Yele-za-pɛr-tib 20 - A SƐB-SÕW

Abraham nɩ Abimelɛkɩ yele

¹ A Abraham tɩ yi n a be cen a Negɛɛvʋ vuo pʋɔ, tɩ kpɩɛr Kadɛsɩ nɩ Súùr cara pʋɔ, al pùorí ʋ cen tɩ zɩ̃ Geraar.

² A Abraham tɩ yere nɩ à ŋá a ʋ pɔw Saara ƴãw: «Ɩ̃ yeepuule n'ʋ.» A Geraar tẽw nãà, Abimelɛkɩ, tɩ ƴãw na bɛ tɛr a Saara wa kʋ̀ ʋ.

³ Ɛcɛ a Naaŋmɩn tɩ ɩ na a Abimelɛkɩ nyɛ̃ ʋ zánʋ pʋɔ a tɩ̃ɩsɔw, ʋ yel ʋ: «Fʋ na kpi na, a pɔw fʋ na tɛr a ƴãw, bʋ̃ʋ n'ʋ vɛ̃, ʋ kul'ɩ sɩr.»

⁴ A Abimelɛkɩ na bɛ tɩ pɩɛlɩ a Saara sɛr a, tɩ sɔw na: «Sore e, a ɩ̃ nɩbɛ nɩ a mãa za bɛ tɛr sãwna ɩ. Fʋ na cãà na ɩ tɩ kpi bɩɩ?

⁵ A Abraham mɩŋa n'ʋ yel mɛ̃ k'ʋʋ yeepuule n'ʋ, ʋʋ mɩ̀ yel k'ʋʋ yɛ-dɛb ʋ. Ɩ̃ pʋ-pla n'ʋ ɩ̃ ɩ n, ɛ́ bɛ sãw bom za ɩ.»

⁶ A Naaŋmɩn tɩ sɔw ʋ nɩ a zánʋ pʋɔ yel: «Ɩ̃ mɩ̀ bãwnɩ a na a fʋ pʋ-pla na n'ʋ fʋ ɩ n a. Mãa mɩ̀ cãà n'ʋ bɛ sàw fʋ maalɩ a yel-bier sãw mɛ̃ ɩ, alɛ n'a so ɩ̃ bɛ sàw fʋ tɔ a pɔw ɛ.

⁷ Ƴɛrɛŋa a, lɛb kʋ̀ a pɔw ŋa a ʋ sɩr. Naaŋmɩn-ƴɛ̀r-manɛ n'ʋ, ʋ na puor'a kʋ̀ b fʋ cãà vʋʋrɛ. Fʋ̃ʋ bɛ wa lɛb tɩr a pɔw a, bãwnɩ a fʋ na na kpi, fʋ̃ʋ nɩ a fʋ nɩbɛ za a, zɛlɩ bɛr bɛ ka be ɩ.»

⁸ A Abimelɛkɩ tɩ ìr'ɩ biɓaar-pipi bʋɔlɩ a ʋ tõ-tõ-biir za wa manɩ a yel ŋa kʋ̀ bɛ, a tɩ ɩ bɛ dɛ̃bɩ̃ɛ yaga.

⁹ Ʋ mɩ̀ tɩ bʋɔl'ɩ a Abraham wa sowr'ʋ: «Bʋ̃ʋ n'ʋ fʋ ɩ tɩ à à ŋá? Bʋ̃ʋ n'ʋ ɩ̃ ɩ sãw fʋ, kɛ̀ fʋ ɩ mãa nɩ a ɩ̃ naalʋ-tẽw za nãá maalɩ a yel-bier ŋa tɔ? Fʋ ɩ n a ɩ̃ zie mɛ̃ a na bɛ tɛr sɔ́r kɛ́ bɛ mɩ́ ɩ a.»

¹⁰ A Abimelɛkɩ tɩ cãà na lɛb yel: «Bʋ̃ʋ n'ʋ ƴãw fʋ fʋ ɩ à à ŋá?»

¹¹ A Abraham tɩ sɔw na: «Ɩ̃ tɩɛr'ɩ ɩ̃ pʋɔ k'aa ka dem bɛ zɔrɛ Naaŋmɩn zaa pʋrɩ ɛ, kɛ́ bɛ na kʋ m'ɩ a ɩ̃ pɔw ƴãw.

¹² Ɛcɛ sɩza n'a ʋ ɩ a ɩ̃ yeepuule: tɩ lãw nɩ sãà, ɛ́ bɛ lãw mã ɩ, alɛ n'a so ʋ tʋ̃ɔ́ ɩ a ɩ̃ pɔw.

¹³ A lɛ a Naaŋmɩn na tɩ ƴãw ɩ̃ yi ɛ́ bɛr a ɩ̃ Sãà yir a, ɩ̃ yel'ɩ a Saara: “Maalʋ ŋa n'ʋ ɩ̃ zɛlɛ a fʋ zie: zie za tɩ na tarɛ a, mɩ́ yel k'ɩ̃ɩ ɩ n a fʋ yɛ-dɛb.”»

¹⁴ A Abimelɛkɩ tɩ lɛb'a kʋ̀ a Abraham a ʋ pɔw Saara, ɛ́ lãw kʋ̀ n ʋ píir nɩ bʋʋr nɩ nĩi lãwnɩ tõ-tõ-bi-dɛbr nɩ tõ-tõ-bi-pɔwbɛ.

¹⁵ Ʋ tɩ cãà na yel a Abraham: «A ɩ̃ tẽw n'ɩ ŋan a fʋ niŋé, zɩ̃ be za fʋ na nɔnɛ a.»

¹⁶ Al pùorí ʋ yel a Saara: «Nyɛ̃, ɩ̃ kʋ̀rɛ nɩ a fʋ yɛ-dɛb salm-pla libie túr (1 000): bãwfʋ n'ʋ a bɛlɩ dem za na lãw kpɩɛr'ɩ fʋ a zie, kɛ́ fʋ bɛ tɛr sãwna a yel ŋa pʋɔ ɩ. Ɛ́ a fʋ yúor kʋ̃ sãw a nɩbɛ za zie ɩ.»

¹⁷ A Abraham tɩ zɛlɩ nɩ a Naaŋmɩn ʋ sanɩ a Abimelɛkɩ nɩ a ʋ pɔw de nɩ a ʋ tõ-tõ-bi-pɔwbɛ, ɛ̀ bɛ lɛb tʋ̃ɔ́ dɔwr.

¹⁸ Bʋ̃ʋ n'ʋ vɛ̃, a Sore tɩ ɩ na a Abimelɛkɩ yir pɔwbɛ za ɩ pɔw-ãanbɛ, a Abraham pɔw Saara ƴãw.