Yel-wula 9 - A SƐB-SÕW

¹ A malkɩ anũu sob tɩ pɛbl'ɩ a ʋ wɩ́ɛ. Ɩ̃ tɩ nyɛ̃ nɩ ŋmar-bir ʋ yi a salom zu wa lo a tẽw. Bɛ tɩ kʋ̀ ʋ nɩ a kɔ̃tɔmɛ dɔwrʋ bɔw-zulu pĩi.

² A ŋmar-bir tɩ yuo nɩ a kɔ̃tɔmɛ dɔwrʋ bɔw-zulu, ɛ́ zʋ̀ʋ́r na ɩ mɛ̃ vũu-kpɛ̃ɛ zʋ̀ʋ́r a ìr do. A tɩ ɩ na a mʋ̃tɔ̃w nɩ a zie a liw.

³ Sãsoge tɩ yi n a zʋ̀ʋ́r pʋɔ yɛ́r pàw a tẽw. Bɛ tɩ kʋ̀ a nɩ fãw na ŋmɛ̃ taa nɩ nan fãw a.

⁴ Bɛ tɩ yel a na k'aa taa wa ɩrɛ mʋ̃ɔ kãw za, nɩ váar kãw za, nɩ tɩɛ kãw za bom ɛ, ɛcɛ, a ɩrɛ a kpɩɛr a nɩsaalbɛ bɛl na bɛ tɛr a Naaŋmɩn bãwfʋ a bɛ gbẽé a.

⁵ A bɛ tɩ tɛr sɔ́r na kʋ a nɩbɛ bɛ ŋa ɩ, dɔwrʋ tɛwr'a a na dɔwrɛ bɛ tɩ ta cuwr anũu. Ɛ́ a dɔwrʋ a na ƴãwnɛ a ɩ na mɛ̃ nãw na mɩ́ tɛb nɩr a.

⁶ A alɩ bibie nɛ a, a nɩsaalbɛ na bɔbr'ɩ a kũu ɛ́ kʋ̃ nyɛ̃ ʋ ɛ, bɛ na bɔbr'a kɛ́ bɛ nãá kpi, ɛ́ a kũu mɩ́ zɔ kɛ́ bɛr bɛ.

⁷ A sãsoge á ŋá tɩ ŋmɛ̃ na taa nɩ wie bɛ na cɔbrɩ zɛbr ƴãw a. A zuru tɩ ɩ na mɛ̃ nãà-kpawʋʋr na ɩ salm-zɩɛ a n'a a vɔblɩ a, ɛ́ a niŋe tɩ ɩ mɛ̃ nɩsaalbɛ niŋe a.

⁸ A zukɔbɛ tɩ ɩ na mɛ̃ pɔwbɛ zukɔbɛ a, ɛ́ a nyɩ́mɛ ɩ mɛ̃ gbẽw nyɩ́mɛ a.

⁹ A mɩ́ tɩ ɩ na mɛ̃ kure kparʋ n'ʋ a su pàw a nyãa a, ɛ́ a pɩgɛ gɔmɛ mɩ́ tɩ ɩ mɛ̃ wi-yaga zɛbr-torkori gɔmɛ a na tawr zɔrɛ nɩ zɛbr zie a.

¹⁰ A tɩ tɛr'ɩ zʋɛ na ŋmɛ̃ taa nɩ nan zʋɛ a, zʋ-ɓɩlɓɩl, ɛ́ a fãw a na tɛr dɔwrɛ nɩ a nɩsaalbɛ a cuwr anũu a, a zʋɛ pʋɔ n'a a fãw ŋa be.

¹¹ A tɛr'ɩ nãà na ɩ a kɔ̃tɔmɛ dɔwrʋ bɔw-zulu malkɩ a. Bɛ bʋɔlɛ ʋ nɩ «Abadɔ̃» a ebre ƴɛ̀rʋ pʋɔ, ɛ́ bʋɔlɛ ʋ «Apolɩ̃ɔ», a gɩrɛkɩ ƴɛ̀rʋ pʋɔ.

¹² A zu-bio dãw-niwn sob tɔl'a, ɛ́ zu-bio ayi n'ɩ á ŋá na waar a pùorí a.

¹³ A malkɩ ayʋɔb sob tɩ pɛbl'ɩ a ʋ wɩ́ɛ. Ɩ̃ tɩ wõ n kɔkɔr ʋ ƴɛ̀rɛ yire a salm-zɩɛ bàwr-maal-kuur na be a Naaŋmɩn niŋé a gõgone anaar ƴãw.

¹⁴ A kɔkɔr tɩ yere na kʋ̀rɛ a malkɩ ayʋɔb sob na tɛr a wɩ́ɛ a: «Cɛr a malkɩ anaar bɛ na 'lẽ a Efaratɩ man-kpɛ̃ɛ nʋɔr a bɛr.»

¹⁵ Bɛ tɩ cɛ̀r'ɩ a malkɩ mɩnɛ anaar bɛr na tɩ cɔbrɩ gù a tɛm, a bibir, a cuw nɩ a yũon bɛ na na kʋ a nɩsaalbɛ na põ ziir ata a zi-been dem a.

¹⁶ Ɩ̃ tɩ wõ n a zɛbr-nɩbɛ na zɔm a wie a nʋɔr: bɛ tɩ ɩ n tu-túr kɔbr ayi (200 000 000).

¹⁷ A ɩ̃ yel-nyɛra pʋɔ a, à ŋá n'a a wie nɩ a zɔmnbɛ tɩ sãá: bɛ tɩ su n kure nyãa-kpali na mʋ̃ɔ mɛ̃ vũu a, a mɩnɛ ɩ sɛblɛ mɛ̃ kʋsɛ-bi-nyɩla kãw bɛ na bʋɔlɛ safɩɩr a, ɛ́ a mɩnɛ ɩ dʋɔr mɛ̃ cirbi a. A wie zuru tɩ ɩ na mɛ̃ gben zuru a, ɛ́ a nɛ́ɛ owr vũu, zʋ̀ʋ́r nɩ cirbi.

¹⁸ A bʋ̃-faar á ŋá ata: a vũu, a zʋ̀ʋ́r nɩ a cirbi, na tɩ yire a wie nɛ́ɛ pʋɔ a tɩ kʋ n a nɩsaalbɛ na põ ziir ata a zi-been dem.

¹⁹ Bʋ̃ʋ n'ʋ vɛ̃, a wie nɛ́ɛ pʋɔ n'a a fãw be, nɩ a zʋɛ pʋɔ mɩ̀. A zʋɛ ŋmɛ̃ na mɛ̃ wɩɩr a, ɛ́ tɛr zuru, ɛ́ alɛ n'a a malɛ nɩ a nɩbɛ.

²⁰ A nɩsaalbɛ bɛl na tɩ cɛ a, a bɛl a bʋ̃-faar ata al na bɛ tɩ kʋ a, bɛ tɩ bɛr a bɛ tõ-faar ɛ, bɛ tɩ cãà na puore a kɔ̃tɔmɛ nɩ a tɩbɛ bɛ na maalɩ nɩ salm-zɩɛ nɩ salm-pla a, bɛ na maalɩ nɩ kure nɩ kʋsɛbɛ nɩ dàar a, tɩbɛ na kʋ̃ tʋ̃ɔ́ nyɛ̃ bom, kʋ̃ tʋ̃ɔ́ wõ bom ɛ́ kʋ̃ tʋ̃ɔ́ cen a.

²¹ Bɛ mɩ̀ bɛ tɩ bɛr a bɛ nɩ-kʋ, a bɛ tɩtɩblʋ, a bɛ pɩ̃ɔ ɩ-ɩrɩ nɩ a bɛ nyãnyuwlu ɛ.