Yele-za-pɛr-tib 36 - A SƐB-SÕW

A Ezawu ìr'a cen tɩ kpɩɛr Edɔm

¹ A Ezawu bɛ mɩ́ na bʋɔlɛ kɛ́ Edɔm a bʋʋrɛ yée n'ɩ à á ŋá.

² A Kanãa tẽw powli bɛ ŋa nɛbɛ a Ezawu tɩ kul: Ada na ɩ a Hititɩ dɔɔ Elon pɔwyaa a, nɩ Oholivama na ɩ Ana pɔwyaa, ɛ́ a Ana ɩ a Hivitɩ dɔɔ Sivewoon pɔwyaa a.

³ Ʋ mɩ̀ tɩ kul'ɩ Basɩmatɩ na ɩ Ɩsɩmayɛl pɔwyaa nɩ Nebayɔtɩ yeepuule a.

⁴ A Ada tɩ dɔw nɩ Elifaazɩ kʋ̀ a Ezawu, ɛ́ Basɩmatɩ dɔw Erewuyɛl kʋ̀ ʋ.

⁵ A Oholivama tɩ dɔw nɩ Yewusɩ, Yalam nɩ Koora. A bidɛbr'ɩ a bɛ ŋa a Ezawu na tɩ dɔw a Kanãa tẽw a.

⁶ A Ezawu tɩ tɛr'ɩ a ʋ pɔwbɛ, a ʋ bidɛbr, a ʋ pɔwyaar, a ʋ tõ-tõ-biir za, nɩ a ʋ dʋ̃-pɛ-bʋʋrɛ za ìr'ɩ. Ʋ mɩ̀ tɩ wob'ɩ a ʋ na-bome za ʋ na páw a Kanãa tẽw a, cen nɩ tẽ-yũo, zãá nɩ a ʋ yɛb Zakɔb.

⁷ Bʋ̃ʋ n'ʋ vɛ̃, a bɛ bʋ̃-tɛrɩ tɩ zuo na nɩ bɛ na na lãw kpɩɛr a. A zie ʋl bɛ na tɩ be a bɛ tɩ saalɩ a bɛ dʋn guolu ƴãw ɛ.

⁸ À ŋá n'a a Ezawu bɛ mɩ́ na bʋɔlɛ Edɔm a tɩ cen tɩ zɩ̃ a Seyiir tãw zu.

A Ezawu bʋʋrɛ

⁹ A Ezawu bʋʋrɛ yée n'ɩ à á ŋá. A bɛ sãàkʋm-kʋra Edɔm tɩ kpɩɛr'ɩ a Seyiir tãw zu.

¹⁰ A Ezawu bidɛbr yée n'ɩ à á ŋá: Elifaazɩ na ɩ a ʋ pɔw Ada bie a nɩ Erewuyɛl na ɩ a ʋ pɔw Basɩmatɩ bie a.

¹¹ A Elifaazɩ bidɛbr tɩ n'ɩ bɛ ŋa: Teman, Omaar, Sefo, Gayetam nɩ Kenaazɩ.

¹² A Ezawu bidɛb Elifaazɩ tɩ tɛr'ɩ pɔwbɛ ayi sob ʋ dɩ Tɩmɩna. Ʋ tɩ dɔw nɩ bidɛb kãw kʋ̀ ʋ a yúor dɩ Amalɛkɩ. A Ezawu nɩ a ʋ pɔw Ada yan tɩ n'ɩ a bɛ ŋa.

¹³ A Erewuyɛl bidɛbr tɩ n'ɩ Nahatɩ, Zera, Sama nɩ Mɩza. A Ezawu nɩ a ʋ pɔw Basɩmatɩ yan tɩ n'ɩ a bɛ ŋa.

¹⁴ A Oholivama na ɩ a Ana pɔwyaa ɛ́ ɩ Sivewoon yãw a tɩ dɔw nɩ Yewusɩ, Yalam nɩ Koora kʋ̀ a Ezawu.

^15-16 A Ezawu bʋʋrɛ nɩ-bɛrɛ n'ɩ bɛ ŋa: a Ezawu nɩ a ʋ pɔw Ada bi-dãw-dɔwra Elifaazɩ nɩbɛ na ɩ nɩ-bɛrɛ a tɩ n'ɩ bɛ ŋa: Teman, Omaar, Sefo, Kenaazɩ, Koora, Gayetam, Amalɛkɩ. Bɛ tɩ kpɩɛr'ɩ a Edɔm tẽw.

¹⁷ A Ezawu bidɛb Erewuyɛl nɩbɛ na ɩ nɩ-bɛrɛ a tɩ n'ɩ bɛ ŋa: Nahatɩ, Zera, Sama nɩ Mɩza. Bɛ tɩ kpɩɛr'ɩ a Edɔm tẽw. Bɛ tɩ ɩ n a Ezawu nɩ a ʋ pɔw Basɩmatɩ yan.

¹⁸ A Ezawu nɩ a ʋ pɔw Oholivama na ɩ Ana pɔwyaa a bidɛbr na ɩ nɩ-bɛrɛ a tɩ n'ɩ bɛ ŋa: Yewusɩ, Yalam nɩ Koora.

¹⁹ A Edɔm tẽw dem nɩ-bɛrɛ na tɩ ɩ a Ezawu bʋʋrɛ a tɩ n'ɩ a bɛ ŋa.

^20-21 A nɩbɛ na de niwn kpɛ a Edɔm tẽw a tɩ ɩ n a Horitɩ dɔɔ Seyiir bʋʋrɛ. A Horitɩ mɩnɛ nɩ-bɛrɛ na tɩ ɩ a Seyiir bʋʋrɛ a tɩ n'ɩ bɛ ŋa: Lotan, Soval, Sivewoon, Ana, Disoon, Esɛɛr nɩ Disan.

²² A Lotan bidɛbr tɩ n'ɩ Hori nɩ Hemam. A Lotan tɩ tɛr'ɩ yeepuule ʋ dɩ Tɩmɩna.

²³ A Soval bidɛbr tɩ n'ɩ Alevan, Manahatɩ, Eval, Sefo nɩ Onam.

²⁴ A Sivewoon bidɛbr tɩ n'ɩ Aya nɩ Ana. A Ana n'ʋ tɩ nyɛ̃ a kʋ̃ɔ a wɛja-kpalɛ pʋɔ, a lɛn daar ʋ na tɩ àrɛ nɩ a ʋ sãà Sivewoon bòn a.

²⁵ A Ana bibiir tɩ n'ɩ a ʋ bidɛb Disoon nɩ a ʋ pɔwyaa Oholivama.

²⁶ A Disoon bidɛbr tɩ n'ɩ Hemidan, Ɛsɩban, Yitiran nɩ Keran.

²⁷ A Esɛɛr bidɛbr tɩ n'ɩ Bilhan, Zaawan nɩ Akan.

²⁸ A Disan bidɛbr tɩ n'ɩ Usɩ nɩ Aaran.

^29-30 A Horitɩ mɩnɛ nɩ-bɛrɛ a Seyiir tẽw tɩ n'ɩ bɛ ŋa: Lotan, Soval, Sivewoon, Ana, Disoon, Esɛɛr nɩ Disan.

³¹ A na-mɩnɛ na lɩɛrɩ taa dɩ naalʋ a Edɔm tẽw, ɛ́ a Ɩsɩrayɛl wa bãw tɛr na-mɩnɛ a n'ɩ bɛ ŋa:

³² Bewɔɔr bidɛb, Bɛla, na yi Dinava a.

³³ Ʋ na wa kpi a, Zera bidɛb Yovavʋ na yi Bɔsɩra a n'ʋ lɩɛr'ʋ.

³⁴ A Yovavʋ na wa kpi a, Husam na yi Teman lowr a n'ʋ lɩɛr'ʋ dɩ a naalʋ.

³⁵ A Husam na wa kpi a, Bedadɩ bidɛb Hadadɩ na yi Awitɩ a n'ʋ lɩɛr'ʋ ɩ a nãà. Ʋlɛ n'ʋ tɩ zɛb tʋ̃ɔ́ a Madian tẽw dem a Mowab tẽw.

³⁶ A Hadadɩ na wa kpi a, Samɩla na yi Masireka a n'ʋ lɩɛr'ʋ ɩ a nãà.

³⁷ A Samɩla na wa kpi a, Sawul na yi a Man-nʋɔr-Erehovɔtɩ a n'ʋ lɩɛr'ʋ ɩ a nãà.

³⁸ A Sawul na wa kpi a, Akɩbɔɔr bidɛb, Baal-Hanan n'ʋ lɩɛr'ʋ ɩ a nãà.

³⁹ A Akɩbɔɔr bidɛb, Baal-Hanan na wa kpi a, Hadaar'ʋ lɩɛr'ʋ ɩ a nãà. A ʋ tẽw yúor tɩ dɩ na kɛ́ Pawu. A ʋ pɔw tɩ dɩ na kɛ́ Mehetaveyɛl, ɛ́ ɩ Matɩrɛdɩ pɔwyaa nɩ Me-Zahavʋ yãw.

⁴⁰ Nyɛ̃ a Edɔm tẽw dem nɩ-bɛrɛ yée na tu a bɛ dɔwlʋ nɩ a ziir bɛ na kpɩɛr a: Tɩmɩna, Alwa, Yetɛtɩ,

⁴¹ Oholivama, Ela, Pinoon,

⁴² Kenaazɩ, Teman, Mivɩsaar,

⁴³ Magidiyɛl, Iiram. A Edɔm tẽw dem na-mɩnɛ n'ɩ a bɛ ŋa. Ŋa za mɩ́ tɩ kpɩɛr'ɩ a bɛ tẽw lõbowr kãw. A Ezawu n'ɩ a Edɔm tẽw dem sãàkʋm.