw a tʋrbaar tuwli taa ayiri yiri a zʋɛ ƴãw, ɛ́ 'lẽ a nɩ a zʋɛ, ɛ́ ƴãw a mɔ̃-'leni a tʋrbaar na tuwli taa a zʋɛ ƴãw.

⁵ Al pùorí, ʋ tɔ̃w vũu ƴãw a mɔ̃-'leni ƴãw, ɛ́ bɛr a dʋn a Filisɩtɛ̃ mɩnɛ ble póru pʋɔ. À ŋá n'a ʋ tɩ nyɩw a ble na ŋma gbõ taa a, nɩ a zu-dɔwmɛ na cãà àr a, nɩ a divɛ̃ tɩɩr póru, nɩ a olivʋ tɩɩr.

⁶ A Filisɩtɛ̃ mɩnɛ tɩ sowr'a: «Ãa n'ʋ ɩ à à ŋá?» Bɛ sɔw: «Samsɔ̃ n'ʋ! Ʋ ɩ n à à ŋá a ʋ dɩɛm-sãà na yi Tɩmɩna a, na de a ʋ pɔw kʋ̀ a ʋ yel-mɩŋa sob a ƴãw.» Lɛ n'a a Filisɩtɛ̃ mɩnɛ tɩ cen tɩ nyɩw a pɔw ŋa nɩ a ʋ sãà mimir.

⁷ A Samsɔ̃ tɩ yel bɛ na: «À ŋá na n'a nyɩ ɩrɛ a, mãa bɛ wa tɩ yáa a san a nyɩ zu a, ɩ̃ kʋ̃ bɛr ɛ.»

⁸ Ʋ tɩ zɛb'ɩ bɛ na, zɛb tʋ̃ɔ́ bɛ pẽlẽpẽlẽ. Al pùorí, ʋ cen tɩ kpɩɛr Etam pìir bɔw pʋɔ.

A Samsɔ̃ nɩ a bõw kokã-kɔbr yele

⁹ Lɛ n'a a Filisɩtɛ̃ mɩnɛ tɩ wa maalɩ a bɛ laɩ a Zuda tẽw, ɛ́ pɩɛrɩ a bɛ sojarɩ tɩ sãá nɩ zie kãw bɛ na bʋɔlɛ Lehi a.

¹⁰ A Zuda nɩbɛ tɩ sowri bɛ na: «Bʋ̃ʋ n'ʋ so nyɩ ìr wa a tɩ ƴãw?» Bɛ sɔw: «Samsɔ̃ n'ʋ tɩ wa kɛ́ tɩ wa nyɔw 'lẽ, ɩ ʋ mɛ̃ a lɛ ʋ na ɩ tɩ a.»

¹¹ Lɛ n'a a Zuda nɩbɛ túr ata (3 000) tɩ cen a Etam pìir bɔw pɛr, tɩ yel a Samsɔ̃: «Fʋ bɛ bãw k'aa Filisɩtɛ̃ mɩnɛ so tɩ na ɩ? Bʋ̃ʋ n'ʋ fʋ ɩ tɩ à à ŋá?» A Samsɔ̃ tɩ sɔw bɛ na: «Ɩ̃ ɩ bɛ na mɛ̃ a lɛ bɛ na ɩ m a.»

¹² Bɛ lɛb yel ʋ: «Tɩ wa na kɛ́ tɩ wa 'le b cen nɩ tɩ kʋ̀ a Filisɩtɛ̃ mɩnɛ.» A Samsɔ̃ yel bɛ: «Nyɩ pɔ, k'aa nyɩɩm tɛɛ za bɛ kʋrɛ mɛ̃ ɩ.»

¹³ Bɛ sɔw: «Ʋ̃ʋ'hʋ̃, tɩ bɛ bɔbr fʋ kʋb ɛ. 'Leb tɛwr'a tɩ bɔbr kɛ́ tɩ 'lẽ fʋ cen nɩ tɩ kʋ̀ bɛ.» Bɛ tɩ nyɔw ʋ na 'lẽ nɩ miw-paalɛ ayi, vɩr ʋ yi n a pìir bɔw pʋɔ.

¹⁴ Ʋ na tɩ ta a Lehi a, a Filisɩtɛ̃ mɩnɛ tɩ ŋmɩɛr'ɩ zɛb-tʋ̃ɔ́fʋ cɛlsɩ tuore nɩ ʋ. Lɛ n'a a Sore Vʋʋrʋ tɩ siw a Samsɔ̃: a mie na tɩ 'lẽ a ʋ kpãkpamɛ nɩ a ʋ nuru a, tɩ yɔl'ɩ mɔlɛ mɔlɛ lɛ, mɛ̃ lɛ̃ fomiwr vũu na dɩ a.

¹⁵ A Samsɔ̃ tɩ nyɛ̃ nɩ bõw kokã-kɔbr, gbaalɩ ɓáw ʋ pɔb'ɩ nɩbɛ túr (1 000) kʋ.

¹⁶ Lɛ n'a a Samsɔ̃ tɩ yel: «Bõw kokam kɔbr'ʋ ɩ̃ pɔb'ɩ bɛ nyaw taa, bõw kokam kɔbr'ʋ ɩ̃ kʋ n nɩbɛ túr (1 000).»

¹⁷ Ʋ na wa ƴɛ̀r baar'a, ʋ gbanɩ nɩ a kokam kɔbr bɛr. Lɛ so bɛ bʋɔlɛ a zie ŋa kɛ́ Aramatɩ-Lehi, a pɛr lɛ kɛ́ “Kokam tãw.”

¹⁸ Kʋ̃ɔ-nyúur na tɩ faar na kʋ ʋ a, a Samsɔ̃ tɩ bʋɔl'ɩ a Sore yel à ŋá: «Naaŋmɩn i, fʋ̃ʋ n'ʋ ɩ ɩ̃ zɛb tʋ̃ɔ́ a nɩbɛ bɛ ŋa sɛw à à ŋá. Ƴɛrɛŋa a, ɩ̃ na kpi n kʋ̃ɔ-nyúur, ɛ́ lo a yɔ-ɓile bɛ ŋa nuru pʋɔ bɩɩ?»

¹⁹ Lɛ n'a a Naaŋmɩn tɩ wɛr a pìir na be a Lehi a, ɛ̀ kʋ̃ɔ yi a Samsɔ̃ nyũ, lɛb tɛr fãw ɛ́ lɛb vʋʋrɛ. Alɛ n'a so bɛ bʋɔlɛ a bul-nʋɔr ʋl kɛ́ “Koore bul-nʋɔr”, a pɛr lɛ kɛ́ “sob nɛ na bʋɔlɛ a bul-nʋɔr.” A bul-nʋɔr ŋa cãà na nɩ dɩ̃a.

²⁰ Yome lɩzɛr'a a Samsɔ̃ tɩ ɩ a Ɩsɩrayɛl nɩbɛ ƴɛ̀r-dɩrɛ a Filisɩtɛ̃ mɩnɛ daar.