Yele-za-pɛr-tib 31 - A SƐB-SÕW

¹ Ʋ tɩ wõ na k'aa Labã bidɛbr yere na: «A Zakɔb faa nɩ a tɩ sãà bome za, alɛ n'a ʋ kpɛ n a naalʋ sɛw à à ŋá.»

² A Zakɔb tɩ jɩ́r'ɩ a Labã niwn, ɛ́ nyɛ̃ k'ʋʋ bɛ cãà ɩrɛ a ʋ zie mɛ̃ a dãwdãw a ɩ.

³ Lɛ n'a a Sore tɩ yel a Zakɔb: «Lɛb cen a fʋ sãà mɩnɛ tẽw, a fʋ yir dem zie: ɩ̃ na be n a fʋ zie.»

⁴ A Zakɔb tɩ ƴãw na a Arasɛl nɩ a Leya wa a póru pʋɔ ʋ na tɩ be nɩ a dʋn a,

⁵ ʋ wa yel bɛ: «Ɩ̃ nyɛ̃ na k'aa nyɩ sãà bɛ cãà ɩrɛ a ɩ̃ zie mɛ̃ a koro za a ɩ, ɛcɛ a ɩ̃ sãà Naaŋmɩn bɛ bɛr mɛ̃ ɩ.

⁶ Nyɩ bãwnɩ a na ɩ̃ na ƴãw a ɩ̃ fãw za tõ a nyɩ sãà tome a,

⁷ ɛcɛ ʋ bɛlɩ mɛ̃ na, lɩɛbɩ a ɩ̃ sã-ya bɛr gb'aa pie. Ɛcɛ Naaŋmɩn bɛ bɛr ʋ màl mɛ̃ ɩ.

⁸ Ʋlɛ wa yel: “A dʋn na ɩ kpɛrɛ a n'a na ɩ a fʋ sã-ya a”, a dʋ̃-nyan za mɩ́ dɔw nɩ bili na ɩ kpɛrɛ a. Ɛ́ ʋlɛ mɩ̀ lɛb wa yel: “A dʋ̃-cʋɔrɛ na ɩ n a fʋ sã-ya a”, a dʋ̃-nyan za mɩ́ dɔw nɩ bili na ɩ cʋɔrɛ a.

⁹ A Naaŋmɩn n'ʋ faa a nyɩ sãà dʋn kʋ̀ m.

¹⁰ A lɛ a dʋn na mɩ́ man kɛ́ dúor taa a, bom ŋa n'ʋ ɩ̃ gã zanɩ nyɛ̃: a pʋ́rɩ na tɩ dúor a pi-nyan nɩ a bʋʋr a tɩ ɩ n cʋɔrɛ, kpɛrɛ nɩ ɓalɛ.

¹¹ A Naaŋmɩn malkɩ tɩ bʋɔlɩ mɛ̃ nɩ zánʋ pʋɔ: “Zakɔb i!” Ɩ̃ sɔw: “Mãa n'ɩ ŋan.”

¹² Ʋ yel mɛ̃: “A pʋ́rɩ za na dúor a pi-nyan bɩɩ a bʋ-nyan a, a ɩ n cʋɔrɛ, kpɛrɛ bɩɩ ɓalɛ. Ɩ̃ na nyɛ̃ a lɛ a Labã na ɩ b a n'a so a ɩ à à ŋá.

¹³ Mãa n'ɩ a Naaŋmɩn ʋl na ɩ fʋ nyɛ̃ m a Betɛl, a be fʋ na maalɩ kʋsɛ-tela ɛ́ kõ nʋɔr a ɩ̃ zie a. Ƴɛrɛŋa a, ìr, bɛr a tẽw ŋa ɛ́ lɛb cen a fʋ tẽw”.»

¹⁴ A Arasɛl nɩ a Leya tɩ sɔw nɩ a Zakɔb à ŋá: «Tɩ cãà na tɛr gbã-dɩ-bom a tɩ sãà yir pʋɔ ɔ?

¹⁵ Ʋ nyɛ̃ tɩ na tɩ ɩ sãanbɛ. Bʋ̃ʋ n'ʋ vɛ̃, ʋ kʋɔrɩ tɩ na, ɛ́ cãà lɛb dɩ a libie ʋ nãá tɩ kʋ̀ tɩ a.

¹⁶ Lɛ so, a na-bome za a Naaŋmɩn na faa a tɩ sãà zie a, tɩɩm nɩ a tɩ bibiir so a. Ƴɛrɛŋa a, ɩ a lɛ za a Naaŋmɩn na yel kʋ̀ b a.»

¹⁷ A Zakɔb tɩ ìr'a ƴãw a ʋ bidɛbr nɩ a ʋ pɔwbɛ zɔm a nyɔ̃wmɩ.

¹⁸ Ʋ tɩ tɛr'ɩ a ʋ dʋn za nɩ a ʋ bome za ʋ na páw a Mezopotami tẽw Saa-zu a, lɛb cere nɩ a ʋ sãà Ɩzaakɩ zie, a Kanãa tẽw.

¹⁹ A Labã tɩ cen na tɩ ŋmarɛ a ʋ píir kɔblʋ, ɛ́ a Arasɛl zu wob a sãà tɩbɛ.

²⁰ A Zakɔb tɩ zu n a Aram tẽw dɔɔ Labã, ʋ na tɩ zɔrɛ ɛ́ bɛ yel yel kʋ̀ ʋ a.

²¹ Ʋ tɩ zɔ n nɩ a ʋ bʋ̃-tɛrɩ za. Ʋ tɩ ìr'a lo gãw a Efaratɩ man, ɛ́ tu Galaadɩ tan lowr cere.

²² A deyere daarɩ́ a, bɛ tɩ yel'a kʋ̀ a Labã k'aa Zakɔb zɔ na.

²³ A Labã tɩ ír'ɩ a ʋ yir nɩbɛ, ɛ́ tɩ diw bɩɛr'ɩ a Zakɔb bibie ayopõi, tɩ páw ʋ a Galaadɩ tan pʋɔ.

²⁴ Ɛcɛ a Naaŋmɩn tɩ ɩ na a Aram tẽw dɔɔ Labã nyɛ̃ ʋ a tɩ̃ɩsɔw zánʋ pʋɔ, ʋʋ yel ʋ: «Taa wa ƴɛ̀rɛ ƴɛ̀rʋ za, ƴɛ̀r-vla bɩɩ ƴɛ̀r-faa, a Zakɔb zie ɩ.»

²⁵ A Labã tɩ ta na páw a Zakɔb na maalɩ a ʋ pɛn-sɛw a Galaadɩ tan pʋɔ a. A Labã nɩ a ʋ nɩbɛ mɩ̀ tɩ ɩ a lɛ.

²⁶ A Labã tɩ sowr'ɩ a Zakɔb: «Bʋ̃ʋ n'ʋ fʋ ɩ à à ŋá? Fʋ zu m'a, fʋ na tɛr a ɩ̃ pɔwyaar zɔ n mɛ̃ gbãgbaar fʋ na nyɔw zɛbr zie a.

²⁷ Bʋ̃ʋ n'ʋ so fʋ sɔwlɩ zɔ, bɛlɩ mɛ̃ à ŋá? Fʋ̃ʋ tɩ yel kʋ̀ m a, ɩ̃ nãá tɩ bɩɛlɩ fʋ na nɩ nʋ̃ɔ̀ yielu, yielu bɛ na ŋmɛ kʋɔr nɩ korijom ƴãw a.

²⁸ Fʋ mɩ̀ bɛ bɛr mɛ̃ ɩ̃ weri a ɩ̃ pɔwyaar nɩ a ɩ̃ yan ɛ. Yel-mɩŋa sa ziri, fʋ ɩ n a ɩb mɛ̃ dãbol a!

²⁹ Ɩ̃ tɛr'ɩ fãw na ɩ a kpɛ nyɩ, ɛcɛ a nyɩ sãà mɩnɛ Naaŋmɩn yel mɛ̃ nɩ a tɩ̃ɩsɔw: “Taa wa ƴɛ̀rɛ ƴɛ̀rʋ za, ƴɛ̀r-vla bɩɩ ƴɛ̀r-faa, a Zakɔb zie ɩ.”

³⁰ A vɩɛl'a fʋ na yi kule, a fʋ sãà yir vʋla na kʋrɛ fʋ a ƴãw. Ɛcɛ bʋnʋ ƴãw n'a fʋ zu a ɩ̃ ŋmɩmɛ?»

³¹ A Zakɔb tɩ sɔw nɩ a Labã: «Ɩ̃ zɔ n dɛ̃bɩ̃ɛ, ɛ́ tɩ́ɛr'ɩ ɩ̃ pʋɔ: “Ʋ na faa nɩ a ʋ pɔwyaar.”

³² Ɛcɛ fʋ̃ʋ wa nyɛ̃ a fʋ ŋmɩmɛ nɩr zie a, a sob kpiir'a! Bɛ́l a bome za na be a ɩ̃ zie a kaa, a tɩ nɩbɛ niŋé, ɛ́ de a fʋ dem.» Bʋ̃ʋ n'ʋ vɛ̃, a Zakɔb bɛ tɩ bãw k'aa Arasɛl zu n a ŋmɩmɛ ɩ.

³³ A Labã tɩ kpɛ n a Zakɔb pɛn-sɛw pʋɔ, kpɛ a Leya dem pʋɔ, ɛ́ kpɛ a tõ-tõ-bi-pɔwbɛ ayi dem pʋɔ, ɛ́ bɛ tɩ nyɛ̃ bom za ɩ. Ʋ tɩ yi n a Leya pɛn-sɛw pʋɔ kpɛ a Arasɛl dem pʋɔ.

³⁴ Zɩ̃ k'aa Arasɛl tɩ de nɩ a tɩbɛ ƴãw nyɔ̃wmɛ kɔw pʋɔ ɛ́ do zɩ̃, ɛ́ a Labã bɔ a pɛn-sɛw ziir za bɛ nyɛ̃ bom ɛ.

³⁵ A Arasɛl tɩ yel'ɩ a sãà: «Ɩ̃ sãà a, ta nyɛ̃ nɩ mɛ̃ suur mãa bɛ wa tʋ́ɔr ìre a fʋ niŋé a ɩ, ɩ̃ sɛ n váar.» A Labã tɩ bɔ na bɛ nyɛ̃ a tɩbɛ ɩ.

³⁶ A Zakɔb tɩ nyɛ̃ nɩ suur, ɛ́ nyɔw a Labã yere. Ʋ tɩ yel ʋ na: «A ɩ̃ sãwna n'ɩ buor? A ɩ̃ yel-bier'ɩ buor fʋ ìr ta tu m?

³⁷ Fʋ na jɛl a ɩ̃ bome za a, fʋ nyɛ̃ nɩ a fʋ yir bʋ̃-been yõ a pʋɔ ɔ? Wul ʋ a ɩ̃ nɩbɛ nɩ a fʋ nɩbɛ, bɛ bãw a yel a tɩɩm ayi cara pʋɔ.

³⁸ Yome lɩzɛr'ɩ à ŋá ɩ̃ na be a fʋ zie a, ɛ́ a fʋ pi-nyan nɩ a fʋ bʋ-nyan bɛ dãw dɔw cɔr ɛ! Ɩ̃ bɛ dãw 'wɔb a pʋ́rɩ na be a fʋ dʋn pʋɔ a ɩ!

³⁹ Ɩ̃ bɛ dãw wa n dʋ̃w wɛ-dʋ̃-faa na kʋ a wa kʋ̀ b ɛ, mãa n'ʋ mɩ́ ya ʋ. Fʋ mɩ́ tɩ sowri mɛ̃ nɩ a dʋn bɛ na zu a san, alɛ saa ɩ mʋ̃tɔ̃w n'a bɛ zu bɩɩ tɩ̃ɩsɔw n'a a.

⁴⁰ A tʋlʋ mɩ́ tɩ kʋrɛ mɛ̃ nɩ a mʋ̃tɔ̃w, ɛ́ a tɩ̃ɩsɔw a ƴawr bɛ bɛrɛ mɛ̃ ɩ, ɩ̃ bɛ mɩ́ tɩ bãw gʋ̃ɔ ɩ.

⁴¹ Yome lɩzɛr'ɩ à ŋá ɩ̃ na kpɛ a fʋ yir a: ɩ̃ tõ n a fʋ tome yome pie nɩ anaar, a fʋ pɔwyaar ayi ƴãw, ɛ́ tõ yome ayʋɔb, a dʋn páwfʋ ƴãw. Ɛcɛ a fʋ̃ʋ a, gb'aa pie n'a fʋ lɩɛbɩ a ɩ̃ sã-ya bɛr!

⁴² A ɩ̃ sãàkʋm Abraham Naaŋmɩn, a Naaŋmɩn na tɩ ɩ a ɩ̃ sãà Ɩzaakɩ ʋ màwr a, ʋlɛ bɛ tɩ sõw mɛ̃ a, fʋ nãá bɛr mɛ̃ na ɩ̃ lɛb kul nũ-zawlɛ. Ɛcɛ a Naaŋmɩn nyɛ̃ nɩ a ɩ̃ kpɩɛrʋ nɩ a tome ɩ̃ na tõ wõ tuo a. A tɩ̃ɩsɔw a, ʋ ƴɛ̀r'a kpɛ m.»

⁴³ A Labã tɩ sɔw nɩ a Zakɔb yel: «A powli bɛ ŋa ɩ n a ɩ̃ pɔwyaar, a bɛ bibiir ɩ n a ɩ̃ bibiir, a dʋn á ŋá ɩ n a ɩ̃ dʋn, ɛ́ a bome á ŋá za fʋ na nyɛ̃ a, mãa so a. Ɛcɛ dɩ̃a na ta a, ɩ̃ kʋ̃ lɛb tʋ̃ɔ́ ɩ bom za a ɩ̃ pɔwyaar ƴãw, bɩɩ a bibiir bɛ na dɔw a ƴãw ɛ.

⁴⁴ Pãa wa tɩ maalɩ wõ-taa, mãa nɩ a fʋ̃ʋ, ɛ́ dãsɩɛ sob be a tɩ cara pʋɔ.»

⁴⁵ Lɛ n'a a Zakɔb tɩ ɓáw kʋsɩɛr bin teli.

⁴⁶ Al pùorí ʋ yel a ʋ nɩbɛ: «Nyɩ wob kʋsɛbɛ.» Bɛ tɩ wob'ɩ kʋsɛbɛ gbõ taa, ɛ́ dɩ a kʋsɛbɛ na gbõ taa a zu.

⁴⁷ A Labã tɩ por'ɩ a zie ʋl yúor Yegaar Sahaduta, ɛ́ a Zakɔb por ʋ Galɛdɩ.

⁴⁸ A Labã tɩ yel'a: «A dɩ̃a a, a kʋsɛbɛ á ŋá na gbõ taa a ɩ n dãsɩɛ bom mãa nɩ a fʋ̃ʋ cará.» Al ƴãw n'a bɛ bʋɔlɛ ʋ Galɛdɩ, a pɛr lɛ kɛ́ “kʋsɛbɛ na gbõ taa ɩ dãsɩɛ bom a”.

⁴⁹ Bɛ mɩ̀ tɩ bʋɔlɛ ʋ nɩ Misɩpa, a pɛr lɛ kɛ́ “Àr-piwru-zie”. Bʋ̃ʋ n'ʋ vɛ̃, a Labã tɩ yel'ɩ à ŋá mɩ̀: «A Sore, ʋ piwre tɩ, tɩmɛ bɛ wa cãà nyɛrɛ taa a.

⁵⁰ Fʋ̃ʋ wa dɔwrɛ a ɩ̃ pɔwyaar a, fʋ̃ʋ wa de pɔwbɛ dɔwlɩ a bɛ zu a, bãwnɩ a, nɩsaal bɛ n'ʋ ɩ a dãsɩɛ sob a tɩ cara pʋɔ ɩ, a Naaŋmɩn mɩŋa n'ʋ.»

⁵¹ A Labã tɩ cãà na yel a Zakɔb: «Jɩ́r a kʋsɛbɛ á ŋá ɩ̃ na gbõ taa a tɩ cara pʋɔ a, jɩ́r a kʋsɩɛr ŋa na teli a.

⁵² A kʋsɛbɛ á ŋá na gbõ taa a nɩ a kʋsɩɛr ŋa na teli a ɩ n dãsɩɛ bome a tɩ zie. Ɩ̃ kʋ̃ gãw a bɛr, ɛ́ tɛr tɩɛr-faa waar'ɩ a fʋ zie ɩ. Fʋ mɩ̀ kʋ̃ gãw a bɛr ɛ́ waar a ɩ̃ zie ɩ, alɛ bɛ ɩ lɛ, faa na páw tɩ na.

⁵³ A Abraham Naaŋmɩn nɩ a Nahɔɔr Naaŋmɩn, bɛ bãw a yel a tɩ cara pʋɔ.» Lɛ n'a a Zakɔb tɩ pɔ n a Naaŋmɩn na tɩ ɩrɛ a ʋ sãà Ɩzaakɩ ʋ màwr a.

⁵⁴ Al pùorí, ʋ tɩ maal'ɩ bàwr a tãw zu, ɛ́ bʋɔlɩ a ʋ nɩbɛ a dɩb ƴãw. Bɛ tɩ dɩ na ɛ́ gã a tãw zu be ìr.