Yel-wula 16 - A SƐB-SÕW

A Naaŋmɩn suur koli-nyúuri ayopõi yele

¹ Al pùorí, ɩ̃ tɩ wõ n kɔkɔ-kpɛ̃w ʋ yire a Ŋmɩn-yir-kpɛ̃ɛ pʋɔ yere a malkɩ ayopõi zie: «A koli-nyúuri ayopõi na paalɩ a Naaŋmɩn suur a, nyɩ cen tɩ cir a ƴãw a tẽw zu.»

² A malkɩ dãw-niwn sob tɩ cen na tɩ cir a ʋ dem ƴãw a tẽw zu. Natɩ-faar na 'wɔbr a tɩ tɛ n a nɩbɛ bɛl na tɛr a dʋ̃w bãwfʋ ɛ́ gbine dume puore a ʋ dasule a.

³ A malkɩ ayi sob tɩ cir'ɩ a ʋ dem ƴãw a kʋ̃ɔ-kpɛ̃ɛ pʋɔ. A kʋ̃ɔ tɩ lɩɛb'a ɩ mɛ̃ kũu zɩ̃ɩ a, ɛ́ bʋ̃-vʋʋra za na be a kʋ̃ɔ-kpɛ̃ɛ pʋɔ a kpi.

⁴ A malkɩ ata sob tɩ cir'ɩ a ʋ dem ƴãw a mamɛ pʋɔ nɩ a kʋ̃ɔnɩ bul-nɛ́ɛ ƴãw a lɩɛbɩ zɩ̃ɩ.

⁵ Lɛ n'a ɩ̃ tɩ wõ a kʋ̃ɔnɩ malkɩ ʋ yere: «Fʋ tɛr'ɩ yel-mɩŋa, fʋ̃ʋ na be ɛ́ dãw be a, fʋ̃ʋ na ɩ a Nɩ-Sõw a, à ŋá n'a fʋ sɩrɩ wul a fʋ yel-mɩnʋ.

⁶ Bɛ na cir a fʋ nɩbɛ nɩ a fʋ ƴɛ̀r-manbɛ zɩ̃ɩ a, zɩ̃ɩ n'a fʋ mɩ̀ kʋ̀ bɛ kɛ́ bɛ nyúur. Bɛ tɛr'ɩ!»

⁷ Ɩ̃ tɩ lɛb'a wõ kɔkɔr ʋ ƴɛ̀rɛ yire a bàwr-maal-kuur lowr yere: «Ʋ̃ʋ, Sore Naaŋmɩn kpɛnʋ-za-sob i, a fʋ ƴɛ̀rʋ fʋ na maalɩ a ɩ n sɩza ɛ́ tɛr yel-mɩŋa.»

⁸ A malkɩ anaar sob tɩ cir'ɩ a ʋ dem ƴãw a mʋ̃tɔ̃w zu, ɛ́ bɛ kʋ̀ a mʋ̃tɔ̃w sɔ́r k'ʋʋ dɩrɛ a nɩsaalbɛ nɩ a ʋ vũu.

⁹ Tʋlʋ na bɛ dɩ vuo a tɩ dɩ n a nɩsaalbɛ. Bɛ tɩ tʋ n a Naaŋmɩn yúor zʋmɛ, a Naaŋmɩn na tɛr fãw a bʋ̃-faar á ŋá zu a, ɛcɛ, bɛ bɛ tɩ lɩɛbɩ a bɛ ɩb zɛw a ʋ yúor ɛ.

¹⁰ A malkɩ anũu sob tɩ cir'ɩ a ʋ dem ƴãw a dʋ̃w naalʋ-dà-kɔw zu, a ʋ naalʋ-tẽw za be lige pʋɔ. A 'wɔbrʋ tɩ ɩ na a nɩbɛ dʋnɛ a zɛlɛ.

¹¹ A 'wɔbrʋ na 'wɔbr bɛ a, nɩ a bɛ natɩɛ tɩ ɩ na bɛ tʋʋr a Naaŋmɩn na be a salom zu a zʋmɛ. Ɛcɛ, bɛ bɛ tɩ bɛr a bɛ tõ-faar ɛ.

¹² A malkɩ ayʋɔb sob tɩ cir'ɩ a ʋ dem ƴãw a Efaratɩ man-kpɛ̃ɛ pʋɔ. A kʋ̃ɔ tɩ sɩr a, puo sɔ́r kʋ̀ a na-mɩnɛ na tɩ yi a saa-pɛrɩ́ waar a.

¹³ Lɛ n'a ɩ̃ tɩ nyɛ̃ kɔ̃tɔ̃-faar ata na ŋmɛ̃ mɛ̃ lɔn a, a yi a wa-bɩɛ nʋɔrɩ́, a dʋ̃w nʋɔrɩ́ nɩ a naaŋmɩn-ƴɛ̀r-man-bɛlɛbɛlɛ nʋɔrɩ́.

¹⁴ Kɔ̃tɔmɛ sɩrɩ n'a! A maalɛ nɩ yel-bãw-guuri! A mɩ́ cen nɩ a tẽ-daa za na-mɩnɛ zie k'aa tɩ bʋɔlɩ bɛ ɓã taa a Naaŋmɩn kpɛnʋ-za-sob zɛbr bibi-kpɛ̃ɛ ƴãw.

¹⁵ «Nyɛ̃, ɩ̃ waar'a mɛ̃ nyãnyuge a! Zu-nʋ̃ɔ̀ sob'ɩ sob nɛ na bɛr gʋ̃ɔ ɛ́ tɛr a ʋ bʋ̃-suuri, k'ʋʋ taa wa cere nɩ ƴã-gã-zawla bɛ nyɛ̃ a ʋ faalʋ a ɩrɛ ʋ vĩ a ɩ.»

¹⁶ A kɔ̃tɔ̃-faar tɩ ɓã n a na-mɩnɛ taa zie kãw bɛ na bʋɔlɛ kɛ́ Amagedɔ̃ a ebre ƴɛ̀rʋ pʋɔ a.

¹⁷ A malkɩ ayopõi sob tɩ cir'ɩ a ʋ dem ƴãw a pɩɛlʋ pʋɔ. Kɔkɔ-kpɛ̃w tɩ ƴɛ̀r'a yi a Ŋmɩn-yir-kpɛ̃ɛ pʋɔ, a naalʋ-dà-kɔw pɛr. Ʋ tɩ yere na: «A maal'a!»

¹⁸ Lɛ n'a a tɩ ɩ saa-nyɩwrʋ, kɔkɛɛ gɔmɛ nɩ a tẽsɔw-kɔbr na dam'ɩ fãw mɛ̃ bɛ na bɛ dãw nyɛ̃ ʋ dam'ɩ a fãw ŋa tɔ, a nɩsaal na tĩ kɛ́ be a tẽw zu a.

¹⁹ A tẽ-kpɛ̃ɛ tɩ ŋmɛr'ɩ ziir ata, ɛ́ a ten za tẽ-bɛrɛ lo. Naaŋmɩn tɩ lɛb'a tɩɛrɩ bãwnɩ a Babɩlɔn tẽ-kpɛ̃ɛ yele, kʋ̀ ʋ a ʋ divɛ̃ nɩ a kole ʋ nyũ, a ʋ su-tʋlʋ divɛ̃.

²⁰ A kʋ̃ɔ-kpɛ̃ɛ-sɔgɔ-ten za tɩ bɔr'a, ɛ́ nɩr bɛ mɩ́ lɛb tɩ nyɛ̃ tãw kãw za ɩ.

²¹ Sa-bi-ku-bɛrɛ na tɩbrɛ bɛ dɩ vuo a tɩ yi n a salom zu ɛ́ lore a nɩsaalbɛ zu. A nɩsaalbɛ tɩ tʋʋr'ɩ a Naaŋmɩn a sa-bi-kube dɔwrʋ ƴãw, bʋ̃ʋ n'ʋ vɛ̃, a dɔwrʋ ŋa tɩ sɩrɩ na kpɛ kpɛ̃ɛ bɛ dɩ vuo ɩ.