Yele-za-pɛr-tib 35 - A SƐB-SÕW

A Zakɔb yi n a Sɩsɛm cen Betɛl

¹ Bibir kãw, a Naaŋmɩn tɩ yel'ɩ a Zakɔb: «Ìr do a Betɛl tɩ kpɩɛr a be. Maalɩ bàwr-maal-kuur a ɩ̃ ƴãw a be, mãa na ɩ fʋ nyɛ̃ m a lɛn daar fʋ na tɩ zɔrɛ dɛrɛ a fʋ yɛb Ezawu a.»

² A Zakɔb tɩ yel'ɩ a ʋ yir dem nɩ a nɩbɛ bɛl za na be a ʋ zie a: «Nyɩ lɔb a ŋmɩn-sãanbɛ na be a nyɩ zie a bɛr. Nyɩ so a nyɩ dɛwr bɛr, ɛ́ lɩɛrɩ a nyɩ bʋ̃-suuri.

³ Nyɩ cɔbrɩ, tɩ dúor'ɩ a Betɛl. Ɛ́ a be a, ɩ̃ na tɩ maal'ɩ bàwr-maal-kuur a Naaŋmɩn ƴãw, a ʋl na tɩ sɔw mɛ̃ a ɩ̃ kpɩɛrʋ bibir, ɛ́ sõw mɛ̃ zie nɛ za ɩ̃ na cen a.»

⁴ Lɛ n'a bɛ tɩ de a ŋmɩn-sãanbɛ dasuli za bɛ na tɛr a kʋ̀ a Zakɔb, lãwnɩ a tokpamɛ bɛ na ƴãw a. A Zakɔb tɩ tuw a na ũù a tɩ-kpɛ̃ɛ na pɩɛlɩ a Sɩsɛm a pile.

⁵ A Zakɔb nɩ a ʋ bibiir na wa wob ìr a lɛn daar a, Naaŋmɩn ɩ na dɛ̃bɩ̃ɛ tɛr a tẽ-kpɔwlɩ nɩbɛ yaga za, kɛ̀ nɩr za bɛ sàw ta tu bɛ ɩ.

⁶ A Zakɔb nɩ a nɩbɛ za na tɩ bɩɛlɛ ʋ a tɩ ta n Luuzɩ, a pɛr lɛ k'aa Betɛl na be a Kanãa tẽw a.

⁷ Ʋ tɩ mɛ n a bàwr-maal-kuur a be, ɛ́ por a zie ʋl yúor kɛ́ “Betɛl Naaŋmɩn”. Bʋ̃ʋ n'ʋ vɛ̃, a be n'a a Naaŋmɩn tɩ ɩ k'ʋ nyɛ̃ ʋ, a lɛn daar ʋ na tɩ zɔrɛ dɛrɛ a ʋ yɛb a.

⁸ A Erebeka bɩyaal na dɩ Debora a tɩ kpi na bɛ ũù ʋ pɩɛlɩ a Betɛl, a sɛn tɩɛ ʋl bɛ na bʋɔlɛ “Kon sɛn tɩɛ” a pile.

⁹ A Naaŋmɩn tɩ lɛb'a ɩ a Zakɔb nyɛ̃ ʋ a lɛn daar ʋ na tɩ yi a Mezopotami lɛb wa a, ɛ́ maal'ʋ.

¹⁰ Ʋ tɩ yel ʋ na: «A fʋ yúor'ɩ Zakɔb, ɛcɛ bɛ kʋ̃ cãà bʋɔlɛ fʋ a lɛ ɩ. Dɩ̃a na ta a, a fʋ yúor'ɩ Ɩsɩrayɛl.» Lɛ n'a a Naaŋmɩn tɩ por ʋ Ɩsɩrayɛl.

¹¹ A Naaŋmɩn tɩ cãà na lɛb yel ʋ: «Ɩ̃ ɩ n a Naaŋmɩn kpɛnʋ-za-sob. A dɔwfʋ, ʋ tu b, ɛ́ fʋ dɔw yɛ̀r yaga za. Fʋ na ɩ n nɩ-bʋʋrɛ kãw sãàkʋm, mɔ̃ mɩ̀, fʋ na ɩ n nɩ-bʋʋrɛ bʋʋrɛ na ɓã taa a sãàkʋm. Fʋ na dɔw nɩ na-mɩnɛ.

¹² Ɩ̃ kʋ̀rɛ fʋ nɩ a tẽw ɩ̃ na kʋ̀ a Abraham nɩ a Ɩzaakɩ a, ɛ́ kʋ̀rɛ ʋ a fʋ bʋʋrɛ a fʋ pùorí.»

¹³ Al pùorí, a Naaŋmɩn tɩ cen na kɛ́ bɛr a zie ʋl ʋ na tɩ ƴɛ̀r'ɩ a Zakɔb a.

¹⁴ A Zakɔb tɩ ɓáw nɩ kʋsɩɛr teli a be a Naaŋmɩn na tɩ ƴɛ̀r'ɩ ʋ a, cir kãá nɩ divɛ̃ blã ƴãw, maal'ʋ.

¹⁵ A Zakɔb tɩ por'ɩ a zie ʋl a Naaŋmɩn na ƴɛ̀r'ɩ ʋ a kɛ́ Betɛl, a pɛr lɛ kɛ́ “Naaŋmɩn yir”.

A Arasɛl dɔw nɩ Bɛ̃zamɛ kpi n

¹⁶ A Zakɔb nɩ a ʋ yir dem tɩ ìr'ɩ a Betɛl. Bɛ tɩ cãà na zãá nɩ a Efarata blã, a lɛn daar a Arasɛl na dɔw a. A dɔwfʋ tɩ kpɛmɛ na.

¹⁷ A Arasɛl na tɩ dɔwr hanɛ nɩ a, a pɔw-dɔwrɛ tɩ yel ʋ na: «Ta zɔrɛ dɛ̃bɩ̃ɛ ɩ, dɛble lɛb n'ʋ.»

¹⁸ A Arasɛl tɩ ɓɛlɛ nɩ ʋ za. Ʋ na tɩ waar na ŋmãa a vʋʋrʋ a, ʋ por'ɩ a bie kɛ́ Bɛn-Oni, a pɛr lɛ kɛ́ “Ɩ̃ 'wɔbrʋ bie.” Ɛcɛ a Zakɔb tɩ por ʋ nɩ “Bɛ̃zamɛ”, a pɛr lɛ kɛ́ “Dʋrʋ-nũu bie.”

¹⁹ A Arasɛl tɩ kpi na bɛ ũù ʋ a Efarata sɔ́r nʋɔr, a pɛr lɛ k'aa Bɛtɩlɛm.

²⁰ A Zakɔb tɩ bin nɩ kʋsɩɛr teli a ʋ yaa zu: bɛ cãà na bʋɔlɛ ʋ a dɩ̃a kɛ́ “Arasɛl yaa kʋsɩɛr.”

²¹ A Zakɔb tɩ ìr'a cen tɩ maalɩ a ʋ pɛn-sɛw Migɩdal-Edɛɛr pùorí.

²² Zɩ̃ k'aa Zakɔb na tɩ kpɩɛr a ʋlɩ zie nɛ a, Urubɛn tɩ cen na tɩ gã nɩ a Bilha na ɩ a ʋ sãà pɔw-bile kãw a. A Zakɔb tɩ wõ a na. A Zakɔb bidɛbr tɩ ɩ n pie nɩ ayi:

²³ A Leya bidɛbr'ɩ bɛ ŋa: Urubɛn na ɩ a bidɛb-dãw-dɔwra a, Sɩmɩ̃ɔ, Levi, Zuda, Ɩsakaar nɩ Zabulɔ̃.

²⁴ A Arasɛl bidɛbr'ɩ bɛ ŋa: Zuzɛb nɩ Bɛ̃zamɛ.

²⁵ A Bilha na ɩ a Arasɛl tõ-tõ-bi-pɔw a bidɛbr'ɩ bɛ ŋa: Dan nɩ Nɛfɩtali.

²⁶ A Zilipa na ɩ a Leya tõ-tõ-bi-pɔw a bidɛbr'ɩ bɛ ŋa: Gadɩ nɩ Asɛɛr. A Zakɔb bidɛbr'ɩ a bɛ ŋa ʋ na dɔw a Mezopotami a.

²⁷ A Zakɔb tɩ ta n a ʋ sãà Ɩzaakɩ zie a Mamire na pɩɛlɩ Kɩrɩyatɩ-Arba a, a pɛr lɛ k'aa Ebrɔ̃. Be n'a a Abraham nɩ a Ɩzaakɩ tɩ kpɛ.

²⁸ A Ɩzaakɩ tɩ tɛr'ɩ yome kɔbr ayi vʋ̃ɔ lɩzɛr (180)

²⁹ a lɛn daar ʋ na kpi a. A na ɩ lɛ a, ʋ tɩ kor'ɩ yaga za, ɛ́ pãa kpi cen tɩ páw a ʋ sãà mɩnɛ. A ʋ bidɛbr Ezawu nɩ Zakɔb tɩ ũù ʋ na.