Yel-wula 17 - A SƐB-SÕW

A pɔw-yɛm-kpɛ̃ɛ bɛ na maal'ɩ ƴɛ̀rʋ a

¹ Lɛ n'a a malkɩ ayopõi na tɩ tɛr a koli-nyúuri ayopõi a, a bɛ ƴen sob tɩ wa wa yel mɛ̃: «Wa, ɩ̃ɩ na wul fʋ nɩ a lɛ bɛ na maal'ɩ a pɔw-yɛm-kpɛ̃ɛ a ƴɛ̀rʋ a, a pɛr lɛ k'aa tẽ-kpɛ̃ɛ ʋl na àr mamɛ yaga nʋɔr a.

² A tẽw zu na-mɩnɛ lãw nɩ ʋ na maalɩ a pɩ̃ɔ-yele, ɛ́ a tẽw zu nɩbɛ nyũ a ʋ pɩ̃ɔ ɩ-ɩrɩ divɛ̃ kuoli.»

³ Lɛ n'a a vʋʋrʋ tɩ siw mɛ̃, ɛ́ a malkɩ ɓáw mɛ̃ kpɛ n wɛja-kpalɛ pʋɔ. Ɩ̃ tɩ nyɛ̃ nɩ pɔw a be, ʋ zɩ̃ dʋ̃-zɩɛ ɓõɓõ zu. Yée na tʋʋr Naaŋmɩn zʋmɛ a tɩ sɛb a pàw a wɛ-dʋ̃w ƴã-gan za, ʋʋ tɩ tɛr zuru ayopõi nɩ ɩ́lɛ́ pie.

⁴ A pɔw tɩ su n kpar-vɩɛlɩ zɩɩr ɓõɓõ, ɛ́ nyɩlɛ ʋ za nɩ salm-zɩɛ nɩ kʋsɛ-bi-nyɩlɩ nɩ lɛgɛ. Ʋ tɩ tɛr'ɩ salm-zɩɛ koli-nyúura na paalɩ yel-faar na bɛ maal'ɩ wob a, nɩ a ʋ pɩ̃ɔ-ɩ-dɛgɛ a, a ʋ nũú.

⁵ Yúor a pɛr na sɔwlɩ a tɩ sɛb'ɩ a ʋ gbẽé à ŋá: «Babɩlɔn kpɛ̃ɛ, pɔw-yɛmɛ nɩ a tẽw yel-faar na bɛ maal'ɩ wob a mã.»

⁶ Ɩ̃ tɩ nyɛ̃ nɩ a pɔw ŋa ʋ nyũ a Naaŋmɩn nɩbɛ nɩ a Yeezu dãsɩɛ dɩrbɛ zɩ̃ɩ kuoli. Ɩ̃ na tɩ nyɛ̃ ʋ a, nʋɔr tɩ ɓãá mɛ̃ nɩ yaga.

⁷ Lɛ n'a a malkɩ tɩ yel mɛ̃: «Bʋ̃ʋ n'ʋ ɩ nʋɔr ɓãá fʋ? Ɩ̃ na man nɩ a pɔw ŋa yele kʋ̀ b fʋ bãw a pɛr, nɩ a wɛ-dʋ̃w ʋ na zɔm, ʋ tɛr zuru ayopõi nɩ ɩ́lɛ́ pie a.

⁸ A wɛ-dʋ̃w fʋ na nyɛ̃ a, tɩ be na, ɛcɛ ʋ bɛ cãà ɩ. Ʋ na yi n a kɔ̃tɔmɛ dɔwrʋ bɔw-zulu pʋɔ do wa wa wɩɛr a ʋ kũu zie. A tẽw zu nɩbɛ bɛl a yée na bɛ sɛb a nyɔ-vʋʋrʋ sɛbɛ pʋɔ a tẽ-daa íru daar za a na nyɛ̃ nɩ a wɛ-dʋ̃w a nʋɔr ɓãá bɛ, bʋ̃ʋ n'ʋ vɛ̃, ʋ tɩ dãw na be, ɛ́ bɛ cãà ɩ, ɛ́ na lɛb wa.

⁹ A sɛw na kɛ́ fʋ tɛr yã nɩ tɩɛrʋ a ka. A zuru ayopõi ɩ n tan ayopõi zu a pɔw na zɩ̃ a. A mɩ̀ ɩ n na-mɩnɛ ayopõi:

¹⁰ a bɛ pʋɔ a, anũu naalʋ baar'a, been n'ʋ dɩrɛ a naalʋ a ƴɛrɛŋa, ɛ́ a ayopõi sob bɛ wa sɛr ɛ, ɛ́ ʋlɛ wa wa a, ʋ kʋ̃ cɛlɩ ɛ.

¹¹ A wɛ-dʋ̃w na tɩ dãw be ɛ́ bɛ wa cãà a, a ʋl mɩŋa ɩ n na-mɩnɛ ani sob. Ʋ pʋɔ nɩ a na-mɩnɛ ayopõi pʋɔ ɛ́ wɩɛr a ʋ kũu zie.

¹² A ɩ́lɛ́ pie fʋ na nyɛ̃ a, a ɩ n na-mɩnɛ pie na bɛ tĩ dɩrɛ a naalʋ sɛr a. Ɛcɛ bɛ na páw nɩ a naalʋ-dɩb fãw, dɩ a naalʋ lãwnɩ a wɛ-dʋ̃w tɛm been.

¹³ Tɩɛr-been yõ n'ʋ bɛ za tɛr: bɛ de a bɛ fãw nɩ a bɛ nɩ-kpɛ̃ɛnʋ tu n a wɛ-dʋ̃w.

¹⁴ Bɛ na zɛb'ɩ nɩ a Pele, ɛcɛ a Pele na zɛb'a tʋ̃ɔ́ bɛ, ʋ na ɩ a sorbɛ za Sore nɩ a na-mɩnɛ za Nãà a ƴãw. Ʋ na zɛb'a tʋ̃ɔ́ bɛ, ʋlɛ nɩ a bɛlɩ dem bɛ na bʋɔlɩ a, a bɛlɩ dem bɛ na kaa ír a, nɩ a bɛlɩ dem na bɛ lɛb pùor a.»

¹⁵ A malkɩ tɩ cãà na yel mɛ̃: «A kʋ̃ɔnɩ fʋ na nyɛ̃ a, a be a pɔw-yɛm na zɩ̃ a, nɩ-bʋʋrɛ bʋʋrɛ nɛbɛ, zu-sɛbla yaga yaga, ten ten nɩbɛ nɩ ƴɛ̀r-pɛ-bʋʋrɛ bʋʋrɛ nɩbɛ nɛbɛ.

¹⁶ A ɩ́lɛ́ pie fʋ na nyɛ̃ a, alɛ nɩ a dʋ̃w na ìr'a hɩ̃ɛn a pɔw-yɛm. A na fa n a ʋ bome za ɛ́ bɛr ʋ ƴã-gan zawla. A na 'wɔb'ɩ a ʋ ƴã-gã-nɛn ɛ́ nyɩw ʋ bɛr.

¹⁷ Bʋ̃ʋ n'ʋ vɛ̃, Naaŋmɩn ƴãw a nɩ tɩɛrʋ a socie pʋɔ k'aa maalɩ a ʋ pʋ-tɩɛrʋ. A na lãw na dɩ a naalʋ tu n a wɛ-dʋ̃w ɛ́ gù a Naaŋmɩn ƴɛ̀rʋ tɩ tu.

¹⁸ Ɛ́ a pɔw fʋ na nyɛ̃ a ɩ n a tẽ-kpɛ̃ɛ ʋl na dɩrɛ naalʋ a tẽw zu na-mɩnɛ zu a.»