Yel-wula 21 - A SƐB-SÕW

A salom-paala nɩ a tẽsɔw-paala yele

¹ Lɛ n'a ɩ̃ tɩ nyɛ̃ salom-paala nɩ tẽsɔw-paala. Bʋ̃ʋ n'ʋ vɛ̃, a salom dãw-niwn sob nɩ a tẽsɔw dãw-niwn sob tɩ bɔr'a, a kʋ̃ɔ-kpɛ̃ɛ bɛ tɩ cãà be ɩ.

² Ɩ̃ɩ tɩ nyɛ̃ nɩ a tẽ-sõw, a Zerizalɛm paala, na yi a Naaŋmɩn zie a salom zu siwr a, ʋ ɩ mɛ̃ pɔw-sãan na ƴãw ʋ pɩ̃ɛmɛ a ʋ sɩr ƴãw a.

³ Ɩ̃ tɩ wõ n kɔkɔ-kpɛ̃w na yire a naalʋ-dà-kɔw pɛr a, ʋ tɩ yere na: «Ƴɛrɛŋa a, a Naaŋmɩn kpɛb zie be n a nɩsaalbɛ sɔgɔ. Ʋ na lãw na kpɩɛr'ɩ bɛ, ɛ́ bɛ na ɩ n a ʋ nɩ-bʋʋrɛ, ʋʋ ɩ a Naaŋmɩn na be a bɛ zie a.

⁴ Ʋ na fɩɛl'ɩ mʋta-kʋ̃ɔ za bɛr a bɛ mimié. Kũu kʋ̃ lɛb cãà be ɩ, kuor nɩ cɛlsɩ nɩ kpɩɛrʋ kʋ̃ lɛb cãà be ɩ. Bʋ̃ʋ n'ʋ vɛ̃, a koro za zie tɔl'a.»

⁵ Lɛ n'a a sob nɛ na zɩ̃ a naalʋ-dà-kɔw zu a tɩ yel: «Ƴɛrɛŋa a, ɩ̃ maalɛ nɩ a bome za a ɩ paalɛ.» Al pùorí ʋ yel mɛ̃: «Sɛb k'aa ƴɛ̀r-bie á ŋá ɩ n sɩza ɛ́ bɛ tɛr bʋnʋ towtow ɛ.»

⁶ Ʋ tɩ lɛb'a yel mɛ̃: «A maal'a! Ɩ̃ ɩ n a Alfa nɩ a Omega, a pɛr-tib nɩ a baarʋ. Sob nɛ kʋ̃ɔ-nyúur na kpɩɛr a, ɩ̃ na kʋ̀ ʋ nɩ a nyɔ-vʋʋrʋ kʋ̃ɔ na bule yire a, mɔlɛ.

⁷ A bom ŋa n'ʋ a sob nɛ na zɛb tʋ̃ɔ́ a na páw, ɩ̃ɩ na ɩ n a ʋ Naaŋmɩn, ʋʋ ɩ a ɩ̃ bie.

⁸ Ɛcɛ, a dɛ̃bɩ̃ɛ dem a, a bɛlɩ dem na lɛb pùor a, a nɩ-faar, a nɩ-kʋrbɛ, a pɩ̃ɔ-yel-maalbɛ, a tɩtɩlbɛ a, a bɛlɩ dem na maalɛ a tɩbɛ a, nɩ a zir-ŋmarbɛ za a, a bɛ zie n'ɩ a cirbi vũu gbãtar-kpɛ̃ɛ: a kũu-gb'a ayi sob'ʋ.»

A Zerizalɛm paala

⁹ A malkɩ mɩnɛ ayopõi na tɩ tɛr a koli-nyúuri ayopõi na paalɩ a baarʋ daar bʋ̃-faar ayopõi a, a bɛ ƴen sob tɩ wa na wa yel mɛ̃: «Wa, ɩ̃ wa wul fʋ a pɔw-sãan, a Pele pɔw.»

¹⁰ A Naaŋmɩn Vʋʋrʋ tɩ siw mɛ̃ na, ɛ́ a malkɩ tɩ tɛr mɛ̃ do n tã-kpɛ̃ɛ na kɛrɩ a zu, tɩ wul mɛ̃ a tẽ-sõw-kpɛ̃ɛ, a Zerizalɛm, na tɩ yi a Naaŋmɩn zie a salom zu siwr a.

¹¹ Ʋ tɩ nyɩwrɛ na nɩ a Naaŋmɩn mɩŋa yúor-vɩɛlʋ-danʋ, ʋ tɩ nyɩwrɛ na mɛ̃ kʋsɛ-bi-nyɩla a, mɛ̃ zasɩpʋ kʋsɛ-bi-nyɩla na cuoli mɛ̃ kʋ̃ɔ-kuur a.

¹² A tẽw tɩ tɛr'ɩ dacĩ-kpɛ̃ɛ na kɛrɩ a, bɛ mɛ viiri koli ʋ, ɛ́ mɩ̀ tɛr dɩ̃dɛɛ pie nɩ ayi, yée sɛb ƴãw a dɩ̃dɛɛ ƴãw.

¹³ Lõbowr za mɩ́ tɩ tɛr'ɩ dɩ̃dɛɛ ata: ata a saa-pɛrɩ́, ata a saa-pɛrɩ́-gʋba-lowr, ata a saa-pɛrɩ́-dʋrʋ-lowr, ata a mʋ̃tɔ̃w-kpɛb-lowr.

¹⁴ A tẽw dacin tɩ mɛ na dɔwlɩ kʋsɛbɛ pie nɩ ayi zu bɛ na sʋ̃ɔ́ nɩ a pɛr a, ɛ́ a Pele nɩ-toni pie nɩ ayi yée sɛb a kʋsɛbɛ zu.

¹⁵ A malkɩ na tɩ ƴɛ̀rɛ a ɩ̃ zie a tɩ tɛr'ɩ bʋ̃-mána, salm-zɩɛ bàa-kɛkɛr, k'ʋʋ man nɩ a tẽw, a ʋ dɩ̃dɛɛ nɩ a ʋ dacin.

¹⁶ A tẽw tɩ tɛr'ɩ lõbowe anaar na sɛw taa a: a wogo nɩ a yɛ̀lʋ za tɩ zɛ̃ n taa. A malkɩ tɩ manɩ nɩ a tẽw nɩ a ʋ bàa-kɛkɛr cen nɩ, a tɩ ɩ kilo tùr-pie nɩ ayi (12 000): a wogo nɩ a yɛ̀lʋ nɩ a kɛrʋ za tɩ zɛ̃ n taa.

¹⁷ Ʋ mɩ̀ tɩ manɩ nɩ a dacin, a ɩ a na tĩ a nɩsaal kpãkpãwnyũgbiel ƴãw tɩ baarɩ a nobie a, gb'a a lɩz'a ayopõi nɩ anaar (144), nɩsaal bʋ̃-mána a malkɩ na tɩ manɛ nɩ a.

¹⁸ Zasɩpʋ n'a bɛ tɩ mɛ n a dacin, ɛ́ mɛ a tẽw tɔr za nɩ salm-zɩɛ mɩŋa na ɩ mɛ̃ kʋ̃ɔ-kuur na cuoli a.

¹⁹ Bɛ tɩ ƴãw nɩ kʋsɛ-bi-nyɩlɩ bʋʋrɛ za a tẽw dacĩ-pɛr kʋsɛbɛ ƴãw: zasɩpʋ n'a bɛ tɩ ƴãw a kʋsɛ-dãw-niwn sob ƴãw, safɩɩr a ayi sob ƴãw, agatɩ a ata sob ƴãw, emerodɩ a anaar sob ƴãw,

²⁰ onisɩ a anũu sob ƴãw, sardʋan a ayʋɔb sob ƴãw, kirizolitɩ a ayopõi sob ƴãw, beril a ani sob ƴãw, topaazʋ a piwaɩ sob ƴãw, kirizopʋrazɩ a pie sob ƴãw, tɩrkʋazɩ a pie nɩ been sob ƴãw, ametisɩ a pie nɩ ayi sob ƴãw.

²¹ A dɩ̃dɛɛ pie nɩ ayi tɩ ɩ n lɛw-bie pie nɩ ayi. Lɛw-bi-be-ƴeni n'a bɛ tɩ maal'ɩ a dɩ̃dɛɛ been been. A tẽw laɩ tɩ ɩ n salm-zɩɛ mɩŋa na ɩ mɛ̃ kʋ̃ɔ-kuur na cuoli a.

²² Ɩ̃ bɛ tɩ nyɛ̃ Ŋmɩn-yir a ʋ pʋɔ ɩ, bʋ̃ʋ n'ʋ vɛ̃, a Sore, a Naaŋmɩn kpɛnʋ-za-sob nɩ a Pele tɩ n'ɩ a ʋ Ŋmɩn-yir.

²³ A tẽw bɛ tɛr a mʋ̃tɔ̃w nɩ a cuw cãà yel-ɩra ɩ, a Naaŋmɩn yúor-vɩɛlʋ-danʋ na caalɛ ʋ a ƴãw, nɩ a Pele na ɩ a ʋ fɩ̃tɩlɛ a ƴãw.

²⁴ A ten ten nɩbɛ za na cere nɩ a ʋ cãà pʋɔ, ɛ́ a tẽw zu na-mɩnɛ wa n a bɛ na-bome a be.

²⁵ A tẽw dɩ̃dɛɛ na mɩ́ yuo na gã a bibi-ɓil za, kʋ̃ lɛb pàw ɛ, nɩr na kʋ̃ lɛb bãw tɩ̃ɩsɔw a be a ƴãw.

²⁶ Bɛ na de nɩ a ten ten na-bome nɩ a yúor-vɩɛlʋ wa n a be.

²⁷ Ɛcɛ, dɛwr za bɛ kpɩɛr a tẽw pʋɔ ɩ, nɩr za na ɩrɛ ɩ-faar na bɛ maal'ɩ wob a, ɛ́ ŋmarɛ ziri a mɩ̀ bɛ kpɩɛr a ʋ pʋɔ ɩ. Bɛlɩ dem a yée na sɛb ƴãw a Pele nyɔ-vʋʋrʋ sɛbɛ pʋɔ a, bɛl tɛwr nɛbɛ na kpɛ a ʋ pʋɔ.