Ƴɛ̀r-dɩrbɛ 10 - A SƐB-SÕW

Ƴɛ̀r-dɩrbɛ bɛ mɩnɛ: Tola nɩ Yayiir

¹ A Abimelɛkɩ kũu pùorí a, Puwa bidɛb, Tola, na ɩ Ɩsakaar dɔwlʋ nɩr nɩ Dodo yãw a n'ʋ tɩ ìr k'ʋʋ faa a Ɩsɩrayɛl nɩbɛ. Samiir'a ʋ tɩ kpɩɛr, a Efarayim tãw vuo pʋɔ.

² Ʋ tɩ kaa nɩ a Ɩsɩrayɛl nɩbɛ zie yome lɩzɛr'ɩ ata, al pùorí, ʋ kpi bɛ ũù ʋ a Samiir.

³ A ʋ pùorí a, Yayiir na yi Galaadɩ a n'ʋ tɩ lɩɛr'ʋ ɩ a Ɩsɩrayɛl nɩbɛ ƴɛ̀r-dɩrɛ, yome lɩzɛr'ɩ ayi.

⁴ Ʋ tɩ tɛr'ɩ bidɛbr lɩzɛr'ɩ pie na tɩ zɔmnɛ bòn lɩzɛr'ɩ pie, ɛ́ tɛr ten lɩzɛr'ɩ pie a Galaadɩ, bɛ na cãà bʋɔlɛ a dɩ̃a kɛ́ Yayiir tẽli a.

⁵ A Yayiir tɩ kpi na, bɛ ũù ʋ Kamon.

A Amɔ̃ tẽw dem ŋmãa nɩ nɩ a Ɩsɩrayɛl nɩbɛ zɛbr

⁶ A Ɩsɩrayɛl nɩbɛ tɩ lɛb'a maal tĩ ɩrɛ a bɛ pɛlɛ a Sore pʋɔ ɩ: bɛ tɩ puor'ɩ a Báàl mɩnɛ nɩ a Asɩtarte mɩnɛ, lãwnɩ a Siiri tẽw dem, nɩ a Sɩdɔ̃ tẽw dem, nɩ Mowab tẽw dem, nɩ a Amɔ̃ tẽw dem, nɩ a Filisɩtɛ̃ mɩnɛ ŋmɩmɛ. Bɛ tɩ zawr'ɩ a Sore bɛr, bɛ cãà puore ʋ ɛ.

⁷ Lɛ n'a a Sore suur tɩ ìr a Ɩsɩrayɛl nɩbɛ ƴãw, ʋ de bɛ kʋ̀ a Filisɩtɛ̃ mɩnɛ nɩ a Amɔ̃ tẽw dem.

⁸ A na tĩ a lɛn daar, ɛ́ tɩ maalɩ yome pie nɩ ani a n'a, bɛ tɩ ɩ a kpɛ a Ɩsɩrayɛl nɩbɛ na kpɩɛr a Galaadɩ, a Amoritɩ mɩnɛ tẽw vuo na be a Zurdɛ̃ saa-pɛrɩ́ a, ɛ́ dɔwrɩ bɛ yaga.

⁹ A Amɔ̃ tẽw dem tɩ kpɛ na gãw a Zurdɛ̃, kɛ́ bɛ tɩ zɛb'ɩ a Zuda dɔwlʋ, nɩ a Bɛ̃zamɛ nɩ a Efarayim dɔwlʋ. A Ɩsɩrayɛl nɩbɛ kpɩɛrʋ bɛ tɩ tɛr manʋ ɛ.

¹⁰ Lɛ n'a a Ɩsɩrayɛl nɩbɛ tɩ kõ bʋɔlɩ a Sore k'ʋʋ wa faa bɛ. Bɛ tɩ yel'a: «Tɩ maal'ɩ yel-bier sãw fʋ, tɩ na zawrɩ fʋ bɛr, fʋ̃ʋ tɩ Naaŋmɩn, ɛ́ puori a Báàl mɩnɛ a.»

¹¹ A Sore tɩ sɔw bɛ na: «A Eziptɩ tẽw dem, a Amoritɩ mɩnɛ, a Amɔ̃ tẽw dem, a Filisɩtɛ̃ mɩnɛ,

¹² a Sɩdɔ̃ tẽw dem, a Amalesitɩ mɩnɛ nɩ a Meunitɩ mɩnɛ na tɩ dɔwrɛ nyɩ, nyɩ kõ bʋɔlɩ mɛ̃ a, ɩ̃ bɛ tɩ faa nyɩ a bɛ nuru pʋɔ ɛ?

¹³ Ɛcɛ nyɩɩm a, nyɩ zawrɩ mɛ̃ na bɛr ɛ́ maalɛ ŋmɩn yoru. Alɛ so ɩ̃ kʋ̃ lɛb faa nyɩ ɛ.

¹⁴ Nyɩ cen! Nyɩ kone bʋɔlɛ a ŋmɩmɛ al nyɩ na kaa ír a, a wa faa nyɩ. Alɛ n'a a fɛrɛ k'aa mɩ́ faa nyɩ a nyɩ kpɩɛrʋ daar!»

¹⁵ A Ɩsɩrayɛl nɩbɛ tɩ lɛb'a yel a Sore: «Tɩ maal'ɩ yel-bier. Ɩ tɩ lɛ za fʋ na nyɛ̃ a vɩɛl a, ɛcɛ cãà lɛb faa tɩ a dɩ̃a.»

¹⁶ Bɛ tɩ wob'ɩ a ŋmɩn-sãanbɛ lɔb bɛr, ɛ́ lɛb tĩ maalɛ a Sore. Lɛ n'a a Sore bɛ tɩ tʋ̃ɔ́ bɛr a Ɩsɩrayɛl nɩbɛ bɛ cãà wone a tuo ɩ.

¹⁷ A Amɔ̃ tẽw dem tɩ ɓã n taa, ɛ́ maalɩ a bɛ laɩ a Galaadɩ vuo pʋɔ, ɛ́ a Ɩsɩrayɛl nɩbɛ mɩ̀ ɓã taa, ɛ́ maalɩ a bɛ laɩ Misɩpa.

¹⁸ Lɛ n'a a dɔwlʋ nɩbɛ bɛl na tɩ zɩ̃ a Galaadɩ a, nɩ a bɛ nɩ-bɛrɛ tɩ sowre taa: «Ãa n'ʋ na de niwn zɛb'ɩ a Amɔ̃ tẽw dem? Sob nɛ na na de niwn zɛb'ɩ bɛ a na ɩ n a Galaadɩ nɩbɛ za nɩ-kpɛ̃ɛ.»