Yel-wula 15 - A SƐB-SÕW

A malkɩ mɩnɛ nɩ a baarʋ daar bʋ̃-faar yele

¹ Al pùorí, ɩ̃ tɩ nyɛ̃ nɩ bãwfʋ yũo a salom zu, bãwfʋ na ɩ kpɛ̃ɛ ɛ́ ɩ nɔ-ɓãan a: malkɩ mɩnɛ ayopõi tɩ tɛr'ɩ bʋ̃-faar ayopõi, a pɛ-baarɩ, bʋ̃ʋ n'ʋ vɛ̃, alɛ n'a na pãa wul a Naaŋmɩn suur na ìr a.

² Ɩ̃ mɩ̀ tɩ nyɛ̃ nɩ bom na ɩ mɛ̃ kʋ̃ɔ-kpɛ̃ɛ kʋ̃ɔ na ɩ walwal ɛ́ jɛr'ɩ vũu a. A bɛlɩ dem na tɩ zɛb tʋ̃ɔ́ a dʋ̃w nɩ a ʋ dasule nɩ a ʋ yúor sɔr-nʋɔr a tɩ tɛr'ɩ a korijome a Naaŋmɩn na kʋ̀ bɛ a, àr'ɩ a kʋ̃ɔ-kpɛ̃ɛ zu.

³ Bɛ tɩ yiele nɩ a Naaŋmɩn tõ-tõ-bie Moyiir yielu, nɩ a Pele yielu à ŋá: «Sore Naaŋmɩn kpɛnʋ-za-sob i, a fʋ tome ɩ n tõ-bɛrɛ ɛ́ ɩ nɔ-ɓãa-tome. Ten za Nãà a, a fʋ ɩb tu n mɩnʋ nɩ yel-mɩŋa.

⁴ Ãa n'ʋ kʋ̃ zɔrɛ fʋ, Sore e, ãa n'ʋ kʋ̃ zɛwr a fʋ yúor? Bʋ̃ʋ n'ʋ vɛ̃, fʋ̃ʋ yõ n'ʋ ɩ sõw, a ten za nɩbɛ na wa na wa lo gbĩ dume a fʋ niŋé, a fʋ ɩ-ɩrɩ na tu yel-mɩŋa sãá a ƴãw.»

⁵ Al pùorí, ɩ̃ tɩ nyɛ̃ nɩ a Ŋmɩn-yir-kpɛ̃ɛ ʋ yuo a salom zu, a Ŋmɩn-yir ʋl pʋɔ a Wõ-taa pɛn-sɛw na tɩ be a.

⁶ A malkɩ ayopõi bɛl na tɩ tɛr a bʋ̃-faar ayopõi a tɩ yi n a Ŋmɩn-yir pʋɔ. Bɛ tɩ su n kpar-wowr-pɛlɛ parpar ɛ́ ŋmãa nɩ salm-zɩɛ kpàgɛ a nyãa zu.

⁷ A bʋ̃-vʋʋrɩ ƴen sob tɩ kʋ̀ n a malkɩ ayopõi salm-zɩɛ koli-nyúuri ayopõi na paalɩ a Naaŋmɩn na vʋʋrɛ kʋralɛ a suur a.

⁸ A Naaŋmɩn yúor-vɩɛlʋ-danʋ nɩ a ʋ kpɛnʋ tɩ ɩ na zʋ̀ʋ́r paalɩ a Ŋmɩn-yir-kpɛ̃ɛ, ɛ́ a bɛ tɩ tɛr nɩr na kpɛ a ʋ pʋɔ ɩ, ɛ̀ gù a malkɩ ayopõi bʋ̃-faar ayopõi tɩ tɔl baarɩ.