Yel-wula 6 - A SƐB-SÕW

A sɩ-suur 'lawfʋ yele

¹ Al pùorí, ɩ̃ tɩ nyɛ̃ nɩ a Pele na 'law a sɩ-suur ayopõi dãw-niwn sob a, ɩ̃ɩ tɩ wõ a bʋ̃-vʋʋrɩ anaar ƴen sob ʋ tanɩ mɛ̃ saa a: «Wa!»

² Ɩ̃ tɩ jɩ́r'a nyɛ̃ wur-pla. A ʋ zɔmnɛ tɩ tɛr'ɩ tam, ɛ́ bɛ kʋ̀ ʋ zɛb-tʋ̃ɔ́fʋ kpawʋɔ ʋ cen nɩ mɛ̃ nɩr na zɛb tʋ̃ɔ́, ɛ́ na cãà lɛb zɛb tʋ̃ɔ́ a.

³ A Pele na wa 'law a sɩ-suur ayi sob a, ɩ̃ wõ n a bʋ̃-vʋʋrɩ ayi sob ʋ yere: «Wa!»

⁴ Lɛ n'a wur-yũo tɩ yi ɩ zɩɛ. Bɛ tɩ kʋ̀ n a ʋ zɔmnɛ fãw k'ʋʋ ɩ ƴã-ɓaarʋ za ta cãà a tẽw zu ɛ, a nɩsaalbɛ kʋrɛ taa. Bɛ tɩ kʋ̀ ʋ nɩ zɛbr-sɔ-kpɛ̃ɛ.

⁵ A Pele na wa 'law a sɩ-suur ata sob a, ɩ̃ wõ n a bʋ̃-vʋʋrɩ ata sob ʋ yere: «Wa!» Ɩ̃ tɩ jɩ́r'a nyɛ̃ wur-sɛbla. A ʋ zɔmnɛ tɩ tɛr'ɩ bʋ̃-mána a ʋ nũú.

⁶ Ɩ̃ tɩ wõ na mɛ̃ kɔkɔr na ƴɛ̀rɛ yire a bʋ̃-vʋʋrɩ anaar sɔgɔ a, ʋ tɩ yere na: «Ka-pla bʋ̃-mána nɔ-been bibi-been sã-ya libie ƴãw, ɛ́ ka-zɩɛ bʋ̃-mána nɛ́ɛ ata bibi-been sã-ya libie ƴãw. Ɛcɛ, a kãá nɩ a divɛ̃ a, taa sãwnɛ a bɛrɛ ɩ.»

⁷ A Pele na wa 'law a sɩ-suur anaar sob a, ɩ̃ wõ n a bʋ̃-vʋʋrɩ anaar sob ʋ yere: «Wa!»

⁸ Ɩ̃ tɩ jɩ́r'a nyɛ̃ wur na sɔb mɛ̃ va-sɛbla a. A ʋ zɔmnɛ dɩ na kɛ́ Kũu, ɛ́ a kpɩmɛ tẽw tɩ tuur ʋ. Bɛ tɩ kʋ̀ a nɩ fãw a tẽw ziir anaar sob zu, k'aa kʋrɛ a nɩbɛ nɩ a zɛbr-sɔ-kpɛ̃ɛ, nɩ a kɔ̃, nɩ a bàal-faar nɩ a tẽw zu wɛ-dʋ̃-faar.

⁹ A Pele na wa 'law a sɩ-suur anũu sob a, a bɛlɩ dem bɛ na kʋ a Naaŋmɩn ƴɛ̀rʋ ƴãw nɩ a dãsɩɛ bɛ na dɩ a ƴãw a, ɩ̃ nyɛ̃ nɩ a bɛ sɩ́ɩr a bàwr-maal-kuur pile.

¹⁰ Bɛ tɩ cɩɩrɛ na nɩ kɔkɔr-kpɛ̃w yere: «Zu-sob na ɩ sõw, ɛ́ ɩ Zu-sob sɩza a, debor'a fʋ na gù n a ƴɛ̀rʋ-maalʋ nɩ a tɩ kũu san sowru a tẽw zu nɩbɛ zie tɩ ta?»

¹¹ Lɛ n'a bɛ tɩ kʋ̀ ŋa za kpar-pla wogo, ɛ́ yel bɛ kɛ́ bɛ cãà alɛ blã, ɛ́ gù a bɛ tõ-tõ-taabɛ nɩ a bɛ yɛbr a na fɛr kɛ́ bɛ kʋ mɛ̃ a bɛl a nʋɔr tɩ paalɩ.

¹² Al pùorí, ɩ̃ tɩ nyɛ̃ nɩ a Pele ʋ 'law a sɩ-suur ayʋɔb sob. Lɛ n'a a tẽsɔw-kɔbr tɩ dam kpɛ̃w kpɛ̃w za! A mʋ̃tɔ̃w tɩ lɩɛb'a sɔb mɛ̃ pɛn-sɛbla kpirkpir a, ɛ́ a cuw lɩɛbɩ ʋ za, mʋ̃ɔ mɛ̃ zɩ̃ɩ a.

¹³ A saa ŋmar-bie tɩ pɔrɛ na lore a tẽw zu mɛ̃ kãkã-tɩɛ sɛsɛb-kpɛ̃ɛ na fu a wɔ̃-kɛrɛ lɔb a.

¹⁴ A salom tɩ bɔr'a ɩ mɛ̃ sɛbɛ bɛ na pili a. A tan nɩ a kʋ̃ɔ-kpɛ̃ɛ-sɔgɔ-ten bɛ tɩ cãà be a beba ziir ɛ.

¹⁵ A tẽw zu na-mɩnɛ, a nɩ-bɛrɛ, a sojarɩ nɩ-bɛrɛ, a tɛra dem, a fãw dem, bɛ za, gbãgbaar nɩ nɩbɛ na so bɛ tʋɔra a, tɩ sɔwl'ɩ a bɔwrɩ pʋɔ nɩ a pie pʋɔ a tan zu.

¹⁶ Bɛ tɩ yere nɩ a tan nɩ a pie: «Nyɩ lo gùri pàw tɩ, sɔwlɩ tɩ zãá nɩ a sob nɛ na zɩ̃ a naalʋ-dà-kɔw zu a niŋé, zãá nɩ a Pele suur.

¹⁷ Bʋ̃ʋ n'ʋ vɛ̃, a bɛ suur bibi-kpɛ̃ɛ vɩɛ na, ɛ́ ãa n'ʋ na tʋ̃ɔ́ cãà be?»