Yel-wula 7 - A SƐB-SÕW

A Ɩsɩrayɛl nɩbɛ 144 000 na ƴãw a Naaŋmɩn bãwfʋ a

¹ À á ŋá pùorí, ɩ̃ tɩ nyɛ̃ nɩ malkɩ anaar bɛ àr a tẽw gõgone anaar ƴãw. Bɛ tɩ nyɔw nɩ a tẽw sɛsɛbr anaar tɛr, kɛ́ sɛsɛb za taa fure a tẽw zu, a kʋ̃ɔ-kpɛ̃ɛ zu nɩ tɩɛ kãw za zu ɛ.

² Ɩ̃ɩ tɩ nyɛ̃ nɩ malkɩ yũo, ʋ yi a mʋ̃tɔ̃w puru zie dúor waar, ɛ́ tɛr a Naaŋmɩn na vʋʋrɛ a bãwfʋ bʋ̃-ƴãwna. Ʋ tɩ cɩɩr'ɩ kpɛ̃w za yel a malkɩ anaar bɛl bɛ na tɩ kʋ̀ fãw a tẽw nɩ a kʋ̃ɔ-kpɛ̃ɛ sãwfʋ ƴãw a:

³ «Nyɩ taa sãwnɛ a tẽw, a kʋ̃ɔ-kpɛ̃ɛ nɩ a tɩɩr ɛ, ɛ́ gù tɩ wa tɩ ƴãw a bãwfʋ a tɩ Naaŋmɩn tõ-tõ-biir gbẽé baarɩ.»

⁴ Ɩ̃ tɩ wõ n a nɩbɛ bɛ na ƴãw a bãwfʋ a nʋɔr: nɩbɛ tùr-lɩz'a ayopõi nɩ túr anaar (144 000), na ƴãw a bãwfʋ a Ɩsɩrayɛl bibiir dɔwlʋ za pʋɔ a:

⁵ Zuda dɔwlʋ pʋɔ, tùr-pie nɩ ayi (12 000) Urubɛn dɔwlʋ pʋɔ, tùr-pie nɩ ayi (12 000) Gadɩ dɔwlʋ pʋɔ, tùr-pie nɩ ayi (12 000)

⁶ Asɛɛr dɔwlʋ pʋɔ, tùr-pie nɩ ayi (12 000) Nɛfɩtali dɔwlʋ pʋɔ, tùr-pie nɩ ayi (12 000) Manase dɔwlʋ pʋɔ, tùr-pie nɩ ayi (12 000)

⁷ Sɩmɩ̃ɔ dɔwlʋ pʋɔ, tùr-pie nɩ ayi (12 000) Levi dɔwlʋ pʋɔ, tùr-pie nɩ ayi (12 000) Ɩsakaar dɔwlʋ pʋɔ, tùr-pie nɩ ayi (12 000)

⁸ Zabulɔ̃ dɔwlʋ pʋɔ, tùr-pie nɩ ayi (12 000) Zuzɛb dɔwlʋ pʋɔ, tùr-pie nɩ ayi (12 000) Bɛ̃zamɛ dɔwlʋ pʋɔ tùr-pie nɩ ayi (12 000).

A zu-sɛbla na yi ziir za a

⁹ À á ŋá pùorí, ɩ̃ tɩ jɩ́r'a nyɛ̃ zu-sɛbla nɩr na kʋ̃ tʋ̃ɔ́ sɔ́r bãw bɛ nʋɔr a. Ten za, dɔwlʋ za, nɩ-bʋʋrɛ za nɩ ƴɛ̀r-pɛ-bʋʋrɛ za nɩbɛ tɩ nɛbɛ. Bɛ tɩ àr'ɩ a naalʋ-dà-kɔw nɩ a Pele niŋé, su kpar-wowr pɛlɛ ɛ́ tɛr kpãkparmɛ wuli a nuru pʋɔ.

¹⁰ Bɛ tɩ cɩɩrɛ nɩ kpɛ̃w za yere: «A faafʋ yi n a tɩ Naaŋmɩn na zɩ̃ a naalʋ-dà-kɔw zu a zie, nɩ a Pele zie!»

¹¹ A malkɩ mɩnɛ za tɩ àr'a viiri koli a naalʋ-dà-kɔw, a nɩ-kore nɩ a bʋ̃-vʋʋrɩ anaar. Bɛ tɩ lo na vɔblɩ muru a naalʋ-dà-kɔw niŋé, ɛ́ puori a Naaŋmɩn nɩ bɛ tʋɔra-siwru,

¹² yere: «Amɛn! Sɩza n'a, a tɩ Naaŋmɩn so a yúor-vɩɛlʋ-danʋ, a yúor-zɛwfʋ, a yã-bãwfʋ, a barka puoru, a ƴãwfʋ, a kpɛnʋ, a fãw, yome yome za! Amɛn!»

¹³ A nɩ-kore ƴen sob tɩ de nɩ a ƴɛ̀rʋ sowri mɛ̃: «Ãa mɩnɛ n'ɩ a nɩbɛ bɛ ŋa na su a kpar-wowr pɛlɛ a, ɛ́ nyɩnɛ n'a bɛ yi wa?»

¹⁴ Ɩ̃ tɩ sɔw ʋ na: «Ɩ̃ Zu-sob i, fʋ̃ʋ n'ʋ bãw.» Lɛ n'a ʋ tɩ yel mɛ̃: «Bɛlɛ n'ɩ a bɛl na yi a kpɩɛrʋ kpɛ̃ɛ pʋɔ wa a. Bɛ pɛ́w nɩ a bɛ kpar-wowr ɛ́ ɩ a pɛlɩ a Pele zɩ̃ɩ pʋɔ.

¹⁵ Alɛ so bɛ àr a Naaŋmɩn naalʋ-dà-kɔw niŋé, ɛ́ ƴãwnɛ a Naaŋmɩn mʋ̃tɔ̃w nɩ tɩ̃ɩsɔw, a ʋ yir pʋɔ. A sob nɛ na zɩ̃ a naalʋ-dà-kɔw zu a na piw bɛ na tɛr.

¹⁶ Kɔ̃ bɩɩ kʋ̃ɔ-nyúur kʋ̃ lɛb kpɛ bɛ towtow ɛ, a mʋ̃tɔ̃w nɩ tʋlʋ kãw za kʋ̃ lɛb dɩ bɛ ɩ.

¹⁷ Bʋ̃ʋ n'ʋ vɛ̃, a Pele na be a naalʋ-dà-kɔw sɔwlɩsɔw a na ɩ n a bɛ cɩ̃ɩnɛ, ʋ na tɛr bɛ na cen nɩ a be a kʋ̃ɔ-walwal na bùle yire a. Ɛ́ Naaŋmɩn na fɩɛl'ɩ mʋta-kʋ̃ɔ za bɛr a bɛ mimié.»