Yele-za-pɛr-tib 21 - A SƐB-SÕW

A Ɩzaakɩ dɔwfʋ

¹ A Sore tɩ maal'ɩ a Saara mɛ̃ a lɛ ʋ na yel a. Ʋ tɩ ɩ n a ʋlɩ bom nɛ ʋ na tɩ yel k'ʋʋ na ɩ na a, kʋ̀ ʋ.

² A Saara tɩ tɛr'ɩ pʋɔ dɔw dɛble kʋ̀ a Abraham na tɩ kor baar'a, a ʋlɩ daar nɛ a Naaŋmɩn na tɩ yel a.

³ A Abraham tɩ por'ɩ a bidɛb a Saara na dɔw kʋ̀ ʋ a kɛ́ Ɩzaakɩ.

⁴ A ʋ bidɛb Ɩzaakɩ na wa páw bibie ani a, a Abraham ŋmãa ʋ nɩ a yʋ̀ɔr mɛ̃ a lɛ a Naaŋmɩn na tɩ ƴãw a nʋɔr a.

⁵ A Abraham tɩ tɛr'ɩ yome kʋba (100) a lɛn daar a Ɩzaakɩ na dɔw a.

⁶ A Saara tɩ yel'a: «A Naaŋmɩn ƴãw mɛ̃ nɩ laarʋ. Nɩr za nãà wa wõ a a na lãwnɩ mɛ̃ na laar.»

⁷ Ʋ tɩ yel'a ƴãw pʋɔ: «Ãa n'ʋ nãá tʋ̃ɔ́ yel a Abraham kɛ́ Saara nãà ƴɛnɩ nɩ bibiir. Ɛcɛ mãa n'ɩ ŋan dɔw bidɛb kʋ̀ ʋ a ʋ koru pʋɔ.»

A Abraham diw nɩ a Agaar nɩ a ʋ bie Ɩsɩmayɛl bɛr

⁸ A Ɩzaakɩ tɩ kɛrɩ na, a mã kpɩr ʋ a bɩr. A Abraham tɩ maal'ɩ cuw-kpɛ̃ɛ a bibir ʋl bɛ na kpɩr a Ɩzaakɩ a.

⁹ Bibir kãw, a Saara tɩ nyɛ̃ nɩ a bidɛb a Eziptɩ tẽw Agaar na dɔw kʋ̀ a Abraham a, ʋ dɩ̃ɛnɛ.

¹⁰ Ʋ tɩ yel'ɩ a Abraham: «Ír a tõ-tõ-bi-pɔw ŋa nɩ a ʋ bidɛb, bʋ̃ʋ n'ʋ vɛ̃, a tõ-tõ-bi-pɔw ŋa bidɛb kʋ̃ dɩ a fʋ gbãw lãwnɩ a ɩ̃ bidɛb Ɩzaakɩ ɛ!»

¹¹ A ƴɛ̀rʋ ŋa tɩ ɩ n a Abraham pʋ-sãwna yaga za, a Ɩsɩmayɛl mɩ̀ na ɩ a ʋ bidɛb a ƴãw.

¹² Ɛcɛ a Naaŋmɩn tɩ yel ʋ na: «Ta tɛr pʋ-sãwna a fʋ tõ-tõ-bi-pɔw nɩ a ʋ bie ƴãw ɛ. Ɩ a lɛ za a Saara na yere kʋ̀rɛ fʋ a. Bʋ̃ʋ n'ʋ vɛ̃, a Ɩzaakɩ n'ʋ na so fʋ tɛr bʋʋrɛ a fʋ yúor pore.

¹³ Ɛcɛ a fʋ tõ-tõ-bi-pɔw bidɛb a, ɩ̃ mɩ̀ na ɩ na ʋ ɩ nɩ-bʋʋrɛ sãàkʋm, ʋ na ɩ a fʋ bʋ̃-dɔwra a ƴãw.»

¹⁴ A Abraham tɩ dãwnɩ nɩ ìru, de dipɛ̃ nɩ wɔ-gbãw na paalɩ kʋ̃ɔ a tuo a Agaar, de a bie kʋ̀ ʋ ɛ́ ír ʋ ʋ cen tɩ bɔrɛ gʋɔr a Bɛɛr-Seva wɛja-kpalɛ pʋɔ.

¹⁵ A wɔ-gbãw kʋ̃ɔ na wa baar'a, a Agaar tɩ jɛ n a bie bɛr tɩle kãw pile.

¹⁶ Al pùorí ʋ taw yi pùor man pĩi bɛ na tɛ a tɩ zɩ̃. Bʋ̃ʋ n'ʋ vɛ̃, ʋ tɩ tɩɛrɛ nɩ ʋ pʋɔ: «Ɩ̃ bɛ bɔbr k'ɩ̃ɩ nyɛ̃ a ɩ̃ bie kũu ɛ!» Lɛ n'a ʋ tɩ taw yi zɩ̃, ɛ́ vaa kɔkɔr kone.

¹⁷ A Naaŋmɩn tɩ wõ n a bie na cɩɩrɛ a, ɛ́ a Naaŋmɩn malkɩ tɩ be a salom zu ɛ́ bʋɔlɩ a Agaar sowr'ʋ: «Bʋ̃ʋ n'ʋ tɛr fʋ, Agaar i? Ta zɔrɛ dɛ̃bɩ̃ɛ ɩ. Naaŋmɩn wõ n a bie na cɩɩrɛ a be a.

¹⁸ Ìr! De a fʋ bidɛb ɛ́ tɛr ʋ kpɛ̃w za. Ɩ̃ na sɩrɩ na ɩ ʋ yɛ̀r, ɩ nɩ-bʋʋrɛ na ta nɩ-bʋʋrɛ a.»

¹⁹ A Naaŋmɩn tɩ ɩ n a Agaar nyɛ̃ bule. Ʋ tɩ cen na tɩ 'wɔ̃w a kʋ̃ɔ paalɩ a wɔ-gbãw wa kʋ̀ a ʋ bie ʋ nyũ.

²⁰ Naaŋmɩn tɩ gù n a bie, ʋ kɛrɩ tɩ ta nɩr. Ʋ tɩ kpɩɛr'ɩ a wɛja-kpalɛ pʋɔ tɩ ɩ tã-tɛ-wɩba.

²¹ Paran wɛja-kpalɛ pʋɔ n'a ʋ tɩ be ɛ́ a mã tɩ ɩ ʋ kul Eziptɩ tẽw pɔw.

A Abraham nɩ a Abimelɛkɩ maal'ɩ wõ-taa

²² A ʋlɩ daar nɛ, a Abimelɛkɩ nɩ a ʋ sojarɩ nɩ-kpɛ̃ɛ Pikol tɩ wa na wa yel a Abraham: «Naaŋmɩn tuur fʋ nɩ a fʋ tõ-toni za pʋɔ.

²³ A na ɩ lɛ a, pɔ n a Naaŋmɩn a ka a ƴɛrɛŋa kɛ́ fʋ kʋ̃ bɛlɩ mɛ̃ ɩ, kʋ̃ bɛlɩ a ɩ̃ bibiir nɩ a ɩ̃ yan ɛ, nɩ k'aa báalʋ ʋl ɩ̃ na tɛr a fʋ zie a, fʋ mɩ̀ na tɛr ʋ nɩ mãa nɩ a tẽw ŋa fʋ na wa kpɩɛr a ƴãw.»

²⁴ A Abraham tɩ yel'a: «Ɩ̃ pɔ n a lɛ.»

²⁵ A Abraham tɩ zɛbr'ɩ a Abimelɛkɩ zie bule kãw ƴãw, a Abimelɛkɩ tõ-tõ-biir na bɛ tɩ sàwr'ɩ a.

²⁶ A Abimelɛkɩ tɩ sɔw ʋ na: «Ɩ̃ bɛ bãw a sob nɛ na ɩ à à ŋá ɩ. Wa tɩ tɔ a dɩ̃a a, fʋ̃ʋ mɩŋa bɛ yel bom za kʋ̀ m ɛ, ɩ̃ɩ bɛ wõ bɛ por a yúor ɛ.»

²⁷ A Abraham tɩ nyɔw nɩ píir nɩ bʋʋr nɩ nĩi kʋ̀ a Abimelɛkɩ, ɛ́ bɛ za ayi wõ taa.

²⁸ A Abraham tɩ ír'ɩ pɛ-sɩrɩ ayopõi ƴãw a tʋɔra zie.

²⁹ A Abimelɛkɩ sowr'ʋ: «A pɛ-sɩrɩ ayopõi á ŋá fʋ na ƴãw a tʋɔra zie a pɛr'ɩ bo?»

³⁰ A Abraham sɔw: «Sàw de a pɛ-sɩrɩ ayopõi á ŋá a ɩ̃ nũú, kɛ́ fʋ tʋ̃ɔ́ dɩ a ɩ̃ dãsɩɛ kɛ́ mãa n'ʋ tuw a bule ŋa.»

³¹ Alɛ n'a so bɛ por a zie ŋa yúor kɛ́ Bɛɛr-Seva, bɛ za ayi na tɩ pɔ a be a ƴãw.

³² Bɛ tɩ maal'ɩ wõ-taa a Bɛɛr-Seva. Al pùorí, a Abimelɛkɩ tɩ lo n a sɔ́r, ʋlɛ nɩ a ʋ sojarɩ nɩ-kpɛ̃ɛ Pikol, lɛb kul a Filisɩtɛ̃ mɩnɛ tẽw.

³³ A Abraham tɩ sɛl'ɩ tamarisɩ tɩɛ a Bɛɛr-Seva, ɛ́ puori a Naaŋmɩn na be kʋralɛ a, bʋɔl'ʋ kɛ́ Sore.

³⁴ A Abraham tɩ kpɛ n a Filisɩtɛ̃ mɩnɛ tẽw cɛlɩ.