Ƴɛ̀r-dɩrbɛ 1 - A SƐB-SÕW

A KANÃA TẼW PƲƆ ZƖMA YELE 1:1—3:6 A Ɩsɩrayɛl nɩbɛ na zɩ̃ a Kanãa tẽw pʋɔ a

¹ A Zozue kũu pùorí, a Ɩsɩrayɛl nɩbɛ tɩ sowr'ɩ a Sore à ŋá: «A tɩ pʋɔ a, dɔwlʋ buor sob'ʋ na de niwn do tɩ zɛb'ɩ a Kanãa tẽw dem?»

² A Sore sɔw: «Zuda dɔwlʋ n'ʋ, ɩ̃ de nɩ a tẽw ƴãw a ʋ nuru pʋɔ.»

³ A Zuda yɛb tɩ n'ɩ a Sɩmɩ̃ɔ. Lɛ n'a a Zuda dɔwlʋ nɩbɛ tɩ yel a Sɩmɩ̃ɔ dɔwlʋ nɩbɛ: «Nyɩ wa tɩ cen tɩ zɛb de a zie bɛ na ŋmɛ a gbãw ír kʋ̀ tɩ a, nyɩ wa tɩ lãw taa zɛb'ɩ a Kanãa tẽw dem! Ɛ́ a pùorí tɩ mɩ̀ páw nyɩ cen tɩ zɛb de a nyɩ zie.» A Sɩmɩ̃ɔ dɔwlʋ nɩbɛ tɩ páw nɩ a Zuda dɔwlʋ nɩbɛ

⁴ bɛ cen a zɛbr. A Sore tɩ ƴãw nɩ a Kanãa tẽw dem nɩ a Perizitɩ mɩnɛ a bɛ nũú, bɛ kʋ nɩbɛ tùr-pie (10 000) a bɛ pʋɔ Bezɛkɩ tẽw.

⁵ Bɛ tɩ nyɛ̃ nɩ a nãà Adoni-Bezɛkɩ a Bezɛkɩ tẽw, ŋmãa nɩ ʋ a zɛbr, ɛ́ zɛb tʋ̃ɔ́ a Kanãa tẽw dem nɩ a Perizitɩ mɩnɛ.

⁶ A Adoni-Bezɛkɩ tɩ zɔ na, bɛ diw nyɔw ʋ, ŋma ʋ a nobidaar nɩ a gbɛbidaar.

⁷ Lɛ n'a a Adoni-Bezɛkɩ tɩ yel: «Na-mɩnɛ lɩz'a ata nɩ pie, bɛ na tɩ ŋma a nobidaar nɩ a gbɛbidaar a, mɩ́ tɩ wobr'ɩ a ɩ̃ bʋ̃-dɩ-ŋmaarɛ na yi a tabal zu lore a. A Naaŋmɩn ɩ m'ɩ a lɛ ɩ̃ na ɩ a.» Bɛ tɩ tɛr ʋ na cen nɩ a Zerizalɛm ʋ tɩ kpi a be.

⁸ A Zuda dɔwlʋ nɩbɛ tɩ zɛb'ɩ nɩ a Zerizalɛm, zɛb de ʋ. Bɛ tɩ kʋ n a tẽw nɩbɛ ɛ́ nyɩw a tẽw.

⁹ Al pùorí, a Zuda dɔwlʋ nɩbɛ tɩ siw na tɩ zɛb'ɩ a Kanãa tẽw dem na kpɩɛr a tan vuo, a Negɛɛvʋ nɩ a Ba-Peyi a.

¹⁰ Al pùorí bɛ zɛb'ɩ a Kanãa tẽw dem na kpɩɛr a Ebrɔ̃ a. A Ebrɔ̃ tɩ dãw na dɩ kɛ́ Kɩrɩyatɩ-Arba. Bɛ tɩ zɛb'a tʋ̃ɔ́ Sesaɩ, Ahiman nɩ Talmaɩ dɔwlʋ nɩbɛ a be.

¹¹ Bɛ tɩ yi n a be cen tɩ zɛb'ɩ a Deviir tẽw nɩbɛ. A Deviir tɩ dãw na dɩ kɛ́ Kɩrɩyatɩ-Sefɛɛr.

¹² A Kalɛb tɩ yel'ɩ à ŋá: «Sob nɛ na na ŋmãa nɩ a Kɩrɩyatɩ-Sefɛɛr zɛbr, ɛ́ zɛb de ʋ a, ɩ̃ na kʋ̀ ʋ nɩ a ɩ̃ pɔwyaa, Akɩsa, ʋ kul.»

¹³ Kenaazɩ na ɩ a Kalɛb yɛ-bile a, bidɛb, Otɩnɩɛl, tɩ zɛb'a de ʋ, a Kalɛb kʋ̀ ʋ a ʋ pɔwyaa Akɩsa ʋ kul.

¹⁴ A Akɩsa na tɩ tarɛ a Otɩnɩɛl zie wa báarɛ a, ʋ yel ʋ na k'ʋʋ zɛlɩ púo a ʋ sãà zie. Al pùorí ʋ siw a ʋ bõw zu, a Kalɛb sowr'ʋ: «Bʋ̃ʋ n'ʋ fʋ bɔbr?»

¹⁵ Ʋ sɔw: «Sàw maalɩ yel-vla kʋ̀ m! Kʋ̀ m kʋ̃ɔnɩ ziir, bʋ̃ʋ n'ʋ vɛ̃, a vuo fʋ na kʋ̀ m a saa-pɛrɩ́-dʋrʋ-lowr a ɩ n zi-kõw.» A Kalɛb tɩ kʋ̀ ʋ nɩ a bul-nɛ́ɛ na be a tẽw saa-zu nɩ a pɛrɩ́ a.

¹⁶ A Kenitɩ mɩnɛ na ɩ a Moyiir dɩɛm nɩbɛ a tɩ yi n a Kpãkparmɛ tɩɩr tẽw, ɛ́ páw a Zuda dɔwlʋ nɩbɛ cen a Zuda wɛja-kpalɛ pʋɔ na be a Aradɩ tẽw saa-pɛrɩ́-dʋrʋ-lowr a. Bɛ tɩ cen na tɩ kpɩɛr a Amalesitɩ mɩnɛ pʋɔ.

¹⁷ A Zuda dɔwlʋ nɩbɛ nɩ a ʋ yɛb Sɩmɩ̃ɔ dɔwlʋ nɩbɛ tɩ cen na tɩ ŋmãa nɩ zɛbr a Kanãa tẽw dem na kpɩɛr Sefatɩ a. Bɛ tɩ zɛb'a de a Sefatɩ, sãw ʋ bɛr ʋ za. Bɛ bʋɔlɛ nɩ a tẽw ŋa a ƴɛrɛŋa kɛ́ Hɔrma, a pɛr lɛ kɛ́ “Debuo.”

¹⁸ Al pùorí, a Zuda dɔwlʋ nɩbɛ tɩ zɛb'a de Gaza, Asɩkalon nɩ Ekiron tẽ-bɛrɛ nɩ a ziir al na pɩɛlɩ a a.

¹⁹ A Sore tɔr za tɩ be n a bɛ zie bɛ zɛb de a tan vuo. Ɛcɛ bɛ bɛ tɩ tʋ̃ɔ́ diw a zi-tɩ̃talɛ pʋɔ nɩbɛ ɩ, bʋ̃ʋ n'ʋ vɛ̃, a nɩbɛ bɛ ŋa tɩ tɛr'ɩ kure zɛbr-torkori.

²⁰ Bɛ tɩ kʋ̀ n a Ebrɔ̃ tẽw a Kalɛb, mɛ̃ a lɛ a Moyiir na tɩ yel a, ɛ́ a Kalɛb zɛb de ʋ a Anakɩ bidɛbr ata zie na tɩ kpɩɛr a be a.

²¹ A Bɛ̃zamɛ dɔwlʋ bʋʋrɛ bɛ tɩ tʋ̃ɔ́ diw a Zebizitɩ mɩnɛ na kpɩɛr a Zerizalɛm a ɩ, bɛ tɩ lãwnɩ nɩ a Bɛ̃zamɛ dɔwlʋ bʋʋrɛ kpɛ a Zerizalɛm wa tɔ a dɩ̃a.

²² A Zuzɛb bʋʋrɛ mɩ̀ tɩ cen na tɩ zɛb'ɩ a Betɛl tẽw, ɛ́ a Sore tɩ be a bɛ zie.

²³ Bɛ tɩ de nɩ niwn tõ nɩbɛ bɛ cen tɩ bɛl bãw a lɛ a tẽ-kpɛ̃ɛ na ŋmɛ̃ a. A tẽw yúor tɩ dãw na dɩ kɛ́ Luuzɩ.

²⁴ A nɩbɛ bɛ na tõ a tɩ nyɛ̃ nɩ nɩr kãw na yire a tẽw pʋɔ a, bɛ yel ʋ: «Wul tɩ a lɛ bɛ na mɩ́ ɩ kpɛ a tẽw pʋɔ a, ɛ́ tɩ na maalɩ fʋ nɩ vla.»

²⁵ A nɩr ʋl tɩ wul bɛ na. Lɛ n'a bɛ tɩ kpɛ kʋ a tẽw dem za. Ɛcɛ bɛ tɩ bɛr'ɩ a nɩr nɛ ʋ yi cere, ʋlɛ nɩ a ʋ dɔwlʋ nɩbɛ za.

²⁶ A nɩr nɛ tɩ cen nɩ Hititɩ mɩnɛ tẽw tɩ ŋmãa tẽ-kpɛ̃ɛ a be, por a yúor kɛ́ Luuzɩ. A tẽw nɛ yúor cãà n'ɩ a lɛ a dɩ̃a.

²⁷ A Manase nɩbɛ bɛ tɩ tʋ̃ɔ́ diw a tẽ-bɛrɛ á ŋá nɩ a tẽ-kpɔwlɩ nɩbɛ ɩ: Bɛtɩ-Sean, Taanakɩ, Door, Yivileam nɩ Megido. A Kanãa tẽw dem tɩ cãà na kpɩɛr a vuo ŋa.

²⁸ A Ɩsɩrayɛl nɩbɛ na saa wa kpɛmɛ a, bɛ bɛ tɩ tʋ̃ɔ́ diw bɛ ɩ, gbãgba-tome n'a bɛ tɩ ƴãw bɛ tone.

²⁹ A Efarayim nɩbɛ bɛ tɩ tʋ̃ɔ́ diw a Kanãa tẽw dem na tɩ kpɩɛr a Gezɛɛr a ɩ, lɛ n'a a Kanãa tẽw dem tɩ kpɩɛr a Gezɛɛr, a Efarayim nɩbɛ sɔgɔ.

³⁰ A Zabulɔ̃ nɩbɛ bɛ tɩ tʋ̃ɔ́ diw a Kanãa tẽw dem na kpɩɛr a Kitiron nɩ a Nahalɔl a ɩ. A nɩbɛ bɛ ŋa tɩ lãw na kpɩɛr'ɩ a Zabulɔ̃ nɩbɛ, bɛ ƴãw bɛ gbãgba-tome.

³¹ A Asɛɛr nɩbɛ bɛ tɩ tʋ̃ɔ́ diw a tẽ-bɛrɛ á ŋá nɩbɛ ɩ: Ako, Sɩdɔ̃, Alavʋ, Akizivʋ, Hɛlba, Afiki nɩ Erehovʋ.

³² A Asɛɛr nɩbɛ tɩ zɩ̃ n a Kanãa tẽw dem na tɩ kpɩɛr a tẽw a sɔgɔ, bɛ na bɛ tɩ tʋ̃ɔ́ diw bɛ a ƴãw.

³³ A Nɛfɩtali nɩbɛ bɛ tɩ tʋ̃ɔ́ diw a Kanãa tẽw dem na tɩ kpɩɛr a Bɛtɩ-Semɛsɩ nɩ a Bɛtɩ-Anatɩ a ɩ. Bɛ tɩ zɩ̃ n a bɛ sɔgɔ, ɛ́ ƴãw bɛ tone gbãgba-tome.

³⁴ A Amoritɩ mɩnɛ tɩ diw nɩ a Dan dɔwlʋ nɩbɛ ƴãw a tan vuo pʋɔ, bɛ bɛ tɩ sàw bɛ siw a zi-tɩ̃talɛ pʋɔ ɩ.

³⁵ Lɛ n'a a Amoritɩ mɩnɛ tɩ cãà kpɩɛr a Har-Herɛsɩ, a Ayalon nɩ a Saalvim. Ɛcɛ a pùorí a, a Zuzɛb yir nɩbɛ wa tʋ̃ɔ́ bɛ na, fɛr bɛ ƴãw bɛ tone gbãgba-tome.

³⁶ A Amoritɩ mɩnɛ tʋr-bɔw a saa-pɛrɩ́-dʋrʋ-lowr tɩ yi n a Nan tãw dob zie saa-pɛrɩ́, ɛ́ lanɛ a Edɔm tẽw nɩbɛ tẽw.