Yel-wula 18 - A SƐB-SÕW

A Babɩlɔn tẽw loba

¹ Al pùorí, ɩ̃ tɩ nyɛ̃ nɩ malkɩ yũo ʋ yi a salom zu siwr waar. Ʋ tɩ tɛr'ɩ fãw kpɛ̃ɛ, ɛ́ a ʋ vɩɛlʋ cãà caalɩ a tẽw za.

² Ʋ tɩ cɩɩr'a nɩ kɔkɔ-kpɛ̃w yel: «Ʋ lo na! A Babɩlɔn tẽ-kpɛ̃ɛ kpɛ̃ɛ lo na! Ƴɛrɛŋa a, ʋ lɩɛb'ɩ kɔ̃tɔmɛ kpɛb zie, kɔ̃tɔ̃-faar za nɩ lili-faar nɩr na bɛ nɔnɛ a sɔwlʋ zie.

³ Bʋ̃ʋ n'ʋ vɛ̃, a ten za nyũ n a ʋ pɩ̃ɔ ɩ-ɩrɩ na bɛ maal'ɩ wob a divɛ̃. A tẽw zu na-mɩnɛ lãw nɩ ʋ na maalɩ a pɩ̃ɔ-yele, ɛ́ a ʋ naalʋ na bɛ vʋʋr a ɩ na a tẽw zu yɛ-yɛrbɛ kpɛ naalʋ.»

⁴ Ɩ̃ lɛb tɩ wõ n kɔkɔ-yũo ʋ yire a salom zu yere: «Ɩ̃ nɩbɛ ɛ, nyɩ yi zaa a ʋ pʋɔ, taa pʋɔrɛ a ʋ yel-bebe pʋɔ ɩ, ɛ́ mɩ̀ taa pʋɔrɛ a ʋ dɔwrʋ na waar a pʋɔ ɩ.

⁵ Bʋ̃ʋ n'ʋ vɛ̃, a ʋ yel-bebe gbõ n taa do tɩ tɔ a salom, ɛ́ a Naaŋmɩn bɛ yiiri a ʋ ɩ-faar bɛr ɛ.

⁶ Nyɩ ɩ ʋ mɛ̃ a lɛ ʋ na ɩ a nɩbɛ a, nyɩ ya ʋ a ʋ ɩb san gb'a ayi. Nyɩ paalɩ a ʋ koli-nyúura nɩ divɛ̃ na kpɛmɛ gb'a ayi gãw a al ʋ na ƴãw a nɩbɛ nyũ a.

⁷ Mɛ̃ a lɛ ʋ na nyɛ̃ a yúor ɛ́ dɩ a dɛpaalʋ a, nyɩ ɩ k'ʋ mɩ̀ nyɛ̃ a kpɩɛrʋ nɩ a wahala. Mɛ̃ ʋ taa tɩɛr'ɩ ʋ pʋɔ à ŋá: “Ɩ̃ zɩ̃ n a ka mɛ̃ pɔw-nãà a, ɩ̃ bɛ ɩ pɔw-kʋɔr ɛ, ɛ́ kʋ̃ bãw wahala towtow ɛ.”

⁸ A lɛ n'a so a ʋ bʋ̃-faar á ŋá na ta ʋ bibi-been: a kũu, a wahala nɩ a kɔ̃. Vũu na dɩ ʋ nɩ kʋmɔkʋmɔ. Bʋ̃ʋ n'ʋ vɛ̃, a Sore Naaŋmɩn na dɩ n ʋ a ƴɛ̀rʋ a tɛr'ɩ kpɛ̃w.»

⁹ A tẽw zu na-mɩnɛ na lãw nɩ ʋ maalɩ a pɩ̃ɔ-yele, ɛ́ lãw nɩ ʋ dɩ a dɛpaalʋ a na tuo nɩ nuru zũú kone nɩ a ʋ ƴãw, a lɛn daar bɛ nãà wa nyɛ̃ a ʋ vũu zʋ̀ʋ́r a.

¹⁰ Bɛ na àr'a zãá, a ʋ dɔwrʋ na ɩrɛ dɛ̃bɩ̃ɛ a ƴãw, ɛ́ yere: «Zu-bio wɛ! Zu-bio wɛ, Babɩlɔn i! Tẽ-kpɛ̃ɛ na tɛr fãw a! A wa ɩ n tɛm been yõ ɛ́ a fʋ ƴɛ̀rʋ dɩ!»

¹¹ A tẽw zu yɛ-yɛrbɛ mɩ̀ na tuo nɩ nuru zũú kone nɩ a ʋ ƴãw, nɩr za na bɛ cãà daar a bɛ yɛ̀rʋ́ bome á ŋá a ƴãw:

¹² salm-zɩɛ, salm-pla, kʋsɛ-bi-nyɩlɩ nɩ lɛgɛ, pɛn-pɛlɛ saalɩ, pɛn-zɩɩr, pɛn-saalɩ nyɩlɩ vʋlvʋl nɩ pɛn-zɩɩr ɓõɓõ, dà-bʋʋrɛ bʋʋrɛ za na bɛ nyɛrɛ a, wɔ́b nyɩmɛ bʋ̃-maalɩ, dà-vɩɛlɩ, kur-zɩɛ, kure bɩɩ kʋsɛ-pɛlɛ bʋ̃-maalɩ,

¹³ tɩɛ kãw bɛ na bʋɔlɛ kɛ́ kanɛl a pɛgɛ nɩ a bʋ̃-dɩ-mɩɩla bʋʋrɛ a mɩnɛ, parfɛ̃, mɩ́ɩ̀r nɩ tɩ-suur-zɔ̃-na-nyùur-vla-vla-a, divɛ̃, kãá, zɔ̃ nɩ ble, nĩi nɩ píir, wie nɩ wie torkori, gbãgbaar nɩ nɩ-pàwrɩ.

¹⁴ A yɛ-yɛrbɛ yere na: «A bome al za fʋ na tɩ bɔbr a, a bɔr'ɩ a fʋ zie, a fʋ na-bome nɩ a fʋ dɛpaalʋ a, a baar'ɩ a fʋ zie, nɩr kʋ̃ lɛb nyɛ̃ a towtow ɛ!»

¹⁵ A yɛ-yɛrbɛ bɛl ʋ na tɩ ɩ bɛ kpɛ naalʋ a, bɛ na àr'a zãá, a ʋ dɔwrʋ na ɩrɛ bɛ dɛ̃bɩ̃ɛ a ƴãw. Bɛ na tuo nɩ nuru zũú kone nɩ,

¹⁶ bɛ na yere na: «Zu-bio! Nyɛ̃ zu-bio na páw a tẽ-kpɛ̃ɛ a! Ʋ mɩ́ tɩ su n pɛn-pɛlɛ saalɩ fɔbr, pɛn-zɩɩr nɩ pɛn-zɩɩr-ɓõɓõ fɔbr, ʋ mɩ́ tɩ ƴãw nɩ salm-zɩɛ, kʋsɛ-bi-nyɩlɩ nɩ lɛgɛ pɩ̃ɛmɛ.

¹⁷ Ɛ́ a wa ɩ tɛm been yõ, ɛ́ a naalʋ á ŋá za baarɩ!» A gbor-bɛrɛ duwrbɛ nɩ a nɩbɛ bɛ na mɩ́ de a, a gbor tõ-tõ-biir nɩ a bɛlɩ dem za a kʋ̃ɔ-kpɛ̃ɛ na guole a, tɩ àr'a zãá,

¹⁸ ɛ́ bɛ na tɩ nyɛ̃ a ʋ vũu zʋ̀ʋ́r a, bɛ tɩ ŋmɩɛr'ɩ cɛlsɩ yere nɩ: «Tẽ-kpɛ̃ɛ buor'ʋ tɩ ta a tẽ-kpɛ̃ɛ kpɛ̃ɛ ŋa?»

¹⁹ Bɛ tɩ 'wɔ̃wnɛ nɩ tanɛ ƴãwnɛ a bɛ zũú, bɛ tɩ tuore nɩ nuru zũú kone cɩɩrɛ yere nɩ: «Zu-bio! Nyɛ̃ zu-bio na páw a tẽ-kpɛ̃ɛ a! A ʋ naalʋ n'a tɩ ƴãw a bɛlɩ dem za na tɛr gbee a kʋ̃ɔ-kpɛ̃ɛ zu a, bɛ kpɛ naalʋ. Ɛ́ a wa ɩ tɛm been yõ, ɛ́ a ʋ yele baarɩ!»

²⁰ Salom i, cɩlɛ a ʋ loba ƴãw! Nyɩ cɩlɛ, nyɩɩm Naaŋmɩn nɩbɛ ɛ, nɩ-toni nɩ naaŋmɩn-ƴɛ̀r-manbɛ ɛ! Bʋ̃ʋ n'ʋ vɛ̃, Naaŋmɩn maal'ɩ ʋ nɩ a ƴɛ̀rʋ kpɛ nyɩ.

²¹ Lɛ n'a malkɩ kãw na tɛr fãw a tɩ ɓáw kʋsɩɛr na ɩ mɛ̃ nɛ-kpɛ̃ɛ a, lɔb ƴãw a kʋ̃ɔ-kpɛ̃ɛ pʋɔ ɛ́ yel: «À ŋá n'a bɛ na lɔb a Babɩlɔn tẽ-kpɛ̃ɛ kpɛ̃ɛ bɛr nɩ fãw, ɛ́ nɩr kʋ̃ lɛb nyɛ̃ ʋ ɛ.

²² Nɩr kʋ̃ lɛb wõ korijom nɩ bʋ̃-ŋmɩɛrɩ a ŋmɛ a fʋ pʋɔ ɩ, wele nɩ wɩ́ɛ a pɛblɩ ɛ. Nɩr kʋ̃ lɛb nyɛ̃ tõ-nɔ-bʋʋrɛ kãw za tõ-tone a fʋ pʋɔ ɩ. Nɩr kʋ̃ lɛb wõ bɛ ƴɛ́r nɩɛr zu ɛ.

²³ A fɩ̃tɩlɛ cãà kʋ̃ lɛb caalɩ a fʋ pʋɔ ɩ. Bɛ kʋ̃ lɛb wõ a dɛb-sãan nɩ a pɔw-sãan kɔkɔr a fʋ pʋɔ ɩ. Bʋ̃ʋ n'ʋ vɛ̃, a fʋ yɛ-yɛrbɛ tɩ ɩ n a nɩ-bɛrɛ a tẽw zu, ɛ́ fʋ tɩ tuli a nɩ-bʋʋrɛ za nɩ a fʋ tɩtɩblʋ.»

²⁴ A fʋ pʋɔ n'a a naaŋmɩn-ƴɛ̀r-manbɛ nɩ a Naaŋmɩn nɩ-bʋʋrɛ zɩ̃ɩ cir, lãwnɩ a bɛlɩ dem za bɛ na tɩ kʋ a tẽw zu a zɩ̃ɩ.