Yel-wula 12 - A SƐB-SÕW

A pɔw nɩ a wa-bɩɛ yele

¹ Bãwfʋ kpɛ̃ɛ kãw tɩ sãá nɩ a salom zu: pɔw na su a mʋ̃tɔ̃w mɛ̃ kparʋ a, a gbɛ́ɛ dɔwlɩ a cuw zu, ɛ́ ŋmar-bie pie nɩ ayi viiri koli a zu mɛ̃ nãà-kpawʋɔ a.

² Ʋ tɩ tɛr'ɩ pʋɔ, ʋ 'wɔbr, ʋ kone, ɛ́ dɔwr wone nɩ tuo.

³ Bãwfʋ yũo tɩ sãá nɩ a salom zu: wa-bɩɛ bɛ́rʋ zɩɛ na tɛr zuru ayopõi nɩ ɩ́lɛ́ pie, ɛ́ a zu za mɩ́ tɩ vɔbl'ɩ nãà-kpawʋɔ a.

⁴ A salom zu ŋmar-bie na põ ziir ata a, ʋ tɩ pɩɩr'ɩ a zi-been dem lɔb a tẽw zu nɩ a ʋ zʋʋr. Ʋ tɩ àr'ɩ a pɔw na dɔwr a niŋé, kɛ́ ʋlɛ wa dɔwr a ʋ bie wa báarɛ a, ʋ̃ʋ nyɔw vɔl.

⁵ A pɔw tɩ dɔw nɩ bidɛble na na kaarɛ a ten za zie nɩ gãdaalʋ a. Bɛ tɩ zaa nɩ a ʋ bie cen nɩ a Naaŋmɩn zie, a ʋ naalʋ-dà-kɔw pɛr.

⁶ A pɔw ʋl a, ʋ tɩ zɔ na kpɛ a wɛja-kpalɛ pʋɔ, a be Naaŋmɩn na tɩ cɔbrɩ zie bɛr ʋ, bɛ na tɩ guol'ʋ bibie túr'ɩ kɔbr ayi dɔwlɩ lɩz'a ata a (1 260).

⁷ Lɛ n'a zɛbr tɩ ìr a salom zu: Mɩsɛl nɩ a ʋ malkɩ mɩnɛ tɩ zɛb'ɩ nɩ a wa-bɩɛ, ɛ́ a wa-bɩɛ nɩ a ʋ malkɩ mɩnɛ mɩ̀ tɩ zɛb'ɩ bɛ.

⁸ Ɛcɛ, bɛ tɩ zɛb'a tʋ̃ɔ́ a wa-bɩɛ. Zie bɛ tɩ cãà be a salom zu ʋlɛ nɩ a ʋ malkɩ mɩnɛ ƴãw ɛ.

⁹ A wa-bɩɛ, a tẽ-kor-waab, a ʋl bɛ na bʋɔlɛ Gɛgɛra nɩ Sɩtaana a, a tẽ-daa za bɛlbɛlɛ, bɛ tɩ cã ʋ na lɔb a tẽw zu lãwnɩ a ʋ malkɩ mɩnɛ.

¹⁰ Al pùorí, ɩ̃ tɩ wõ n kɔkɔ-kpɛ̃w a salom zu ʋ yere: «Ƴɛrɛŋa a, a faafʋ pãa ta na, a tɩ Naaŋmɩn kpɛnʋ nɩ a ʋ naalʋ-dɩb, a ʋ Kɩrɩta na dɩ nɩ-kpɛ̃ɛnʋ a. Bʋ̃ʋ n'ʋ vɛ̃, a sob nɛ na mɩ́ mɩl a tɩ yɛbr a, bɛ cã ʋ na lɔb, a ʋl na mɩ́ tɩ mɩlɛ bɛ a Naaŋmɩn niŋé mʋ̃tɔ̃w nɩ tɩ̃ɩsɔw a.

¹¹ A tɩ yɛbr zɛb'a tʋ̃ɔ́ ʋ a Pele zɩ̃ɩ ƴãw, nɩ a ƴɛ̀rʋ dãsɩɛ bɛ na dɩ a ƴãw. Bɛ bɛ tɩ nɔ̃w a bɛ nyɔ-vʋʋrʋ tɩ zɔ n a kũu dɛ̃bɩ̃ɛ ɩ.

¹² A na ɩ à ŋá a, cɩlɛ salom i, nɩ nyɩɩm za na kpɩɛr a ʋ zu a! Ɛcɛ, baw-bio páw nyɩ na, nyɩɩm tẽsɔw nɩ kʋ̃ɔ-kpɛ̃ɛ ɛ! Bʋ̃ʋ n'ʋ vɛ̃, a Gɛgɛra siw na wa a nyɩ zie, ɩ suur tɛwr, ʋ na bãw k'aa vuo na cɛ ʋ a ɩ n ŋmalelɛ a.»

¹³ A wa-bɩɛ na wa nyɛ̃ bɛ cã ʋ lɔb a tẽw zu a, ʋ ìr'a diwr a pɔw na dɔw a bidɛble a.

¹⁴ Ɛcɛ, bɛ tɩ kʋ̀ n a sɩl-kpɛ̃ɛ pɩgɛ ayi a pɔw, k'ʋʋ ƴaw nɩ kpɛ n a wɛja-kpalɛ pʋɔ, a zie ʋl bɛ na cɔbrɩ a ʋ ƴãw a, bɛ tɩ guol'ʋ a be yome ata nɩ ŋmãa, zãá nɩ a waab.

¹⁵ Lɛ n'a a waab tɩ ow kʋ̃ɔ mɛ̃ man-kpɛ̃ɛ kʋ̃ɔ a, a pɔw pùorí, k'aa kʋ̃ɔ tʋ̃ɔ́ tuo ʋ cen nɩ.

¹⁶ Ɛcɛ a tẽsɔw tɩ sõw nɩ a pɔw: a tẽsɔw tɩ háa nɩ a ʋ nʋɔr fuori a man-kpɛ̃ɛ kʋ̃ɔ a wa-bɩɛ na ow a.

¹⁷ A wa-bɩɛ tɩ nyɛ̃ nɩ nɩ a pɔw suur, cen tɩ zɛbr'ɩ a pɔw bʋʋrɛ bɛl na cɛ a, a bɛl na tuur a Naaŋmɩn nɛ-ƴãwnɩ ɛ́ maal tɛr a yel-mɩŋa a Yeezu na wul a.

¹⁸ A wa-bɩɛ tɩ àr'ɩ a kʋ̃ɔ-kpɛ̃ɛ nʋɔr biire pʋɔ.