Yele-za-pɛr-tib 30 - A SƐB-SÕW

¹ A Arasɛl na tɩ nyɛ̃ ʋ bɛ dɔwr bibiir kʋ̀rɛ a Zakɔb a, ʋ nyuur'ɩ nɩ a ʋ yɛb. Ʋ tɩ yel'ɩ a Zakɔb: «Kʋ̀ m bibiir, alɛ bɛ ɩ lɛ ɩ̃ kpiir a!»

² A Zakɔb tɩ nyɛ̃ nɩ ʋ nɩ suur yel: «Ɩ̃ nɔ̃w lɩɛr'ɩ a Naaŋmɩn na bɛ sàw fʋ na dɔw a bɩɩ?»

³ A Arasɛl tɩ sɔw na: «Nyɛ̃ a ɩ̃ tõ-tõ-bi-pɔw Bilha, páw ʋ, ʋ mɩ̀ dɔw bidɛbr kʋ̀ m. Ɩ̃ na gúol bɛ na. Ʋlɛ n'ʋ na ɩ ɩ̃ mɩ̀ tɛr bidɛbr.»

⁴ Lɛ n'a a Arasɛl tɩ de a ʋ tõ-tõ-bi-pɔw Bilha kʋ̀ a Zakɔb, ʋ ɩ pɔw. A Zakɔb tɩ páw ʋ na.

⁵ A Bilha tɩ tɛr'ɩ pʋɔ dɔw bidɛb kʋ̀ a Zakɔb.

⁶ A Arasɛl tɩ yel'a: «Naaŋmɩn dɩ n a ƴɛ̀rʋ nyɛ̃ a ɩ̃ dem de, ʋ kpɛ m. Ʋ wõ n a ɩ̃ zɛlʋ, ɛ́ mɩ̀ kʋ̀ m bidɛb.» Alɛ so ʋ por ʋ Dan.

⁷ A Arasɛl tõ-tõ-bi-pɔw, Bilha, tɩ lɛb'a tɛr pʋɔ dɔw a bidɛbr ayi sob kʋ̀ a Zakɔb.

⁸ A Arasɛl yel: «Ɩ̃ mɔ̃ nɩ nɩ a ɩ̃ yɛb faa faa, ɛ́ tʋ̃ɔ́.» Ʋ tɩ por'ɩ a ʋ bidɛb Nɛfɩtali.

⁹ A Leya na tɩ nyɛ̃ ʋ bɛ cãà dɔwr a, ʋ de nɩ a ʋ tõ-tõ-bi-pɔw Zilipa kʋ̀ a Zakɔb, ʋ ɩ pɔw.

¹⁰ A Leya tõ-tõ-bi-pɔw, Zilipa, tɩ dɔw nɩ bidɛb kʋ̀ a Zakɔb,

¹¹ a Leya yel: «Nyɛ̃ bàwson ɩ̃ na páw a!» Ɛ́ por ʋ Gadɩ.

¹² A Leya tõ-tõ-bi-pɔw, Zilipa, tɩ dɔw nɩ a bidɛbr ayi sob kʋ̀ a Zakɔb.

¹³ A Leya tɩ yel'a: «Nyɛ̃ zu-nʋ̃ɔ̀ ɩ̃ na páw a! Ƴɛrɛŋa a, a pɔwbɛ na tʋ̃ɔ́ na yere k'ɩ̃ɩ tɛr'ɩ zu-nʋ̃ɔ̀.» Ʋʋ tɩ por ʋ nɩ Asɛɛr.

¹⁴ Bibir kãw, a ble ŋmab daar, a Urubɛn tɩ cen nɩ a póru pʋɔ tɩ nyɛ̃ tɩ-wɔmɛ kãw bɛ na bʋɔlɛ mãdɩragɔɔr a, ʋ pɔr wa kʋ̀ a ʋ mã Leya. Lɛ n'a a Arasɛl tɩ yel a Leya: «Ɩ̃ zɛlɛ fʋ na, ír a fʋ bidɛb mãdɩragɔɔr kʋ̀ m.»

¹⁵ A Leya sɔw: «Fʋ faa mɛ̃ nɩ a sɩr a bɛ saalɛ fʋ ɛ, fʋ mɩ̀ lɛb faarɛ a ɩ̃ bidɛb mãdɩragɔɔr ʋ?» Lɛ n'a a Arasɛl lɛb yel: «Alɛ wa ɩ lɛ a, a Zakɔb, ʋ gã nɩ fʋ a tɩ̃ɩsɔw, a fʋ bidɛb mãdɩragɔɔr ƴãw!»

¹⁶ A Zakɔb na tɩ yi a póru pʋɔ waar a zaanʋɔra a, a Leya tɩ tuor'ʋ na yel ʋ: «Mãa zie n'a fʋ na wa a tɩ̃ɩsɔw, bʋ̃ʋ n'ʋ vɛ̃, ɩ̃ ya na de fʋ nɩ a ɩ̃ bidɛb mãdɩragɔɔr.» A Zakɔb tɩ gã nɩ ʋ nɩ a ʋlɩ tɩ̃ɩsɔw nɛ.

¹⁷ Naaŋmɩn tɩ sàw nɩ a Leya puoru, ʋ tɩ tɛr'ɩ pʋɔ dɔw a bidɛbr anũu sob kʋ̀ a Zakɔb.

¹⁸ A Leya tɩ yel'a: «A Naaŋmɩn kʋ̀ m'ɩ a ɩ̃ sã-ya, ɩ̃ na de a ɩ̃ tõ-tõ-bi-pɔw kʋ̀ a ɩ̃ sɩr a ƴãw.» Ʋ tɩ por'ɩ a ʋ bidɛb Ɩsakaar.

¹⁹ A Leya tɩ lɛb'a tɛr pʋɔ, dɔw a bidɛbr ayʋɔb sob kʋ̀ a Zakɔb.

²⁰ Ʋ tɩ yel'a: «A Naaŋmɩn maalɩ mɛ̃ nɩ maalʋ na ɩ maalʋ a! Ƴɛrɛŋa ʋl a, a ɩ̃ sɩr na ŋmɛlɩ na kaa mɛ̃, bʋ̃ʋ n'ʋ vɛ̃, ɩ̃ dɔw nɩ bidɛbr ayʋɔb kʋ̀ ʋ.» Ʋ tɩ por'ɩ a ʋ bidɛb Zabulɔ̃.

²¹ Al pùorí, ʋ dɔw powle por Dina.

²² Lɛ n'a a Naaŋmɩn tɩ tɛr a Arasɛl tɩɛrʋ. Ʋ tɩ sàw na de a ʋ puoru, ɛ́ ɩ ʋ tɛr a dɔwfʋ.

²³ Ʋ tɩ tɛr'ɩ pʋɔ dɔw bidɛb, ɛ́ yel: «A Naaŋmɩn pãa nanɩ na ír a ɩ̃ vĩ bɛr mɛ̃!»

²⁴ Ʋ tɩ por'ɩ a ʋ bidɛb Zuzɛb, ɛ́ yel: «A Sore, ʋ lɛb kʋ̀ m bidɛb ƴãw pʋɔ!»

A lɛ a Zakɔb na ɩ kpɛ naalʋ a

²⁵ A Arasɛl na wa dɔw a Zuzɛb baar'a, a Zakɔb yel'ɩ a Labã: «Bɛr mɛ̃ ɩ̃ lɛb kul, ɩ̃ lɛb ta a ɩ̃ tẽw.

²⁶ Kʋ̀ m a ɩ̃ pɔwbɛ nɩ a ɩ̃ bibiir, bɛl ƴãw ɩ̃ na tõ a fʋ tome a, ɛ́ bɛr mɛ̃ ɩ̃ cen. Fʋ mɩŋa za bãw nɩ a tome ɩ̃ na tõ a fʋ zie a.»

²⁷ A Labã tɩ sɔw ʋ na: «Ɩ̃ zɛlɛ fʋ na, bɛr wõ a ɩ̃ ƴɛ̀rʋ. A ɩ̃ ŋmɩmɛ wul mɛ̃ na k'aa fʋ̃ʋ ƴãw n'a a Sore maalɩ mɛ̃.

²⁸ Yel a fʋ sã-ya kʋ̀ m, ɩ̃ɩ na ya b'a.»

²⁹ A Zakɔb yel ʋ: «Fʋ mɩŋa za bãw nɩ a lɛ ɩ̃ na tõ a fʋ tome a, nɩ a lɛ a na wa ŋmɛ̃ a fʋ dʋn zie a mãa zũú a.

³⁰ A blã al fʋ na tɩ tɛr, ɩ̃ɩ bɛ wa sɛr a, a yɛ̀r'a bɛ dɩ vuo ɩ: ɩ̃ na dɛ wa kpɛ a fʋ yir a, a Sore maalɩ fʋ na. A daar pãa bɛ ta, ɩ̃ mɩ̀ na na tone a ɩ̃ yir dem ƴãw a ɩ?»

³¹ A Labã yel: «Bʋ̃ʋ n'ʋ ɩ̃ na kʋ̀ b?» A Zakɔb sɔw: «Fʋ bɛ kʋ̀rɛ mɛ̃ bom za ɩ. Fʋ̃ʋ wa sàw a lɛ ɩ̃ na na yel kʋ̀ b a, ɩ̃ na cɩ̃ɩnɛ na ɛ́ kaarɛ a fʋ dʋn zie mɛ̃ a dãwdãw a.

³² Ɩ̃ na kpɛ na cɔlɩ a fʋ dʋn za a dɩ̃a, ow pɛrʋ za na ɩ kpɛrɛ bɩɩ ɓalɛ a, pɛrʋ za a kɔblʋ na sɔb a nɩ bʋɔ za na ɩ kpɛrɛ bɩɩ ɓalɛ a: a na ɩ n a ɩ̃ sã-ya.

³³ A pùorí a, fʋ na wa bɛlɩ a ɩ̃ sã-ya nyɛ̃, ɩ̃ tɛr'ɩ yel-mɩŋa bɩɩ. A bʋʋr al za nãà bɛ wa ɩ kpɛrɛ bɩɩ ɓalɛ a nɩ a píir al za kɔblʋ nãà bɛ wa sɔb a na ɩ n dʋ̃-zuri.»

³⁴ A Labã sɔw: «A vɩɛl'a! A ɩ mɛ̃ a lɛ fʋ na yel a.»

³⁵ A ʋlɩ bibir nɛ tɔr za, a Labã tɩ ow nɩ a bʋrali-cʋɔrɩ bɩɩ bʋrali-ɓalɩ, nɩ a bʋ-kpɛrɩ nɩ a ɓalɩ nɩ a píir a kɔblʋ na sɔb bɩɩ ɓalɩ a. Ʋ tɩ de nɩ a dʋn á ŋá kʋ̀ a ʋ bidɛbr

³⁶ ɛ́ ƴãw bɛ cen bibie ata, zãá nɩ a Zakɔb. A Zakɔb ʋl tɩ cɩ̃ɩnɛ nɩ a Labã dʋn al na baa cɛ a.

³⁷ Ʋ tɩ bɔ n pepiliye tɩɛ, amãdie tɩɛ nɩ pʋlatan tɩɛ dali-ɓaar wa ɓo ɓo a pɛgɛ viiri koli, a dali-bi-pla sãá sãá a ziir a mɩnɛ.

³⁸ Ʋ tɩ ƴãw nɩ a dali-cʋɔrɛ a dʋn balɛ̃wnɩ pʋɔ, a dʋn niŋé, bʋ̃ʋ n'ʋ vɛ̃, a mɩ́ nɔnɛ nɩ do taa alɛ wa wa a kʋ̃ɔ nyub a.

³⁹ Lɛ n'a a dʋn tɩ do taa a dali niŋé, a bʋʋr dɔw bʋli-cʋɔrɩ, bʋli-kpɛrɩ nɩ bʋli-ɓalɩ.

⁴⁰ A píir al a Zakɔb na tɩ ƴãw a tʋɔra zie a, ʋ tɩ ɩ na a jɩ́rɛ a Labã dʋn pʋɔ a al na ɩ cʋɔrɩ, bɩɩ tɛr kɔbl-sɛblɛ a. À ŋá n'a ʋ tɩ ɩ tɛr dʋn, ɛ́ bɛ sàw a nyaw a Labã dʋn ɛ.

⁴¹ A dʋ̃-kpɛn wa dúor taa a ʋlɩ vuo nɛ pʋɔ a, a Zakɔb mɩ́ bin nɩ a dali a dʋn niŋé, a balɛ̃wnɩ pʋɔ, k'aa mɩ́ do taa a dali nisɔw.

⁴² Ɛcɛ alɛ wa ɩ dʋ̃-gbãali a, ʋ bɛ mɩ́ tɩ ƴãw a dali ɛ. A ɩ a lɛ, a Labã tɩ so a dʋ̃-gbãali gbãali, ɛ́ a Zakɔb so a dʋ̃-kpɛn kpɛn.

A zɔba a Zakɔb na zɔ a

⁴³ A Zakɔb tɩ kpɛ n naalʋ yaga za. Ʋ tɩ tɛr'ɩ píir nɩ bʋʋr bɛ dɩ vuo ɩ, nɩ tõ-tõ-bi-pɔwbɛ nɩ tõ-tõ-bi-dɛbr nɩ nyɔ̃wmɩ nɩ bòn.