Yele-za-pɛr-tib 46 - A SƐB-SÕW

A Zakɔb tɛr'ɩ a ʋ yir dem cen nɩ a Eziptɩ

¹ A Zakɔb tɩ yi na lo a sɔ́r nɩ a ʋ bʋ̃-tɛrɩ za. Ʋ na wa ta Bɛɛr-Seva a, ʋ maal'ɩ bagɛ kʋ̀ a ʋ sãà Ɩzaakɩ Naaŋmɩn.

² A ʋlɩ tɩ̃ɩsɔw nɛ a, ʋ tɩ nyɛ̃ nɩ a Naaŋmɩn ʋ ƴɛ̀r a ʋ zie. A Naaŋmɩn tɩ bʋɔl'ʋ na: «Zakɔb i! Zakɔb i!» A Zakɔb sɔw: «Mãa n'ɩ ŋan.»

³ A Naaŋmɩn yel ʋ: «Mãa n'ɩ a Naaŋmɩn, a fʋ sãà Naaŋmɩn. Ta zɔrɛ dɛ̃bɩ̃ɛ a Eziptɩ tẽw cenu ƴãw ɛ. Bʋ̃ʋ n'ʋ vɛ̃, a be n'a ɩ̃ na tɩ ɩ fʋ yɛ̀r ɩ nɩ-bʋʋr-yaga.

⁴ Mãa mɩŋa na bɩɛlɩ fʋ na cen nɩ a be, ɛ́ tɩ ɩ fʋ yi a be lɛb wa. Fʋ̃ʋ wa kpi a, a Zuzɛb'ʋ na pàw fʋ a mimie.»

⁵ Lɛ n'a a Zakɔb tɩ ìr kɛ́ bɛr a Bɛɛr-Seva. A Zakɔb bidɛbr tɩ ƴãw nɩ a bɛ sãà, a bɛ pɔwbɛ nɩ a bɛ bibiir a torkori a Faarawɔ̃ na tɩ tɩr kɛ́ bɛ wa de nɩ ʋ a pʋɔ.

^6-7 Bɛ mɩ̀ tɩ de nɩ a bɛ dʋn nɩ a na-bome za bɛ na páw a Kanãa a. À à ŋá n'a a Zakɔb tɩ ta a Eziptɩ, ʋlɛ nɩ a ʋ bʋ̃-dɔwrɩ za: a ʋ bidɛbr nɩ a ʋ yan na ɩ dɛbli a, a ʋ pɔwyaar nɩ a ʋ yan na ɩ powli a. Ʋlɛ nɩ a ʋ yir dem za tɩ ta n a Eziptɩ.

A Zakɔb yir dem

⁸ A Ɩsɩrayɛl nɩbɛ na wa a Eziptɩ a, a pɛr lɛ k'aa Zakɔb, a ʋ bibiir nɩ a ʋ yan, a bɛ yée n'ɩ á ŋá: Urubɛn na ɩ a Zakɔb bidɛb-dãw a,

⁹ nɩ a ʋ bidɛbr Hanɔkɩ, Palu, Hɛsɩron nɩ Karmi.

¹⁰ Sɩmɩ̃ɔ nɩ a ʋ bidɛbr Yemuwɛl, Yamin, Ohadɩ, Yakin, Sohaar nɩ Sawul na ɩ Kanãa tẽw pɔw kãw bidɛb a.

¹¹ Levi nɩ a ʋ bidɛbr Gɛrson, Kehatɩ nɩ Merari.

¹² Zuda nɩ a ʋ bidɛbr Sela, Perɛsɩ nɩ Zera. A Zuda bidɛbr bɛ mɩnɛ, Ɛɛr nɩ Onan, tɩ kpi n a Kanãa. A Perɛsɩ tɩ tɛr'ɩ bidɛbr ayi: Hɛsɩron nɩ Hamul.

¹³ Ɩsakaar nɩ a ʋ bidɛbr Tola, Puwa, Yoovʋ nɩ Simiron.

¹⁴ Zabulɔ̃ nɩ a ʋ bidɛbr Serɛdɩ, Elon nɩ Yaleyɛl.

¹⁵ A Leya nɩ a Zakɔb bidɛbr na dɔw a Mezopotami a n'ɩ a bɛ ŋa. A bɛ pɔwyaa Dina mɩ̀ be n be. Bɛlɛ wa sɔ́r a bɛ bibiir ƴãw a, bɛ za ɩ n nɩbɛ lɩzɛr'ɩ pie nɩ ata.

¹⁶ Gadɩ nɩ a ʋ bidɛbr Sifion, Hagi, Suni, Ɛsɩbon, Eeri, Arodi nɩ Areli.

¹⁷ Asɛɛr nɩ a ʋ bidɛbr Yimina, Yisiva, Yisivi nɩ Beriya, nɩ a bɛ yeepuule Sera. A Beriya tɩ tɛr'ɩ bidɛbr ayi: Ebɛɛr nɩ Malekiyɛl.

¹⁸ A Zakɔb nɩ a Zilipa bibiir nɩ a yan pie nɩ ayʋɔb'ɩ a bɛ ŋa. A Labã n'ʋ tɩ de a Zilipa kʋ̀ a ʋ pɔwyaa Leya k'ʋʋ ɩ a ʋ tõ-tõ-bi-pɔw.

¹⁹ A Zakɔb pɔw Arasɛl tɩ dɔw nɩ bidɛbr ayi kʋ̀ ʋ: Zuzɛb nɩ Bɛ̃zamɛ.

²⁰ A Zuzɛb pɔw Asenatɩ na ɩ On tẽw bàwr-maalɛ Poti-Fera pɔwyaa a, tɩ dɔw nɩ bidɛbr ayi kʋ̀ ʋ a Eziptɩ: Manase nɩ Efarayim.

²¹ Bɛ̃zamɛ tɩ tɛr'ɩ bidɛbr pie: Bɛla, Bekɛɛr, Asɩbɛl, Geera, Naaman, Ehi, Ʋrɔsɩ, Mupim, Hupim nɩ Ardɩ.

²² A Zakɔb nɩ a Arasɛl bibiir nɩ a yan pie nɩ anaar'ɩ a bɛ ŋa.

²³ Dan nɩ a ʋ bidɛb Husim.

²⁴ Nɛfɩtali nɩ a ʋ bidɛbr Yaseyɛl, Guni, Yesɛɛr nɩ Sɩlɛm.

²⁵ A Zakɔb nɩ a Bilha bibiir nɩ a yan ayopõi n'ɩ a bɛ ŋa. A Labã n'ʋ tɩ kʋ̀ a Bilha a ʋ pɔwyaa Arasɛl, k'ʋʋ ɩ a ʋ tõ-tõ-bi-pɔw.

²⁶ A Zakɔb yir dem, a ʋ bibiir nɩ a ʋ yan na tɩ wa a Eziptɩ a, bɛ za tɩ ɩ n nɩbɛ lɩz'a ata nɩ ayʋɔb. A ʋ bidɛbr pɔwbɛ mɩ̀ tɩ be n be.

²⁷ A Zuzɛb bidɛbr na dɔw a Eziptɩ a tɩ ɩ n nɩbɛ ayi. A Zakɔb yir dem za na tɩ wa a Eziptɩ a tɩ ɩ n nɩbɛ lɩz'a ata nɩ pie.

A Zakɔb nɩ a ʋ yir dem zɩ̃ n a Eziptɩ tẽw

²⁸ A Zakɔb tɩ tõ n Zuda a bɛ nidaa, k'ʋʋ tɩ tɛr a Zuzɛb wa n a Gosɛn vuo pʋɔ. A Zakɔb nɩ a ʋ nɩbɛ na wa ta a Gosɛn a,

²⁹ a Zuzɛb ƴãw na bɛ caw a wie a ʋ torko ƴãw, ʋ yi tuor'ɩ a ʋ sãà Zakɔb. Ʋ na wa nyɛrɛ a ʋ sãà wa báarɛ a, ʋ nyɔw ʋ na weri, fɩɩrɩ tɛr ɛ́ kõ a tɩ cɛlɩ.

³⁰ Lɛ n'a a Zakɔb tɩ yel ʋ: «Ƴɛrɛŋa ɩ̃ na lɛb nyɛ b fʋ cãà vʋʋrɛ a, ɩ̃ pãa na tʋ̃ɔ́ na kpi.»

³¹ A Zuzɛb tɩ yel'ɩ a ʋ yɛbr nɩ a ʋ sãà yir dem bɛl na cɛ a: «Ɩ̃ na cen na tɩ yel a Faarawɔ̃: “A ɩ̃ yɛbr nɩ a ɩ̃ sãà yir dem za na tɩ be a Kanãa a wa n a ɩ̃ zie.”

³² Ɩ̃ na cãà na lɛb yel à ŋá kʋ̀ ʋ: “Píir nɩ bʋʋr'a bɛ guole. Dʋn zie n'a bɛ kaarɛ, ɛ́ bɛ wa n nɩ a píir, a bʋʋr, a bɛ nĩi nɩ a bɛ bʋ̃-tɛrɩ za.”

³³ A Faarawɔ̃ wa bʋɔlɩ nyɩ tɩ sowri: “Bʋ̃ʋ tome n'a nyɩ tone?”

³⁴ Nyɩ na sɔw ʋ na: “Dʋn n'a tɩ guole a tɩ pɔ̀lʋ daarɩ́ za wa tɔ a ƴɛrɛŋa, mɛ̃ a tɩ sãàkʋm-kore a.” Lɛ n'a bɛ na sàw nyɩ kpɩɛr a Gosɛn vuo pʋɔ. Bʋ̃ʋ n'ʋ vɛ̃, a Eziptɩ tẽw dem bɛ nɔnɛ a píir nɩ a bʋ-guolbɛ za ɩ.»