Ƴɛ̀r-dɩrbɛ 14 - A SƐB-SÕW

A Samsɔ̃ kʋ n gbẽw nɩ nũ-zawlɛ

¹ Bibir kãw, a Samsɔ̃ tɩ cen nɩ Tɩmɩna tɩ nyɛ̃ pɔw a be, a Filisɩtɛ̃ mɩnɛ powli pʋɔ.

² Ʋ na tɩ lɛb kul a, ʋ tɩ yel'ɩ a ʋ sãà nɩ a ʋ mã: «Ɩ̃ nyɛ̃ nɩ pɔw a Tɩmɩna, a Filisɩtɛ̃ mɩnɛ powli pʋɔ. Nyɩ cen tɩ zɛlɩ ʋ kʋ̀ m ɩ̃ kul.»

³ A ʋ dɔwrbɛ tɩ yel ʋ na: «Pɔw bɛ ka be a fʋ dɔwlʋ pʋɔ, nɩ a tɩ nɩ-bʋʋrɛ pʋɔ bɩɩ, fʋ na cen tɩ de pɔw a Filisɩtɛ̃ mɩnɛ zie, a yɔ-ɓile bɛ ŋa zie e?» Ɛcɛ a Samsɔ̃ tɩ yel'ɩ a ʋ sãà: «Bɔ ʋ kʋ̀ m, ʋlɛ n'ʋ pɛlɩ a ɩ̃ pʋɔ.»

⁴ A ʋ sãà nɩ a ʋ mã bɛ tɩ bãw k'aa Sore zie n'a a yi ɛ, bʋ̃ʋ n'ʋ vɛ̃, a Sore tɩ bɔbr'ɩ lɛ ʋ na na ɩ zɛb'ɩ a Filisɩtɛ̃ mɩnɛ a. A lɛn daar a, a Filisɩtɛ̃ mɩnɛ tɩ so nɩ a Ɩsɩrayɛl nɩbɛ.

⁵ Lɛ n'a a Samsɔ̃ nɩ a ʋ sãà nɩ a ʋ mã tɩ ìr lo a Tɩmɩna sɔ́r. Bɛ na tɩ tarɛ a Tɩmɩna divɛ̃ tɩɩr póru ƴãw a, gbẽw-pɔl kãw tɩ ƴaw na yi ùore tuore nɩ a Samsɔ̃.

⁶ A Sore Vʋʋrʋ tɩ siw nɩ a Samsɔ̃, ʋ nyɔw a gbẽw taw ɓɛl ziir ayi nɩ nũ-zawlɛ, mɛ̃ lɛ bɛ na mɩ́ taw bʋle ɓɛl a. Ɛcɛ ʋ bɛ tɩ manɩ a yel ŋa kʋ̀ a ʋ sãà nɩ a ʋ mã ɩ.

⁷ Al pùorí, ʋ tɩ cãà na lo a ʋ sɔ́r, cen a Tɩmɩna tɩ ƴɛ̀r'ɩ a Filisɩtɛ̃ mɩnɛ pɔwyaa ʋl. A powle tɩ pɛlɩ nɩ a ʋ pʋɔ.

⁸ Bibie à ŋá lɛ pùorí, ʋ tɩ lɛb'a cen a Tɩmɩna, k'ʋʋ tɩ kul a powle. A sɔ́r zu a, ʋ tɩ bɩɛ na cen k'ʋʋ tɩ nyɛ̃ a gbẽw-kũu. Ʋ tɩ nyɛ̃ nɩ sɩw-bie wob sɩw-gamɛ ƴãw sɩwr a gbẽw na wɛ a pʋɔ.

⁹ Ʋ tɩ vɔ̃ n a sɩw-gamɛ ƴãw a ʋ nũú dɩrɛ cere nɩ. Ʋ na wa cen páw a ʋ sãà nɩ a ʋ mã a, ʋ tɩ kʋ̀ bɛ nɩ a sɩwr bɛ dɩ, ɛcɛ ʋ bɛ tɩ yel kʋ̀ bɛ kɛ́ gbẽw na kpi wɛ a pʋɔ n'a ʋ vɔ̃ a sɩw-gamɛ á ŋá ɩ.

A Samsɔ̃ lɔb'ɩ zʋkpar kʋ̀ a Filisɩtɛ̃ mɩnɛ

¹⁰ Al pùorí, a Samsɔ̃ sãà tɩ cen nɩ a powle zie. A Samsɔ̃ tɩ maal'ɩ kul-taa cuw dɩb a be, mɛ̃ a lɛ a pɔlbili na ɩrɛ a.

¹¹ A Filisɩtɛ̃ mɩnɛ na wa nyɛrɛ ʋ wa báarɛ a, bɛ tɩ kaa na ír pɔ́lɛ́ lɩzɛr'ɩ pie kɛ́ bɛ be a ʋ zie.

¹² A Samsɔ̃ tɩ yel bɛ na: «Ɩ̃ na lɔb'ɩ zʋkpar kʋ̀ nyɩ. Nyɩmɛ wa ír a bir kʋ̀ m, ɛ́ manɩ a ʋ pɛr kʋ̀ m ka nɩ a cuw dɩb bibie ayopõi á ŋá pʋɔ a, ɩ̃ na kʋ̀ nyɩ nɩ kpar-bɛrɛ lɩzɛr'ɩ pie nɩ cuw kparɩ lɩzɛr'ɩ pie.

¹³ Alɛ bɛ ɩ lɛ a, nyɩmɛ nɛbɛ na kʋ̀ m a kpar-bɛrɛ lɩzɛr'ɩ pie, nɩ a cuw kparɩ lɩzɛr'ɩ pie.» Bɛ tɩ yel ʋ na: «Lɔb a fʋ zʋkpar, tɩ wone na.»

¹⁴ A Samsɔ̃ tɩ yel bɛ na: A sob nɛ na dɩrɛ a pʋɔ n'a a bom nɛ bɛ na dɩrɛ a yi. A sob nɛ na kpɛmɛ a pʋɔ n'a a bom nɛ na nʋmɛ a yi. Bʋ̃ʋ n'ʋ? A tɩ maal'ɩ bibie ata, ɛ́ a pɔlbili cãà bɛ tɩ bãw a zʋkpa-bir ɛ.

¹⁵ A bibie ayopõi sob, bɛ tɩ yel'ɩ a Samsɔ̃ pɔw à ŋá: «Bɛlɩ a fʋ sɩr, ʋ ír a zʋkpa-bir kʋ̀ tɩ, alɛ bɛ ɩ lɛ, tɩ na nyɩw nɩ fʋ̃ʋ nɩ a fʋ sãà yir bɛr. A tɩ fáb ƴãw n'a nyɩ bʋɔlɩ tɩ bɩɩ?»

¹⁶ A Samsɔ̃ pɔw tɩ cen na tɩ kone ƴãwn a ʋ sɩr yere nɩ à ŋá: «Fʋ hɩ̃ɛn mɛ̃ na, fʋ bɛ nɔnɛ mɛ̃ ɩ! Fʋ lɔb'ɩ zʋkpar kʋ̀ a ɩ̃ tẽ-bi-taabɛ, ɛ́ bɛ ír a pɛr kʋ̀ m ɛ.» A Samsɔ̃ tɩ sɔw ʋ na: «Ɩ̃ mɩ̀ bɛ ír a bir kʋ̀ a ɩ̃ sãà nɩ a ɩ̃ mã ɩ, ɛ́ na ír kʋ̀ fʋ̃ʋ ʋ?»

¹⁷ A Samsɔ̃ pɔw tɩ bàl ʋ na nɩ a ʋ kon, a cuw dɩb bibie ayopõi al za pʋɔ. A bibie ayopõi sob, a Samsɔ̃ tɩ ír'ɩ a zʋkpa-bir kʋ̀ ʋ, ʋ na bɛ tɩ cãà laar a zũú. Daadaalɛ ʋ yel kʋ̀ a ʋ tẽ-bi-taabɛ.

¹⁸ A bibie ayopõi sob, a mʋ̃tɔ̃w na bɛ tɩ kpɛ sɛr a, a tẽw nɩbɛ tɩ yel'ɩ a Samsɔ̃: «Bʋ̃ʋ n'ʋ nʋmɛ gãw a sɩwr? Bʋ̃ʋ n'ʋ kpɛmɛ gãw a gbẽw?» Ʋ tɩ sɔw bɛ na: «Nyɩmɛ bɛ tɩ kɔ n a ɩ̃ na-sɩra a, nyɩ kʋ̃ʋ tɩ bãw a zʋkpa-bir ɛ.»

¹⁹ Lɛ n'a a Sore Vʋʋrʋ tɩ siw a Samsɔ̃, ʋ cen Asɩkalon, tɩ kʋ a tẽw nɛ nɩbɛ lɩzɛr'ɩ pie, de a bɛ bʋ̃-suuri cen nɩ tɩ kʋ̀ a bɛlɩ dem na tɩ ír a zʋkpa-bir a, a ɩ a bɛ cuw kparɩ. Al pùorí, ʋ tɩ nyɛ̃ nɩ suur pi kɔkɛɛ lɛb kul'ɩ a ʋ sãà yir.

²⁰ Bɛ tɩ de nɩ a ʋ pɔw kʋ̀ a ʋ kul-taa yel-mɩŋa sob.