Yele-za-pɛr-tib 3 - A SƐB-SÕW

A Sore Naaŋmɩn diw nɩ a nɩsaal bɛr a Edɛn zaadɛ̃ pʋɔ

¹ A wɛ-dʋn za a Sore Naaŋmɩn na tɩ maalɩ a pʋɔ a, a waab'ʋ tɩ kpɛ yã zuo a za. Ʋ tɩ sowr'ɩ a pɔw: «Sɩza n'a a Naaŋmɩn yel nyɩ: “Nyɩ taa dɩrɛ a zaadɛ̃ tɩ-wɔm kãw za ɩ?”»

² A pɔw sɔw a waab: «Tɩ na tʋ̃ɔ́ na dɩrɛ a zaadɛ̃ tɩ-wɔmɛ.

³ Ɛcɛ a tɩɛ ʋl na àr a zaadɛ̃ sɔwlɩsɔw a wɔmɛ ƴãw a, a Naaŋmɩn yel tɩ na: “Nyɩ kʋ̃ dɩ a ɩ, nyɩ kʋ̃ tɔ a ɩ, alɛ bɛ ɩ lɛ nyɩ na kpi na.”»

⁴ A waab tɩ sɔw nɩ a pɔw: «Towtow! Nyɩ bɛ kpiir ɛ.

⁵ Ɛcɛ a Naaŋmɩn bãwnɩ a na k'aa ʋlɩ bibir nɛ nyɩ nãà wa dɩ a a, nyɩ na nyɛrɛ na, nyɩ na ɩ na mɛ̃ Naaŋmɩn a, mɩ́ tʋ̃ɔ́ bãw a vla nɩ a faa.»

⁶ A pɔw tɩ nyɛ̃ nɩ a tɩ-wɔmɛ a vɩɛl a jɩ́rʋ ɩrɛ nʋ̃ɔ̀, ɛ́ a sɛw k'aa nʋmɛ, ɛ́ a dɩb ɩrɛ vʋla yel-yaga bãwfʋ ƴãw. Ʋ tɩ pɔr'ɩ a wɔm kãw dɩ. Al pùorí ʋ kʋ̀ ʋ a ʋ sɩr na tɩ be a ʋ zie a ʋ mɩ̀ dɩ.

⁷ Lɛ n'a bɛ za ayi tɩ zaw nyɛ̃ bãwnɩ bɛ na ɩ baw-zawlɛ a. Bɛ tɩ sɛ n kãkãw váar ɓã taa a ɩ gàn a bɛ zie.

⁸ A Sore Naaŋmɩn na tɩ dɛnɛ a zaadɛ̃ pʋɔ a zaanʋɔra, sɛsɛble na tɩ fure a, a dɛb nɩ a pɔw tɩ wõ n a Sore Naaŋmɩn kɔkɔr, ɛ́ sɔwlɩ a ʋ niŋé a zaadɛ̃ tɩɩr pʋɔ.

⁹ A Sore Naaŋmɩn tɩ bʋɔl'ɩ a dɛb sowr'ʋ: «Nyɩnɛ n'a fʋ be?»

¹⁰ Ʋ sɔw: «Ɩ̃ wõ na fʋ na cere a zaadɛ̃ pʋɔ a, ɛ́ zɔ̃ dɛ̃bɩ̃ɛ ɩ̃ na ɩ baw-zawla a ƴãw, alɛ n'a so ɩ̃ sɔwlɩ.»

¹¹ A Sore Naaŋmɩn tɩ sowr'ʋ na: «Ãa n'ʋ yel kʋ̀ b kɛ́ fʋ ɩ n baw-zawla? Fʋ dɩ n a tɩ-wɔm ɩ̃ na diw fʋ bɛr kɛ́ fʋ taa dɩrɛ a bɩɩ?»

¹² A dɛb sɔw: «A pɔw fʋ na kʋ̀ m k'ʋʋ be a ɩ̃ zie a, ʋlɛ n'ʋ kʋ̀ m a tɩ-wɔm ŋa ɩ̃ dɩ.»

¹³ Lɛ n'a a Sore Naaŋmɩn tɩ yel a pɔw: «Bʋ̃ʋ n'ɩ à à ŋá fʋ na ɩ a?» A pɔw sɔw: «A waab'ʋ bɛ̀lɩ mɛ̃ ƴãw ɩ̃ dɩ a tɩ-wɔm.»

¹⁴ Lɛ n'a a Sore Naaŋmɩn tɩ yel a waab: «Fʋ na faa ɩ à à ŋá a, ɩ̃ ŋmɩɛr'a ƴãwn fʋ. A yir dʋn za nɩ a wɛ-dʋn za pʋɔ a, vub'a fʋ na vure nɩ a fʋ púor, ɛ́ mɔwr tanɛ a fʋ bibi-vɩɛrɩ za.

¹⁵ Ɩ̃ na ƴãw nɩ dɔ̃ fʋ̃ʋ nɩ a pɔw cara pʋɔ, a fʋ bʋʋrɛ nɩ a ʋ bʋʋrɛ cara pʋɔ. A ʋ bʋʋrɛ na mɩ́ ƴɛ́r'ɩ a fʋ zu ŋmɛr, ɛ́ fʋ dʋ̃ a ʋ bʋʋrɛ gbɛnakɔr.»

¹⁶ Al pùorí a Sore yel a pɔw: «Ɩ̃ na ɩ na fʋ mɩ́ tɛr a pʋɔ nyɛ̃ nɩ wʋ̀ʋr yaga, ɛ́ dɔw bibiir wõ n tuo. A fʋ sɩr vʋla na mɩ́ tɛr fʋ na, ʋʋ na tʋ̃ɔ́ fʋ na.»

¹⁷ Al pùorí ʋ yel a dɛb: «Fʋ na bɛr wõ a fʋ pɔw ƴɛ̀rʋ, ɛ́ dɩ a tɩ-wɔm ɩ̃ na diw fʋ bɛr kɛ́ fʋ taa dɩrɛ a, fʋ̃ʋ n'ʋ so ɩ̃ ŋmɩɛr ƴãwn a tẽsɔw. Fʋ na mɩ́ hanɩ nɩ yaga, ɛ́ páw a fʋ nʋɔr-dɩb a ʋ pʋɔ a fʋ nyɔ-vʋʋrʋ daar za.

¹⁸ A tẽsɔw na búle nɩ gɔ̀-pɛ-bʋʋrɛ za kʋ̀rɛ fʋ. A na fɛr'a fʋ dɩrɛ a alɩ bome nɛ na búle a póru pʋɔ a.

¹⁹ A fʋ niwn na mɩ́ ɩ n hanʋ mɛb, ɛ́ fʋ páw a fʋ nʋɔr-dɩb, ɛ́ gù fʋ wa tɩ lɛb kpɛ a tẽsɔw pʋɔ, ʋl pʋɔ na n'a fʋ yi a! Bʋ̃ʋ n'ʋ vɛ̃, fʋ ɩ n úuru, ɛ́ na lɛb lɩɛbɩ a úuru.»

²⁰ A nɩsaal, a Adama, tɩ por'ɩ a ʋ pɔw yúor kɛ́ Awa, a pɛr lɛ kɛ́ Nyɔ-vʋʋrʋ. Bʋ̃ʋ n'ʋ vɛ̃, ʋlɛ n'ɩ a nɩ-vʋʋrɩ za mã.

²¹ A Sore Naaŋmɩn tɩ maal'ɩ gamɛ kparɩ a Adama nɩ a ʋ pɔw ƴãw ɛ́ su bɛ.

²² Al pùorí ʋ tɩɛr ʋ pʋɔ: «A nɩsaal'ɩ ŋan ɩ mɛ̃ Naaŋmɩn a: ʋ bãw nɩ a vla nɩ a faa. Ƴɛrɛŋa a, ʋ ta mɩ̀ páw vuo dɔl nũu pɔr'ɩ a nyɔ-vʋʋrʋ tɩɛ wɔm dɩ vʋʋrɛ kʋralɛ ɩ.»

²³ Lɛ n'a a Sore Naaŋmɩn tɩ diw a nɩsaal bɛr a Edɛn zaadɛ̃ pʋɔ k'ʋʋ tɩ kʋɔr a tẽsɔw, a ʋl pʋɔ bɛ na ír ʋ a.

²⁴ A Sore na wa diw a nɩsaal bɛr baar'a, ʋ ƴãw nɩ seribɛ̃ mɩnɛ a Edɛn zaadɛ̃ saa-pɛrɩ́. Bɛ tɩ tɛr'ɩ zɛbr-sɔ-kpɛ̃ɛ na ɩ vũu ɛ́ lɩɛbɛ a ziir za a gù n a nyɔ-vʋʋrʋ tɩɛ sɔ́r.