Yele-za-pɛr-tib 45 - A SƐB-SÕW

A Zuzɛb ɩ na a ʋ yɛbr bãw ʋ

¹ A Zuzɛb tɩ nyɔw nɩ ʋ mɩŋa guu a nɩbɛ za na tɩ àr a ʋ zie a niŋé, ɛ́ ƴãw bɛ yi. A bɛ kãw za bɛ tɩ ka be, a lɛn daar ʋ na ɩ a ʋ yɛbr bãw ʋ a ɩ.

² Ɛcɛ ʋ tɩ kõ na a yi yaga, a Eziptɩ nɩbɛ tɩ wõ a, ɛ́ a yel ta a Faarawɔ̃ nãà yir.

³ A Zuzɛb tɩ yel'ɩ a ʋ yɛbr: «A mãa Zuzɛb ʋ! A ɩ̃ sãà cãà na a?» Ɛcɛ a ʋ yɛbr bɛ tɩ tʋ̃ɔ́ sɔw ʋ ɛ, bɛ na bɛ tɩ bãw a lɛ bɛ na na tɛr bɛ tʋɔra a ʋ niŋé a ƴãw.

⁴ Ʋ tɩ yel bɛ na: «Nyɩ taw pɩɛlɩ mɛ̃.» Bɛ tɩ taw pɩɛl'ʋ. A Zuzɛb lɛb yel: «Mãa n'ɩ a nyɩ yɛb Zuzɛb nyɩ na nyɔw kʋ̀ɔrɩ, kɛ́ bɛ cen nɩ a Eziptɩ a.

⁵ Ɛcɛ ƴɛrɛŋa a, a ta ɩ nyɩ kpɩɛrʋ nɩ pʋ-sãwna nyɩ na kʋ̀ɔrɩ mɛ̃ à à ŋá a ɩ. Naaŋmɩn n'ʋ ƴãw k'ɩ̃ de nyɩ niwn wa a ka, k'ɩ̃ɩ wa tʋ̃ɔ́ faa nyɩ.

⁶ Yome ayi n'ɩ á ŋá, a kɔ̃ na lo a tẽw pʋɔ a, ɛ́ yome anũu n'a cãà cɛ, kɔb na kʋ̃ kɔ ɛ́ bʋ̃-dieri kʋ̃ de a.

⁷ Naaŋmɩn de nɩ niwn tõ m a ka a nyɩ ƴãw, kɛ́ nyɩ wa tʋ̃ɔ́ tɛr bʋʋrɛ a ka, ɛ́ tʋ̃ɔ́ cãà. Faafʋ na ɩ kpɛ̃ɛ a n'ʋ.

⁸ A na ɩ à ŋá a, nyɩmɛ bɛ nɛbɛ tõ m a ka ɩ, Naaŋmɩn n'ʋ. Ʋlɛ mɩ̀ cãà n'ʋ ɩ k'ɩ̃ ɩ a Faarawɔ̃ tõ-tõ-bi-kpɛ̃ɛ za, a nãà yir kaarɛ nɩ a Eziptɩ tẽw za kaarɛ.

⁹ Nyɩ pãa lɛb kul fɔ̃w tɩ yel a ɩ̃ sãà: “A fʋ bidɛb Zuzɛb ƴɛ̀rʋ n'ɩ ŋa ʋ na ƴɛ̀rɛ a fʋ zie a: Naaŋmɩn ɩ na k'ɩ̃ ɩ a Eziptɩ tẽw za kaarɛ. Wa a ɩ̃ zie fɔ̃w fɔ̃wlɛ.

¹⁰ Fʋ na wa zɩ̃ n Gosɛn vuo pʋɔ, fʋ̃ʋ nɩ a fʋ bibiir, a fʋ yan, a fʋ dʋn: píir, bʋʋr nɩ nĩi lãwnɩ a fʋ bʋ̃-tɛrɩ za. Lɛ n'a fʋ na pɩɛlɩ mɛ̃.

¹¹ Ɩ̃ na kʋ̀rɛ fʋ nɩ bʋ̃-dɩrɩ a ka, fʋ̃ʋ nɩ a fʋ yir dem nɩ a fʋ dʋn, kɛ̀ nyɩ taa wa bɔbr bom guur ɛ. Bʋ̃ʋ n'ʋ vɛ̃, a kɔ̃ na cãà na lo yome anũu”.»

¹² A Zuzɛb tɩ yel'a ƴãw pʋɔ: «Nyɩ nyɛ̃ nɩ nɩ mimir, a ɩ̃ yɛ-bile Bɛ̃zamɛ mɩ̀ nyɛ̃ nɩ mimir kɛ́ mãa Zuzɛb'ʋ ƴɛ̀rɛ a nyɩ zie.

¹³ Nyɩ cen tɩ yel kʋ̀ a ɩ̃ sãà ɩ̃ na ɩ nɩ-kpɛ̃ɛ a Eziptɩ tẽw a, nɩ a alɩ bome nɛ za nyɩ na nyɛ̃ a. Al pùorí, nyɩ tɛr ʋ fɔ̃wlɛ wa n a ka.»

¹⁴ A Zuzɛb tɩ nyɔw nɩ a Bɛ̃zamɛ kãkori, bɛ weri taa ɛ́ kone.

¹⁵ A Zuzɛb mɩ̀ tɩ weri weri nɩ a ʋ yɛbr bɛl na cɛ a kone nɩ. Lɛ n'a bɛ pãa tɩ sàw ƴɛ̀r sɔw ʋ.

A Faarawɔ̃ yel k'aa Zakɔb wa zɩ̃ a Eziptɩ

¹⁶ Bɛ tɩ wõ n a Faarawɔ̃ nãà yir, k'aa Zuzɛb yɛbr ta na. A Faarawɔ̃ nɩ a ʋ tõ-tõ-nɩ-bɛrɛ na tɩ wõ a yel ŋa a, a tɩ ɩ bɛ nɩ nʋ̃ɔ̀.

¹⁷ A Faarawɔ̃ tɩ yel'ɩ a Zuzɛb: «Yel a fʋ yɛbr kɛ́ bɛ tuo a tuor a bɛ dʋn lɛb cen nɩ a Kanãa tẽw

¹⁸ tɩ tɛr a bɛ sãà nɩ a bɛ yie dem wa n a ka. Ɩ̃ na wa ƴãw na bɛ zɩ̃ a Eziptɩ tẽw zie ʋl na vɩɛl vɩɛl a, dɩrɛ a tẽw bʋ̃-dɩ-vɩɛlɩ zie.

¹⁹ Fʋ mɩ̀ na yel'ɩ a fʋ yɛbr kɛ́ bɛ de torkori a Eziptɩ ka, tɩ tuo nɩ a bɛ pɔwbɛ nɩ a bɛ bibiir nɩ a bɛ sãà lɛb wa n.

²⁰ Bɛ ta kone a bɛ bome bɛ na na bɛr a be a ɩ, bʋ̃ʋ n'ʋ vɛ̃, bɛ na wa na wa zɩ̃ a Eziptɩ tẽw zi-vla zie.»

²¹ A Zakɔb bidɛbr tɩ ɩ n a lɛ bɛ na yel kʋ̀ bɛ a. A Zuzɛb tɩ kʋ̀ bɛ nɩ torkori mɛ̃ a lɛ a Faarawɔ̃ na yel a, ɛ́ mɩ̀ kʋ̀ bɛ sɔ́r bʋ̃-dɩrɩ.

²² Ʋ tɩ kʋ̀ n cuw-kparʋ ŋa za, ɛ́ kʋ̀ a Bɛ̃zamɛ cuw-kparɩ anũu, de nɩ salm-pla libie kɔbr ata (300).

²³ Ʋ mɩ̀ tɩ tɩr'ɩ bòn pie na tuo a Eziptɩ tẽw bʋ̃-vɩɛlɩ zie a, nɩ bòn-nyan pie na tuo ble, dipɛ̃ nɩ bʋ̃-dɩrɩ a mɩnɛ a, kɛ́ bɛ tɩ kʋ̀ a ʋ sãà a sɔ́r loba ƴãw.

²⁴ Ʋ tɩ bɛr'ɩ a ʋ yɛbr sɔ́r, ɛ́ yel kɛ́ bɛ taa zɛbr taa ɩ.

²⁵ Bɛ tɩ yi n a Eziptɩ cen tɩ ta a Kanãa a bɛ sãà Zakɔb zie.

²⁶ Bɛ tɩ yel ʋ na: «A Zuzɛb cãà na, ɛ́ ʋlɛ n'ʋ kaarɛ a Eziptɩ tẽw za zie.» Ɛcɛ a bɛ tɩ ɩ a Zakɔb bom za ɩ, ʋ na bɛ tɩ sàw de a bɛ ƴɛ̀rʋ a ƴãw.

²⁷ Ɛcɛ bɛ tɩ manɩ nɩ a alɩ bome nɛ za a Zuzɛb na tɩ yel kʋ̀ bɛ a. Al pùorí, a Zakɔb tɩ nyɛ̃ nɩ a torkori a Zuzɛb na tɩr a ʋ deb ƴãw a. Lɛ n'a a ʋ tɩɛrʋ pãa lɛb tɩ zaw.

²⁸ Ʋ tɩ yel'a: «A man na. A ɩ̃ bidɛb Zuzɛb cãà na, ɩ̃ na cen na tɩ nyɛ̃ ʋ ɛ́ bãw kpi.»