Yel-wula 3 - A SƐB-SÕW

A ƴɛ̀rʋ na ƴɛ̀r kʋ̀ a Sardɩ tẽw Lãw-yir a

¹ «Sɛb yel a Sardɩ tẽw Lãw-yir malkɩ: À ŋá n'a a sob nɛ na tɛr a Naaŋmɩn Vʋʋrʋ ayopõi nɩ a ŋmar-bie ayopõi a yere: ɩ̃ bãw nɩ a fʋ tome. Bɛ yel kɛ́ fʋ vʋʋrɛ na, ɛcɛ fʋ kpi na.

² Cɛlɛ be, ɛ́ a yele al na cɛ ɛ́ bɔbr kũu a, ɩ k'a lɛb kpɛmɛ. Bʋ̃ʋ n'ʋ vɛ̃, ɩ̃ bɛ nyɛ̃ a fʋ ɩ-ɩrɩ a vɩɛl a za a ɩ̃ Naaŋmɩn niŋé ɩ.

³ A na ɩ lɛ a, lɛb tɩɛrɩ a lɛ fʋ na de a wulu ɛ́ wõ ʋ a. Tuur a wulu ŋa ɛ́ lɩɛbɩ a fʋ ɩb. Fʋ̃ʋ bɛ wa cɛlɛ be a, ɩ̃ na wa na wa ur fʋ mɛ̃ nyãnyuge a, ɛ́ fʋ kʋ̃ bãw a tɛm ɛ.

⁴ Ɛcɛ, a Sardɩ a, fʋ tɛr'ɩ nɩbɛ blã na bɛ dɛw a bɛ kparɩ bɛr a. Bɛ na su n kpar-pɛlɛ bɩɛlɛ nɩ mɛ̃, bʋ̃ʋ n'ʋ vɛ̃, bɛ sɛw na taa nɩ.

⁵ À ŋá n'a a sob nɛ na na zɛb tʋ̃ɔ́ a na su kpar-pɛlɛ. Ɩ̃ kʋ̃ sãw a ʋ yúor bɛr a nyɔ-vʋʋrʋ sɛbɛ pʋɔ ɩ, ɩ̃ɩ na yel'ɩ a ɩ̃ Sãà nɩ a ʋ malkɩ mɩnɛ niŋé k'ɩ̃ɩ nɩr'ʋ.

⁶ Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.»

A ƴɛ̀rʋ na ƴɛ̀r kʋ̀ a Fɩladɛlfɩ tẽw Lãw-yir a

⁷ «Sɛb yel a Fɩladɛlfɩ tẽw Lãw-yir malkɩ: À ŋá n'a a Nɩ-sõw, a Sob nɛ na tɛr yel-mɩŋa a, yere, ʋl na tɛr a nãà Daviir pĩi a, ʋl na mɩ́ yuo ɛ́ nɩr kʋ̃ tʋ̃ɔ́ pàw a, ʋl na mɩ́ pàw ɛ́ nɩr kʋ̃ tʋ̃ɔ́ yuo a:

⁸ ɩ̃ bãw nɩ a fʋ tome. Nyɛ̃, ɩ̃ yuo nɩ pan a fʋ niŋé nɩr na kʋ̃ tʋ̃ɔ́ pàw a. Fʋ bɛ tɛr fãw yaga ɩ, ɛcɛ fʋ tɛr'ɩ a ɩ̃ ƴɛ̀rʋ vla ɛ́ bɛ jɛ m bɛr ɛ.

⁹ Nyɛ̃ a lɛ ɩ̃ na na ɩ a Sɩtaana lãw nɩbɛ a, a zir-ŋmarbɛ bɛ ŋa na yel kɛ́ bɛ ɩ n Zifʋ mɩnɛ ɛ́ bɛ ɩ Zifʋ a: ɩ̃ na fɛr bɛ na ƴãw bɛ wa gbĩ dume a fʋ niŋé. Bɛ na nyɛ̃ na bãw k'ɩ̃ɩ nɔnɛ fʋ na.

¹⁰ Ɩ̃ na yel kɛ́ fʋ dɩ kanyir fʋ sàw a, ɩ̃ mɩ̀ na gù b'ɩ a kpɩɛrʋ daar, a kpɩɛrʋ na na páw a tẽ-daa za k'ʋʋ ɩ a tẽw zu nɩbɛ kaa a.

¹¹ Ɩ̃ kʋ̃ yaa kɛ́ wa ɩ. A ʋlɩ bom nɛ fʋ na tɛr a, fɩɩr'ʋ tɛr kpɛ̃w za nɩr za taa faarɛ a fʋ zɛb-tʋ̃ɔ́fʋ kpawʋɔ ɩ.

¹² Sob nɛ na na zɛb tʋ̃ɔ́ a, ɩ̃ na ɩ na ʋ ɩ kpul a ɩ̃ Naaŋmɩn yir pʋɔ, ʋʋ kʋ̃ yi zaa a ʋ pʋɔ towtow ɛ. Ɩ̃ na sɛb'ɩ a ɩ̃ Naaŋmɩn yúor ƴãw a ʋ zu, nɩ a ɩ̃ Naaŋmɩn tẽ-kpɛ̃ɛ yúor, a Zerizalɛm paala na yi a ɩ̃ Naaŋmɩn zie a salom zu siwr a. Ɩ̃ mɩ̀ na sɛb'ɩ a ɩ̃ yo-paala ƴãw a ʋ zu.

¹³ Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.»

A ƴɛ̀rʋ na ƴɛ̀r kʋ̀ a Lawdise tẽw Lãw-yir a

¹⁴ Sɛb yel a Lawdise tẽw Lãw-yir malkɩ: «À ŋá n'a a Amɛn, a dãsɩ-dɩrɛ mɩŋa na bɛ lɛbr pùor a yere, ʋl na ɩ a Naaŋmɩn bʋ̃-íri za yib zie a:

¹⁵ ɩ̃ bãw nɩ a fʋ tome, fʋ bɛ ɓãá gbinini ɛ, ɛ́ mɩ̀ bɛ tʋlɛ kpãkpã ɩ. Fʋ nãá nɩ̃ɛ tɩ ɓãá gbinini bɩɩ tʋlɛ kpãkpã!

¹⁶ Ɛcɛ, fʋ na tʋlɛ bʋnbʋn, bɛ ɓãá gbinini ɛ́ mɩ̀ bɛ lɛb tʋlɛ kpãkpã a, ɩ̃ na ti fʋ na bɛr.

¹⁷ Fʋ yere nɩ à ŋá: “Ɩ̃ tɛr a na, ɩ̃ kpɛ n naalʋ, bom za tuo bɛ kpɩɛr mɛ̃ ɩ.” Ɛ́ nɩ̃ɛ bɛ bãw kɛ́ fʋ bɛ tɛr ŋmɛ̃a ɩ, kɛ́ fʋ ɩrɛ nɩ nɩbaalʋ, kɛ́ fʋ ɩ n nã́w sob, zɔ̃w ɛ́ ɩ ƴã-gan zawla ɩ!

¹⁸ Ɩ̃ wule fʋ nɩ yã a: dà salm-zɩɛ a ɩ̃ zie tʋ̃ɔ́ sɩrɩ kpɛ naalʋ, salm-zɩɛ bɛ na zuw ír a dɛwr bɛr a. Dà kpar-pɛlɛ su pàw fʋ tʋɔra, a fʋ ƴã-gan zawla na ɩrɛ vĩ a ta cãà sãá ɩ. Mɩ̀ dà mimie tɩ̃ɩ sanɩ nɩ a fʋ mimie kɛ́ fʋ tʋ̃ɔ́ nyɛrɛ.

¹⁹ Bɛlɩ dem za ɩ̃ na nɔnɛ a, ɩ̃ mɩ́ wule bɛ nɩ a bɛ sãwna ɛ́ kpãànɛ bɛ. A na ɩ lɛ a, tʋlɛ ɛ́ lɩɛbɩ a fʋ ɩb.

²⁰ Mãa n'ɩ ŋan àr a dɩ̃dɔr nʋɔr kpàwrɛ a pan. Nɩr wa wõ a ɩ̃ kɔkɔr ɛ́ yuo mɛ̃ a pan a, ɩ̃ na kpɛ n a ʋ zie tɩ lãw nɩ ʋ dɩ, ʋʋ lãw nɩ mɛ̃ dɩ.

²¹ Sob nɛ na na zɛb tʋ̃ɔ́ a, ɩ̃ na ɩ na ʋ lãw nɩ mɛ̃ zɩ̃ a ɩ̃ naalʋ-dà-kɔw zu, mɛ̃ a lɛ a mãa mɩ̀ na zɛb tʋ̃ɔ́ ɛ́ cen tɩ lãw nɩ a ɩ̃ Sãà zɩ̃ a ʋ naalʋ-dà-kɔw zu a.

²² Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.»