Yele-za-pɛr-tib 38 - A SƐB-SÕW

A Zuda nɩ a Tamaar yele

¹ A lɛn daar, a Zuda tɩ yi n a ʋ yɛbr zie cen Adulam tẽw, nɩr kãw na dɩ Hira a zie.

² A be a, ʋ tɩ nyɛ̃ nɩ Kanãa tẽw nɩr kãw bɛ na bʋɔlɛ Suwa a, pɔwyaa. Ʋ tɩ de ʋ na ʋ ɩ a ʋ pɔw, ʋ páw ʋ,

³ a pɔw tɛr pʋɔ dɔw dɛble, a Zuda por ʋ Ɛɛr.

⁴ A pɔw lɛb tɩ tɛr'ɩ pʋɔ dɔw dɛble por ʋ Onan.

⁵ Al pùorí, ʋ lɛb maal dɔw dɛble por ʋ Sela. Kezivʋ n'a a Zuda tɩ be a lɛn daar a pɔw na dɔw a.

⁶ A Zuda tɩ de nɩ pɔw kʋ̀ a ʋ bidɛb-dãw Ɛɛr, a pɔw dɩ kɛ́ Tamaar.

⁷ A Ɛɛr tɩ ɩ na a bɛ pɛlɩ a Sore pʋɔ ɩ, ʋ ɩ ʋ kpi.

⁸ Lɛ n'a a Zuda tɩ yel a Onan: «Bɩɛrɩ a fʋ yɛb pɔw, dɔw nɩ bibiir kʋ̀ a fʋ yɛb.»

⁹ Ɛcɛ a Onan tɩ bãwnɩ a na ʋ na kʋ̃ so a bibiir a. Lɛ so ʋlɛ mɩ́ wa gã nɩ a ʋ yɛb pɔw a, ʋ mɩ́ ɩ na a ʋ yɔ-kʋ̃ɔ cir tẽw, k'ʋʋ ta dɔw bie kʋ̀ a ʋ yɛb ɛ.

¹⁰ A Onan ɩb ŋa bɛ tɩ pɛlɩ a Sore pʋɔ ɩ, ʋ ɩ ʋ mɩ̀ kpi.

¹¹ Lɛ n'a a Zuda tɩ yel a ʋ bie-pɔw Tamaar: «Fʋ na faa ɩ pɔw-kʋɔr a, kul tɩ kpɩɛr a fʋ sãà yir, ɛ́ gù a ɩ̃ bidɛb Sela wa ɩ kpɛ̃ɛ baarɩ.» Bʋ̃ʋ n'ʋ vɛ̃, ʋ tɩ tɩ́ɛr'ɩ ʋ pʋɔ: «A Sela mɩ̀ ta kpi mɛ̃ a ʋ yɛbr a ɩ.» A lɛ n'a a Tamaar tɩ kul tɩ kpɩɛr a ʋ sãà yir.

¹² A tɩ cɛlɩ na ɛ́ a Suwa pɔwyaa na ɩ a Zuda pɔw a wa kpi. A ko-maal na wa baar'a, a Zuda ìr'a cen Tɩmɩna, ʋlɛ nɩ a ʋ bá Hira na yi a Adulam a, k'ʋʋ tɩ nyɛ̃ a nɩbɛ na ŋmarɛ a ʋ píir kɔblʋ a.

¹³ Nɩr kãw tɩ yel'ɩ a Tamaar: «A fʋ sɩr-sãà cere nɩ Tɩmɩna k'ʋʋ tɩ ŋma a ʋ píir kɔblʋ.»

¹⁴ A Tamaar tɩ yaa nɩ a ʋ pɔw-kʋɔr kparɩ bɛr, ɛ́ de pɛn páw nɩ a ʋ niwn kɛ́ bɛ ta bãw ʋ ɛ. Ʋ tɩ cen na tɩ zɩ̃ Enayim tẽw na be a Tɩmɩna sɔ́r zu a dɩ̃dɔr nʋɔr. Bʋ̃ʋ n'ʋ vɛ̃, ʋ tɩ nyɛ̃ na k'aa Sela ɩ n kpɛ̃ɛ baarɩ, ɛ́ bɛ bɛ de ʋ kʋ̀ ʋ ʋ kul ɛ.

¹⁵ A Zuda tɩ nyɛ̃ nɩ a Tamaar bʋɔlɛ pɔw-yɛm, ʋ na tɩ pàw a ʋ niwn a ƴãw.

¹⁶ Ʋ tɩ bɩɛ na cen a ʋ zie, a sɔ́r nʋɔr, tɩ yel ʋ: «Alɛ, sàw ɩ̃ gã nɩ fʋ!» A Tamaar sɔw: «Bʋ̃ʋ n'ʋ fʋ na kʋ̀ m a al ƴãw?»

¹⁷ Ʋ sɔw: «Ɩ̃ na nyɔw nɩ bʋle a ɩ̃ dʋn pʋɔ tɩr bɛ wa kʋ̀ b.» A Tamaar lɛb yel: «A vɩɛl'a, ɛcɛ kʋ̀ m bʋ̃-kãw sɛr ɩ̃ gùre nɩ.»

¹⁸ Ʋ sowr'ʋ: «Bʋ̃ʋ n'ʋ ɩ̃ na kʋ̀ b sɛr?» A Tamaar yel: «Kʋ̀ m a fʋ ŋmaarʋ-bʋ̃-ƴãwna nɩ a ʋ miwr, nɩ a dabɔl fʋ na tɛr a nũú a.» Ʋ tɩ de a kʋ̀ ʋ, ɛ́ gã nɩ ʋ, ʋ tɛr a ʋ pʋɔ.

¹⁹ A Tamaar tɩ ìr'a lɛb kul a ʋ yir, tɩ ír a pɛn bɛr, ɛ́ lɛb de a ʋ pɔw-kʋɔr kparɩ.

²⁰ A Zuda tɩ ƴãw na a ʋ bá na yi a Adulam a, ʋ cen nɩ a bʋle k'ʋʋ tɩ kʋ̀ a pɔw, ɛ́ de a bome a pɔw na de bin a. Ɛcɛ a ʋ bá bɛ tɩ nyɛ̃ a pɔw ɛ,

²¹ ɛ́ sowri a tẽw dem: «A pɔw-yɛm na tɩ be a Enayim sɔ́r nʋɔr a wa?» Bɛ tɩ sɔw na: «Pɔw-yɛm bɛ dãw be a ka towtow ɛ.»

²² A Zuda bá tɩ lɛb'a wa wa yel ʋ: «Ɩ̃ bɛ nyɛ̃ ʋ ɛ, ɛ́ a tẽw dem yel kɛ́ pɔw-yɛm bɛ dãw be a be mɩ̀ ɛ.»

²³ A Zuda lɛb yel: «Alɛ wa ɩ lɛ a, ʋ tɛr a bome ʋ na de a. Tɩ ta ɩrɛ wa ƴãw tɩ tʋɔra vĩ ɛ. Mãa tɩr'ɩ a bʋle, ɛ́ fʋ bɛ tɩ nyɛ̃ ʋ ɛ!»

²⁴ A tɩ maal'ɩ cuwr ata, ɛ́ bɛ wa yel a Zuda: «A fʋ bie-pɔw Tamaar tõ n pɔw-yɛm tome. Mɔ̃ mɩ̀, ʋlɛ n'ɩ ŋan tɛr pʋɔ a ʋ pɔw-yɛm tome pʋɔ.» A Zuda yel: «Bɛ nyɔw ʋ yi n tɩ ƴãw ʋ dɩ vũu a mimir!»

²⁵ Bɛ na tɩ tɛr ʋ yire nɩ a, a Tamaar tɩ tõ na bɛ tɩ yel a ʋ sɩr-sãà: «Jɩ́r a bome á ŋá kaa. A nɩr ʋl na so a ŋmaarʋ-bʋ̃-ƴãwna ŋa nɩ a miwr ŋa, nɩ a dabɔl ŋa a, ʋlɛ n'ʋ ƴãw mɛ̃ a pʋɔ. Ƴãw fãw bãw ãa n'ɩ a nɩr ŋa.»

²⁶ A Zuda tɩ nyɛ̃ nɩ a bome bãw, ɛ́ yel: «A Tamaar tu n a lɛ a nʋɔr na ƴãw a vla za zuo mɛ̃. Yel-mɩŋa n'a, a tɩ fɛr'a k'ɩ̃ɩ de ʋ kʋ̀ a ɩ̃ bidɛb Sela ʋ kul, ɩ̃ɩ bɛ ɩ a lɛ ɩ.» Lɛ n'a a Zuda bɛ lɛb tɩ gã nɩ ʋ towtow ɛ.

²⁷ A ʋ dɔwfʋ daar na wa ta a, bɛ nyɛ̃ na bɛ ɩ yɩbr.

²⁸ Ʋ na tɩ dɔwr a, a bie kãw tɩ tur'ɩ a nũu, a pɔw-dɔwrɛ nyɔw, ɛ́ 'lẽ fomi-zɩɛ ƴãw a nũsuwle ƴãw ɛ́ yel: «Ŋa n'ʋ de niwn yi.»

²⁹ Ɛcɛ a bie tɩ lɛb'a taw a ʋ nũu kpɛ n, ɛ́ a ʋ yɛb de niwn yi. A pɔw-dɔwrɛ ŋmɛ cɛl: «Nyɛ̃ vʋɔr fʋ na yuo a!» Lɛ n'a a Zuda tɩ por a bie kɛ́ Perɛsɩ, a pɛr lɛ kɛ́ “Vʋɔr.”

³⁰ Al pùorí, a ʋ yɛb tɩ yi n nɩ a fomi-zɩɛ a nũsuwle ƴãw, a Zuda por ʋ kɛ́ Zera.