Yel-wula 10 - A SƐB-SÕW

A malkɩ nɩ a sɛble yele

¹ Al pùorí, ɩ̃ tɩ nyɛ̃ nɩ malkɩ na kpɛmɛ a, ʋ yi a salom zu siwr. Zũzuwr tɩ pili na pàw ʋ, ɛ́ sa-gõguo be a ʋ zũú mɛ̃ nãà-kpawʋɔ a. A ʋ niwn tɩ ɩ na mɛ̃ mʋ̃tɔ̃w a, ɛ́ a gbɛ́ɛ ɩ mɛ̃ vũu kpule a.

² Ʋ tɩ tɛr'ɩ sɛble na yuo a, a ʋ nũú. Ʋ tɩ bin nɩ a dʋrʋ gbɛ́r a kʋ̃ɔ-kpɛ̃ɛ zu, ɛ́ bin a gʋba gbɛ́r a tẽw zu.

³ Ʋ tɩ cɩɩr'ɩ kpɛ̃w za mɛ̃ lɛ gbẽw na mɩ́ ùor'a. Ʋ na tɩ cɩɩrɩ a, a saa tanʋ ayopõi kɔkɛɛ tɩ sɔw na.

⁴ Ɩ̃ tɩ maal'a k'ɩ̃ɩ sɛb a lɛ a na yel a, ɛ́ wõ kɔkɔr a salom zu ʋ yere a ɩ̃ zie: «Maal tɛr a ʋlɩ bom nɛ a saa tanʋ ayopõi na yel a, ʋ ɩ yel-sɔwla, taa sɛbr ʋ ɛ.»

⁵ Lɛ n'a a malkɩ ʋl ɩ̃ na tɩ nyɛ̃ ʋ àr a kʋ̃ɔ-kpɛ̃ɛ zu nɩ a tẽw zu a tɩ zɛw a dʋrʋ nũu cɔw a salom,

⁶ ɛ́ pɔ n a Naaŋmɩn na vʋʋrɛ kʋralɛ a, a Naaŋmɩn na ír a salom nɩ bom za na be a ʋ zu a, na ír a tẽw nɩ bom za na be a ʋ zu a, na ír a kʋ̃ɔ-kpɛ̃ɛ nɩ bom za na be a ʋ pʋɔ a. A malkɩ tɩ yel'a: «Alɛ sɛr kʋ̃ lɛb cãà be ɩ!

⁷ A ʋlɩ bibir a malkɩ ayopõi sob nãà wa pɛblɛ a ʋ wɩ́ɛ a, lɛn daar a a Naaŋmɩn yel-sɔwla ʋ na tɩɛrɩ bin a na maalɩ mɛ̃ a lɛ ʋ na tɩ dãw yel kʋ̀ a ʋ tõ-tõ-biir na ɩ a ʋ ƴɛ̀r-manbɛ a.»

⁸ A kɔkɔr ɩ̃ na tɩ wõ ʋ ƴɛ̀rɛ yire a salom zu a tɩ lɛb'a ƴɛ̀r a ɩ̃ zie yel mɛ̃: «Cen tɩ de a sɛble na yuo a, a malkɩ na àr a kʋ̃ɔ-kpɛ̃ɛ zu nɩ a tẽw zu a nũú.»

⁹ Ɩ̃ tɩ taw na ta a malkɩ zie yel ʋ k'ʋʋ kʋ̀ m a sɛble. Ʋ tɩ yel mɛ̃ na: «De ʋ 'wɔb: ʋ na tome nɩ a fʋ pùorí, ɛ́ a fʋ nʋɔrɩ́ ʋ nʋmɛ mɛ̃ sɩwr a.»

¹⁰ Ɩ̃ tɩ de nɩ a sɛble a malkɩ nũú 'wɔb. Ʋ tɩ nʋmɛ nɩ a ɩ̃ nʋɔrɩ́ mɛ̃ sɩwr a. Ɛcɛ, ɩ̃ na wa vɔl baar'a, ʋ tome nɩ a ɩ̃ pùorí.

¹¹ Lɛ n'a bɛ tɩ yel mɛ̃: «A fɛr'a kɛ́ fʋ lɛb maal yel a ʋlɩ bom nɛ a Naaŋmɩn na cɔbrɩ nɩ-bʋʋr-yaga, ten yaga, ƴɛ̀r-pɛ-bʋʋrɛ yaga nɩ na-mɩnɛ yaga ƴãw a.»