Yele-za-pɛr-tib 39 - A SƐB-SÕW

A Zuzɛb na ɩ a Potifaar tõ-tõ-bie a

¹ A Ɩsɩmayɛl bʋʋrɛ na tɩ tɛr a Zuzɛb cen nɩ a Eziptɩ a tɩ kʋ̀ɔr'ʋ na kʋ̀ a Eziptɩ tẽw nɩr kãw bɛ na bʋɔlɛ Potifaar a. Ʋ tɩ ɩ n a nãà tõ-tõ-nɩ-kpɛ̃ɛ kãw nɩ a sojarɩ na gùre ʋ a nɩ-kpɛ̃ɛ.

² A Sore tɩ be n a Zuzɛb zie, bom za tuur ʋ. A Zuzɛb tɩ kpɩɛr'ɩ a ʋ nɩ-kpɛ̃ɛ na ɩ a Eziptɩ tẽw nɩr a yir.

³ A Potifaar tɩ nyɛ̃ na k'aa Sore be n a Zuzɛb zie, k'ʋʋ mɩ́ tɩ ɩ na bom za a Zuzɛb na ɩrɛ a tu vla.

⁴ A Potifaar pʋɔ tɩ pɛlɩ nɩ a Zuzɛb ƴãw, ʋ de ʋ ʋ ɩ a ʋ tõ-tõ-bie. Ʋ tɩ de nɩ a ʋ yir kaafʋ nɩ a ʋ bʋ̃-tɛrɩ za kaafʋ tome kʋ̀ a Zuzɛb.

⁵ A Potifaar na tɩ dier a ʋ yir kaafʋ nɩ a ʋ bʋ̃-tɛrɩ za kaafʋ tome kʋ̀rɛ a Zuzɛb wa báarɛ a, a Sore maal'ɩ a ʋ yir a Zuzɛb zũú. A maalʋ ŋa tɩ lʋ̃ɔ nɩ a ʋ bome za, a ʋ yir pʋɔ nɩ a ʋ póru pʋɔ.

⁶ Lɛ n'a a Potifaar tɩ de a ʋ bome za ƴãw a Zuzɛb nuru pʋɔ. Ʋ bɛ tɩ cãà kaarɛ bom za zie, a bɛ ɩ a ʋl mɩŋa bʋ̃-dɩrɩ tɛwr ɛ. A Zuzɛb tɩ pɔ̀l'a, ɛ́ vɩɛl.

A Potifaar pɔw ŋmãa nɩ ziri ƴãw a Zuzɛb

⁷ A tɩ cɛlɩ nɩ blã, ɛ́ a Zuzɛb nɩ-kpɛ̃ɛ pɔw jɩ́r ʋ ɛ́ yel: «Gã nɩ mɛ̃!»

⁸ Ɛcɛ a Zuzɛb tɩ zawr'a, ɛ́ yel a ʋ nɩ-kpɛ̃ɛ pɔw: «Nyɛ̃, a ɩ̃ nɩ-kpɛ̃ɛ tɛr mɛ̃ nɩ a ʋ zie ka, ɛ́ bɛ cãà kaarɛ bom za zie a yir pʋɔ ɩ. Ʋ de nɩ a ʋ bome za ƴãw a ɩ̃ nuru pʋɔ.

⁹ A yir ŋa pʋɔ a, ʋ bɛ tɛr fãw zuo mɛ̃ ɩ. Ʋ bɛ sɩb mɛ̃ bom kãw za, a bɛ ɩ a fʋ̃ʋ na ɩ a ʋ pɔw a ɩ. Ŋmɩŋmɩn za n'a ɩ̃ na tʋ̃ɔ́ tõ ton na bɛ maal'ɩ wob, ɛ́ maalɩ yel-bier sãw a Naaŋmɩn?»

¹⁰ A Potifaar pɔw tɩ ƴɛ̀rɛ nɩ a Zuzɛb zie bibie za, k'ʋʋ wa gã kɔw ʋ, bɛ lãw taa. Ɛcɛ a Zuzɛb bɛ tɩ bɛrɛ wone a ʋ ƴɛ̀rʋ ɛ.

¹¹ Bibir kãw, a Zuzɛb tɩ wa n a yir a tome ƴãw, ɛ́ tõ-tõ-bie kãw za bɛ tɩ ka be ɩ.

¹² A Potifaar pɔw tɩ nyɔw ʋ nɩ a kparʋ ƴãw, ɛ́ yere: «Gã nɩ mɛ̃!» Ɛcɛ a Zuzɛb tɩ cɛ n a kparʋ fuori ƴãw ʋ a nũú, ɛ́ zɔ tɔl yi.

¹³ A pɔw na tɩ nyɛ̃ a Zuzɛb ʋ zɔ yi ɛ́ bɛr ʋ a ʋ kparʋ a ʋ nuru pʋɔ a,

¹⁴ ʋ ŋmɛ n cɛl bʋɔlɩ a tõ-tõ-biir wa yel bɛ: «Nyɩ nyɛ̃ a na a! A ɩ̃ sɩr tɛr'ɩ ebre nɩr kãw wa n k'ʋʋ wa ɩrɛ tɩ laar. Ʋ wa n a ɩ̃ zie k'ʋʋ wa gã nɩ mɛ̃, ɩ̃ wa ŋmɛ cɛl.

¹⁵ Ʋ na dɛ wa wõ ɩ̃ ŋmɩɛr a cɛlsɩ bʋɔlɛ nɩ a, ʋ zɔ na tɩ yi, ɛ́ bɛr a ʋ kparʋ a ɩ̃ zie.»

¹⁶ Ʋ tɩ bin nɩ a Zuzɛb kparʋ a ʋ zie gùre nɩ a ʋ sɩr lɛb waa daar.

¹⁷ A nɔ-been nɛ n'ʋ ʋ tɩ ƴɛ̀r kʋ̀ ʋ: «A ebre gbãgbaa fʋ na tɛr wa kʋ̀ tɩ a wa n a ɩ̃ zie k'ʋʋ wa sãw mɛ̃ bɛr.

¹⁸ Ɛcɛ ɩ̃ na dɛ wa ŋmɛ a cɛl bʋɔlɩ a nɩbɛ a, ʋ zɔ na kɛ́ bɛr a ʋ kparʋ a ɩ̃ zie.»

¹⁹ A nɩ-kpɛ̃ɛ na tɩ wõ a ʋ pɔw manɩ a lɛ a Zuzɛb na ɩ a ʋ zie a, ʋ nyɛ̃ nɩ suur.

²⁰ Ʋ tɩ ƴãw na bɛ nyɔw a Zuzɛb tɩ pàw a gaso ʋl pʋɔ a nãà na mɩ́ ƴãw a ʋ nɩ-pàwrɩ a. À ŋá n'a a Zuzɛb tɩ be a gaso pʋɔ.

A Zuzɛb na be a gaso pʋɔ a

²¹ Ɛcɛ a be mɩ̀ a, a Sore tɩ be n a ʋ zie, ɛ́ wul ʋ a ʋ nɔ̃wfʋ. Ʋ tɩ ɩ na a gaso-gùrbɛ nɩ-kpɛ̃ɛ nɔ̃w a ʋ yele.

²² A nɩ-kpɛ̃ɛ ŋa tɩ de nɩ a nɩ-pàwrɩ za ƴãw a Zuzɛb nuru pʋɔ. A Zuzɛb'ʋ tɩ jɩ́rɛ ton za na tone a gaso pʋɔ a.

²³ A gaso-gùrbɛ nɩ-kpɛ̃ɛ bɛ tɩ cãà cɛlɛ bom za ʋ na de kʋ̀ a Zuzɛb a zie ɩ. Bʋ̃ʋ n'ʋ vɛ̃, a Sore tɩ be n a Zuzɛb zie, ɛ́ ɩrɛ bom za a Zuzɛb na maalɛ a ʋ tuur vla.