Yel-wula 4 - A SƐB-SÕW

A Naaŋmɩn bɛ na puore a tẽ-vla pʋɔ a

¹ À á ŋá pùorí, ɩ̃ tɩ nyɛ̃ nɩ bʋ̃-yũo: ɩ̃ nyɛ̃ nɩ pan na yuo a tẽ-vla pʋɔ a. A kɔkɔr ʋl ɩ̃ na tɩ dãw wõ ʋ yire mɛ̃ a wɩ́ɛ a tɩ yel mɛ̃ na: «Do wa a ka, ɩ̃ɩ na wul fʋ nɩ a ʋlɩ bom nɛ na na wa a pùorí a.»

² A Naaŋmɩn Vʋʋrʋ tɩ siw mɛ̃ nɩ daadaalɛ. Ɛ́ naalʋ-dà-kɔw n'ɩ ŋan tɩ be a tẽ-vla pʋɔ be. Nɩr kãw tɩ zɩ̃ n a naalʋ-dà-kɔw zu.

³ Ʋ tɩ nyɩwrɛ na mɛ̃ kʋsɛ-bi-nyɩlɩ kãw bɛ na bʋɔlɛ kɛ́ zasɩpʋ nɩ sardʋan a. Sa-sʋɔ na nyɩwrɛ mɛ̃ kʋsɛ-bi-nyɩla bɛ na bʋɔlɛ kɛ́ emerodɩ a tɩ viir'a koli a naalʋ-dà-kɔw.

⁴ Naalʋ dà-kɔwr lɩzɛr'ɩ anaar tɩ viir'a koli a naalʋ-dà-kɔw, ɛ́ nɩ-kore lɩzɛr'ɩ anaar na su kpar-pɛlɛ ɛ́ vɔblɩ nãà-kpawʋʋr na ɩ salm-zɩɛ a tɩ zɩ̃ a dà-kɔwr al zu.

⁵ Saa-nyɩwrʋ, nɩ kɔkɛɛ, nɩ saa tanʋ tɩ yire nɩ a naalʋ-dà-kɔw ƴãw. Lãpa vũuni ayopõi tɩ 'lere nɩ a naalʋ-dà-kɔw niŋé: a Naaŋmɩn Vʋʋrʋ ayopõi n'a.

⁶ Bom kãw tɩ be n a naalʋ-dà-kɔw niŋé ɩ mɛ̃ kʋ̃ɔ-kpɛ̃ɛ kʋ̃ɔ na ɩ walwal cuoli ŋmɛ̃ mɛ̃ kʋ̃ɔ-kuur a. A sɔwlɩsɔw a, bʋ̃-vʋʋrɩ anaar na ɩ mimie tɛwr a niŋé nɩ a pùorí a tɩ jil'a koli a naalʋ-dà-kɔw.

⁷ A bʋ̃-vʋʋra dãw-niwn sob tɩ ŋmɛ̃ na taa nɩ gbẽw, a ayi sob ŋmɛ̃ taa nɩ nadele, a ata sob tɩ ƴãw nɩ niwn mɛ̃ nɩsaal niwn a, ɛ́ a anaar sob tɩ ŋmɛ̃ taa nɩ sɩla na laarɛ a.

⁸ A bʋ̃-vʋʋrɩ anaar á ŋá kãw za tɩ tɛr'ɩ pɩgɛ ayʋɔb na ɩ mimie tɛwr a zikurí nɩ a pʋ̃ɔmɩ a. Mʋ̃tɔ̃w nɩ tɩ̃ɩsɔw, a tɩ yere na bɛ tɛr nãà bɛr ɛ: «Sõw, sõw, sõw n'ɩ a Sore, Naaŋmɩn kpɛnʋ-za-sob, ʋl na tɩ be, na be, ɛ́ waar a!»

⁹ A bʋ̃-vʋʋrɩ anaar na mɩ́ wa yiele danɛ nɩ, ƴãwnɛ nɩ ɛ́ puore nɩ a sob nɛ na zɩ̃ a naalʋ-dà-kɔw zu a yãanɩ a, a sob nɛ na vʋʋrɛ kʋralɛ a,

¹⁰ a nɩ-kore lɩzɛr'ɩ anaar mɩ́ gbĩ n dume a sob nɛ na zɩ̃ a naalʋ-dà-kɔw zu a niŋé, bɛ mɩ́ puor'ɩ a sob nɛ na vʋʋrɛ kʋralɛ a, nɩ bɛ tʋɔra-siwru. Bɛ mɩ́ lɔb'ɩ a bɛ nãà-kpawʋʋr bin a naalʋ-dà-kɔw niŋé ɛ́ yere:

¹¹ «Sore tɩ Naaŋmɩn i, fʋ sɛw na na nyɛ̃ danʋ, ƴãwfʋ nɩ kpɛnʋ. Bʋ̃ʋ n'ʋ vɛ̃, fʋ̃ʋ n'ʋ ír a bome za, fʋ sàw na k'aa be, ɛ́ ír a.»