Ƴɛ̀r-dɩrbɛ 11 - A SƐB-SÕW

Zɛfɩte lɩɛb'ɩ a Ɩsɩrayɛl ƴɛ̀r-dɩrɛ

¹ Soja-gãdaa kãw tɩ be n a Galaadɩ tẽw dɩ kɛ́ Zɛfɩte. Galaadɩ nɩ pɔw-yɛm kãw bidɛb tɩ n'ʋ.

² A Galaadɩ pɔw mɩ̀ tɩ dɔw nɩ bidɛbr kʋ̀ ʋ. A pɔw ŋa bidɛbr na wa baa a, bɛ diw nɩ a Zɛfɩte ɛ́ yel: «Fʋ bɛ páwr bom za a tɩ sãà gbã-dɩ-bome pʋɔ ɩ, fʋ na ɩ pɔw-yũo bidɛb a ƴãw.»

³ Lɛ n'a a Zɛfɩte tɩ zɔ zãá nɩ a ʋ yɛbr, cen tɩ kpɩɛr Tɔɔvʋ tẽw. Nɩ-bɛ-tɛr-bir mɩnɛ tɩ ɓã n taa a ʋ zie, ɛ́ mɩ́ páw ʋ bɛ yi fa a nɩbɛ bome.

⁴ A na wa cen ta tab kãw a, a Amɔ̃ tẽw dem tɩ ŋmãa nɩ nɩ a Ɩsɩrayɛl nɩbɛ a zɛbr.

⁵ A zɛbr na wa tĩ a, a Galaadɩ tẽw nɩ-kore tɩ cen na tɩ bʋɔlɩ a Zɛfɩte a Tɔɔvʋ tẽw.

⁶ Bɛ tɩ yel ʋ na: «Wa ɩ a tɩ sojarɩ nɩ-kpɛ̃ɛ, tɩ tʋ̃ɔ́ zɛb'ɩ a Amɔ̃ tẽw dem.»

⁷ Ɛcɛ a Zɛfɩte tɩ sɔw nɩ a Galaadɩ tẽw nɩ-kore: «Nyɩmɛ bɛ nɛbɛ tɩ hɩ̃ɛn mɛ̃, ɛ́ diw mɛ̃ a ɩ̃ sãà yir pʋɔ ɩ? Bʋ̃ʋ n'ʋ so nyɩ wa bʋɔlɛ mɛ̃ ƴɛrɛŋa nyɩ na be kpɩɛrʋ pʋɔ a?»

⁸ A Galaadɩ tẽw nɩ-kore tɩ sɔw ʋ na: «Tɩmɛ wa lɛb wa a fʋ zie ƴɛrɛŋa a, tɩ bɔbr'a kɛ́ fʋ wa pʋɔ a tɩ pʋɔ tɩ zɛb'ɩ a Amɔ̃ tẽw dem, ɛ́ fʋ ɩ a tɩ nɩ-kpɛ̃ɛ nɩ a Galaadɩ tẽw dem za nɩ-kpɛ̃ɛ.»

⁹ A Zɛfɩte tɩ sɔw bɛ na: «Nyɩmɛ wa tɛr mɛ̃ lɛb wa n a nyɩ zie, k'ɩ̃ɩ wa zɛb'ɩ a Amɔ̃ tẽw dem a, a Sore wa ɩ ɩ̃ zɛb tʋ̃ɔ́ bɛ a, ɩ̃ na ɩ n a nyɩ nɩ-kpɛ̃ɛ.»

¹⁰ A Galaadɩ tẽw nɩ-kore tɩ yel'ɩ a Zɛfɩte: «A Sore na dɩ n a dãsɩɛ, tɩɩm nɩ a fʋ̃ʋ cara pʋɔ, tɩmɛ bɛ wa ɩ a lɛ fʋ na yel a.»

¹¹ Lɛ n'a a Zɛfɩte tɩ páw a Galaadɩ tẽw nɩ-kore cen, a nɩbɛ tɩ de ʋ, ʋ ɩ a bɛ nɩ-kpɛ̃ɛ nɩ a sojarɩ nɩ-kpɛ̃ɛ. A Zɛfɩte tɩ lɛb'a yel a bɛ wõ-taa ŋa a Sore niŋé a Misɩpa.

A Zɛfɩte bɔbr'a kɛ́ ʋlɛ nɩ a Amɔ̃ tẽw dem nãá wõ taa

¹² A Zɛfɩte tɩ tõ n nɩbɛ kɛ́ bɛ tɩ yel a Amɔ̃ tẽw dem nãà: «Mãa nɩ fʋ̃ʋ mɩ̀ bʋnʋ, ɛ̀ fʋ ìr wa, wa zɛbr'ɩ a ɩ̃ tẽw?»

¹³ A Amɔ̃ tẽw dem nãà tɩ sɔw nɩ a nɩbɛ a Zɛfɩte na tõ a: «A Ɩsɩrayɛl nɩbɛ na faa a ɩ̃ tẽw a n'a so. A lɛn daar a Ɩsɩrayɛl nɩbɛ na yi a Eziptɩ tẽw waar a n'a bɛ de a ɩ̃ tẽw, a na tĩ a Arnon fʋɔla ɛ́ tɩ tɔ a Yabɔkɩ bàa nɩ a Zurdɛ̃ bà-fʋɔla a. Ƴɛrɛŋa a, lɛb kʋ̀ tɩ a ten á ŋá nɩ ƴã-ɓaarʋ.»

¹⁴ A Zɛfɩte tɩ lɛb'a tõ nɩbɛ a Amɔ̃ tẽw dem nãà zie

¹⁵ kɛ́ bɛ tɩ yel ʋ à ŋá: «À ŋá n'a a Zɛfɩte yere: a Ɩsɩrayɛl nɩbɛ bɛ de a Mowab tẽw nɩ a Amɔ̃ tẽw ɛ.

¹⁶ Bʋ̃ʋ n'ʋ vɛ̃, bɛ na tɩ yi a Eziptɩ tẽw a, a wɛja-kpalɛ pʋɔ n'a bɛ cen tɩ sãá a Bàa-kɛkɛɛ kʋ̃ɔ-kpɛ̃ɛ́, ɛ́ tɩ ta a Kadɛsɩ.

¹⁷ Be n'a a Ɩsɩrayɛl nɩbɛ tɩ be, ɛ́ tõ nɩbɛ a Edɔm tẽw nãà zie, kɛ́ bɛ tɩ zɛlɩ ʋ k'ʋʋ sàw bɛ tu tɔl a ʋ tẽw pʋɔ. Ɛcɛ a Edɔm tẽw nãà bɛ tɩ sàw ɛ. A Ɩsɩrayɛl nɩbɛ mɩ̀ lɛb tõ nɩbɛ a Mowab tẽw nãà zie, kɛ́ bɛ mɩ̀ lɛb tɩ zɛlɩ ʋ a lɛ tɔr za, ʋ mɩ̀ lɛb zawrɩ. Lɛ n'a a Ɩsɩrayɛl nɩbɛ tɩ be a Kadɛsɩ.

¹⁸ Al pùorí, bɛ tɩ cãà na lo a sɔ́r a wɛja-kpalɛ pʋɔ cere tɩ dɛ a Edɔm nɩ a Mowab ten viiri koli, ɛ́ ta a Mowab tẽw saa-pɛrɩ́. Bɛ tɩ maal'ɩ a bɛ laɩ a Arnon bàa gãwn ŋa lowr, ɛ́ bɛ kpɛ a Mowab tẽw pʋɔ ɩ, bʋ̃ʋ n'ʋ vɛ̃, a Arnon n'ʋ tɩ ɩ a tẽw ŋa tʋr-bɔw.

¹⁹ A be n'a bɛ tɩ be, ɛ́ tõ nɩbɛ a Amoritɩ mɩnɛ nãà Sihon zie, na dɩrɛ naalʋ a Hɛsɩbon a. Bɛ tɩ zɛlɩ ʋ na, k'ʋʋ sàw bɛ tu tɔl a ʋ tẽw pʋɔ, cen a bɛ cenu zie.

²⁰ Ɛcɛ a Sihon bɛ tɩ sàw ɛ: ʋ tɩ bʋɔl'ɩ a ʋ sojarɩ za ɓã taa, maalɩ a ʋ laɩ Yahasɩ zɛb'ɩ a Ɩsɩrayɛl nɩbɛ.

²¹ A Sore, a Ɩsɩrayɛl Naaŋmɩn, tɩ ƴãw nɩ a Sihon nɩ a ʋ sojarɩ a Ɩsɩrayɛl nɩbɛ nuru pʋɔ, bɛ zɛb tʋ̃ɔ́ bɛ. A Ɩsɩrayɛl nɩbɛ tɩ zɛb'a de a tẽw za a Amoritɩ mɩnɛ na tɩ kpɩɛr a,

²² a na tĩ a Arnon fʋɔla tɩ ta a Yabɔkɩ bàa a, nɩ a na tĩ a wɛja-kpalɛ tɩ sãá nɩ a Zurdɛ̃ a.

²³ A Sore, a Ɩsɩrayɛl Naaŋmɩn n'ʋ sàw a tɩɩm na ɩ a ʋ nɩ-bʋʋrɛ a zɛb de a Amoritɩ mɩnɛ tẽw, ɛ́ fʋ̃ʋ, fʋ bɔbr kɛ́ fʋ lɛb de ʋ a tɩ zie e?

²⁴ Mɛ̃ fʋ taa so a tẽw a fʋ ŋmɩn Kemɔsɩ na kʋ̀ b a? Ɛ́ tɩɩm kʋ̃ so bom nɛ za a Sore tɩ Naaŋmɩn na ɩ tɩ zɛb de a ɩ?

²⁵ Fʋ tɩɛr kɛ́ fʋ kpɛmɛ na zuo a Sipɔɔr bidɛb Balakɩ, na ɩ a Mowab tẽw nãà a bɩɩ? Ɛcɛ ʋl nɩ̃ɛ bɛ tɩ bɔ a Ɩsɩrayɛl nɩbɛ nɔhaarʋ ɛ, ʋ bɛ tɩ zɛb'ɩ bɛ ɩ.

²⁶ Yome kɔbr ata (300) n'ɩ à ŋá a Ɩsɩrayɛl nɩbɛ na zɩ̃ a Hɛsɩbon nɩ a Arowɛɛr nɩ a ten kpɔwlɩ pʋɔ a, nɩ a ten al za na be a Arnon nʋɔr a. Bʋ̃ʋ n'ʋ so nyɩ bɛ lɛb zɛb de a ten á ŋá a lɛn daar za?

²⁷ Mãa ƴãw a, ɩ̃ bɛ sãw fʋ ɛ, fʋ̃ʋ n'ʋ ɩrɛ faa a ɩ̃ zie, fʋ na zɛbr'ɩ mɛ̃ a. A Sore na dɩrɛ nɩ a nɩsaalbɛ a ƴɛ̀rʋ a, ʋ dɩ a ƴɛ̀rʋ a dɩ̃a, a Ɩsɩrayɛl nɩbɛ nɩ a Amɔ̃ tẽw dem cara pʋɔ!»

²⁸ Ɛcɛ, a Amɔ̃ tẽw dem nãà bɛ tɩ bɛr wõ a ƴɛ̀rʋ, a Zɛfɩte na tɩ tõ bɛ tɩ ƴɛ̀r kʋ̀ ʋ a ɩ.

A nʋɔr a Zɛfɩte na kõ a

²⁹ A Sore Vʋʋrʋ tɩ siw nɩ a Zɛfɩte. Ʋ tɩ tu na tɔl a Galaadɩ tẽw vuo pʋɔ, nɩ a Manase tẽw pʋɔ. Al pùorí, ʋ cen a Galaadɩ tẽw Misɩpe, ɛ́ tɩ yi a be kpɛ a Amɔ̃ tẽw.

³⁰ A Zɛfɩte tɩ kõ n nʋɔr a Sore zie à ŋá: «Fʋ̃ʋ wa ƴãw a Amɔ̃ tẽw dem a ɩ̃ nuru pʋɔ a,

³¹ sob nɛ za na na de niwn yi a ɩ̃ yir tuori mɛ̃, a lɛn daar ɩ̃ nãà wa yi a Amɔ̃ tẽw dem zie lɛb waar'ɩ ƴã-ɓaarʋ a, fʋ̃ʋ na so a sob nɛ, ɩ̃ɩ na maal'ɩ ʋ nɩ nyɩw-a-za-bàwr kʋ̀ b.»

³² A Zɛfɩte tɩ gãw nɩ a Amɔ̃ tẽw dem tʋr-bɔw, k'ʋʋ tɩ zɛb'ɩ bɛ, ɛ́ a Sore de bɛ ƴãw a ʋ nuru pʋɔ.

³³ A Zɛfɩte tɩ zɛb'a tʋ̃ɔ́ bɛ pẽlẽpẽlẽ, ɛ́ de ten lɩzɛr na be a Arowɛɛr, a Minitɩ nɩ a Avɛl-Keramim ten kpɔwlɩ cara pʋɔ a. À ŋá n'a a Ɩsɩrayɛl nɩbɛ tɩ dɩ naalʋ a Amɔ̃ tẽw dem zu.

³⁴ A Zɛfɩte na tɩ lɛb waar a Misɩpa a ʋ yir a, a ʋ pɔwyaa n'ʋ tɩ yi tuor'ʋ, ŋmɩɛr gãgaar ƴawr'ɩ. Ʋl yõ n'ʋ tɩ ɩ a ʋ bie, ʋ bɛ tɩ tɛr bidɛb bɩɩ pɔwyaa ƴãw pʋɔ a ʋ ƴãw ɛ.

³⁵ Ʋ na wa nyɛrɛ ʋ wa báarɛ a, ʋ taw nɩ a ʋ bʋ̃-suuri cɩɛrɩ ɛ́ yel: «'Woi! Ɩ̃ pɔwyaa a, nyɛ̃ pʋ-sãwna pʋɔ fʋ na ƴãw mɛ̃ a, fʋ̃ʋ mɩŋa n'ʋ so a kpɩɛrʋ páw mɛ̃, ɩ̃ kõ n nʋɔr a Sore zie, ɛ́ kʋ̃ tʋ̃ɔ́ lɩɛbɩ bɛr ɛ.»

³⁶ A ʋ pɔwyaa tɩ sɔw ʋ na: «Ɩ̃ sãà a, fʋ̃ʋ wa kõ nʋɔr a Sore zie a, fʋ̃ʋ ɩrɛ mɛ̃ tu n a lɛ fʋ na kõ a nʋɔr a, bʋ̃ʋ n'ʋ vɛ̃, ʋ ɩ na fʋ zɛb tʋ̃ɔ́ a fʋ dɔ̃ dem, a Amɔ̃ tẽw dem, yáa a san.»

³⁷ Al pùorí, ʋ yel a ʋ sãà: «Sàw bʋ̃-been ŋa kʋ̀ m: bɛr mɛ̃ cuwr ayi ɩ̃ kpɛ a tan pʋɔ mãa nɩ a ɩ̃ cɛnbɛ tɩ kõ ɩ̃ na na kpi ɛ́ bɛ kul sɩr a.»

³⁸ A Zɛfɩte tɩ bɛr ʋ nɩ sɔ́r ʋ cen a cuwr ayi ƴãw. Ʋlɛ nɩ a ʋ cɛnbɛ tɩ kpɛ n a tan pʋɔ tɩ kõ ʋ na na kpi ɛ́ bɛ kul sɩr a.

³⁹ A cuwr ayi na wa tɔl a, ʋ tɩ lɛb'a wa a ʋ sãà zie, ʋ wa tu a nʋɔr ʋ na tɩ kõ a. Zɩ̃ k'ʋʋ bɛ tɩ páw dɛb towtow ɛ, lɛ n'a a lɩɛbɩ tub a Ɩsɩrayɛl tẽw pʋɔ:

⁴⁰ yũon za a, a Ɩsɩrayɛl nɩbɛ pɔwbɛ mɩ́ cen na tɩ kõ a Galaadɩ tẽw Zɛfɩte pɔwyaa bibie anaar.