Yele-za-pɛr-tib 2 - A SƐB-SÕW

¹ À ŋá n'a a Naaŋmɩn tɩ ír a salom nɩ a tẽw nɩ a bome al za na be a pʋɔ a baarɩ.

² A Naaŋmɩn na tɩ tõ a ʋ tome za baar'a, ʋ pɩ̃ɛnɩ nɩ a bibie ayopõi sob, a ʋ tome za ʋ na tɩ tõ a ƴãw.

³ A Naaŋmɩn tɩ maal'ɩ a bibie ayopõi sob, ɛ́ ɩ k'ʋ ɩ a ʋ bibi-sora. Bʋ̃ʋ n'ʋ vɛ̃, ʋ tɩ pɩ̃ɛnɩ nɩ a ʋlɩ bibir nɛ a ʋ bome íru tome za ƴãw.

⁴ A salom nɩ a tẽw beba yele n'ɩ à à ŋá, a lɛn daar a Naaŋmɩn na tɩ ír a a. A lɛn daar a Sore Naaŋmɩn na tɩ maalɩ a salom nɩ a tẽw a,

A Edɛn tẽw zaadɛ̃ yele

⁵ vale za bɛ tɩ be a tẽw zu sɛr ɛ, mɔ̃le za bɛ tɩ bul sɛr ɛ. Bʋ̃ʋ n'ʋ vɛ̃, a Sore Naaŋmɩn bɛ tɩ ƴãw saa wa a tẽw zu sɛr ɛ, nɩsaalbɛ mɩ̀ bɛ tɩ be be na kʋɔr a tẽsɔw ɛ.

⁶ Ɛcɛ kʋ̃ɔ kãw tɩ tɛbr'a yire a tẽw, bure a tẽsɔw za.

⁷ A Sore Naaŋmɩn tɩ de nɩ a tẽsɔw tã-buulu mɛ n a nɩsaal, ɛ́ pɛblɩ a nyɔ-vʋʋrʋ pɩɛlʋ ƴãw a ʋ nyɔbɔgɛ pʋɔ, a nɩsaal lɩɛbɩ bʋ̃-vʋʋra.

⁸ Al pùorí, a Sore Naaŋmɩn tɩ ƴãw nɩ zaadɛ̃ a Edɛn tẽw, a saa-pɛrɩ́, ɛ́ de a nɩsaal ʋ na mɛ a ƴãw a be.

⁹ A Sore Naaŋmɩn tɩ ɩ na a tẽsɔw bul tɩ-pɛ-bʋʋrɛ za na sãá vɩɛlɩ vɩɛlɩ ɛ́ a wɔmɛ nʋmɛ a. A nyɔ-vʋʋrʋ tɩɛ nɩ a tɩɛ ʋl na mɩ́ ɩ fʋ bãw a vla nɩ a faa a tɩ be n a zaadɛ̃ sɔwlɩsɔw.

¹⁰ Man kãw tɩ yi n a Edɛn tẽw pʋɔ, ɛ́ a kʋ̃ɔ zɔrɛ tɔlɛ a zaadɛ̃ pʋɔ. Ʋ tɩ ɓar'ɩ a be tɛr gbɛ́ɛ anaar.

¹¹ A man-gbɛ́r kãw tɩ dɩ na kɛ́ Pison, ʋlɛ n'ʋ viiri koli a Hawila tẽw. Salm-zɩɛ be n a tẽw ŋa pʋɔ.

¹² Salm-zɩɛ mɩŋa mɩŋa nɩ tɩɛ kʋ̃ɔ kãw na nyùur vla bɛ bʋɔlɛ bidelium a, nɩ a kʋsɛ-bi-nyɩla na dɩ onisɩ a mɩ̀ be n be.

¹³ A man-gbɛ́ɛ ayi sob tɩ dɩ na kɛ́ Gihon. Ʋlɛ n'ʋ cen viiri koli a Kusɩ tẽw.

¹⁴ A man-gbɛ́ɛ ata sob tɩ n'ɩ a Tɩɩgɩr na zɔrɛ a Asuur tẽw saa-pɛrɩ́ a. A man-gbɛ́ɛ anaar sob tɩ n'ɩ a Efaratɩ.

¹⁵ A Sore Naaŋmɩn tɩ de nɩ a nɩsaal ƴãw a Edɛn tẽw zaadɛ̃ pʋɔ, k'ʋʋ kʋɔr ʋ ɛ́ gùre ʋ.

¹⁶ A Sore Naaŋmɩn tɩ ƴãw nɩ nʋɔr ŋa kʋ̀ a nɩsaal: «Fʋ na tʋ̃ɔ́ na dɩrɛ a zaadɛ̃ tɩɩr za wɔmɛ.

¹⁷ Ɛcɛ, a tɩɛ ʋl na mɩ́ ɩ fʋ bãw a vla nɩ a faa a wɔmɛ a, fʋ kʋ̃ dɩ a ɩ. Bʋ̃ʋ n'ʋ vɛ̃, a ʋlɩ bibir nɛ fʋ nãà wa dɩrɛ a ʋ wɔm a, a kũu n'a fʋ na kpi.»

¹⁸ A Sore Naaŋmɩn tɩ yel'a: «A bɛ vɩɛl kɛ́ a dɛb ɩ ʋ yõ ɩ. Ɩ̃ na maal'ɩ sõwne bɛ na de taa vla vla a kʋ̀ ʋ.»

¹⁹ Lɛ n'a a Sore Naaŋmɩn tɩ de a tanɛ mɛ n a wɛ-dʋn za nɩ a saa-zu lili za, ɛ́ tɛr a wa n a dɛb zie k'ʋʋ wa nyɛ̃ a lɛ ʋ na na por a a yée a. Bʋ̃-vʋʋra za na mɩ́ tɛr'ɩ a yúor ʋl a dɛb na na por ʋ a.

²⁰ A dɛb tɩ por'ɩ yée a yir dʋn, a wɛ-dʋn nɩ a saa-zu lili. Ɛcɛ a ʋl mɩŋa ƴãw a, a dɛb bɛ tɩ nyɛ̃ sõwne, ʋlɛ nɩ ʋl na de taa a ɩ.

²¹ Lɛ n'a a Sore Naaŋmɩn tɩ ɩ a dɛb ʋ gúr kpalɩtam gã. Ʋ tɩ ír'ɩ a dɛb nyabikɔbr kãw, ɛ́ lɛb tal a ƴã-gã-nɛn pàw a bɔw.

²² A Sore Naaŋmɩn tɩ maal'ɩ pɔw nɩ a nyabikɔbr ʋ na ír a dɛb zie a, ɛ́ tɛr a pɔw wa n a dɛb zie.

²³ Lɛ n'a a dɛb tɩ cɩɩrɩ: «Ʋ̃'hʋ̃ʋ! Ƴɛrɛŋa ʋl a, pãa nyɛ̃ nɩr na ɩ mɛ̃ a mãa a, mãa mɩŋa zɩ̃ɩ n'ʋ! Bɛ na bʋɔlɛ ʋ nɩ pɔw a dɛb pʋɔ na n'a ʋ yi a ƴãw.»

²⁴ Alɛ n'a so a dɛb na mɩ́ bɛr a ʋ sãà nɩ a ʋ mã, ɛ́ lãw nɩ a ʋ pɔw bɛ ɩ nɩ-been.

²⁵ A dɛb nɩ a ʋ pɔw tɩ ɩ n baw-zawlɛ bɛ za ayi, ɛ́ bɛ tɩ zɔrɛ taa vĩ ɛ.